Published:Updated:

1528-ல் பாபர் மசூதி... 2020-ல் ராமர் கோயில்... 492 ஆண்டு வரலாற்றுச் சுருக்கம்! #AyodhyaRamMandir

Ayodhya
Ayodhya ( AP Photo / Rajesh Kumar Singh )

1528-ல் பாபர் மசூதி இருந்த இடத்தில் இன்று ராமர் கோயில் கட்டுவதற்கான பணிகள் நடைபெற்றுக்கொண்டிருக்கின்றன. 492 ஆண்டுகள் நீண்ட வரலாறு கொண்ட அயோத்தி நிலப் பிரச்னையில் என்ன நடந்தது?

இன்று பிரதமர் நரேந்திர மோடி, அயோத்தியில் ராமர் கோயில் அமைப்பதற்கான பூமி பூஜையை அடிக்கல் நாட்டி தொடங்கி வைக்கிறார். பல சர்ச்சைகள், வழக்குகள் என நீண்ட நெடிய வரலாறு கொண்ட அயோத்தி நிலத்தின் கதையை இந்தக் கட்டுரையில் அலசலாம்...

1528

* பாபரின் தளபதி மிர் பாகி என்பவர் அயோத்தியில் பாபர் மசூதியைக் கட்டினார்.

* இந்துக் கோயிலை இடித்துவிட்டுக் கட்டியதாக எந்தத் தகவலும் இல்லை.

* 325 ஆண்டுகளுக்கு எந்தப் பிரச்னையும் இல்லை.

1853

* பாபர் மசூதி கட்டப்பட்டபோது, அங்கிருந்த இந்துக் கோயில் இடிக்கப்பட்டதாகச் சிலர் பிரச்னையைக் கிளப்பினர்.

1859

* பதற்றம் அதிகரிக்கவே பிரிட்டிஷ் ஆட்சியாளர்கள் மசூதியைச் சுற்றி வேலி அமைத்தனர்.

* மசூதிக்கு உள்ளே இஸ்லாமியர்கள் தொழுகை நடத்தவும், வெளியில் இந்துக்கள் வழிபாடு நடத்தவும் அனுமதிக்கப்பட்டனர்.

பாபர் மசூதி
பாபர் மசூதி
1885

* மஹந்த் ரகுபீர் தாஸ் என்பவர் ராமருக்குக் கோயில் எழுப்ப அனுமதிக்கக் கோரி ஃபரிதாபாத் மாவட்ட நீதிமன்றத்தில் வழக்கு தொடர்ந்தார். இந்த வழக்கை நீதிமன்றம் தள்ளுபடி செய்தது.

1949

* சில இந்துக்கள் பாபர் மசூதியின் உள்ளே ராமர் சிலையை வைத்தனர்.

* பாபர் மசூதி உள்ள இடம் பிரச்னைக்கு உரியது எனக் கூறி இரு தரப்பினரும் உள்ளே நுழைய மாநில அரசு அனுமதி மறுத்தது.

1950

* கோபால்சிங் விஷாரத் மற்றும் ராமச்சந்திரதாஸ், `ராமர் பிறந்ததாகக் கருதப்படும் இடத்தில் நிறுவப்பட்டுள்ள ராமர் சிலைக்குப் பூஜை செய்ய அனுமதிக்க வேண்டும்' என்று மனு தாக்கல் செய்தனர். அந்த மனுவை ஏற்று அனுமதி வழங்கப்பட்டது.

அயோத்தி
அயோத்தி
பாபர் நுழையாத பாபர் மசூதி: அயோத்தியில் என்ன நடந்தது? பாகம் 1
1958

* நிர்மோஹி அகாரா என்ற சாதுக்களின் அமைப்பு, `ராமர் பிறந்ததாகக் கருதப்படும் இடத்தை தங்களுக்கு வழங்க வேண்டும்’ என்று புதிதாக மனு ஒன்றைத் தாக்கல் செய்தது.

1961

* சன்னி சென்ட்ரல் போர்ட், `மசூதிக்குள் உள்ள சிலைகளை அப்புறப்படுத்த வேண்டும். மசூதி மற்றும் அதைச் சுற்றியுள்ள பகுதிகள் எங்களுக்கே சொந்தம்’ என்று மனுத்தாக்கல் செய்தது.

1984

பிரச்னைக்குரிய இடத்தில் மசூதியை இடித்துவிட்டு, ராமர் கோயில் கட்டப்போவதாக இந்துக் குழுக்கள் அறிவித்தன. கோயில் கட்டுவதற்காக மிகப் பெரிய இயக்கம் உருவெடுத்தது. இதில் பா.ஜ.க தலைவர் அத்வானி முக்கிய பங்குவகித்தார்.

1986

* பாபர் மசூதி கதவுகள் திறக்கப்பட வேண்டும். இந்துக்கள் அங்கு வழிபட அனுமதிக்கப்பட வேண்டும் என்ற ஹரிசங்கர் துபேவின் மனுவை ஏற்று உத்தரவு பிறப்பிக்கப்பட்டது. இதற்கு, இஸ்லாமியர்கள் தரப்பில் கடும் எதிர்ப்பு கிளம்பியது.

* பாபர் மசூதி ஆக்ஷன் கமிட்டி உருவாக்கப்பட்டது.

1989

* பாபர் மசூதி அருகே ராமர் கோயில் கட்ட விஷ்வ இந்து பரிஷத் அடிக்கல் நாட்டியது.

* இதுவரை மாவட்ட நீதிமன்றத்தில் நடந்த வழக்கு, உயர் நீதிமன்ற சிறப்பு அமர்வுக்கு மாற்றப்பட்டது.

1990

* வி.ஹெச்.பி (விஷ்வ இந்து பரிஷத்) அமைப்பினர் மசூதியின் சில பகுதியைச் சேதப்படுத்தினர்.

* அதே ஆண்டில், செப்டம்பர் மாதம் குஜராத் மாநிலம் சோம்நாத்திலிருந்து அத்வானி, ரத யாத்திரையைத் தொடங்கினார்.

1991

* நாடாளுமன்றத்தில் பிரதான எதிர்க்கட்சியானது பா.ஜ.க.

* ரத யாத்திரையின் பலனாக உத்தரப்பிரதேசத்தில் ஆட்சியையும் கைப்பற்றியது.

* இதைத்தொடர்ந்து, கோயில்கட்ட கரசேவை இயக்கம் தொடங்கப்பட்டது.

1992

* டிசம்பர் 6, கரசேவகர்களால் பாபர் மசூதி முற்றிலுமாக இடிக்கப்பட்டது.

* இதனால் நாடெங்கும் கலவரம் வெடித்தது. 2,000 பேர் உயிரிழந்தனர். அதில் அநேகர் இஸ்லாமியர்.

* இதன் பின்னணியை விசாரிக்க அப்போது பிரதமராக இருந்த பி.வி.நரசிம்மராவ், லிபரான் ஆணையத்தை அமைத்தார்.

பாபர் மசூதி
பாபர் மசூதி
1993

* பாபர் மசூதி இருந்த பகுதியில் 67 ஏக்கர் நிலத்தை மத்திய அரசு கையகப்படுத்தியது.

* அத்வானி உள்ளிட்ட சில தலைவர்கள்மீது சதித் திட்டம் தீட்டியதாக சி.பி.ஐ நீதிமன்றத்தில் வழக்குத் தொடரப்பட்டது.

2001

* பாபர் மசூதி இடிப்பு வழக்கில், அத்வானி உள்ளிட்டோர் மீதான குற்றச்சாட்டு நிரூபிக்கப்படவில்லை என்று கூறி சி.பி.ஐ நீதிமன்றம் 21 பேரை விடுதலை செய்தது.

* அப்போது அத்வானி உள்துறை அமைச்சராகவும் துணை பிரதமராகவும் இருந்தது குறிப்பிடத்தக்கது.

92-ல் வெளியான ஜூனியர் விகடன் அட்டைப்படம்
92-ல் வெளியான ஜூனியர் விகடன் அட்டைப்படம்
2002

* உயர் நீதிமன்றம், பாபர் மசூதி இருந்த இடத்தில் அகழ்வாராய்ச்சி செய்து, அங்கு இந்துக் கோயில் இருந்ததா என்று ஆய்வறிக்கை தாக்கல் செய்யும்படி `ஆர்க்கியாலஜி சர்வே ஆஃப் இந்தியா’வுக்கு உத்தரவிட்டது.

2010

* அலகாபாத் உயர் நீதிமன்றம், மத்திய அரசு கையகப்படுத்திய இடத்தில் மூன்றில் இரண்டு பகுதி நிலத்தை ராமர் கோயில் கட்டவும் மீதமுள்ள ஒரு பகுதி நிலத்தை இஸ்லாமியர்களுக்கும் வழங்கவும் உத்தரவிட்டது.

* அத்வானி உள்ளிட்டோரை விடுதலை செய்யக் கோரி உத்தரவிட்ட உயர் நீதிமன்ற தீர்ப்பை அலகாபாத் உயர் நீதிமன்றம் உறுதி செய்தது.

2017

மார்ச் 6

* பாபர் மசூதி இடிப்பு வழக்கில் அத்வானி உள்ளிட்டோர் விடுதலை செய்யப்பட்டதை எதிர்த்து, சி.பி.ஐ தாக்கல் செய்திருந்த மறுசீராய்வு மனுவை விசாரித்து, ``ஒரு வழக்கை முழுமையாக விசாரிக்காமல் `கால தாமதம்’ என்பது போன்ற `டெக்னிக்கல்’ காரணங்களின் அடிப்படையில் விடுதலை செய்ய முடியாது” என்று உச்ச நீதிமன்றம் தெரிவித்தது.

மார்ச் 17

* பாபர் மசூதி இடிப்பு சதியில் அத்வானி, முரளி மனோகர் ஜோஷி, உமா பாரதி உள்ளிட்ட பா.ஜ.க தலைவர்களுக்குத் தொடர்பு இருக்கிறது என்று சி.பி.ஐ திட்டவட்டமாகக் கூறியது.

* ‘இது தொடர்பாக மிக விரிவாக விசாரணை நடத்த வேண்டும்’ என்று உச்ச நீதிமன்றம் கூறியது.

ஏப்ரல் 6

* `அத்வானி உள்ளிட்டோரின் விடுதலையை ஏற்றுக்கொள்ள முடியாது’ என்று கூறிய உச்ச நீதிமன்றம், ரேபரேலியில் நடந்துவந்த பாபர் மசூதி இடிப்பு வழக்கை அரசியல் அமைப்புச் சட்டம் 142 விதியின் கீழ், லக்னோவுக்கு மாற்ற உத்தரவிட்டது.

அத்வானி, உமாபாரதி, முரளி மனோகர் ஜோஷி
அத்வானி, உமாபாரதி, முரளி மனோகர் ஜோஷி
ஏப்ரல் 19

* அத்வானி, முரளி மனோகர் ஜோஷி உள்ளிட்டவர்கள் மீதான குற்றச்சாட்டை விசாரிக்க சி.பி.ஐ-க்கு உத்தரவிடப்பட்டது. தினந்தோறும் விசாரணை நடத்தி, இரண்டாண்டுகளுக்குள் வழக்கை முடிக்கவும் உச்ச நீதிமன்றம் உத்தரவிட்டது.

மே 30

அத்வானி, முரளி மனோகர் ஜோஷி, உமா பாரதி ஆகியோருக்கு ஜாமீன் வழங்கியது லக்னோ சிறப்பு நீதிமன்றம். பிறகு, ஜாமீன் ரத்து செய்யப்பட்டு அவர்கள் மீது சதிக் குற்றச்சாட்டுகள் சுமத்தப்பட்டன.

ஆகஸ்ட் 8

ஷியா மத்திய வக்ஃப் போர்டு உச்ச நீதிமன்றத்திடம், ``அயோத்தியாவில் சர்ச்சைக்குரிய இடத்தை விட்டு விட்டுச் சற்று தள்ளி இஸ்லாமியர்கள் நிறைந்த மற்றோர் இடத்தில் மசூதி கட்டிக் கொள்கிறோம்” என்று வாக்குமூலம் ஒன்றை சமர்ப்பித்தது.

அயோத்தி
அயோத்தி
எப்படி அமையவிருக்கிறது ராமர் கோயில்? - அயோத்தி ஸ்பாட் விசிட்
ஆகஸ்ட் 11

பாபர் மசூதி - ராம ஜென்ம பூமி குறித்த 13 முறையீடுகள் டிசம்பர் 5-ம் தேதி விசாரிக்கப்படும் என்று உச்ச நீதிமன்றம் தெரிவித்துள்ளது.

டிசம்பர் 5

பிப்ரவரி 8-ம் தேதிக்கு வழக்கு ஒத்தி வைக்கப்பட்டது.

2018

பிப்ரவரி 8

இந்த வழக்கை மீண்டும் விசாரிக்கத் தொடங்கியது. அதன்பின், 3 நீதிபதிகள் கொண்ட புதிய அமர்வுக்கு இந்த வழக்கை மாற்றியது உச்ச நீதிமன்றம்.

அக்டோபர் 29

3 நீதிபதிகள் அமர்வுக்குக் கீழ் வந்த பாபர் மசூதி இடிப்பு வழக்கின் விசாரணையை, மீண்டும் 2019-ம் ஆண்டு ஜனவரி மாதத்துக்கு ஒத்திவைத்தது உச்ச நீதிமன்றம்.

2019

ஜனவரி 10

நீதிபதி லலித் வழக்கு விசாரணையில் இருந்து விலகிக்கொண்டார்.

ஜனவரி 25

தலைமை நீதிபதி ரஞ்சன் கோகய், எஸ்.ஏ பாப்டே, சந்திரசூட், அசோக் பூஷன், எஸ்ஏ நஷீர் ஆகியோர் கொண்ட புதிய அமர்வு அமைக்கப்பட்டது.

பாபர் மசூதி, உச்ச நீதிமன்றம், ஐந்து நீதிபதிகள் அமர்வு
பாபர் மசூதி, உச்ச நீதிமன்றம், ஐந்து நீதிபதிகள் அமர்வு
மார்ச் 8

முன்னாள் உச்ச நீதிமன்ற நீதிபதி கலிஃபுல்லா தலைமையிலான மத்தியஸ்தர் குழு ஒன்றை உச்சநீதிமன்றம் அமைத்தது.

ஆகஸ்ட் 6

6-ம் தேதி முதல் அரசியல் சாசன அமர்வு நாள்தோறும் விசாரணை நடத்தியது.

அக்டோபர் 15

* வழக்கு விசாரணையை அக்டோபர் 16-ம் தேதியுடன் நிறைவு செய்ய விரும்புவதாக தலைமை நீதிபதி தெரிவித்தார்.

உச்ச நீதிமன்றம்
உச்ச நீதிமன்றம்
அக்டோபர் 16

* அக்டோபர் 16-ம் தேதியோடு வழக்கு விசாரணை நிறைவுபெற்றது.

* தீர்ப்பு தேதி குறிப்பிடப்படாமல் வழக்கு ஒத்திவைக்கப்பட்டது.

நவம்பர் 9

காலை 10.30 மணி அளவில் வரலாற்றுச் சிறப்புமிக்க தீர்ப்பு வழங்கப்பட்டது.

சர்ச்சைக்குரிய 2.77 ஏக்கர் கொண்ட இடத்தில் ராமர் கோயில் கட்டலாம். இதற்காக புதிய அறக்கட்டளை ஒன்றை 3 மாதங்களில் மத்திய அரசு அமைக்க வேண்டும். அந்த அறக்கட்டளை ராமர் கோயில் கட்டுவதற்கான பணிகளை மேற்கொள்ள வேண்டும். அயோத்தியில் வக்ஃபு வாரியம் அமைந்துள்ள இடத்தில் இஸ்லாமியர்கள் தொழுகை நடத்த 5 ஏக்கர் மாற்று இடம் வழங்க வேண்டும்.
உச்ச நீதிமன்றம் தீர்ப்பு

2020

பிப்ரவரி 5

அயோத்தியில் ராமர் கோயில் கட்டுவதற்காக 15 பேர் கொண்ட `ஶ்ரீராம ஜென்மபூமி தீர்த்த ஷேத்ரா அறக்கட்டளை' தொடங்கப்பட்டது.

மே 11

ராமர் கோயில் கட்டுவதற்கான நிலம் சீரமைப்பு பணிகள் தொடங்கின.

`ராமஜென்மபூமி அறக்கட்டளையின் முதல் உறுப்பினர்; கமல்ஹாசனின் உறவினர்!' -யார் இந்த பராசரன்?
ஜூன் 10

ராமர் கோயிலின் முதற்கட்ட கட்டுமானப் பணிகள் சிறப்பு வழிபாடுகளுடன் தொடங்கப்பட்டன.

இந்த முதற்கட்ட பணிகள் நிறைவுபெற்றதும் ராமர் கோயில் கட்டுவதற்கான அடிக்கல் நாட்டப்படும்.
நிருத்ய கோபால் தாஸ், ராம ஜென்மபூமி அறக்கட்டளை தலைவர்
ஜூலை 22

ஶ்ரீராம ஜென்மபூமி அறக்கட்டளையின் பொருளாளர் சுவாமி கோவிந்த் தேவ் கிரி, `ஆகஸ்ட் 5-ம் தேதி ராமர் கோயிலுக்கான பூமி பூஜைக்குப் பிரதமரை அழைத்திருக்கிறோம், அவரும் வர ஒப்புக் கொண்டார்' என்று செய்தியாளர்களிடம் தெரிவித்தார்.

பிரதமர் மோடி
பிரதமர் மோடி
ஜூலை 25

உத்தரப்பிரதேச முதல்வர் யோகி ஆதித்யநாத், அயோத்தி சென்று, பூமி பூஜைக்கான ஏற்பாடுகள் நடப்பதை மேற்பார்வையிட்டார்.

பிரதமர் மோடி ராம் மந்திரின் பூமி பூஜையில் கலந்து கொள்வது ஒரு வரலாற்றுச் சிறப்புமிக்க தருணமாக இருக்கும். இந்த நிகழ்வு தூர்தர்ஷன் சேனலில் நேரடி ஒளிபரப்பு செய்யப்படும். அதனை மற்ற சேனல்களிலும் ஒளிபரப்புவார்கள்.
ராம் ஜென்மபூமி அமைப்பின் ட்விட்டர் பதிவு
அயோத்தி: `கொரோனா அச்சம்; மோடி குறித்து கவலை!’ - அடிக்கல் நாட்டு விழாவை தவிர்க்கும் உமா பாரதி?
ஆகஸ்ட் 5

இன்று பிற்பகல் 12.30 மணியளவில் பிரதமர் நரேந்திர மோடி, ராமர் கோயில் அமைப்பதற்கான பூமி பூஜையை அடிக்கல் நாட்டித் தொடங்கி வைப்பார் என்று செய்திகள் வெளியாகியுள்ளன.

அடுத்த கட்டுரைக்கு