Published:Updated:

`மருத்துவக் கல்வியின் தரத்தை சீர்குலைக்கும் செயல்!' - இந்தியன் மெடிக்கல் அசோஷியேசன் குற்றச்சாட்டு!

இரா.செந்தில் குமார்

`அலோபதி மற்றும் சித்தா, ஆயுர்வேதம் போன்ற கலவைமுறையால் மருத்துவம் பாதிக்கப்படும்' - மருத்துவ ஆணையத்துக்கு எதிர்ப்பு!

இந்தியன் மெடிக்கல் அசோஷியேசன்
இந்தியன் மெடிக்கல் அசோஷியேசன்

இந்திய மருத்துவக் கவுன்சிலுக்குப் பதிலாக, தேசிய மருத்துவ ஆணையம் அமைப்பதற்கான மசோதா கடந்த வாரம் நாடாளுமன்ற இரு அவைகளிலும் நிறைவேற்றப்பட்டு ஜனாதிபதி ஒப்புதலுக்கு அனுப்பப்பட்டுள்ளது. மருத்துவத்துறையில் சீர்திருத்தங்கள் மேற்கொள்ளவே தேசிய மருத்துவ ஆணையம் நிறுவப்படுவதாக மத்திய அரசு அறிவித்துள்ளது. ஆனால், எதிர்க்கட்சிகள் மத்தியில் இந்த மசோதாவுக்கு கடும் எதிர்ப்பு கிளம்பியுள்ளது. நாடு முழுவதுமுள்ள மருத்துவர்களும் மருத்துவ மாணவர்களும் தொடர் போராட்டங்களில் ஈடுபட்டு வருகின்றனர். 'மருத்துவத்துறையைத் தனியாரிடம் தாரை வார்ப்பதற்கான ஏற்பாடுதான் இந்த ஆணையம்' என்பது தேசிய மருத்துவ ஆணையத்தை எதிர்ப்பவர்களின் முதன்மையான குற்றச்சாட்டாக இருக்கிறது.

தேசிய மருத்துவ ஆணையம்
தேசிய மருத்துவ ஆணையம்
Vikatan

இந்தியக் குடிமக்கள் ஒவ்வொருவருக்கும் தரமான சிகிச்சை, மருத்துவத்துறை மேம்பாடு போன்றவற்றுக்காக இந்தியன் மெடிக்கல் கவுன்சில் சட்டம் 1933-ன் படி, 1934-ம் ஆண்டு உருவாக்கப்பட்டது இந்திய மருத்துவக் கவுன்சில். மருத்துவப் படிப்புகளின் தரத்தை நிர்வகிப்பது. மருத்துவக் கல்லூரிகளின் தரத்தைச் சோதனையிடுவது, புதிய மருத்துவக் கல்லூரிகளுக்கு அனுமதி அளிப்பது, வெளிநாடுகளில் வழங்கும் மருத்துவப் பட்டங்களின் தரத்தைப் பரிசோதிப்பது போன்ற பணிகளையும் மருத்துவர்களுக்கான பதிவையும் செய்துவந்தது இந்த அமைப்பு.

இந்த அமைப்பில் மொத்தம் 110 பேர் உறுப்பினர்களாக செயல்பட்டு வந்தனர். அதில் பாதிக்கும் மேற்பட்டோர் தேர்தல் மூலம் தேர்வு செய்யப்பட்டவர்கள், மற்றவர்கள் மத்திய அரசால் நியமிக்கப்பட்டவர்கள். 2010-ம் ஆண்டு, குஜராத்தில் தனியார் மருத்துவக் கல்லூரி ஒன்றுக்கு அனுமதி அளிக்க இரண்டு கோடி ரூபாய் லஞ்சம் வாங்கியதாக இந்த கவுன்சிலின் தலைவர் கேசன் தேசாய் கைது செய்யப்பட்டார். அத்துடன் மருத்துவக் கவுன்சில் கலைக்கப்பட்டது. அதன்பிறகு, 2013-ம் ஆண்டு ஜெயஶ்ரீபென் மேத்தா தலைமையில் மீண்டும் அமைக்கப்பட்டு தொடர்ந்து செயல்பட்டு வந்தது.

தேசிய மருத்துவ ஆணையத்தில் அதற்கான வாய்ப்பில்லை. உறுப்பினர்களைத் தேர்தல் முறையில் தேர்ந்தெடுக்காமல் ஆளும் அரசுகளுக்கு வேண்டப்பட்டவர்களை நியமிக்கும் வகையில் உருவாக்கப்பட்டுள்ளது.
தேசிய துணைத்தலைவர் ஜெயலால்

இந்நிலையில் கடந்த 2017-ம் ஆண்டின் இறுதியில், மத்திய சுகாதாரத்துறை அமைச்சர் ஜே.பி.நட்டா, இந்திய மருத்துவக் கவுன்சிலைக் கலைக்கவும் தேசிய மருத்துவ ஆணையம் அமைக்கவும் நாடாளுமன்றத்தில் ஒரு மசோதாவைத் தாக்கல் செய்தார். மருத்துவத் துறையில் நடக்கும் முறைகேடுகளையும் மருத்துவக் கல்லூரிகள் மீதான புகார்களை விசாரிக்கவும், சுகாதாரத் துறையில் சீர்திருத்தம் செய்யவுமே தேசிய மருத்துவ ஆணையம் அமைக்கப்படுகிறது என்றும் அவர் தெரிவித்தார்.

மேலும், 'இனி, மருத்துவக் கல்வி நிறுவனங்கள் இடங்களின் எண்ணிக்கையை அதிகரிக்கவும், புதிய படிப்புகளைத் தொடங்கவும் இனி அனுமதி பெறத்தேவையில்லை. அதேபோல் மருத்துவப் படிப்பை முடித்த மருத்துவர்கள், தொழில் புரிய புதிய தகுதித் தேர்வு ஒன்றை எழுதி தேர்ச்சிபெற வேண்டும். தேசிய மருத்துவ ஆணையத்தின் தலைவர், உறுப்பினர்களை மத்திய அரசுத் தேர்வு செய்யும். மத்திய மந்திரி சபை செயலாளர் தலைமையிலான தேர்வுக்குழு, தன்னாட்சி அமைப்புகளின் உறுப்பினர்களைத் தேர்வு செய்யும். அவற்றில் ஐந்து உறுப்பினர்களும், 12 அலுவல் நிலை உறுப்பினர்களும் இருப்பார்கள்' என்றும் மசோதாவில் தெரிவிக்கப்பட்டிருந்தது.

``போலி மருத்துவர்களை உருவாக்கவா தேசிய மருத்துவ ஆணையம்?” - இந்திய மருத்துவர் சங்கம் கேள்வி
ஒவ்வொரு வருடமும் 80,000 மருத்துவர்கள் எம்.பி.பி.எஸ் படித்து முடித்து வெளியே வருகிறார்கள்.

மருத்துவர்கள், சமூகச் செயற்பாட்டாளர்கள் மத்தியில் இந்த மசோதா கடும் கொந்தளிப்பை உண்டாக்கியது. மருத்துவர்கள் தொடர் வேலைநிறுத்தத்தில் ஈடுபட்டனர். நாடாளுமன்ற தேர்வுக்குழு பரிந்துரைக்கு மசோதா அனுப்பப்படும் என்ற அறிவிப்பு வந்த பிறகு போராட்டங்கள் கைவிடப்பட்டன. நாடாளுமன்றத் தேர்வுக்குழு தனது பரிந்துரையைக் கடந்த 2018-ம் ஆண்டு மார்ச் மாதம் சமர்ப்பித்தது. அதைத் தொடர்ந்து கடந்த வாரம் நாடாளுமன்ற இரு அவைகளிலும் மசோதா தாக்கல் செய்யப்பட்டது. அன்றுமுதல் இந்தியன் மெடிக்கல் அசோஷியேசன் பல்வேறு வகையான போராட்டங்களை நடத்திவருகிறது. நாளை நாடு முழுவதும் மருத்துவர்கள் வேலை நிறுத்தத்தை அறிவித்துள்ள நிலையில் அதன் தேசிய துணைத்தலைவர் ஜெயலாலிடம் பேசினோம்.

''இந்திய மருத்துவக் கவுன்சிலின் செயல்பாடுகளில் சில குறைபாடுகள் இருந்தாலும், அது ஜனநாயகத்துடன் செயல்பட்ட ஓர் அமைப்பு. ஆனால், தேசிய மருத்துவ ஆணையத்தில் அதற்கான வாய்ப்பில்லை, உறுப்பினர்களைத் தேர்தல் முறையில் தேர்ந்தெடுக்காமல் ஆளும் அரசுகளுக்கு வேண்டப்பட்டவர்களை நியமிக்கும் வகையில் உருவாக்கப்பட்டுள்ளது. இது ஆரோக்கியமானதல்ல. மேலும், இந்த மசோதாவின் 32-வது பிரிவில், மருத்துவமனை சார்ந்த பணியாளர்களுக்கு, அலோபதி மருத்துவம் செய்ய அனுமதி வழங்கப்படவுள்ளதாகத் தெரிவிக்கப்பட்டுள்ளது.

அலோபதி
அலோபதி

மருத்துவப் பணியாளர்கள் என்றால் செவிலியர்களா, மருந்தாளுநர்களா என்ற விவரம் எதுவும் சொல்லப்படவில்லை. மருத்துவம் படிக்காத ஒருவர் சிகிச்சையளித்தால் அது மிகவும் ஆபத்தான ஒரு போக்கு. மருத்துவர்களில் மூன்றில் ஒருவர் இப்படித் தேர்ந்தெடுக்கப்படப்போவதாக அறிவிக்கப்பட்டுள்ளது. ஒவ்வொரு வருடமும் 80,000 மருத்துவர்கள் எம்.பி.பி.எஸ் படித்து முடித்து வெளியே வருகிறார்கள். அவர்களை முறையாகப் பயன்படுத்தாமல் இப்படிச் செய்வது சரியல்ல.

அடுத்ததாக 15-வது பிரிவில், மருத்துவப் படிப்பில் இறுதியாண்டு படிக்கும்போது 'நெக்ஸ்ட்' தேர்வு எழுதி வெற்றி பெற்றால்தான் மருத்துவராகப் பணிசெய்ய முடியும், முதுநிலை மருத்துவம் படிக்க முடியும் என்று சொல்லப்பட்டுள்ளது. அதில் பல சட்ட சிக்கல்கள் இருக்கின்றன. ஒரு மாணவர் மருத்துவராகத் தகுதியானவரா என்பதை பல்கலைக்கழகம்தான் முடிவு செய்ய வேண்டும். அதற்கு மாறாக, இந்தியா முழுவதும் ஒரு தேர்வை நடத்தி அதன் அடிப்படையில் கொடுத்தால், கிராமப்புற மாணவர்கள் பாதிக்கப்படுவார்கள்.

கல்லூரிகள், 'வசதிகளை உருவாக்கிக்கொள்வோம்' என உறுதிமொழி தந்தாலே போதும், கல்லூரிகளுக்கு அங்கீகாரம் கொடுக்கப்படும் என அறிவிக்கப்பட்டுள்ளது. இது ஒட்டுமொத்தமாக மருத்துவக் கல்வியின் தரத்தையே சீர்குலைக்கிறது.
பல லட்சம் கொடுத்து கோச்சிங் சென்டர்களுக்கு சென்றால் மட்டுமே இதுபோன்ற போட்டித் தேர்வுகளில் மாணவர்களால் வெற்றிபெற முடியும்.
அருணந்தி பாஸ்கர்

அதேபோல, ஒரு மருத்துவ மாணவர், நோயாளிகளிடம் எப்படி நடந்துகொள்கிறார், எப்படிச் சிகிச்சையளிக்கிறார் என்பதைத் தெரிந்துகொள்ள உதவுவதே செயல்முறைத் தேர்வு. அது மிகவும் அவசியம். அதை நீக்கிவிட்டு வெறும் எழுத்துத் தேர்வு மூலம் தேர்ந்தெடுப்பது நல்ல மருத்துவர்களை உருவாக்காது. 50 மற்றும் 51-வது பிரிவின்படி அலோபதி மற்றும் சித்தா, ஆயுர்வேதம் போன்ற மாற்று மருத்துவமும் இணைந்த ஒருங்கிணைந்த மருத்துவமுறையை ஏற்படுத்த வழிவகை செய்யப்படும் எனத் தெரிவிக்கப்பட்டுள்ளது. இதுபோன்ற கலவையான மருத்துவமுறையால் ஒவ்வொரு மருத்துவத்தின் தரமும் பாதிக்கப்படும்.

தனியார் மருத்துவக் கல்லூரிகளில், மொத்தமுள்ள இடங்களில் 50 சதவிகிதம் அரசு ஒதுக்கீட்டின் மூலமும் 35 சதவிகிதம் மேனேஜ்மென்ட் கோட்டா மூலமும் 15 சதவிகிதம் வெளிநாடுவாழ் இந்தியர்களுக்கும் ஒதுக்கப்படும். மொத்த இடங்களுக்கும் அந்தந்த மாநில அரசுகளின் சார்பில் செயல்படும் நீதிபதிகள் அடங்கிய ஒரு குழு கட்டணங்களைத் தீர்மானித்து வந்தது. ஆனால், இனிமேல் 50 சதவிகித இடங்களுக்கு மட்டுமே அந்தக் குழு கட்டணங்களைத் தீர்மானிக்கும், மீதமுள்ள 50 சதவிகித இடங்களுக்கு கல்லூரிகளே கட்டணத்தைத் தீர்மானிக்கலாம் எனப் பிரிவு 10 ஐ (10I)-ல் அறிவிக்கப்பட்டுள்ளது. அதேபோல, தங்கள் விருப்பப்படி இடங்களின் எண்ணிக்கையையும் அதிகரிக்க முடியும்.

மருத்துவர் ஜெயலால்
மருத்துவர் ஜெயலால்

அடுத்ததாக பிரிவு 27 மற்றும் 28-ன் படி, மருத்துவக் கல்லூரிகளில் ஆண்டுதோறும் நடந்துவந்த ஆய்வு இனி, மருத்துவ ஆணையம் விருப்பப்படும் நேரங்களில் ஆய்வு செய்யும் வகையில் மாற்றி அமைக்கப்பட்டுள்ளது. அதேபோல இதுவரை மருத்துவக் கல்லூரிக்குத் தேவையான அத்தனை வசதிகளையும் செய்த பிறகுதான் ஒரு புதிய மருத்துவக் கல்லூரிக்கு அங்கீகாரம் கொடுக்கப்பட்டு வந்தது.

ஆனால், இனிமேல் அப்படி அல்ல. கல்லூரிகள், 'வசதிகளை உருவாக்கிக்கொள்வோம் என உறுதிமொழி தந்தாலே போதும், கல்லூரிகளுக்கு அங்கீகாரம் கொடுக்கப்படும்' என அறிவிக்கப்பட்டுள்ளது. இது தனியார் மருத்துவக் கல்லூரிகளின் தரத்தை சீர்குலைப்பதோடு ஒட்டுமொத்தமாக மருத்துவக் கல்வியின் தரத்தையே சீர்குலைக்கிறது. அதனால் இந்த ஆணையம் கண்டிப்பாக எதிர்க்கப்பட வேண்டியது'' என்கிறார் மருத்துவர் ஜெயலால்.

மருத்துவக் கல்வி
மருத்துவக் கல்வி

அரசியல் கட்சிகள், மருத்துவர்கள் மட்டுமல்லாமல் மருத்துவக் கல்லூரி மாணவர்களும் கடந்த 10 நாள்களாகப் பல்வேறுவிதமான போராட்டங்களை நடத்தி வருகின்றனர். எனவே, தமிழ்நாடு மருத்துவ மாணவர்கள் சங்கத்தின் பொதுச் செயலாளர் அருணந்தி பாஸ்கரிடம் கேட்டோம். அவர் பேசும்போது, "தேசிய மருத்துவ ஆணையம் கண்டிப்பாக எதிர்க்கப்பட வேண்டிய ஒன்று. பல துறைகளைத் தனியார் மயமாக்கியதைப்போல் மருத்துவத்துறையையும் முழுமையாகத் தனியார் மயமாக்குவதற்குத்தான் இந்த ஆணையம் உதவும். மருத்துவ மாணவர்கள், இறுதியாண்டில் நெக்ஸ்ட் தேர்வில் வெற்றி பெற்றால்தான் படிப்பை முடித்து, மருத்துவராகப் பணியாற்ற முடியும்.

பல லட்சம் கொடுத்து கோச்சிங் சென்டர்களுக்குச் சென்றால் மட்டுமே இதுபோன்ற போட்டித் தேர்வுகளில் மாணவர்களால் வெற்றிபெற முடியும். ஏழை மாணவர்களை மருத்துவத்துறையில் இருந்து வெளியேற்றவே இதுபோன்ற தேர்வுகள் உதவும். அதேநேரம் வெளிநாடுகளில் இருந்து வரும் மருத்துவர்கள் லைசென்ஸ் இருந்தால் இங்கே மருத்துவம் பார்க்க முடியும் என்று தெரிவிக்கப்பட்டுள்ளது. அது என்ன லைசென்ஸ் என்பது குறித்த விவரம் தெரிவிக்கப்படவில்லை. இங்குள்ள மருத்துவர்களை அப்புறப்படுத்திவிட்டு வெளிநாடுகளில் இருந்து மருத்துவர்களை இறக்குமதி செய்வதற்கான திட்டம்தான் இது'' என்கிறார் அருணந்தி பாஸ்கர்.

எம்.பி.பி.எஸ் முடித்த அலோபதி மருத்துவர்கள் கிராமப்புறங்களில் சென்று வேலை செய்ய விரும்புவதில்லை.
தமிழ்நாடு ஆயுஷ் மருத்துவர்கள் சங்கத்தின் தலைவர் தமிழ்ராஜன்

அதேவேளையில், தமிழ்நாடு ஆயுஷ் மருத்துவர்கள் சங்கத்தின் தலைவர் தமிழ்ராஜன் கூறும்போது, "தேசிய மருத்துவ ஆணையம் காலத்தின் கட்டாயம். இந்தச் சட்ட மசோதாவை ஆயுஷ் மருத்துவர்கள் மனதார வரவேற்கிறோம். குறிப்பாக, ஆயுஷ் மருத்துவர்களும் அலோபதி மருத்துவம் பார்க்க முடியும் என்கிற அரசின் முடிவு மிகவும் வரவேற்கத்தக்கது. எம்.பி.பி.எஸ் முடித்த அலோபதி மருத்துவர்கள் கிராமப்புறங்களில் சென்று வேலை செய்ய விரும்புவதில்லை. அதனால் ஊரகப்பகுதிகளில் மருத்துவர்கள் பற்றாக்குறை அதிகமாக இருக்கிறது. போலி மருத்துவர்கள் அதிகரிக்கிறார்கள். ஆயுஷ் மருத்துவர்கள் நாங்கள் கிராமப்புறங்களில், அரசு ஆரம்ப சுகாதார நிலையங்களில் வேலை செய்யத் தயாராக இருக்கிறோம். போலி மருத்துவர்களின் பிடியிலிருந்து மக்களை மீட்க, மருத்துவத்துறையில் பல சீர்திருத்தங்களைக் கொண்டுவர இந்த சட்ட மசோதா நிச்சயம் உதவும்'' என்கிறார் தமிழ்ராஜன்.