Published:Updated:

புதிய நாணயங்களிலுள்ள பிரச்னைகள் என்னென்ன? பார்வையற்றவர்கள் சந்திக்கும் சிக்கல்களைக் களைவது எப்படி?

நாணயங்கள்

1950-களில் இருந்தே இந்தி மொழியின் பயன்பாடு நாணயங்களில் இடம்பெறத் தொடங்கிவிட்டது. ஆனால் இவ்வருட நாணயத்தில் மொழியின் ஆதிக்கம் சற்றுக் கூடியிருப்பதைக் காண முடிகிறது.

புதிய நாணயங்களிலுள்ள பிரச்னைகள் என்னென்ன? பார்வையற்றவர்கள் சந்திக்கும் சிக்கல்களைக் களைவது எப்படி?

1950-களில் இருந்தே இந்தி மொழியின் பயன்பாடு நாணயங்களில் இடம்பெறத் தொடங்கிவிட்டது. ஆனால் இவ்வருட நாணயத்தில் மொழியின் ஆதிக்கம் சற்றுக் கூடியிருப்பதைக் காண முடிகிறது.

Published:Updated:
நாணயங்கள்

அன்றாடத்தை அல்லல் படாமல் நகர்த்துவதற்கு ஒவ்வொரு மனிதருக்கும் தேவையான ஓர் அடிப்படை விஷயம்தான் பணம். எல்லா காலத்திலும் இன்றியமையாத ஒரு விஷயமாக விளங்கும் பணத்தை, எல்லா மனிதர்களும் சுலபமாக அணுகவும், கையாளவும் முடிகிறதா என்பது ஆய்வுக்குரியது.

பணப் பரிவர்த்தனைகள் இன்று டிஜிட்டல் முறையில் பரவலாகிவிட்டாலும், நம்மில் பெரும்பாலானோர் இன்னும் ரொக்கத்தைக் கொண்டே பணப் பரிமாற்றத்தைப் பின்பற்றி வருகிறோம்.

சில்லறைகள் (மாதிரி படம்)
சில்லறைகள் (மாதிரி படம்)
சரி, இந்த ரொக்கத்தை, சில்லறையை அணுகுவதில், கையாள்வதில் யாருக்கெல்லாம் சிரமம் ஏற்படுகிறது? எந்த வகையில் ஏற்படுகிறது என்பதை இப்போது காண்போம்.

ஒட்டுமொத்த விகடனுக்கும் ஒரே ஷார்ட்கட்!

இந்தியா ஏறக்குறைய 130 கோடிக்கும் அதிகமான மக்கள்தொகையைக் கொண்ட நாடு. இதில் கிட்டத்தட்ட 6.2 கோடி மக்கள் பார்வையற்றவர்கள். ஆம்! பார்வையற்றவர்கள் பயன்படுத்தும்படி பிரத்யேகமான குறியீடுகளுடன் வந்த பணத்தின் காலம் முடிந்துவிட்டது. தற்காலத்தில் புதிதாய் பிறக்கும் வகைமைகள் எல்லாம் பெயரளவில் மட்டுமே இந்தப் பிரத்யேகத்தைத் தாங்கி வருகின்றன என்று மாற்றுத்திறனாளிகள் செயற்பாட்டாளர்கள், நாணவியல் ஆர்வலர்கள் விமர்சிக்கிறார்கள். பணத்தைக் கையாள்வதில் பெரும் சவால்களைச் சந்தித்தாலும் இதில் குறிப்பிடப்பட வேண்டியது சமீபத்தில் வெளியான 1 ரூபாய் முதல் 10 ரூபாய் வரையிலான நாணயங்கள்.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer
2016-ல் பழைய நோட்டுகளின் பணமதிப்பு நீக்கம் மற்றும் புதிய நோட்டுகளின் அறிமுகம் பார்வையற்ற பயனர்களுக்கு அதன் சொந்த சவால்களைக் கொண்டுவந்தது. அதனைத் தொடர்ந்து 2019-ல் பார்வையற்றவர்களுக்காகச் சிறப்பு நாணயங்களை வெளியிடப் போவதாக பிரதமரும் மத்திய நிதியமைச்சரும் ஓர் அறிவிப்பை வெளியிட்டனர். அதைத் தொடர்ந்து அந்த 2020-ல் இந்நாணயங்கள் புழக்கத்தில் வந்தன.

"நாணயங்களைப் பொறுத்தவரையில் இரண்டு பிரிவுகள் உள்ளன. டெஃபனிட்டிவ் காய்ன்ஸ் (Definitive coins) எனப்படும் பொதுமக்கள் பயன்பாட்டில் இருக்கும் நாணயங்கள்; கோமெம்மரேட்டிவ் நாணயங்கள் (Commemorative coins) எனப்படும் தலைவர்கள், நிகழ்வுகளின் நினைவை ஒட்டி வெளியிடப்படும் நினைவார்த்த நாணயங்கள்.

இந்தியாவில் 1950-களின் தொடக்கத்தில்தான் நாணயங்கள் அச்சடிக்க ஆரம்பிக்கிறார்கள்; 1964-ல் தான் முதன்முறையாக நினைவார்த்த நாணயங்களை அறிமுகப்படுத்துகிறார்கள். முக்கியத் தலைவர்களின் பிறந்த நாள், ஐம்பதாவது ஆண்டு, நூறாவது ஆண்டு, நூற்றியைம்பதாவது ஆண்டு மாதிரியான முக்கிய ஆண்டுகளிலும், முக்கியமான சம்பவங்கள், வரலாற்றுச் சிறப்புமிக்க புகைப்படங்கள், சின்னங்கள் இது மாதிரியான விஷயங்களை மையப்படுத்தியும் அதைச் சிறப்பித்து நினைவுகூரும் வகையில் அமைந்தவை இந்த நினைவார்த்த நாணயங்கள்" என்று நாணயங்கள் வகைமை குறித்து விளக்குகிறார் சென்னை நாணயவியல் சங்கத்தின் தலைவர் சென்னை மணிகண்டன்.

நாணயங்கள்
நாணயங்கள்

"இந்தப் பின்னணியில் 75-வது சுதந்திர தினத்தை முன்னிட்டு வெளியிடப்பட்டிருக்கும் நாணயங்களை நினைவார்த்த நாணயங்களாக எடுத்துக் கொள்வதா வேண்டாமா என்பதிலும் ஒரு குளறுபடி ஏற்பட்டிருக்கிறது. பிரதமரும், மத்திய நிதியமைச்சரும் அவை நினைவார்த்த நாணயங்கள் இல்லை என்று கூறினாலும் 75-வது சுதந்திர தினத்தைப் பறைசாற்றும் விதமாகப் பார்வையற்றவர்களுக்கான பிரத்யேகமான வடிவமைப்புடன் வெளியிடப்பட்டிருக்கும் இந்த நாணயங்களை நாம் எவ்வாறு அழைப்பது என்பதில் குழப்பம் ஏற்பட்டுள்ளது" என்று கூறும் மணிகண்டன் முக்கியமான விஷயம் ஒன்றையும் கவனப்படுத்துகிறார்.

"1950-களில் இருந்தே இந்தி மொழியின் பயன்பாடு நாணயங்களில் இடம்பெறத் தொடங்கிவிட்டது. ஆனால் இவ்வருட நாணயத்தில் இந்தியின் ஆதிக்கம் சற்றுக் கூடியிருப்பதைக் காண முடிகிறது. இதற்கு முன் வெளியான நாணயங்களில் இந்தி அல்லது ஆங்கில வாசகங்கள் நாணயத்தின் விளிம்பில்தான் இடம்பெற்றிருக்கும். ஆனால், இப்போது வெளியிடப்பட்டிருக்கும் நாணயங்களில் நாணயத்தின் மதிப்பு சிறிதாகவும், இந்தி மொழி வாசகம் பெரிதாகவும் நாணயத்தின் மையத்தில் இடம்பெற்றிருக்கிறது. சுதந்திரம் பெற்ற 75-ம் ஆண்டின் சிறப்பை உணர்த்தும், ‘ஆசாதி கா அமிர்த மஹோட்சவ்’ என்ற வாக்கியம் இந்தியில் இடம்பெற்றிருப்பதை இந்தித் திணிப்பு என்று எடுத்துக்கொள்ள முடியாவிட்டாலும், பன்முகத்தன்மை கொண்ட இந்தியாவில் ஒரு மொழியை மட்டும் முன்னிலைப்படுத்துவது சரியாக இருக்குமா?" என்று கேள்வி எழுப்புகிறார் மணிகண்டன்.

"75-ம் ஆண்டு சுதந்திர தினத்தை முன்னிட்டு வெளியிடப்பட்ட இந்த நாணயங்கள் 2022-ல் தான் வெளியிடப்பட்டிருக்க வேண்டும். இந்தியாவில் மும்பை, கொல்கத்தா, நொய்டா போன்ற இடங்களில் நாணயங்கள் அச்சடிக்கும் மின்ட் அமைந்திருக்கிறது. இவற்றில் நொய்டா மின்ட்டில் அச்சடிக்கப்பட்ட நாணயங்களில் மட்டும் 2021 என்று பொறிக்கப்பட்டிருக்கிறது. 2022 என்றிருக்க வேண்டிய நாணயங்களில் ஏன் 2021 அச்சடிக்கப்பட்டிருக்கிறது?” என்ற கேள்வியையும் கூடுதலாக எழுப்புகிறார் மணிகண்டன்.

நாணயத்தின் மொழிப்பிரச்னை ஒருபுறம் இருக்க, நாணயம் எதற்காக வெளியிடப்பட்டதோ அந்த நோக்கத்தை நிறைவேற்றுகிறதா என்பதும் கேள்விக்குரியதாக இருக்கிறது. பார்வையற்றவர்களுக்காகப் பிரத்யேகமாக அச்சடிக்கப்பட்ட நாணயங்கள் என்ற அறிவிப்புடன் வெளியிடப்பட்டிருக்கும் இந்த நாணயங்கள், அதற்கான எந்தப் பண்புகளையும் கொண்டிருக்கவில்லை என்று வேதனை தெரிவிக்கிறார் மணிகண்டன்.

“2011-ல் புதிதாக வெளியிடப்பட்ட ஸ்டெயின்லெஸ் ஸ்டீல் நாணயங்கள் எந்த வேறுபாடும் இன்றி ஒரே மாதிரியாக இருப்பது பெரும் குழப்பத்தை ஏற்படுத்துகிறது என்று பொதுமக்கள் குற்றம்சாட்டினர். அப்படியென்றால் பார்வையற்றவர்களின் நிலையை யோசித்துப் பாருங்கள்... இந்தப் பின்னணியில் இப்போதும் இதே தொடர்வது மேலும் குழப்பத்துக்கு இட்டுச் செல்கிறது" என்கிறார் மணிகண்டன்.

சென்னை மணிகண்டன்
சென்னை மணிகண்டன்
முதல்முதலில் வெளியிடப்பட்ட நாணயங்கள் தங்களது மதிப்பிற்கு ஏற்ப தனி அம்சங்களைப் பெற்றிருந்தன. ஒரு ரூபாய் நாணயம் என்றால் சிறிதான வட்டம், பக்கங்கள் சற்று அதிகமாகவும் பெரிதாகவும் தென்படுவது இரண்டு ரூபாய், இரண்டு நாணயங்களை ஒட்டவைத்தார் போல கனமாக வருவது ஐந்து ரூபாய் மற்றும் சற்றே பெரிய அளவு நாணயங்கள் 10 ரூபாய் என்று வகைமைப்படுத்தப்பட்டிருந்தன. ஆனால், அடுத்தடுத்து வெளியிடப்பட்ட நாணயங்கள் பொதுவாக ஒரே வடிவில் அமைந்தன.

மாற்றுத்திறனாளி ஆர்வலரான ஸ்கோர் அறக்கட்டளையின் தலைமை நிர்வாக அதிகாரி ஜார்ஜ் ஆபிரகாம் இதுகுறித்து பேட்டி ஒன்றில் பேசும்போது, “2014-ம் ஆண்டில், பிரதமர் நரேந்திர மோடி முதன்முதலில் ‘டிஜிட்டல் இந்தியா’ நோக்கி உந்துதலை அறிவித்தபோது, பல பார்வையற்ற குடிமக்களைப் போலவே நானும் உற்சாகமடைந்தேன். எல்லோரையும் உள்ளடக்கிய ஒன்றாக, அணுகல்தன்மை உடையதாக டிஜிட்டல் இந்தியா விளங்கும் என்று நினைத்தேன். ஆனால், பெரும்பாலான தகவல் தொழில்நுட்ப வல்லுநர்களுக்கு அணுகல்தன்மை என்னவென்று தெரியாது என்பதை விரைவில் நான் கண்டுபிடித்தேன். மேலும், அனைத்து தரப்பு மக்களும் சேர்க்கப்படுவதற்கான சாத்தியக்கூறுகள் குறித்து அதிகாரிகள் அறிந்திருக்கவில்லை, அதன் தேவையைக் கவனத்தில் கொள்ளவில்லை.

நாணயங்கள்
நாணயங்கள்

உண்மையான சேர்க்கை என்பதை நனவாக்க, அரசு அதிகாரிகள், செயல்படுத்தும் முகவர்கள், டெவலப்பர்கள் மற்றும் இது தொடர்பான அனைத்து தரப்பினரும் பார்வைக் குறைபாடு உள்ள ஒருவருக்கு என்னென்ன சிக்கல்கள் உள்ளன என்பதை முதலில் புரிந்துகொள்ள வேண்டும். எது ஒன்றைப் புதிதாக உருவாக்கும்போது அல்லது வடிவமைக்கும் போது கணக்கில் எடுத்துக்கொள்ள வேண்டிய முக்கியமான அம்சம் இது" என்று கூறியிருக்கிறார்.

உடனடி கவனம் கோரும் இப்பிரச்னை குறித்து பரிசீலிக்குமா அரசு?