Published:Updated:

`வார்டு உறுப்பினருக்கு ரூ.10 லட்சம்?' - டிமாண்ட் வைத்த தி.மு.க எம்.எல்.ஏ; தலைமைக்குப் பறந்த கடிதம்!

`ரூ.10 லட்சம் பணம் கொடுத்தால்தான் அந்த சீட் கிடைக்கும்.'

தி.மு.க எம்.எல்.ஏ ரகுபதி
தி.மு.க எம்.எல்.ஏ ரகுபதி

புதுக்கோட்டை மாவட்ட ஊராட்சியின் 12-வது வார்டுக்கு சீட் தர ரூ.10 லட்சம் தி.மு.க எம்.எல்.ஏ ரகுபதி கேட்பதாகவும், தன் மகனுக்கு பணம் வாங்காமல் அந்த வார்டில் சீட் தரக்கோரி தி.மு.க-வின் முன்னாள் எம்.எல்.ஏ ஆலவயல் சுப்பையா, தி.மு.க தலைமைக் கழகத்துக்குக் கடிதம் அனுப்பியுள்ளார். அதில், "புதுக்கோட்டை மாவட்ட ஊராட்சி வார்டு எண் 12-க்கு என் மகன் முரளிதரனுக்கு விருப்ப மனு கேட்டு நேர்காணல் முடிக்கப்பட்டு சீட் அறிவிக்கும் நேரத்தில் புதுக்கோட்டை தெற்கு மாவட்டச் செயலாளர் ரகுபதி ரூ.10 லட்சம் பணம் கொடுத்தால் தான் அந்த சீட் கிடைக்கும்.

கடிதம்
கடிதம்

மற்ற தேர்தல் செலவுகளை நீங்கள் பார்த்துக்கொள்ளுங்கள் என்று கூறுகிறார். நான் தி.மு.க-வில் ஏற்கெனவே எம்.எல்.ஏ ஆக இருந்தேன். எங்களுக்கு இதுமாதிரி டிமாண்ட் எல்லாம் வைக்காமல், என் மகன் முரளிதரனுக்கு சீட் வழங்க தாங்கள் உத்தரவிட வேண்டும் என்று கேட்டுக்கொள்கிறேன்" இவ்வாறு அனுப்பி இருந்தார்.

இதுபற்றி முரளிதரன் கூறும்போது, "தி.மு.க எம்.எல்.ஏ-விடம் இருந்து அழைப்பு வந்துச்சு. தம்பி ரெண்டு பேர் சீட் கேட்குறீங்க. ரெண்டு பேரும் சீனியர் வீட்டுப் பிள்ளைங்க. ரெண்டு பேரில் யார் முதலில் ரூ.10 லட்சத்தைக் கொண்டு வந்து தர்றீங்களோ அவங்களுக்கு சீட் கொடுக்கிறோம். ஒன்றிய செயலாளர் அடைக்கல மணி சொல்லச் சொன்னாருன்னு சொல்லிட்டு வச்சிட்டாரு. இதுபற்றி அப்பாகிட்ட சொன்னேன். அப்பாகிட்டேயும் பேசி பணம் கேட்ட உடனே, கோபமாகத்தான் அப்பா எம்.எல்.ஏ-வாக இருந்த என்கிட்டேயே பணம் கேட்கிறீங்களான்னு சொல்லித்தான் தலைமைக்குக் கடிதம் அனுப்புனாரு" என்றார்.

தி.மு.க எம்.எல்.ஏ ரகுபதி
தி.மு.க எம்.எல்.ஏ ரகுபதி

இதுபற்றி தி.மு.க எம்.எல்.ஏ ரகுபதியிடம் கேட்டபோது, "எந்தக் கட்சிக்காரர்களுக்காகவும் நான் பணம் செலவு செய்வேனே தவிர, எந்தக் கட்சிக்காரரிடமும் எனக்கென்று அன்று முதல் இன்று வரை பணம் கேட்டது கிடையாது. என்னிடம்தான் பலரும் பணம் வாங்கி இருக்கின்றனர். செலவுக்குப் பணம் கொடுங்கள் என்று கட்சிக்காரர்களிடம் கேட்டு வாங்கும் பழக்கம் எனக்கு இல்லை. என்னைப்பற்றி அறிந்தவர்களுக்கு நன்றாகத் தெரியும். குறிப்பாக, தி.மு.க தலைமைக்கும் என்னைப் பற்றி நன்கு தெரியும். சீட்டுக்குப் பணம் கேட்பதாக ஏதோ உள் நோக்கத்தோடு குற்றம்சாட்டி உள்ளனர்" என்றார்.