காவி நிறத்தில் ஒரு புதிய பறவை!

ஒ ரு கருத்து தாக்கத்தை ஏற்படுத்தப் பக்கம் பக்கமாக அது குறித்து விளக்கவேண்டியதில்லை எனத் திருவள்ளுவருக்கு அடுத்து உலகுக்கு உணர்த்தியது ட்விட்டர்தான். இப்படியான ட்விட்டருக்கும் மத்திய அரசுக்கும் இடையே மோதல் நாளுக்கு நாள் வீரியமாகிக்கொண்டே இருக்கிறது. காரணம் என்ன? . டெல்லியில் போராடும் விவசாயிகளுக்கு ஆதரவாக பாப் பாடகர் ரிஹானா, சுற்றுச்சூழல் செயற்பாட்டாளர் கிரேட்டர் துன்பர்க் ட்வீட்டுகள் இட்டதும், அவை இந்திய இறையாண்மைக்கு எதிரானது என கிரிக்கெட் வீரர் சச்சின் முதல் பல பாலிவுட் பிரபலங்கள்வரை எதிர்க்குரல் எழுப்பியதும் பலரும் அறிந்த சர்ச்சை. மத்திய வெளியுறவுத் துறை அமைச்சகம் விளக்கம் கொடுக்குமளவு ஒரு ட்வீட்டுக்கு வலிமை இருக்கிறது என்பது அப்போதுதான் பலருக்கும் புரிந்திருக்கும்.

‘வன்முறையைத் தூண்டும் விதமான ட்விட்டர் பதிவுகளைப் பதிவிடும் கணக்குகள் அனைத்தும் நீக்கப்படவேண்டும்’ என்று ஒரு பட்டியலை நீட்டியது மத்திய அரசு. அதையடுத்து சிலரின் பக்கங்களை ட்விட்டர் நீக்கியது, அவர்களின் தரப்பில் சரியான விளக்கம் கொடுத்ததை அடுத்து அவர்களின் பக்கங்கள் மீண்டும் செயல்பட அனுமதி வழங்கியது. அந்த பட்டியலிலிருந்த பல செயற்பாட்டாளர்கள், ஊடகங்களின் கணக்குகளை நீக்கவும் மறுத்துவிட்டது. “சுதந்திரமாகக் கருத்து தெரிவிப்பது அடிப்படை உரிமை. இந்திய அரசியலமைப்பு சட்டம் அதைத்தான் சொல்கிறது. ட்விட்டர் பயனா ளர்கள் சுதந்திர மாகக் கருத்து களைப் பதிவிடு வதையே நாங்கள் விரும்புகிறோம்’ என்று ட்விட்டர் விளக்கமும் கொடுத்தது.

. ட்விட்டரின் இந்த விளக்கம் அரசை கொதிப் படைய செய்தது. “இந்த உத்தரவை உடனடியாக பின்பற்ற வேண்டும் ட்விட்டர். இதில் விவாதத்திற்கே இடமில்லை. இது இந்த நாட்டின் சட்டம். எங்கள் சட்டங்களை மதிக்க வேண்டியது உங்கள் கடமை. எங்கள் உத்தரவில் ஏதேனும் பிரச்னை இருந்தால் சட்டரீதியாக அதை எதிர்கொள்ளுங்கள்.” என்றது அரசு. இருந்தும் வளைந்துகொடுப்பதாக இல்லை ட்விட்டர். ‘இந்தியாவில் பணிபுரியும் ட்விட்டரின் முக்கிய அதிகாரிகள் கைது செய்யப்படலாம், ஏழு ஆண்டுகள் வரை சிறை அனுபவிக்க வேண்டியது இருக்கும்’ என எச்சரித்தது அரசு.

இந்த மோதலின் எதிரொலியாக, ட்விட்டருக்கு எதிராக மத்திய அமைச்சர்கள் இந்தியச் செயலியான ‘கூ’-வுக்கு ஆதரவு தெரிவித்தனர். பாஜக ஆதரவாளர்களும் ‘கூ’ பக்கம் ஒதுங்கினர். ட்விட்டரைத் தடை செய்ய வேண்டும் என டிவிட்டரிலேயே வினோதமாக டிரெண்ட் செய்தனர் `திடீர்’ கூ ஆதரவா ளர்கள். அதே சமயம், ‘கூ’-வில் சீன முதலீடு இருக்கிறது என குற்றச்சாட்டும் எழுந்தது. அது மிகச்சிறிய அளவிலான பங்கு, அதுவும் தற்போது இல்லை என மீசையில் மண் ஒட்டாத குறையாக விளக்கமளித்தது கூ. ட்வீட்டரில் புளூ டிக் பயன்படுத்தப்படுவதற்கு மாற்றாக ‘கூ’வில் காவிநிற டிக் பயன்படுத்தலாமா என்று பரிசீலிப்பது வரை உக்கிரமானது யுத்தம்.

. இந்தியாவுக்கென பிரத்யேமாக செயலிகளும், சமூக வலைதளங்களும் இருப்பதில் தவறில்லை. ஆனால், எந்த மெனக்கெடலும் இல்லாமல், தொடர்ச்சியாக இப்படியான செயலிகளை மத்தியில் ஆள்பவர்கள் விளம்பரப்படுத்துவது தொடர்கதையாகி வருகிறது. டிக் டாக் தடைசெய்யப்பட்ட பிறகு ஏராளமான செயலிகள் ‘இந்திய செயலிகள்’ என்ற பெயரில் களமிறங்கின. ஆனால், மக்களைக் கவர்ந்ததோ இன்ஸ்டாகிராமின் ரீல்ஸ்தான். டேட்டா பாதுகாப்பு தொடங்கி எதிலும் கவனம் செலுத்தாமல் ‘Made in India’ டேக்கை மட்டும் வைத்து எப்படி பெரும் நிறுவனங்களை எதிர்கொள்ள முடியும் என்பதை நம் நிறுவனங்கள் சிந்தித்துப் பார்த்தல் அவசியம். மேலும் அரசியல் பகையைத் தீர்க்கவோ எதிர்க்குரல்களை ஒடுக்கவோ தேசபக்தி அடையாளங்களைப் பயன்படுத்துவதும் சரியல்ல.

காவி நிறத்தில் ஒரு புதிய பறவை!

ம.காசி விஸ்வநாதன்Follow