Published:Updated:

“உலகின் பிரச்னைகளுக்குத் தீர்வு தரும் நாடாக இந்தியா மாறியிருக்கிறது!”

திருமூர்த்தி
பிரீமியம் ஸ்டோரி
திருமூர்த்தி

ஐ.நா-வுக்கான இந்தியாவின் நிரந்தரப் பிரதிநிதியாக 2020-ல் நியூயார்க் செல்லும் முன், மத்திய வெளியுறவுத்துறை அமைச்சகத்தின் செயலாளராகப் பணியாற்றினேன்

“உலகின் பிரச்னைகளுக்குத் தீர்வு தரும் நாடாக இந்தியா மாறியிருக்கிறது!”

ஐ.நா-வுக்கான இந்தியாவின் நிரந்தரப் பிரதிநிதியாக 2020-ல் நியூயார்க் செல்லும் முன், மத்திய வெளியுறவுத்துறை அமைச்சகத்தின் செயலாளராகப் பணியாற்றினேன்

Published:Updated:
திருமூர்த்தி
பிரீமியம் ஸ்டோரி
திருமூர்த்தி

“கொரோனாப் பரவல் உச்சத்தில் இருந்தபோது நியூயார்க் சென்று இறங்கிய முதல் அதிகாரி நான்தான்” - தீர்க்கமாகச் சிரிக்கிறார் டி.எஸ்.திருமூர்த்தி. தமிழ்நாட்டைச் சேர்ந்த திருமூர்த்தி, இந்திய வெளியுறவுத்துறையில் கடந்த 37 ஆண்டுகளில் வகித்த பதவிகளும் ஆற்றிய பணிகளும் முக்கியத்துவம் வாய்ந்தவை; நெருக்கடியான தருணங்களில் இந்தியாவின் சர்வதேச உறவுகளை முன்னகர்த்திச் சென்றவை. 1985-ம் ஆண்டு குடிமைப்பணியில் சேர்ந்து, அயலுறவுப்பணியைத் தேர்வு செய்த திருமூர்த்தி பணியாற்றிய நாடுகளின் பட்டியல் பெரியது. ஐ.நா-வுக்கான இந்தியாவின் நிரந்தரப் பிரதிநிதியாக 2020-ல் பொறுப்பேற்ற திருமூர்த்தி, கொரோனாப் பெருந்தொற்று தொடங்கி, ரஷ்யா-உக்ரைன் மோதல் வரை நெருக்கடி மிகுந்த நேரங்களில் இந்தியாவின் குரலை உலக அரங்கில் எதிரொலித்தார். தற்போது பணியிலிருந்து ஓய்வுபெற்று, சென்னை திரும்பியிருக்கும் திருமூர்த்தியுடன் உரையாடினேன்.

“சட்டம் பயின்ற உங்களைத் தூதரகப் பணிகள் (Diplomacy) நோக்கி உந்தியது எது? சிவில் சர்வீஸ் தேர்வில் தேர்ச்சி பெற்றதும் அயலுறவுப் பணியைத் தேர்வு செய்தது ஏன்?”

“விவேகானந்தா கல்லூரியில் பி.காம். படித்தேன். நான் ஆடிட்டர் ஆகிவிடுவேன் என்றே எல்லோரும் நினைத்தார்கள். ஆனால், என் உறவினர்கள் சிலர் ஏற்கெனவே சிவில் சர்வீஸ் பணியில் இருந்ததால் நான் அதை நோக்கி ஈர்க்கப்பட்டேன். அதற்காகவே சட்டம் படித்தேன். தூதரகப் பணிகளுக்கும் சட்ட சேவைக்கும் ஒரே மாதிரியான திறமையும் மனப்பக்குவமும் தேவை என்பதை அயலுறவுப்பணியில் சேர்ந்த பிறகுதான் உணர்ந்தேன். நான் பணியில் சேர்ந்த 1985-ம் ஆண்டில், அரசியல் இடையூறுகள் அதிகரிக்கத் தொடங்கியதால் சிவில் சர்வீஸ் பணியின் தன்மையும் மாறத் தொடங்கியது. மேலும், உலகளவில் இந்தியாவின் பிரதிநிதியாக இருக்க அயலுறவுப்பணியில் பெரிய வாய்ப்பு கிடைக்கும் என்று உணர்ந்தேன். அதனால் அயலுறவுப்பணியில் சேர்ந்தேன்.”

“உலகின் பிரச்னைகளுக்குத் தீர்வு தரும் நாடாக இந்தியா மாறியிருக்கிறது!”

“இந்திய வெளியுறவுத்துறையில் உள்நாட்டிலும் அயல்நாட்டிலும் முக்கியத்துவம் வாய்ந்த பதவிகளை நீங்கள் வகித்துள்ளீர்கள். அந்தப் பணிகளின் தன்மை பற்றிச் சொல்லுங்களேன்?”

“ஐ.நா-வுக்கான இந்தியாவின் நிரந்தரப் பிரதிநிதியாக 2020-ல் நியூயார்க் செல்லும் முன், மத்திய வெளியுறவுத்துறை அமைச்சகத்தின் செயலாளராகப் பணியாற்றினேன். அப்போது அரபு, ஆப்பிரிக்க நாடுகளின் உறவுகள், உலக நாடுகளின் வளர்ச்சி மற்றும் மேம்பாட்டுக்காக இந்தியாவின் நிதிப் பங்களிப்புகள், பிரிக்ஸ் (BRICS) கூட்டமைப்பு போன்றவற்றுடனான பொருளாதார உறவுகள் ஆகியவை என் பொறுப்பில் இருந்தன. அதற்கு முன்பு இந்தியாவின் அண்டை நாடுகளான இலங்கை, வங்கதேசம், மாலத்தீவுகள், மியான்மர் ஆகிய நாடுகளுக்கான வெளியுறத்துறை இணைச் செயலாளராகப் பணியாற்றினேன். நான் பொறுப்பில் இருந்த இந்தக் காலகட்டத்தில்தான் இலங்கை இறுதிப்போர், மாலத்தீவு மற்றும் வங்கதேசத்தில் ஆட்சி மாற்றம், மியான்மரில் தேர்தல் என அந்த நாடுகளின் போக்கையே மாற்றிய நிகழ்வுகள் அரங்கேறின.

அமெரிக்க ஜனாதிபதியாக ஜார்ஜ் புஷ் இருந்த காலகட்டத்தில், வாஷிங்டனில் இந்திய அயலுறவுப்பணியில் இருந்தேன். இந்திய-அமெரிக்க இருதரப்பு உறவில் மிகப் பெரிய முன்னகர்வு ஏற்பட்டது இந்தக் காலகட்டத்தில் தான். இந்தோனேசியாவுக்குப் பிறகு, மலேசியாவில் உயர் ஆணையராக 4 ஆண்டுகள் இருந்த பதவிக் காலம் என்னால் மறக்க முடியாத ஒன்று.”

“பாலஸ்தீனத்தை ஒரு நாடாக முதலில் அங்கீகரித்த உலக நாடுகளில் இந்தியாவும் ஒன்று. பாலஸ்தீன தேசிய ஆணையத்துக்கான முதல் இந்தியப் பிரதிநிதி நீங்கள். இஸ்ரேலுடன் இந்தியா இன்று நெருக்கமான உறவைப் பின்பற்றிவரும் நிலையில், இந்திய-பாலஸ்தீன உறவு எந்த நிலையில் இருப்பதாகக் கருதுகிறீர்கள்?”

“நான் அரபு மொழியில் தேர்ச்சி பெற்றதால் எகிப்து, பாலஸ்தீனம் ஆகிய இடங்களில் பணியாற்றினேன். கெய்ரோவில் பணியாற்றியபோது, நைல் நதிக் கரையின் காபி ஷாப்களில், நோபல் பரிசு பெற்ற எழுத்தாளர் நகுய்ப் மஹ்ஃபூஸ் (Naguib Mahfouz) அவர்களைச் சந்தித்துப் பேசிய அனுபவங்கள் மறக்கமுடியாதவை.

யாசர் அராபத் பாலஸ்தீன அதிபராக இருந்த காலகட்டத்தில்தான், பாலஸ்தீனத்துக்கான இந்தியாவின் முதல் பிரதிநிதியாக நியமிக்கப்பட்டு, காஸாவில் இரண்டு ஆண்டுகளுக்கு மேல் பணியாற்றினேன். இந்தியா இஸ்ரேலுடன் தற்போது மிகச்சிறந்த உறவைக் கொண்டிருக்கிறது. இந்தியாவில் யூதர்கள் 2,000 ஆண்டுகளாக வாழ்ந்துவந்தாலும், யூத இனவெறிக்கான (anti semitism) எந்தத் தடமும் இந்தியாவில் கிடையாது. இஸ்ரேலுடனான நம் உறவு உண்மையில் பலதரப்பட்ட ஒன்றாகப் பரிணமித்திருக்கிறது. மற்றொருபுறம் நாம் பாலஸ்தீனத்துக்குத் தீவிர ஆதரவாளராக இருந்துவந்திருக்கிறோம். பாலஸ்தீனியர்களும் இஸ்ரேலியர்களும் அருகருகே அமைதியும் பாதுகாப்புமாக வாழக்கூடிய இருதேச அரசுத் தீர்வையே (two-state solution) இந்தியா தொடர்ந்து வலியுறுத்திவருகிறது. ஐ.நா பாதுகாப்பு கவுன்சிலிலும்கூட நாம் இரு தேச அரசுத் தீர்வுக்காகத் தொடர்ந்து குரல் கொடுத்துவருகிறோம். ஆகவே, இஸ்ரேலுடன் நல்லுறவைப் பேணுவதிலும், பாலஸ்தீனத்துக்கான நம்முடைய தொடர் ஆதரவிலும் எந்த முரண்பாடும் இல்லை.”

“உலகின் பிரச்னைகளுக்குத் தீர்வு தரும் நாடாக இந்தியா மாறியிருக்கிறது!”

“ஐ.நா-வுக்கான இந்தியாவின் நிரந்தரப் பிரதிநிதியாக நீங்கள் பதவிவகித்த காலகட்டத்தில் கொரோனாப் பரவல், தாலிபன்கள் ஆப்கனை மீண்டும் கைப்பற்றியது, ரஷ்யா-உக்ரைன் மோதல் என உலக அரசியலில் மிகப்பெரிய நிகழ்வுகள் அரங்கேறின. இந்தப் பிரச்னைகளில் இந்தியாவின் பிரதிநிதியாக நீங்கள் செயல்பட்ட அனுபவங்களைச் சொல்லுங்களேன்?”

“நான் ஐ.நா-வில் பணியாற்றிய இரண்டு ஆண்டுகளும் உண்மையிலே முக்கியத்துவம் வாய்ந்தவைதான். குறிப்பாக, பாதுகாப்புக் கவுன்சிலில் இந்தியா இருந்த காலகட்டத்தைச் சொல்லலாம். ஆரம்பத்தில் நாம் கோவிட் பெருந்தொற்றைச் சமாளிக்க வேண்டியிருந்தது. வளரும் நாடுகளுக்கு மருந்துகள், மருத்துவ உபகரணங்களை வழங்கும் உயிர்நாடியாக நாம் விரைவில் மாறினோம். வளர்ந்த நாடுகள் தமக்கெனத் தடுப்பூசிகளைப் பதுக்கி வைத்துக்கொண்டு வளரும் நாடுகளுக்குத் தடுப்பூசிகள் கிடைக்காமல் செய்தபோது, தடுப்பூசிகளை வழங்க இந்தியா முன்வந்தது.

கடந்த ஆண்டு ஆகஸ்ட் மாதம் ஆப்கானிஸ்தானில் தாலிபன்கள் மீண்டும் அதிகாரத்துக்கு வந்தபோது, பாதுகாப்புக் கவுன்சிலின் தலைமைப் பொறுப்பு இந்தியா வசம் இருந்தது. அப்போது பல அமர்வுகள், விவாதங்களுக்கு நான் தலைமை தாங்கினேன். ஆப்கானிஸ்தான் பற்றிய மிக முக்கியமான தீர்மானம் நிறைவேற்றப்பட்டது அப்போதுதான். பாதுகாப்புக் கவுன்சிலில் இந்தக் காலகட்டத்தில் இந்தியாவின் இருப்பு, தாலிபன் தடைகள் குழுவின் (Taliban Sanctions Committee) தலைவராக விவாதங்களை ஒருமுகப்படுத்தவும், பாதகமான வெளிப்புறக் குறுக்கீடுகளைத் தவிர்க்கவும் உதவியது. இந்தியாவுக்கு எதிரான பயங்கரவாத நடவடிக்கைகளுக்கு ஆப்கானிஸ்தான் களமாக இருக்கக்கூடாது என்பதற்கும், அங்கு பெண்கள் மற்றும் சிறுபான்மையினரின் உரிமைகள் மதிக்கப்படுவதை உறுதிசெய்வதற்கும் இந்தியா தொடர்ந்து செயலாற்றி தாலிபன்களைப் பொறுப்பேற்க வைக்கும்.

உக்ரைன் மோதல் நிச்சயமாக ஐ.நா-வில் நம் பலதரப்பு ராஜ்ஜிய உறவுகளுக்கான சோதனையாக அமைந்தது. குறிப்பாக, உக்ரைனில் 23,000-க்கும் அதிகமான இந்தியர்கள் இருந்ததால் முன்னுரிமை அடிப்படையில் அவர்களை வெளியேற்றிக் கொண்டுவரவேண்டியிருந்தது. பாதுகாப்பு கவுன்சிலில் இருப்பதால், நம்முடைய குரல் முக்கியத்துவம் வாய்ந்ததாக இருந்தது. நம் ஆதரவு மற்றவர்களுக்கு இன்றியமையாததாகவும் இருந்தது. மோதலின் பெரும்பாலான காலகட்டம் தொடங்கி ஜூன் மாதம் ஓய்வுபெறும் வரை நான் நிரந்தரப் பிரதிநிதியாக இருந்தேன். எல்லாத் தரப்பிலுமிருந்து வரும் அழுத்தங்களுக்கு மத்தியிலும் நமது அரசாங்கம் சுட்டிக்காட்டிய புள்ளியில் நம்மை நிலைநிறுத்தும் பொறுப்பு இயல்பாகவே என்னிடம் ஒப்படைக்கப்பட்டது. அதை வெற்றிகரமாக மேற்கொண்டேன்.

பாதுகாப்புக் கவுன்சிலில் மாறுபட்ட கருத்துகளுக்கு இடையே ஒரு பாலமாகச் செயல்பட முடியும் என்பதை நம்முடைய செயல்பாட்டின் வழி உணர்த்தினோம். அதே சமயம் தேவையான இடங்களில் சுதந்திரமான கருத்துகளை முன்வைக்கவும் நாம் தயங்கவில்லை.”

“இத்தனை ஆண்டுகால உலகளாவிய பணி அனுபவம் தனிப்பட்ட வகையில் உங்களுக்குக் கற்றுக்கொடுத்தது என்ன?”

“பல்லாண்டுக்கால அயலுறவுப்பணியில் ஏராளமானவற்றை நான் கற்றுக்கொண்டுள்ளேன். அயல்நாட்டில் நாம் என்ன செய்தாலும் அது ஏதாவது ஒரு வகையில் இந்தியாவுக்கோ, நம்முடைய மாநிலங்களுக்கோ உதவும் வகையில் இருக்க வேண்டும் என்பதை உறுதிசெய்வது முக்கியம். இதை நான் கற்றுக்கொண்டவற்றுள் முக்கியமானதாகக் கருதுகிறேன். இந்தியாவின் பலம் அல்லது பலவீனம் மிகைப்படுத்தப்படாமல், நம் நலன்கள் உறுதிசெய்யப்பட வேண்டும். நம்மீதான நம்பகத்தன்மையை இது உருவாக்குகிறது. கோவிட்-19 பெருந்தொற்று, காலநிலை மாற்றம், டிஜிட்டல் புரட்சி, தெற்குலக நாடுகளுடனான வளர்ச்சிக் கூட்டாண்மை, வளங்குன்றா நீடித்த வளர்ச்சியை எட்டுவது போன்ற உலகளாவிய பிரச்னைகள், அம்சங்களை எதிர்கொள்வதற்கான தீர்வின் ஒருபகுதியை வழங்கும் நாடாக இந்த ஆண்டுகளில் இந்தியா மாறியிருக்கிறது. இது ஒரு நல்ல சூழ்நிலை.”