Published:Updated:

அமைச்சரின் அறக்கட்டளைக்கு அரசு கட்டடம்!

அன்பரசன், வேலுமணி
பிரீமியம் ஸ்டோரி
News
அன்பரசன், வேலுமணி

வேலுமணி மீது அதிகார துஷ்பிரயோக குற்றச்சாட்டு

அமைச்சரின் அறக்கட்டளைக்கு அரசு கட்டடம்!

வேலுமணி மீது அதிகார துஷ்பிரயோக குற்றச்சாட்டு

Published:Updated:
அன்பரசன், வேலுமணி
பிரீமியம் ஸ்டோரி
News
அன்பரசன், வேலுமணி

‘‘கோவையில் மக்கள் வரிப்பணத்தில் மாநகராட்சி இடத்தில் கட்டப்பட்ட கட்டடத்தை, உள்ளாட்சித் துறை அமைச்சர் வேலுமணி அதிகார துஷ்பிரயோகம் செய்து தனது அறக்கட்டளை சார்பில் அம்மா ஐ.ஏ.எஸ் அகாடமி நடத்தி வருகிறார்’’ என்று புகார் கிளப்பியுள்ளார் அறப்போர் இயக்கத்தின் ஒருங்கிணைப்பாளர் ஜெயராம் வெங்கடேசன்.

ஜெயராம் வெங்கடேசன், தியாகராஜன்
ஜெயராம் வெங்கடேசன், தியாகராஜன்

அவரிடம் பேசினோம். ‘‘கோவை, ஆர்.எஸ்.புரம் பகுதியில் மாநகராட்சி சுகாதாரத் துறைக்குச் சொந்தமான, சுகாதார ஆய்வாளர் அலுவலகம் இருந்தது. அந்தக் கட்டடம் மிகவும் பழையதாகிவிட்டதால், அதை இடித்துவிட்டு புதிய கட்டடம் கட்ட, டெண்டர் விடப்பட்டது. கட்டடம் கட்டும் பணிகள் நடந்ததால், மாநகராட்சி மேற்கு மண்டல அலுவலகத்தின் வெளியில் தகர ஷீட் அமைக்கப்பட்டு, சுகாதார ஆய்வாளர் அலுவலகம் இயங்கி வந்தது.

இந்த நிலையில், 1.75 கோடி ரூபாய் மதிப்பீட்டில், ஐந்தாயிரம் சதுர அடி பரப்பளவில் கட்டடம் கட்டி முடிக்கப்பட்டது. கான்ஃபரன்ஸ் ஹால் உள்ளிட்ட வசதிகளுடன் கட்டப்பட்ட அந்த அலுவலகத்தை, சுகாதார ஆய்வாளர் அலுவலகத்துக்குக் கொடுக்காமல், அம்மா ஐ.ஏ.எஸ் அகாடமி நடத்துவதற்குக் கடந்த பிப்ரவரியில் தந்துவிட்டனர். அகாடமி திறப்பு விழாவை அரசு விழாவைப்போலத்தான் நடத்தினர். இந்த அம்மா ஐ.ஏ.எஸ் அகாடமியை நடத்துவது, ‘நல்லறம்’ டிரஸ்ட். வேலுமணி, டிரஸ்ட்டின் நிறுவனர். வேலுமணியின் அண்ணன் அன்பரசன், தலைவர். இது அப்பட்டமான அதிகார துஷ்பிரயோகம். மக்களுக்கான கட்டடத்தைத் தனியாருக்குத் தாரை வார்த்ததன் மூலமாக, அரசுக்குப் பெரும் இழப்பு ஏற்பட்டுள்ளது. இதுதொடர்பாக வழக்குப் பதிவுசெய்ய லஞ்ச ஒழிப்புத் துறையிடம் மனு அளித்துள்ளோம்’’ என்றார்.

ஒட்டுமொத்த விகடனுக்கும் ஒரே ஷார்ட்கட்!

அன்பரசன், வேலுமணி
அன்பரசன், வேலுமணி

இந்த விவகாரம் குறித்து தகவல் அறியும் உரிமைச் சட்டத்தில் கேள்வி எழுப்பியிருந்த சமூக ஆர்வலர் தியாகராஜன், ‘‘அந்தக் கட்டடத்தை அம்மா ஐ.ஏ.எஸ் அகாடமிக்கு வழங்குவது தொடர்பான ஒப்பந்த நகல், மாமன்ற தீர்மான நகல் போன்ற எந்தத் தகவல்களும் மாநகராட்சியின் இணையதளத்தில் இல்லை. அந்தக் கட்டடத்திலும் ‘இது மாநகராட்சிக்குச் சொந்தமான இடம்’ என்று எங்கும் குறிப்பிடவில்லை. எனவே, இதுதொடர்பாக மாநகராட்சியிடம் தகவல் அறியும் உரிமைச் சட்டத்தில் தகவல் கேட்டிருந்தேன். சுகாதார ஆய்வாளர் அலுவலகம், புதிய கட்டடத்தில் இயங்குவதாக முதலிலும், மேற்கு மண்டல அலுவலகத்தின் ஒரு பகுதியில் இயங்குவதாக மேல்முறையீட்டிலும் பதில் அளித்தனர். பின்னர், ஐ.ஏ.எஸ் அகாடமி இயங்கி வரும் இடத்தில், ‘கோவை மாநகராட்சி மேற்கு மண்டலம் சுகாதார ஆய்வாளர் அலுவலகம்’ என்று, ஃபிளெக்ஸ் மட்டும் வைத்தனர். கட்டடத்தை மீட்டு, சுகாதார ஆய்வாளர் அலுவலகம் இயங்க நடவடிக்கை எடுக்க வேண்டும்’ என்றார்.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

இந்த விவகாரம் பூதாகரமாகியுள்ள நிலையில், அம்மா ஐ.ஏ.எஸ் அகாடமி இயங்கிவரும் புதிய கட்டடத்தின் ஓரிரு அறைகளில், அவசர அவசரமாக இரண்டு டேபிள், கம்ப்யூட்டர், நோட்டுகள் ஆகியவற்றை வைத்து, சுகாதார ஆய்வாளர் அலுவலகம் புதிய கட்டடத்தில்தான் இயங்குகிறது என்பதை நம்ப வைப்பதற்கான பணிகளும் நடக்கின்றன.

அம்மா ஐ.ஏ.எஸ். அகாடமி பயிற்சி மையம், சுகாதார ஆய்வாளர் அலுவலகப் பெயர் பலகை வைக்கப்பட்ட பின்னர்...
அம்மா ஐ.ஏ.எஸ். அகாடமி பயிற்சி மையம், சுகாதார ஆய்வாளர் அலுவலகப் பெயர் பலகை வைக்கப்பட்ட பின்னர்...

நல்லறம் டிரஸ்டின் தலைவரும் வேலுமணியின் சகோதரருமான அன்பரசனிடம் பேசினோம். வேலுமணி சார்பாகவும் பேசிய அவர், ‘‘ஆலயம் ஃபவுண்டேஷன்தான், இந்த ஐ.ஏ.எஸ் அகாடமியை நடத்துவதற்கான டெண்டரை எடுத்தனர். அவர்களால் நடத்த முடியவில்லை. அதனால்தான், இதை நாங்கள் நடத்தி வருகிறோம். மற்ற ஐ.ஏ.எஸ் அகாடமிகளில், பயிற்சிக்கு லட்சக்கணக்கில் கட்டணம் வாங்குகின்றனர். எனவே, ஏழை மாணவர்களுக்கு இலவசமாக ஐ.ஏ.எஸ் பயிற்சி வழங்க வேண்டும் என்ற நோக்கத்தில்தான், இந்த அகாடமியை நடத்தி வருகிறோம். நாங்கள் எந்த முறைகேட்டிலும் ஈடுபடவில்லை. இப்போது எழுந்துள்ள புகார் காரணமாக, அம்மா ஐ.ஏ.எஸ் அகாடமியை வேறு இடத்துக்கு மாற்ற இருக்கிறோம்’’ என்றார்.

கோவை மாநகராட்சி ஆணையாளர் ஷ்ரவன் குமார் ஜடாவத், ‘‘முதலில் சுகாதாரத்துறை ஆய்வாளர் கட்டடத் துடன், வணிக வளாகம் கட்டுவதுதான் திட்டம். பிறகு அதை முழுவது மாக வணிக வளாக மாகக் கட்டிவிட்டோம். சுகாதார ஆய்வாளருக்கு அவ்வளவு பெரிய அலுவலகம் தேவையில்லை. அதனால்தான், அங்கு சுகாதார ஆய்வாளர் அலுவலகம் இயங்கவில்லை. அந்தக் கட்டடத்தை வாடகைக்கு விடுவதற்கு, முறைப்படி டெண்டர் விட்டோம். இதை நாளிதழ்களில் விளம்பரமும் கொடுத்தோம். டெண்டரில் கலந்துகொண்ட நிறுவனங்களில், அதிகத் தொகைக்குக் கேட்ட ஆலயம் டிரஸ்ட்டுக்குதான் கட்டடத்தை வாடகைக்குக் கொடுத்தோம். இடையில், இதுதொடர்பாக மீடியாக்களிடம் சிலர் சென்றதால், எனக்குக் கீழ் இருக்கும் அதிகாரிகள் பயந்துவிட்டனர். அங்கு புதிய போர்டு வைத்து, அலுவலகத்தை அங்கு மாற்ற முயற்சி செய்துள்ளனர். இது எனக்குத் தெரியாமல் நடந்துள்ளது. அந்த அலுவலர்களைக் கண்டித்து விட்டேன். சுகாதார ஆய்வாளர் அலுவலகம் புதிய கட்டடத்தில் இயங்க முடியாது’’ என்றார்.

அன்பரசனும் ஷ்ரவன் குமாரும் சொல்லும் ஆலயம் டிரஸ்ட், வேலுமணியின் நிழலாக வலம்வரும் சந்திரசேகருக்குச் சொந்தமானது என்பது கூடுதல் தகவல்!