Published:Updated:

தோல்வியடைந்த தூய்மை இந்தியா!

தோல்வியடைந்த தூய்மை இந்தியா!
பிரீமியம் ஸ்டோரி
தோல்வியடைந்த தூய்மை இந்தியா!

தோல்வியடைந்த தூய்மை இந்தியா!

தோல்வியடைந்த தூய்மை இந்தியா!

தோல்வியடைந்த தூய்மை இந்தியா!

Published:Updated:
தோல்வியடைந்த தூய்மை இந்தியா!
பிரீமியம் ஸ்டோரி
தோல்வியடைந்த தூய்மை இந்தியா!

‘தூய்மையான இந்தியா’ - மகாத்மாகாந்தியின் மாபெரும் கனவு, அந்தக் கனவை காந்தியின் 150-வது பிறந்தநாளை 2019-ல் கொண்டாடும்போது நிறைவேற்றி முடிக்க வேண்டும் என்று பிரதமர் மோடி, 2014, அக்டோபர் 2-ல்  ‘ஸ்வச் பாரத் அபியான்’ திட்டத்தைத் தொடங்கி வைத்தார். ‘தூய்மை இந்தியா’ இயக்கத்தைப் பரப்புவதற்காக நாடு முழுவதும் 9 பிரபலங்களைத் தேர்ந்தெடுத்தார். ‘தூய்மை இந்தியா’ தூதுவர்களில் நம்மூர் கமல்ஹாசனும் ஒருவர். ஆனால் காலமாற்றத்தில் கமல்ஹாசனும் தனிக்கட்சி ஆரம்பித்து, நாடாளுமன்றத் தேர்தல் களத்தில் குதித்திருக்கிறார். ஐந்தாண்டுக்காலத்தில் மோடியின் ‘தூய்மை இந்தியா’ வெற்றியடைந்துவிட்டதா? இந்தியாவில் குப்பைகளே இல்லாமற்போய்விட்டதா?

பெயர் மாறியது; ஊர் மாறியதா?

மோடியின் ‘தூய்மை இந்தியா’வுக்கு முன்னோடியாகவே இரண்டு திட்டங்கள் இருக்கின்றன.

வாஜ்பாய் அரசு 1999 ஏப்ரல் 1 அன்றே சுகாதார விழிப்புணர்வுக்கான திட்டத்தைக் கொண்டுவந்தது. ஆனால் அது முழுமையாக நடைமுறைப்படுத்தப்படவில்லை. பின்னர் இந்தத் திட்டம் 2012 ஏப்ரல் 1-ம் தேதி மன்மோகன்சிங் அரசால்  ‘நிர்மல் பாரத் அபியான்’ எனப் பெயர் மாற்றப்பட்டது. ‘2022-க்குள் இந்தியாவின் அனைத்து ஊர்களிலும் சுகாதாரம் மேம்பட்டிருக்க வேண்டும்; திறந்த வெளியில் மலங்கழிப்பதை முற்றிலும் ஒழிக்க வேண்டும்; ஊரகப்பகுதியில் வாழும் மக்களின் பொதுச் சுகாதாரத்தை மேம்படுத்தவேண்டும்; நலவாழ்வுக் கல்வியும் விழிப்புணர்வும் தந்து மக்களிடையே சுகாதாரத்திற்கான விழிப்புணர்வை ஏற்படுத்த வேண்டும்; கழிவு  மேலாண்மையை உருவாக்கிட வேண்டும்’ என்ற பல்வேறு நோக்கங்களை அடிப்படையாகக் கொண்ட திட்டம்தான்  நிர்மல் பாரத் அபியான் திட்டம். இந்தத் திட்டமும் முழுமையாக வெற்றியடைந்தது என்று சொல்ல முடியாது. 

தோல்வியடைந்த தூய்மை இந்தியா!

இந்த ‘நிர்மல் பாரத் அபியான்’ திட்டம்தான், 2014ல் மோடியால் ‘ஸ்வச்பாரத் அபியான்’ ஆனது. ஆகமொத்தம் மூன்று பிரதமர்களும் மாற்றி மாற்றிப் பெயர் வைத்தார்களே தவிர, இந்தியா தூய்மை அடையவில்லை.
நிர்மல் பாரத் அபியான் திட்டத்திற்கு 2013-2014 நிதியறிக்கையில் மத்திய அரசு 4,260 கோடி நிதி ஒதுக்கியது. இதன்படி வறுமைக்கோட்டிற்குக் கீழ் உள்ள குடும்பங்களுக்கும், அரசுப் பள்ளிகள் மற்றும் அங்கன்வாடிகளுக்கும் கழிப்பறைகள் கட்டிக்கொடுத்தல், சுகாதார வளாகங்கள் உருவாக்குவதற்கு அரசுத் தரப்பில் மானியம் வழங்கப்படுதல் ஆகியவற்றுக்கு முன்னுரிமை அளிக்கப்பட்டது. சுகாதாரத் திட்டங்களைச் சிறப்பாகச் செயல்படுத்தும் கிராம ஊராட்சிகளுக்கு, ‘நிர்மல் கிராம் புரஸ்கார்’ விருதை 2005-ம் ஆண்டிலிருந்து மத்திய அரசு வழங்கிவருகிறது.

மோடியால் ஆரவாரமாகத் தொடங்கப்பட்ட ‘ஸ்வச்பாரத் அபியான்’ எனப்படும் ‘தூய்மை இந்தியா இயக்கம்’ ஆரம்பிக்கப்பட்டதிலிருந்து இதுவரை ஒதுக்கப்பட்ட மொத்த நிதி 49,218 கோடி. இந்த நிதியின் மூலம் இந்தியா முழுவதும் 9,24,24,009 கழிப்பறைகள் கட்டப்பட்டுள்ளன என்று மத்திய அரசால் தெரிவிக்கப்பட்டுள்ளது.

5,55,385 கிராமங்கள், ‘திறந்த வெளி மலம் கழித்தல் இல்லாத கிராமங்கள்’ என அறிவிக்கப்பட்டுள்ளன.

616 மாவட்டங்கள் ‘திறந்த வெளி மலம் கழித்தல் இல்லாத மாவட்டங்கள்’ என அறிவிக்கப்பட்டுள்ளன.

30 மாநிலங்கள்/யூனியன் பிரதேசம், ‘திறந்த வெளி மலம் கழித்தல் இல்லாத மாநிலங்கள்/யூனியன் பிரதேசம்’ என அறிவிக்கப்பட்டுள்ளன.

தூய்மைத் தமிழகமா?

தமிழகத்தைப் பொறுத்தவரை அனைத்து வீட்டிலும் 100 %  கழிவறை கட்டப்பட்டுள்ளது என அறிவிக்கப்பட்டுள்ளது. மத்திய அரசுத் தகவல்களின்படி இதுவரை தமிழகத்தில், 4,54,185 கழிப்பறைகள் கட்டப்பட்டுள்ளன.

84,641 பொதுக் கழிப்பறைகள் கட்டப்பட்டுள்ளன.

12,524 கிராமங்கள் ‘திறந்தவெளி மலம் கழித்தல் இல்லாத கிராமங்கள்’ என அறிவிக்கப்பட்டுள்ளன.

31 மாவட்டங்கள் ‘திறந்த வெளி மலம் கழித்தல் இல்லாத மாவட்டங்கள்’ என அறிவிக்கப்பட்டுள்ளன.

‘தூய்மை இந்தியா இயக்க’த்தின் இணையதளம், ‘இந்த இயக்கம் ஆரம்பிக்கப்பட்ட 2014, அக்டோபர் 2 அன்று இந்தியாவின் தூய்மை அளவு 38.7 சதவிகிதம். ஆனால், 2019 மார்ச் 15 கணக்கின்படி இந்தியாவின் தூய்மை அளவு 98.9 சதவிகிதம்’ என்கிறது. ஆனால்  தூய்மைப்பணிகளுக்காக பில்கேட்ஸால் தொடங்கப்பட்ட ‘கேட்ஸ் பவுண்டேஷன் அறிக்கையோ, இன்றும் இந்தியாவில் திறந்த வெளியில் மலம் கழிப்பவர்கள் எண்ணிக்கை கோடிக்கணக்கில் என்று கூறுகின்றது.
‘தமிழகம் 100 சதவிகிதம் தூய்மை அடைந்துள்ளது, இங்கு எவருமே திறந்த வெளி மலம் கழிப்பதில்லை’ என்பது மத்திய அரசின் அறிக்கை. இது உண்மைதானா என்று தெரிந்துகொள்ள சென்னையில் சில இடங்களில் கள ஆய்வு மேற்கொண்டோம்.

சென்னையில் அடையாறு மற்றும் கூவம் ஆற்றங்கரையை ஒட்டியுள்ள, தண்டவாளங்களை ஒட்டியுள்ள சில பகுதிகளுக்கு நேரில் சென்று பார்த்தோம். அங்குள்ள பல வீடுகளில் கழிப்பறை வசதி கிடையாது. அவர்கள் பொதுக் கழிப்பறைகளையே பயன்படுத்துகின்றனர். அந்தப் பொதுக்கழிப்பறைகளும் பெரும்பாலும் பராமரிப்பின்றி, பயன்படுத்த முடியாத நிலையில்தான் இருக்கின்றன.

சென்னை, சைதாப்பேட்டை மறைமலையடிகள் பாலத்தின் கீழ் உள்ள பகுதியில் வசிக்கும் வசந்தி என்பவர் “இங்க நிறைய வீடுகளே சின்ன ரூம் அளவுக்குத்தான் இருக்கு, இதுல எங்க தனியா கக்கூஸ் கட்டுறதுக்கு இடம் இருக்கு? பெரும்பாலும் நாங்க வேலைக்குப் போற இடத்துலயே டாய்லெட் யூஸ் பண்ணிப்போம். நைட் நேரத்துல இந்த பப்ளிக் டாய்லெட் இல்லைன்னா அப்படி ஆத்தோரமா போவோம்” என்கிறார்.

சென்னையிலேயே இந்த நிலை என்றால் பிற ஊர்களில் நிலை என்னவாக இருக்கும் என்பதைச் சொல்லித் தெரிய வேண்டியதில்லை. பெரும்பாலும் திறந்த வெளி மலம் கழிப்பவர்கள் ஆற்றங்கரைப் பகுதிகளைச் சார்ந்தவர்களாகவும், கிராமப்புறங்களில் வசிப்பவர்களாகவும்தான் உள்ளனர்.

இவர்களில் பலரிடம் பேசியதில் நான்கு சுவர்களால் ஆன கழிவறை என்பதே அவர்களைப் பொறுத்தவரை வினோதமானதுதான்.  மேலும்,  கழிவறையைப் பயன்படுத்த முக்கியத் தேவை நீர். பல கிராமப்புறங்களில் அத்தியாவசியத் தேவைகளுக்கே தண்ணீர்த் தட்டுப்பாடு நிலவும்போது அவர்கள் கழிவறைக்குத் தனியாகத் தண்ணீர் பயன்படுத்துவது என்பது இயலாத ஒன்று.

மேலும், கிராமப்புறங்களில் ‘தூய்மை இந்தியா’ இயக்கத்தின் மூலம் கட்டிக்கொடுக்கப்பட்டுள்ள கழிப்பறைகளையும் பலர் பயன்படுத்துவதில்லை. அப்படியே பயன்படுத்தினாலும் அதைத் தூய்மைப்படுத்திப் பராமரிப்பதற்கு ஆதிக்கச்சாதிகள் தயாராக இல்லை. அதைச் சுத்தப்படுத்துவதற்கும் காலனியில் வசிக்கும் தலித் மக்களைப் பயன்படுத்தவே நினைக்கின்றனர். இத்தகைய முரண்பாடுகள் தீரும்வரை இந்தியா தூய்மையடைவது என்பது பகற்கனவுதான்.

ஒட்டுமொத்த விகடனுக்கும் ஒரே ஷார்ட்கட்!

“தூய்மை இந்தியா திட்டத்தின் மூலம் கட்டிக்கொடுத்த பலகோடிக் கழிப்பறைகள் வெறும் கட்டடங்களாகவே உள்ளன. நாங்கள் சென்று பார்க்கும்பொழுது பாதி கட்டப்பட்ட பல கட்டடங்களையே காணமுடிந்தது. அந்தக் கட்டடங்களை மக்கள் பொருள் வைக்கும் அறையாகவோ அல்லது பெட்டிக்கடையாகவோ தான் பயன்படுத்துகின்றனர்” என்கிறார் ஒரு தன்னார்வத் தொண்டு நிறுவன ஊழியர்.

தோல்வியடைந்த தூய்மை இந்தியா!

அரசு கழிப்பறைகள் கட்டிக்கொடுத்தும் மக்கள் பயன்படுத்தாதது ஏன்?

கழிப்பறைகளின் தேவை, அவசியம் குறித்த விழிப்புணர்வு மக்களிடம் இல்லை. அரசு கழிப்பறைகளைக் கட்டிக்கொடுப்பதற்கு முன் அதன் தேவைகளை மக்களிடத்தில் புரியவைத்திருக்க வேண்டும். பல ஆண்டுகளாய் காற்றோட்டமாகத் திறந்தவெளியில் மலங்கழித்தவர்களைத் திடீரெனக் கழிவறைக்குள் புகுத்த முடியாது. கழிவறைகள் இருந்தும் வெளியே மலம் கழிக்கும் நபர்களும் இங்கு அதிகம் உண்டு. இதற்கான விழிப்புணர்வுப் பிரசாரம் என்பது சில அரசு விளம்பரங்களுடன் நின்றுவிட்டது. இது கிராமத்தின் கடைக்கோடி வரை சென்றடையவில்லை. தமிழகத்தையே எடுத்துக்கொள்வோம்.

‘தூய்மை இந்தியா’ ஆரம்பிக்கப்பட்டபோது தமிழகத்தில் பிராண்ட் அம்பாசிடர் கமல்ஹாசன் கையில் குப்பைக்கூடையுடனும் தமிழக பா.ஜ.க. தலைவர் தமிழிசை சௌந்தரராஜன் துடைப்பங்களுடனும் புகைப்படத்துக்கு போஸ் தந்தார்கள். அதற்குப்பிறகு ‘தூய்மை இந்தியா’ இயக்கம் தமிழகத்தில் என்ன செய்தது? கமல்ஹாசன் இந்த இயக்கத்தை மக்களிடம் கொண்டு செல்வதற்கு என்ன செய்தார்? மத்திய அரசு அவரை எந்தளவுக்குப் பயன்படுத்தியது? ‘பிக்பாஸ்’ நிகழ்ச்சியில் நாம் கமல்ஹாசனைப் பார்த்த அளவுக்குக்கூட ‘தூய்மை இந்தியா’ பணிகளில் அவரைப் பார்க்கவில்லை என்பதே, இது தோல்வியடைந்ததைக் காட்டவில்லையா? 

கழிவறைகளின் ‘தரம்?’

 சென்னை அண்ணாசாலையையே எடுத்துக்கொள்வோம். கிண்டியிலிருந்து ஆயிரம் விளக்கு வரை உள்ள பகுதிகளில் ஒரு பெண் இருசக்கர வாகனத்தில் பயணித்தால், இடையில் சிறுநீர் கழிப்பதற்குக்கூட முறையான ஒரு கழிப்பறை இல்லை. இதை மையப்படுத்தி, நம் ஆனந்தவிகடன் சார்பாக ‘வேர் இஸ் மை டாய்லெட்?’ என்ற வீடியோவை உருவாக்கினோம். ‘தூய்மை இந்தியா’ இயக்கம் இருந்தும்கூட இன்னும் இந்த நிலை மாறவில்லை என்றுதான் சொல்லவேண்டும்.

‘தூய்மை இந்தியா’ இயக்கத்தின் மூலம் கட்டிக்கொடுக்கப்படும் கழிப்பறைகளும் ஏதோ பெயருக்குக் கட்டிக்கொடுக்கப்பட்டவையே.எண்ணிக்கையில் கணக்கு காட்டவேண்டும் என்பதற்காகவே கட்டப்பட்ட கழிப்பறைகளின் தரம் எப்படி இருக்கும்? அவை முறையாகப் பராமரிக்கப்படுகின்றனவா என்று தொடர்ச்சியாகக் கண்காணிக்கப்படுவதில்லை.

ஒரு கழிவறை கட்ட அரசு 12,000 ரூபாய் தருகிறது. அனால் இங்கு கட்டப்படும் கழிவறைகளுக்குச் செலவு 8,000 ரூபாய்கூட ஆவதில்லை. மிச்சப்படுத்தப்படும் பணம் யார் பாக்கெட்டுக்குச் செல்கிறது?

சென்னையைச் சுற்றி 714  பொதுக்கழிவறைகள் இருக்கின்றன. அதில் 80 சதவிகித கழிவறைகள் பயனற்றுதான் இருக்கின்றன.  அவை ஏன் பராமரிக்கப்படாமல் இருக்கின்றன, அந்தக் கழிவறைகளின் பராமரிப்பு களுக்கு அரசு வழங்கும் பணம் எங்கே போகிறது, என்ன ஆகிறது?

தோல்வியடைந்த தூய்மை இந்தியா!

பாதுகாப்பான குடிநீர் மற்றும் சுகாதாரத்திற்கான மனித உரிமைகளின் ஐ.நா சிறப்புச் செய்தித்தொடர்பாளர் லியோ ஹெல்லர். இந்திய அரசின் அழைப்பை ஏற்று, 2017 அக்டோபர் 27 முதல் நவம்பர் 10 வரை தூய்மை இந்தியா திட்டம் குறித்து ஆய்வு மேற்கொண்டு அறிக்கை ஒன்றை வெளியிட்டிருந்தார்.

அந்த அறிக்கையில் ‘திறந்த வெளிக் கழிப்பிடமில்லா இடம் என்று சான்றளிக்கப்பட்ட பல இடங்களும், அவ்வாறு இல்லாமல் இருப்பதைக் கண்கூடாகப் பார்க்க முடிகிறது’ என்றும், ‘கிராமப்புறம் மற்றும் நகர்ப்புறப்பகுதிகளில் இன்றளவும் கைகளால் மலமள்ளும் அவலநிலை நீடிக்கிறது. ‘தூய்மை இந்தியா’ திட்டம் மனித உரிமைகள் அடிப்படையிலான அணுகு முறையைக் கொண்டிருக்கவில்லை’ என்றும் தெரிவித்தார். இந்தத் திட்டத்தில் தகவல், கல்வி மற்றும் தொழில்நுட்ப (IEC) வழிமுறையானது சரியாகப் பின்பற்றப்படவில்லை என்று குற்றம் சாட்டியவர், ‘‘திட்டங்களுக்கு நிதியை மட்டும் ஒதுக்குவது போதாது. அந்தத் திட்டம் சரியான முறையில் நடைமுறைப்படுத்தப்படுவதும் அவசியம்” என்று தெரிவித்திருந்தார்.

காந்தி கண்ட பல கனவுகள் நிறைவேறாமலே இருக்கின்றன. அதில் ஒன்றுதான் ‘தூய்மை இந்தியா.’ மீண்டும் மோடியோ அல்லது வேறு யாராவதோ பிரதமராகி, திட்டத்தின் பெயரை மட்டும் மாற்றி, கையில் துடைப்பத்துடன் போஸ் கொடுப்பதும் நடக்கத்தான் போகிறது. அதுதான் இந்தியா!

- துரைராஜ் குணசேகரன், ஓவியம்: பிரேம் டாவின்சி

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism