ரூ.20 லட்சம் கோடி நிதி உதவி... பொருளாதார மீட்சிக்கு வழிவகுக்குமா?

க டந்த டிசம்பர் மாதம் ஆரம்பித்த கொரோனா பிரச்னை இன்னமும் ஓயவில்லை. . ஆரம்பத்தில் நாடு நாடாகப் பரவி, இப்போது மாநிலம், மாவட்டம், கிராமம், மக்கள் அதிகம் நடமாடும் தெருக்கள் என நெருங்கி வந்து, அனைவருக்கும் மாபெரும் அச்சத்தையும் உயிர் பயத்தையும் காட்டிக்கொண்டிருக்கிறது கொரோனா.

. `கொரோனாநோய்த் தொற்று பரவாமலிருக்க, ஊரடங்கு பிறப்பிப்பதுதான் ஒரே வழி’ என்று சீனா காட்டிய வழியில் உலக நாடுகள் அனைத்தும் சென்றன. அடுத்துவந்த இரண்டு மாதங்களுக்கு உலகம் முழுக்க தொழிற்சாலைகள் மூடப்பட்டன. மக்கள் வெளியே வருவது தடைசெய்யப்பட்டது. அத்தியாவசியப் பொருள்கள் விற்பனை தவிர பிற வர்த்தகங்கள் அனைத்தும் முடங்கின. இதனால் பொருளாதாரச் சரிவு சமீபத்தில் கண்டிராத அளவுக்கு ஏற்பட்டது. பலகோடிப் பேர் வேலையை இழந்தனர்.

இந்த நிலையில் மீண்டும் பொருளாதார வளர்ச்சி ஏற்பட வேண்டுமெனில், அந்தந்த நாட்டு அரசாங்கங்கள் மிகப்பெரிய அளவில் நிதியுதவி செய்தாக வேண்டும் என்பதைப் புரிந்துகொண்டு, ஒவ்வொரு நாடும் ஒவ்வோர் அளவில் நிதியுதவித் திட்டங்களை அறிவித்தன. கொரோனா தொற்றால் அதிகம் பாதிக்கப்பட்டிருக்கும் அமெரிக்கா, தன் நாட்டு மக்களுக்காக 2.2 ட்ரில்லியன் டாலர் நிவாரண நிதியை (உள்நாட்டு உற்பத்தியில் 13%) ஒதுக்கியது. அதேபோல, கொரோனாவால் பாதிக்கப்பட்ட மற்ற உலக நாடுகளும் ஏராளமான நிதியை ஒதுக்கியிருக்கின்றன.

கொரோனாவால் நம் நாட்டில் பெரிய அளவில் உயிர்ச்சேதம் எதுவும் இதுவரை ஏற்படவில்லையென்றாலும், பொருளாதாரச் சரிவு குறிப்பிடத்தகுந்த அளவு ஏற்பட்டிருக்கிறது. `நம் ஜி.டி.பி 5 சதவிகிதத்துக்குமேல் இருந்தது வேகமாகச் சரிந்து தற்போது பூஜ்ஜியம் சதவிகித வளர்ச்சியைக் காணும்’ என சர்வதேச ரேட்டிங் நிறுவனங்கள் கணிப்பு வெளியிட்டு வருகின்றன.

`பொருளாதாரச் சரிவைத் தடுத்து நிறுத்தி, மீண்டும் வளர்ச்சியைக் கொண்டுவருவதற்கு அமெரிக்கா, கனடா, ஜப்பான் போன்ற உலக நாடுகள் பெருமளவில் நிதியுதவித் திட்டங்களை அறிவித்ததுபோல, நமது மத்திய அரசாங்கமும் அறிவிக்க வேண்டும்’ என்ற கோரிக்கை கடந்த சில வாரங்களாக சாதாரண மக்கள் முதல் தொழில்துறை வட்டாரங்கள் வரை பரவலாக முன்வைக்கப்பட்டது.

. இந்தக் கோரிக்கையை நிறைவேற்றுவது மாதிரி, `ரூ.20 லட்சம் கோடி மதிப்பில் நிதியுதவித் திட்டங்கள் அறிவிக்கப்படும்’ என்று அறிவித்தார் பிரதமர் நரேந்திர மோடி. இந்த அறிவிப்பு வந்த அடுத்த நாள் ரூ.20 லட்சம் கோடிக்கான நலத்திட்டங்களை அறிவித்தார் நிதியமைச்சர் நிர்மலா சீதாராமன். அவர் அறிவித்ததில் முக்கியமான அம்சங்கள்...

. 15 அம்சத் திட்டங்கள்!

சிறு, குறு தொழில் முனைவோர்களுக்கு வங்கிகளில் கடனுதவி வழங்கப்படும். இதற்கு அடமானமாகச் சொத்துகள் எதையும் காட்டத் தேவையில்லை. உத்தரவாதத்தை அரசு வழங்கும். இதற்காக ரூ.3,00,000 கோடி ஒதுக்கீடு.

நெருக்கடியிலுள்ள சிறு, குறு நிறுவனங்களுக்குச் சிறப்பு கடன் உதவி. இதற்கு ரூ.20,000 கோடி ஒதுக்கீடு. இந்தத் திட்டத்தின்கீழ் இரண்டு லட்சம் சிறு, குறு நிறுவனங்கள் பயனடையும்.

வாராக்கடன் பட்டியலிலுள்ள நிறுவனங்களுக்குக் கடன் வழங்க அரசே உத்தரவாதம் தரும்.

வங்கியல்லாத தொழில் நிறுவனங்கள், வீட்டுக் கடன் வழங்கும் நிறுவனங்கள் மற்றும் குறுங்கடன் வழங்கும் நிறுவனங்கள் ஆகியவற்றில் பணப்புழக்கத்தை அதிகரிப்பதற்காக, அந்த நிறுவனங்கள் வழங்கும் கடனுக்கு இந்திய அரசு பகுதி அளவு உத்தரவாதம் அளிக்கும். இந்தக் கடன்கள் மூலம் அந்த நிறுவனங்களுக்கு ஏற்படும் முதல் 20% இழப்பை இந்திய அரசு ஏற்றுக்கொள்ளும். இதற்காக ரூ.45,000 கோடி ஒதுக்கப்பட்டுள்ளது.

வங்கியல்லாத நிதி நிறுவனங்கள், வீட்டுக் கடன் வழங்கும் நிதி நிறுவனங்கள் மற்றும் குறுங்கடன் வழங்கும் நிறுவனங்கள் ஆகியவற்றில் பணப்புழக்கத்தை அதிகரிப்பதற்காக ரூ.30,000 கோடி மதிப்பில் சிறப்புத் திட்டம் ஒன்றை மத்திய அரசு தொடங்கவிருக்கிறது.

மின்சார விநியோகத்தில் ஈடுபட்டிருக்கும் நிறுவனங்கள், நிதி நெருக்கடியிலிருந்து மீண்டுவர ரூ.90,000 கோடி வழங்கப்படும்.

. டி.டி.எஸ் (TDS) மற்றும் டி.சி.எஸ் (TCS) வரிப் பிடித்தங்கள் தற்போதுள்ள அளவிலிருந்து 25% குறைக்கப்படும். இது இந்த நிதியாண்டின் மீதமுள்ள பகுதி முழுவதும், அதாவது 31 மார்ச், 2021 வரை அமலில் இருக்கும். இதன் மூலம் மக்களிடம் சுமார் 50,000 கோடி ரூபாய் அளவுக்குப் பணப்புழக்கம் அதிகரிக்கும். 2019-2020-ம் நிதியாண்டுக்கான வருமான வரித் தாக்கல் செய்வதற்கான கால அளவு ஜூலை 31-ம் தேதி முதல் நவம்பர் 30-ம் தேதி வரை நீட்டிக்கப்படுகிறது.

. பொருளாதார வளர்ச்சிக்கு உதவும் வகையில் தொழில்துறை மீண்டும் ஊக்கத்துடன் செயல்பட உதவும் பல நடவடிக்கைகளை மத்திய நிதியமைச்சர் நிர்மலா சீதாராமன் அறிவித்தார்.

பொருளாதாரம் மீண்டும் வேகமான வளர்ச்சியைக் காண வேண்டுமெனில் மத்திய அரசாங்கம் ஒதுக்கியிருக்கும் நிதி போதுமானதா, அவர்களின் திட்டங்கள் ஏற்புடையதாக இருக்கின்றனவா என்பதைத் தெரிந்துகொள்ள சில பொருளாதார நிபுணர்களிடமும், தொழில்துறையைச் சார்ந்தவர்களிடமும் பேசினோம். முதலில் பங்குச் சந்தை நிபுணர் வ.நாகப்பனுடன் பேசினோம்.

ஓப்பனிங் சரி; ஆனா, ஃபினிஷிங்?

“எதிர்பார்க்காதது நடக்கும் போது ஆச்சர்யமாகவும், அதிர்ச்சியாகவும்தான் இருக்கும். அப்படித்தான் இருக்கிறது தற்போதைய மத்திய அரசின் நடவடிக்கைகள். `கைதட்டுங்கள், விளக்கு ஏற்றுங்கள்...’ போன்ற விஷயங்களை எதிர்பார்த்துப் பழகிய எனக்கும், திடீரென ரூ.20 லட்சம் கோடிக்கான நலத்திட்ட அறிவிப்புகளைக் கேட்கும்போது ஆச்சர்யமான அதே உணர்வுதான்.

நிதியமைச்சரின் நலத்திட்ட அறிவிப்புகள் குறிப்பாக, சிறு, குறுந்தொழில் நிறுவனங்களைச் சார்ந்து அமைந்திருந்தன. பொருளாதாரத்தின் முதுகெலும்பாக இருப்பது எஸ்.எம்.இ நிறுவனங்கள்தான். அவற்றுக்கான நலத்திட்டங்கள்தான் இப்போது முக்கியம் என்பதை உணர்ந்ததாலேயே, எஸ்.எம்.இ-களுக்கான அறிவிப்புகளை முதலில் அறிவித்திருக்கிறார். ஆனால், ‘ஓப்பனிங் எல்லாம் சரியாத்தான் இருக்கு; ஆனா, ஃபினிஷிங் சரியில்லையே...’ என்று சொல்லும்படியாக மத்திய அரசின் நடவடிக்கைகளும், வங்கியின் அணுகுமுறையும் இருந்துவிடக் கூடாது. இன்னும் ஏழை எளிய மக்களுக்கான அறிவிப்புகள் வர வேண்டும்’’ என்றார்.

. கடனுக்கான வட்டியைக் குறையுங்கள்!

குறுந்தொழில் அமைப்பான ‘டாக்ட்’ அமைப்பின் கோவை மாவட்டத் தலைவர் ஜே.ஜேம்ஸ், “நிதியமைச்சரின் அறிவிப்புகளில் சிறு, குறுந்தொழில் நிறுவனங்களுக்கான வரையறையை மாற்றியமைத்திருப்பதை வரவேற்கிறோம். தற்போது நவீன இயந்திரங்களின் விலை லட்சக்கணக்கில் இருக்கும்போது, எஸ்.எம்.இ நிறுவனங்களுக்கான வரையறையை உயர்த்தியிருப்பது பலனளிக்கும்.

. அதேபோல சிறு, குறுந்தொழில் நிறுவனங்களுக்குக் கடனுதவி வழங்குவதற்காக ரூ.3 லட்சம் கோடி ஒதுக்கியிருப்பதாக அறிவித்திருப்பதையும் வரவேற்கிறோம். இதன் மூலம், `வங்கிகளில் நான்கு ஆண்டுத் தவணையில் பிணையில்லாத கடன்கள் வழங்கப்படும்’ என்று கூறியிருக்கிறார்கள். ஆனால், வங்கிகள் தரப்பில் இதை எவ்வாறு செயல்படுத்துவார்கள் என்பதுதான் கேள்விக்குறியாக இருக்கிறது. இன்றைய நிலையில், வங்கிகளைப் பொறுத்தவரை, நிறுவனங்களுக்குக் கடன் வழங்குவதற்கு நிறைய விதிமுறைகள் வைத்திருக்கிறார்கள். `கடந்த ஆண்டுகளில் நிறுவனத்தின் வரவு செலவு இருப்புநிலைகளைப் பார்த்துக் கடன் அளிக்கப்படும்’ என்கிறார்கள்.

. ஆனால், இந்தியாவில் கடந்த மூன்று ஆண்டுகளாகவே பொருளாதார மந்தநிலையின் காரணமாக நிறுவனங்களின் வருமானம் குறைவாகவே இருந்திருக்கிறது. . இந்தச் சூழலில், நிறுவனத்தின் வரவு செலவுக் கணக்கின் அடிப்படையில் இல்லாமல், நிறுவனம் எம்.எஸ்.எம்.இ-யில் பதிவு செய்யப்பட்டிருக்கிறதா, இதில் செய்யப்பட்டுள்ள முதலீடு எவ்வளவு என்பதையெல்லாம் மதிப்பிட்டு, அதன் அடிப்படையில் கடன் வழங்கலாம். `இப்படிக் கூடுதலாக வழங்கப்படும் கடன்களுக்கு வட்டி விகிதத்தை ஆறு சதவிகிதமாகக் குறைக்க வேண்டும்’ என்று கேட்டிருந்தோம். அப்படிக் குறைப்பது குறித்து எந்த அறிவிப்பும் இல்லை” என்றார்.

. ஏமாற்றத்தை அளிக்கிறது!

பொருளாதார நிபுணரான ஜோதி சிவஞானம், “பிரதமர் அறிவித்தபடி ரூ.20 லட்சம் கோடிக்கான முழுமையான திட்டங்களை நிதியமைச்சர் அறிவிக்க வில்லை. சிறு, குறு நிறுவனங்களுக்கான வரையறையை தற்போது மாற்றியிருப்பது தேவையற்றது. பி.எஃப் பிடித்தத்தில் 12% என்பதை 10%-ஆகக் குறைத்ததில் அரசின் பங்களிப்பும் கிடையாது. இதை ஒரு கணக்காகக் காட்டுவது வேடிக்கை. அதேபோல சிறு, குறு நிறுவனங்களுக்கு நேரடி நிதியுதவி எதுவும் அறிவிக்கவில்லை. ஆனால், ஏற்கெனவே நிறுவனங்களுக்குத் தர வேண்டிய நிலுவைத் தொகையைத் தருவதையெல்லாம் ஊக்கத்தொகைபோல கணக்கில் காட்டுகிறார்கள். இது எந்த விதத்தில் நியாயம்? இத்தனை நாளும் தராத பணத்தை வட்டியுடன் அரசாங்கம் தரட்டுமே!

பெரிய கார்ப்பரேட் நிறுவனங்களுக்கு பல்லாயிரம் கோடிக்குக் கடன் தந்த வங்கிகள், சிறிய நிறுவனங்களை நம்பி கடன்கொடுக்கத் தயாராக இல்லை. எனவே, இந்த அறிவிப்பு ஏமாற்றத்தையே அளிக்கிறது’’ என்றார்.

. வட்டியைக் குறையுங்கள்!

கொடீசியா அமைப்பின் முன்னாள் தலைவர் இளங்கோ, “சிறு, குறுந்தொழில் நிறுவனங்களுக்காக வெளியிட்டிருக்கும் திட்டங்கள் வரவேற்கத்தக்க வகையில்தான் இருக்கின்றன. ஆனால் அவை அனைத்தும் சரியாக நடைமுறைப்படுத்தப்படுமா என்பது கேள்விக்குறியாக இருக்கிறது.

. சிறு, குறு தொழில் நிறுவனங்கள் ஏற்கெனவே கடன் சிக்கலில்தான் இருக்கின்றன. மீண்டும் அவர்களுக்குக் கடன் தர மட்டுமே அரசாங்கம் முன்வந்திருக்கிறது. நாங்கள் கேட்பதெல்லாம் கடனுக்கான அதிகபட்ச வட்டிக் குறைப்புதான். தற்போது சராசரியாக இருக்கும் 12% வட்டியை, 5-6 சதவிகிதமாகக் குறைத்தால் மிகவும் பயனுள்ளதாக இருக்கும். பி.எஃப் செலுத்துவதில் இரண்டு சதவிகிதத்தைக் குறைத்திருப்பதற்கு பதிலாக, `தொழிலாளர்களும் தொழில் முனைவோர்களும் மூன்று மாதங்கள் பி.எஃப் பணத்தைச் செலுத்த வேண்டாம்’ என்று சொல்லியிருக்கலாம்’’ என்றார்.

ரூ.20 லட்சம் கோடியில், இதுவரை மொத்தம் ரூ.15.74 லட்சம் கோடிக்கான அறிவிப்புகளை மத்திய அரசாங்கம் வெளியிட்டிருக்கிறது.

மீதமிருக்கும் ரூ.4.26 லட்சம் கோடிக்கான அறிவிப்புகள் எப்போது வெளியாகும் என்பதையும், இந்த அறிவிப்புகளால் பொருளாதாரம் எந்த வகையில் முன்னேற்றம் காணும் என்பதையும் பார்க்க, நாம் ஆவலுடன் காத்திருப்போம்!

. ரூ.20 லட்சம் கோடி நிதி உதவிக் கணக்கு!

. பிப்ரவரி 6 : ரிசர்வ் வங்கியின் லிக்விடிட்டி செயல்பாடுகள் மூலம் அறிவிக்கப்பட்ட தொகை ரூ.2.80 லட்சம் கோடி (ஜி.டி.பி-யில் 1.4%).

மார்ச் 27 : ரிசர்வ் வங்கியின் லிக்விடிட்டி செயல்பாடுகள் மூலம் அறிவிக்கப்பட்ட தொகை 3.74 லட்சம் கோடி (ஜி.டி.பி-யில் 1.8%) மற்றும் நிதியமைச்சர் நிர்மலா சீதாராமன் அறிவித்த நிதி தொகுப்பு ரூ.1.70 லட்சம் கோடி (ஜி.டி.பி-யில் 0.85%).

ஏப்ரல் 17 : நீண்டகால இலக்குகொண்ட ரெப்போ செயல்பாடு (TLTRO 2.0) மூலம் அறிவிக்கப்பட்டது ரூ.50,000 கோடி (ஜி.டி.பி-யில் 0.25%) மற்றும் Sidbi, Nabard and NHB ஆகியவற்றின் மறு நிதியளிப்பின் மூலம் கிடைத்த தொகை ரூ.50,000 கோடி (ஜி.டி.பி-யில் - 0.25%).

ஏப்ரல் 27 : சிறப்பு லிக்விடிட்டி வசதிகளை மியூச்சுவல் ஃபண்டுகளுக்கு வழங்கியதன் மூலம் அறிவிக்கப் பட்டது ரூ.50,000 கோடி (ஜி.டி.பி-யில் 0.25%).

மே 13 : நிர்மலா சீதாராமன் அறிவித்த நிதித் தொகுப்பு ரூ.5,94,450 லட்சம் கோடி (ஜி.டி.பி-யில் - 2.9%).

மொத்தம் : இதுவரை வெளியான அறிவிப்புகளின் மதிப்பு ரூ.15.74 லட்சம் கோடி. இது மொத்த ஜி.டி.பி-யில் 7.87%. இன்னும் அறிவிப்பு வர வேண்டிய தொகையின் மொத்த மதிப்பு ரூ.4.26 லட்சம் கோடி. இது ஜி.டி.பி-யில் 2.13%.

. உலக நாடுகளின் கொரானா நிதி - ஜி.டி.பி சதவிகிதம்!

. கொரோனா பாதிப்பிலிருந்து மீண்டுவர இந்தியா உட்பட உலக நாடுகள் அறிவித்துள்ள நிதியுதவித் திட்டத்தின் அளவு அதன் ஜி.டி.பி-யில் பங்கு (நாடு வாரியாக, சதவிகிதத்தில்)

. ரியல் எஸ்டேட் திட்டங்கள் நிறைவுக் காலம்: 9 மாதங்கள் நீட்டிப்பு!

மார்ச் 25 அல்லது அதற்குப் பிறகு திட்டமிடப்பட்ட நிறைவுத் தேதியைக்கொண்ட அனைத்து ரியல் எஸ்டேட் திட்டங்களுக்கும் நிறைவுக் காலம் ஆறு மாதம் நீட்டிக்கப்பட்டிருக்கிறது. உள்ளூர் நிலைமைகளைக் கருத்தில்கொண்டு, மேலும் மூன்று மாத கால அவகாசத்தை ரியல் எஸ்டேட் கட்டுப்பாட்டு அமைப்பான ரெரா அனுமதிக்க மத்திய அரசு அனுமதி அளித்திருக்கிறது.

ஊரடங்கு மற்றும் தொழில் முடக்கத்தின்போது மொத்த கட்டுமான வேலைகளும் நிறுத்தப்பட்டதால், ரியல் எஸ்டேட் திட்டங்களை நிறைவு செய்வதில் தாமதம் ஏற்பட்டிருக்கும். இந்த நிறைவுக் காலம் நீட்டிப்பு மூலம் நடந்துகொண்டிருக்கும் பெரும்பாலான திட்டங்களை இயல்புநிலைக்குக் கொண்டுவரும். திட்டங்களில் `காலதாமதம்’ என்ற கெட்ட பெயர் மற்றும் ரெரா அமைப்பு அபராதம் விதிப்பது தடுக்கப்படுகிறது. ரெரா அமைப்பில் இந்தியா முழுக்கப் பதிவுசெய்யப்பட்ட 50,000-க்கும் மேற்பட்ட திட்டங்களின் காலக்கெடுவை ஒவ்வொரு திட்டமாக ஆராய்ந்து நீடிப்பது சாத்தியமில்லை என்பதால், ஒட்டுமொத்தமாக அனைத்துத் திட்டங்களுக்கும் இப்போது ஆறு மாதங்கள் நீடிக்கப்பட்டிருக்கிறது.

`ஆறு மாதங்கள் தாமதமாக இருந்தாலும், வீடுகள் கட்டி முடிக்கப்பட்டுக் கிடைக்கும் என்பதால், இது வீட்டு உரிமையாளர்களின் நலனைப் பாதுகாக்கும்’ என்று மத்திய அரசாங்கம் தெரிவித்துள்ளது.

-சேனா

ரூ.20 லட்சம் கோடி நிதி உதவி... பொருளாதார மீட்சிக்கு வழிவகுக்குமா?

செ.கார்த்திகேயன்Follow

தெ.சு.கவுதமன்