Published:Updated:

“நம் வீட்டுத் தண்ணீர்த் தொட்டிகள்... பிரான்ஸ் நிறுவனத்தின் கட்டுப்பாட்டில்!”

“நம் வீட்டுத் தண்ணீர்த் தொட்டிகள்... பிரான்ஸ் நிறுவனத்தின் கட்டுப்பாட்டில்!”
பிரீமியம் ஸ்டோரி
News
“நம் வீட்டுத் தண்ணீர்த் தொட்டிகள்... பிரான்ஸ் நிறுவனத்தின் கட்டுப்பாட்டில்!”

கொந்தளிக்கும் கோவை மக்கள்

கோவை மாநகர மக்களுக்கான குடிநீரை எப்போது விநியோகிக்க வேண்டும், எப்போது நிறுத்த வேண்டும் என்பதை இனி முடிவுசெய்யப்போவது கோவை மாநகராட்சி அல்ல; பிரான்ஸ் நாட்டைச் சேர்ந்த ஒரு பன்னாட்டு நிறுவனம்தான் அதைச் செய்யும். ‘இனி குடிநீர்க் கட்டணத்தை யார் விதிப்பார்கள்? எதன் அடிப்படையில் கட்டணம் விதிக்கப்படும்? வீடுகளில் தண்ணீர்க் குழாய் இல்லாததால் பொதுக் குழாய்களில் தண்ணீர் பிடிக்கும் மக்களின் நிலை என்ன ஆகப்போகிறது?’ போன்ற கேள்விகளை அச்சத்துடன் எழுப்புகிறார்கள் கோவை மக்கள்.

‘கோவை மாநகராட்சியில் குடிநீர் விநியோகிக்கும் பணியைத் தனியாரிடம் ஒப்படைப்பது’ என 2017-ல் உள்ளாட்சித் துறை தீர்மானித்தது. அதன்படி, கோவையில் 60 வார்டுகளில் குடிநீர் விநியோகிக்கும் பணிகளை, பிரான்ஸைச் சேர்ந்த ‘சூயஸ் புராஜெக்ட்ஸ் பிரைவேட் லிமிடெட்’ (SPPL) என்ற நிறுவனத்துக்கு இப்போது கொடுத்துள்ளனர். 400 மில்லியன் யூரோவுக்கு (ரூ. 3,167 கோடி) இந்த டெண்டரை எடுத்திருப்பதாகக் கடந்த பிப்ரவரி மாதம் தமது இணையதளத்தில் சூயஸ் நிறுவனம் தெரிவித்துள்ளது. இந்தியாவில் முதன்முதலாக இவ்வளவு தொகைக்குக் குடிநீர் விநியோகத்தை எடுத்திருப்பதாக அந்த நிறுவனம் பெருமையுடன் தெரிவித்துள்ளது. 26 ஆண்டுகளுக்குக் குடிநீர் விநியோகத்துக்கான ஒப்பந்தம் இந்த நிறுவனத்துக்குக் கொடுக்கப்பட்டுள்ளது. இப்போது, 60 வார்டுகளில் உள்ள வீடுகள் மற்றும் நிறுவனங்களின் குடிநீர் இணைப்புகள் குறித்த கணக்கெடுப்பில் இந்த நிறுவனம் ஈடுபட்டுள்ளது. ஓராண்டில் ஆய்வு முடித்து, அடுத்த நான்கு ஆண்டுகளில் குழாய்களைச் சீரமைத்து, பிறகு 21 ஆண்டுகளுக்குத் தண்ணீர் விநியோகத்தை இந்த நிறுவனம்தான் மேற்கொள்ளும். இதுவரை தமிழ்நாடு குடிநீர் வடிகால் வாரியத்திடமிருந்து 1,000 லிட்டர் குடிநீரை 9.75 பைசாவுக்கு வாங்கி, அதை மானிய விலையில் 1,000 லிட்டருக்கு 4.50 பைசாவுக்கு மக்களுக்கு விநியோகித்துவருகிறது கோவை மாநகராட்சி. இனி என்ன நடக்கும் என்பது தெரியவில்லை.

“நம் வீட்டுத் தண்ணீர்த் தொட்டிகள்... பிரான்ஸ் நிறுவனத்தின் கட்டுப்பாட்டில்!”

உலகம் முழுவதும் 130-க்கும் மேற்பட்ட நாடுகளில் காலடி எடுத்து வைத்துள்ளது சூயஸ் நிறுவனம். பெக்டெல், விவெண்டி போன்ற உலக அளவில் தண்ணீர் வியாபாரம் செய்யும் நிறுவனங்களில் தற்போது சூயஸ் நிறுவனம்தான் முன்னணியில் உள்ளது. உலகம் முழுவதும் பல்வேறு கிளை நிறுவனங்களும் இதற்கு உண்டு. இந்த நிறுவனம், 2012-ம் ஆண்டு டெல்லி மால்வியா நகர் பகுதியில் குடிநீர் விநியோகிக்கும் பணியைக் கையிலெடுத்தது. தற்போது பெங்களூரு, கொல்கத்தா, கோவை எனத் தண்ணீர் வளம் அதிகமுள்ள நகரங்களைக் குறிவைத்துள்ளது இந்த நிறுவனம். மற்ற நகரங்களைவிட, கோவை மாநகராட்சியுடன் போடப்பட்டுள்ளதே மிகப் பெரிய ஒப்பந்தம்.

இதுகுறித்து நம்மிடம் பேசிய வழக்கறிஞரும் எழுத்தாளருமான இரா.முருகவேள், “உலகமயமாக்கலுக்குப் பிறகு, சேவைத் துறைகளைத் தனியாருக்குத் தாரை வார்ப்பது உலகம் முழுவதும் நடந்து வருகிறது. சேவைத் துறைகளில் லாபம் பார்க்கமுடியும் என்பது கார்ப்பரேட் நிறுவனங்களுக்குத் தெரியும். குடிநீர் விநியோகம் என்பது பிரமாண்டமான நெட்வொர்க். அதைக் கைப்பற்றுவதற்காகத் தான், பன்னாட்டு நிறுவனங்கள் இந்தியா வுக்குள் வருகின்றன. சூயஸ் நிறுவனத்துடனான ஒப்பந்தம் மூலமாகச் சிறுவாணி, பில்லூர் அணைகள் முதல் நம் வீட்டுத் தண்ணீர்த் தொட்டிகள் வரை அனைத்தும் அந்த நிறுவனத்தின் கட்டுப்பாட்டுக்குள் சென்றுவிடும். இதற்கான விலையை அரசுதான் நிர்ணயிக்கும் என்றாலும்கூட, சூயஸ் நிறுவனத்தின் லாபத்தையும் வைத்தே விலை நிர்ணயிக்கப்படும்.

இப்படி ‘தண்ணீரைத் தனியாருக்குத் தாரைவார்ப்பது குறித்து மக்களிடம் கருத்து கேட்கப்பட்டதா? பொதுக் குழாய்களைத் தூக்கியெறிய மாட்டோம் என இவர்களால் உறுதி கொடுக்க முடியுமா?’ என்ற கேள்விகள் எழுகின்றன. நாங்கள் வரி கொடுக்கிறோம். நீங்கள் தண்ணீர் கொடுக்கிறீர்கள். அப்படி இருக்கும்போது, பன்னாட்டு நிறுவனத்துக்கு இங்கு என்ன வேலை? இதுதொடர்பாக, பொது விவாதங்கள் நடத்தப்பட வேண்டும். குடிநீரைத் தொடர்ந்து ரேஷன் பொருள் விநியோகத்தையும் தனியார்மயப்படுத்த திட்டம் தீட்டி வருகின்றனர். ராணுவம், வெளியுறவு தவிர மற்ற துறைகளைத் தனியார்மயப்படுத்துவதுதான் இவர்களின் நோக்கம்” என்றார் உஷ்ணத்துடன்.

சுற்றுச்சூழல் செயற்பாட்டாளர் மோகன்ராஜிடம் பேசியபோது, “உள்ளாட்சி அமைப்புகளுக்குத் தேர்தல் நடத்தப்படாத இந்த நேரத்தில், மக்களிடம் கருத்துக் கேட்காமல் இப்படி ஒரு முடிவைக் கோவை மாநகராட்சி மேற்கொண்டது தவறு. இந்த ஒப்பந்தம் மூலம், மக்களின் வரிப்பணத்தில் கட்டப்பட்ட கட்டமைப்புகள் அனைத்தையும் தனியாருக்குத் தாரைவார்த்துக் கொடுத்துள்ளனர். உயிர் வாழ முக்கியமானது குடிநீர். அதை ஒரு விற்பனைப்பொருளாக மாற்றுவது கண்டனத்துக்குரியது. ஒரு லட்சத்து 50 ஆயிரம் குடிநீர் இணைப்புகளுக்கு சூயஸ் நிறுவனம் ஒப்பந்தம் போட்டுள்ளது. ஒரு இணைப்புக்கு, ஆண்டுக்கு 6,666 ரூபாய் அடிப்படையில் எடுத்துள்ளது. இதை மாதக் கணக்கில் பார்த்தால் குறைந்தது 500 ரூபாயை அரசுக்கு சூயஸ் நிறுவனம் செலுத்த வேண்டும். இதை, மக்கள் மீதுதான் அவர்கள் திணிப்பார்கள். இனி, மாத பட்ஜெட்டில் மற்ற பொருள்களுக்குப் போலவே குடிநீருக்கும் பணத்தை ஒதுக்க வேண்டும்.

இந்த ஒப்பந்தம் குறித்து சூயஸ் நிறுவனம் தனது இணையதளத்தில் அறிவிப்பு வெளியிட்டுள்ள நிலையில், இதன் முழு விவரங்களையும் மாநகராட்சி ஏன் வெளிப்படையாகத் தெரிவிக்கவில்லை. இது அமைச்சர் முதல் அதிகாரிகள் வரை அனைவர்மீதும் சந்தேகத்தை அதிகரிக்க வைக்கிறது. 24 மணி நேரமும் குடிநீர் வழங்கப்படும் என்று கவர்ச்சிகர அறிவிப்பை வெளியிடுவார்கள். அடுத்ததாக, அதிகத் தண்ணீர் பயன்படுத்துபவர்களுக்கு, குறைவான விலையில் தண்ணீர் கொடுப்பார்கள். சூயஸ் நிறுவனம் ஏற்கெனவே காலடி வைத்த நாடுகளில், ‘மழைநீர் சேகரிக்கக் கூடாது. கிணறு வெட்டக் கூடாது’ என்றெல்லாம் ஆதிக்கம் செலுத்திவருகிறது. எனவே, தனியார் நிறுவனத்தின் ஆதிக்கத்தை ஆரம்பத்திலேயே தடுக்க வேண்டும்” என்றார் உறுதியாக.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
“நம் வீட்டுத் தண்ணீர்த் தொட்டிகள்... பிரான்ஸ் நிறுவனத்தின் கட்டுப்பாட்டில்!”

மார்க்சிஸ்ட் லெனினிஸ்ட் கட்சியின் கோவை மாநகரச் செயலாளரும், மாநகராட்சி முன்னாள் கவுன்சிலருமான வேல்முருகன், “கோவை மாநகராட்சியின் ஒட்டுமொத்தச் செயல்பாடும் மர்மமாக உள்ளது. கடந்த ஜூலை மாதம் முதல், மாநகராட்சி தீர்மானங்கள் இணையதளத்தில் வெளியிடப்படுவதில்லை. இதுகுறித்து தகவல் அறியும் உரிமைச் சட்டத்தில் கேள்வி எழுப்பினாலும், மழுப்பலான பதில்களே கிடைக்கின்றன. குடிநீர்க் குழாய்களைக்கூட பராமரிக்க முடியாவிட்டால் இது என்ன மாதிரியான மாநகராட்சி நிர்வாகம்? குடிநீரைத் தனியாருக்குத் தாரை வார்ப்பதை ஏற்றுக்கொள்ள முடியாது. இதை எதிர்த்துப் போராட்டம் நடத்துவோம்” என்றார் கோபத்துடன்.

இது தொடர்பாக விளக்கம் கேட்க சூயஸ் நிறுவனத்தைத் தொடர்புகொண்ட போது, ‘‘இதுகுறித்து நாங்கள் ஏதும் பேச முடியாது. மாநகராட்சி நிர்வாகத்திடமே கேட்டுக்கொள்ளுங்கள்” என்றனர். கோவை மாநகராட்சி கமிஷனர் விஜயகார்த்திகேயனிடம் கேட்டபோது, “கோவையில் இருக்கும் குடிநீர்க் குழாய்கள், ஆங்கிலேயர் காலத்தில் அமைக்கப்பட்டவை. பல இடங்களில் கசிவுகள் இருப்பதால், குடிநீர் வீணாகிறது. நீர் இருந்தும் அதை மக்களுக்கு முறையாகக் கொடுக்க முடிவதில்லை. குழாய்களை மாற்றியமைப்பதற்குப் பெரும் தொகை தேவைப்படும். எனவே, உலக அளவில் இந்தப் பணியைச் சிறப்பாகச் செய்யும் சூயஸ் நிறுவனத்துக்கு 26 ஆண்டுகளுக்கு ஒப்பந்தம் விடப்பட்டுள்ளது. இதுதொடர்பாக, பல்வேறு கட்டங்களாக ஆலோசனை நடத்தி முறையாக ஒப்பந்தம் விடப்பட்டுள்ளது. இதன் மூலம் முறைகேடாகத் தண்ணீர் இணைப்புப் பெறுவது தடுக்கப்படும். பல உலக நாடுகளில், 24 மணி நேரக் குடிநீர் விநியோகத்தை வெற்றிகரமாக சூயஸ் நிறைவேற்றியுள்ளது. குடிநீர்க் குழாயை மாற்றி அமைப்பதும், அவற்றைப் பராமரிப்பதும் மட்டும்தான் சூயஸின் பணி. குடிநீர்க் கட்டணத்தை மாநகராட்சி நிர்வாகம்தான் நிர்ணயிக்கும். மக்களின் தேவைக்கேற்ப, பொதுக் குழாய்களும் பயன்பாட்டில் இருக்கும்” என்றார்.

நம் வீட்டுக்குழாயில் வரும் தண்ணீரையும் பன்னாட்டு நிறுவனத்திடம்தான் விலைகொடுத்து வாங்க வேண்டும் என்பது மோசமான விளைவுகளை ஏற்படுத்திவிடும்.

- இரா.குருபிரசாத்
படங்கள்: தி.விஜய்