‘ஷாக் கொடுக்கும் அரசு!' - குடிநீரைத் தொடர்ந்து மின்சாரமும் தனியார்மயம்...

கு டிநீர் விநியோகத்தைத் தொடர்ந்து மின்வாரியத்தையும் தனியார்மயமாக்கும் முயற்சியாக மின் பகிர்மானத்தைத் தனியாரிடம் தமிழக அரசு ஒப்படைத்திருக் கிறது. நெல்லை மாவட்டம் நாங்குநேரி சிறப்புப் பொருளாதார மண்டலத்தில் இருந்து அதற்கான முயற்சி தொடங்கப் பட்டிருப்பதாக மின்வாரியத் தொழிலாளர்கள் சங்கத்தினர் குற்றம்சாட்டுகின்றனர். இதற்கு எதிர்ப்புத் தெரிவித்து, போராட்டத்தில் குதிக்கவும் அவர்கள் தயாராகி வருகின்றனர்.

இதுகுறித்து தமிழ்நாடு மின் ஊழியர் மத்திய அமைப்பின் பொதுச் செயலாளரான ராஜேந்திரனிடம் பேசினோம்.

. “நாட்டின் மொத்த மின் உற்பத்தி 3,44,689 மெகாவாட். இதில் 1,57,136 மெகாவாட் மின்சாரத்தைத் தனியார் நிறுவனங்கள் உற்பத்தி செய்கின்றன. ஏற்கெனவே, மின் உற்பத்தி தனியாரிடம் சென்றுவிட்ட நிலையில், மின் பகிர்மானமும் தனியாரிடம் கொடுக்கும் முயற்சிகள் தொடங்கிவிட்டன. அதற்கு அடிப்படையாக அமைந்தது உதய் மின் திட்டம்தான். ஜெயலலிதா முதல்வராக இருந்தபோது உதய் மின் திட்டத்துக்கு எதிர்ப்புத் தெரிவித்தார். ஆனால், மத்திய அரசின் நெருக்கடிக்குப் பயந்து இப்போதைய மாநில அரசு அந்தத் திட்டத்தில் கையெழுத்திட்டுவிட்டது. இதைத் தொடர்ந்தே மின் உற்பத்தி மற்றும் பகிர்மானத்தை மேற்கொள்ள அனுமதி கோரி 762 தனியார் நிறுவனங்கள் அரசிடம் அனுமதி கேட்டிருக்கின்றன. அதன்படி நாங்குநேரி சிறப்புப் பொருளாதார மண்டலத்தில், 2018 ஆகஸ்ட் 18-ம் தேதி முதல் 2042-ம் ஆண்டு ஆக்ஸ்ட் 17-ம் தேதி வரை 24 வருடங்களுக்குத் தனியார் நிறுவனங்கள் மின் பகிர்மானம் செய்துகொள்ள, கடந்த டிசம்பர் மாதம் தமிழ்நாடு மின்சார ஒழுங்குமுறை ஆணையத்துடன் ஒப்பந்தம் செய்யப்பட்டிருக்கிறது.

தனியார் நிறுவனங்கள் தொழிற்சாலைகளுக்கு யூனிட் ஒன்றுக்கு ரூ. 6.35 என்கிற விலையும், வர்த்தக நிறுவனங்களுக்கு யூனிட்டுக்கு எட்டு ரூபாய் விலையும் வசூலிக்க ஒப்பந்தத்தில் அனுமதி அளிக்கப்பட்டிருக்கிறது. தவிர, தனியார் நிறுவனங்கள் தாங்களே நுகர்வோரைத் தேர்வுசெய்துகொள்ளவும் அனுமதி அளித்துள்ளனர். இதன்படி, 100 யூனிட்டுக்குக் குறைவாகப் பயன்படுத்தும் ஏழைகளின் வீடுகள், சிறு கடைகளுக்குத் தனியார் நிறுவனங்கள் இணைப்பு வழங்காது.

. நாங்குநேரியில் தனியாருக்கு அனுமதி வழங்கியதன் மூலம் அதைத் தமிழகம் முழுவதும் விரிவுபடுத்தவும் அரசு திட்டமிட்டிருக்கிறது. தமிழக மின்சார வாரியம் என்பது சேவை நிறுவனம். அதைத் தனியாரிடம் கொடுப்பதால் லாப நோக்கத்தில் செயல்பட்டுப் பொதுமக்களுக்குச் சிரமத்தை ஏற்படுத்தி விடுவார்கள். விரைவில் பொதுமக்களுடன் இணைந்து போராட்டத்தில் ஈடுபடுவோம்’’ என்றார் காட்டமாக.

தமிழ்நாடு மின் ஊழியர் மத்திய அமைப்பு மாநிலச் செயலாளரான வண்ணமுத்து கூறுகையில், “மின் பகிர்மானம் தனியார் வசம் சென்றுவிட்டால் வசதியானவர்கள் காசு கொடுத்து எவ்வளவு வேண்டுமானாலும் மின்சாரத்தை வாங்கிக்கொள்வார்கள். நல்ல விலை கிடைப்பதால் உற்பத்தி செய்யப்படும் மின்சாரத்தில், பெருமளவுக்கு வசதியானவர்களுக்கே விற்பனை செய்ய தனியார் நிறுவனங்கள் ஆர்வம் காட்டும். இதனால், அரசுக்கான தனியாரின் மின் சப்ளை குறையும். இதனால், மக்களுக்கான அரசு மின் விநியோகம் பாதிக்கப்படும். இப்போதே விவசாயத்துக்கு நள்ளிரவு நேரத்தில் சில மணிநேரம் மட்டுமே மின்சாரம் கிடைக்கிறது. தனியார் வசம் சென்றால், நிலைமை என்னவாவது?

. இயற்கைப் பேரிடர் காலத்தில் நிலைமை இன்னும் மோசமாகிவிடும். உதாரணத்துக்கு, ஒடிசாவில் தனியார் நிறுவனம் ஒன்று, அங்கு புயல் பாதிப்பு ஏற்பட்டபோது மின் கட்டுமான சேதாரங்களைச் சரிசெய்ய, 300 கோடி ரூபாய் கேட்டது. ஆனால், சென்னை பெருவெள்ளம், ஒகி, கஜா போன்ற புயல் பாதிப்புகளின்போது, நம் மின் ஊழியர்கள் அடிப்படை வசதிகள்கூட இல்லாத நிலையிலும், சீரமைப்புப் பணிகளை மேற்கொண்டனர். தனியாரிடம் இதை எதிர்பார்க்க முடியாது. எனவே, மின் பகிர்மானத்தைத் தனியாருக்கு வழங்கியதைத் திரும்பப் பெற வேண்டும்” என்றார்.

இதுபற்றி மின்வாரிய அதிகாரிகளிடம் கேட்டோம். “நாங்குநேரி பகுதியில் காற்றாலை மின் உற்பத்தி அதிகமாக உள்ளது. அதனால், அங்கு மின்சார விநியோகத்தைத் தனியார் மூலமாக நிறைவேற்ற, மின்சார ஒழுங்குமுறை ஆணையம் அனுமதி வழங்கியிருக்கிறது. கடந்த டிசம்பர் மாதம் 18-ம் தேதி இதற்கான ஒப்பந்தம் போடப்பட்டது. இந்தத் திட்டம் செயல்பாட்டுக்கு வருவதற்கு முன்பே எதிர்ப்புத் தெரிவிப்பது சரியல்ல’’ என்று முடித்துக்கொண்டார்.

செயல்பாட்டுக்கு வருவதற்கு முன்புதானே எதிர்ப்புத் தெரிவிக்க முடியும் என்பது அதிகாரி களுக்குத் தெரியாதா? கோவை, மதுரை, திருச்சி மாநகராட்சிகளில் ஏற்கெனவே குடிநீர் விநியோ கத்தை தமிழக அரசு, தனியார்மயமாக்கும் வேலைகளில் இறங்கி யுள்ளது. இப்போது மின் விநியோகத்தையும் கையில் எடுத்துள்ளது. அனைத்தை யும் தனியார்மயமாக்கினால் அரசு என்பது எதற்காக?

- பி.ஆண்டனிராஜ் படங்கள்: எல்.ராஜேந்திரன்