பணமதிப்பு நீக்கம்... மூன்றாண்டுகள் நிறைவு! - சாதகங்கள் என்ன, பாதகங்கள் என்ன?

என்னவோ... ஏதோ எனப் பார்த்துக்கொண்டிருக்கும்போதே, ‘500 மற்றும் 1,000 ரூபாய் நோட்டுகள் செல்லாது’ என அறிவித்தார். ஒரு கணம் மொத்த நாடும் உறைந்துபோனது. சில மணி நேரத்தில் மார்க்கெட் தொடங்கி மதுக்கடைகள் வரை கடும் தள்ளுமுள்ளு ஏற்பட்டது. தூங்கா இரவாக கழிந்தது அந்த இரவு.

அடுத்தடுத்த நாள்களில் சுமார் இரண்டு மாதங்களுக்கும்மேலாக வங்கிகளிலும் ஏ.டி.எம் மையங்களிலும் மக்கள் தங்களது சொந்த பணத்தை எடுப்பதற்காகவும் சேமித்த பணத்தை மாற்றுவதற்காகவும் கால்கடுக்க நின்றார்கள். கடுகு டப்பா தொடங்கி வீட்டின் லாக்கர் வரை வைத்திருந்த பாரம்பர்ய சேமிப்பு மொத்தமும் வங்கிக்கு மாறியது. விவரம் அறியாத பாமரர்கள் பலரின் பணம் செல்லாக் காசானது. நாடு முழுவதும் நடந்த இந்தக் களேபரேங்களில் மக்கள் 108 பேரும், வங்கிப் பணியாளர்கள் 12 பேரும் உயிர் இழந்தனர்.

. இதோ மூன்று ஆண்டுகள் கடந்துவிட்டன. இந்தக் காலகட்டத்தில் பணமதிப்பு நீக்கத்தால் ஏற்பட்ட சாதகங்கள் என்ன... பாதகங்கள் என்ன, பணமதிப்பு நீக்கத்தின்போது சொல்லப்பட்ட இலக்குகளை மத்திய அரசு எட்டிவிட்டதா..? பார்ப்போம்.

. கறுப்புப்பணத்தை மீட்கவே பணமதிப்பு நீக்கம் என்று கூறப்பட்டது. ஆனால், இதுவரை கறுப்புப்பணத்தை மீட்டதற்கான எந்தக் கணக்கையும் மத்திய அரசு காட்டவில்லை. ‘செல்லாததாக அறிவிக்கப்பட்ட பழைய ரூபாய் நோட்டுகளை வங்கியில் ஒப்படைக்கும்போது, சுமார் நான்கு லட்சம் கோடி ரூபாய் கறுப்புப்பணம் திரும்பவும் வங்கிக்கு வராது’ என்றார்கள். ஆனால் 99.4 சதவிகிதம் அளவுக்கு பணம் மீண்டும் வங்கிக்கே திரும்ப வந்தது. கறுப்புப்பணம் வெளியே எவ்வளவு அழிக்கப்பட்டது அல்லது கண்டுபிடிக்கப்பட்டது என்பது மர்மமாகவே இருக்கிறது.

. அதேசமயம் கறுப்புப்பணத்தைப் பதுக்குவதற்காகவே நிறுவப்பட்டிருந்த ஏராளமான ‘லெட்டர்பேடு’ நிறுவனங்கள் கண்டுபிடிக்கப்பட்டு, முடக்கப்பட்டன. புதியதாக கறுப்புப் பணம் பதுக்குவது தடுக்கப்பட்ட அதே வேளை, புதியதாக முதலீடுகள் வரவில்லை; சந்தையில் ஏற்கெனவே இருக்கும் பணப்புழக்க நிலவரத்தைத் தவிர்த்து, கூடுதலான புதிய பணப்புழக்கம் வரவில்லை.

. இன்னொரு பக்கம் சிறுதொழில் நிறுவனங்கள் பெரிதும் அடிவாங்கின. அவை நலிவடைந்து, தட்டுத்தடுமாறி லேசாக எழுந்து நிற்கத் தொடங்கிய நிலையில், அடுத்த அடியாக விழுந்தது ஜி.எஸ்.டி வரி விதிப்பு. கோவை, திருப்பூர், சென்னை உள்பட இந்தியா முழுவதும் உள்ள தொழில் நகரங்கள் பெரும்பாதிப்பை எதிர்கொண்டன. 2017-18 நிதியாண்டில் நாடு முழுவதும் 5,40,847 சிறுதொழில் நிறுவனங்கள் மூடப்பட்டன. 2016-17 நிதியாண்டுடன் ஒப்பிடுகையில் 2,39,000 நிறுவனங்கள் கூடுதலாக மூடப்பட்டுள்ளன. தொடர்ந்து 2018-19 நிதியாண்டில் மூடப்பட்ட தொழில் நிறுவனங்களின் எண்ணிக்கை 6,70,018 என அதிகரித்தது. பணியிழப்பு, உற்பத்தி இழப்பு பலமடங்கு அதிகரித்தன. ஜி.டி.பி வளர்ச்சி விகிதம் தொடர் சரிவைச் சந்தித்தது; இன்றளவும் சந்தித்துவருகிறது.

. பணமதிப்பு நீக்கத்தால் அனைவருமே வங்கிக்கணக்கு தொடங்க வேண்டிய கட்டாயம் உருவானது. இது நல்லது. ஆன்லைன் பணப்பரிமாற்றமும் அதிகரித்தது. ஜி.எஸ்.டி அறிமுகப்படுத்தப்பட்ட பிறகு, ஜி.எஸ்.டி பதிவுசெய்த அனைவருமே ஆன்லைன் பணப்பரிமாற்ற முறைக்கு மாறினார்கள். இதை பணமதிப்பு நீக்கம் மற்றும் ஜி.எஸ்.டி-யால் ஏற்பட்ட காலத்துக்கேற்ற மாற்றம் எனலாம்.

புழக்கம் இருக்கும் இடத்தில்தானே பொய்யும் புரட்டும் வந்து சேரும். ஆன்லைன் மோசடிகளும் அதிகரித்தன. ரிசர்வ் வங்கி கணக்கின்படி 2017-18 நிதியாண்டில் மட்டும் மொத்தம் 972 ஆன்லைன் மோசடிகளில் 109.75 கோடி ரூபாய் வங்கிக்கணக்குகளிலிருந்து திருடப்பட்டிருக்கிறது.

. இதுகுறித்து, தொழில்முனைவோர் ஆலோசகர் சிவகுமாரிடம் கேட்டபோது, ‘‘பணமதிப்பு நீக்க நடவடிக்கையில் சாதகங்களும் உண்டு, பாதகங்களும் உண்டு. நம் ஏற்றுமதி, இறக்குமதி விகிதங்களைவைத்துப் பார்க்கும்போது, பணமதிப்பு நீக்கத்தால் ஏற்பட்ட பாதிப்பு தற்போது குறைந்துள்ளது. 2018-19 நிதியாண்டின் இறுதி காலாண்டில் ஏற்றுமதி 13.6 சதவிகிதமாக உள்ளது. உலக சராசரி ஏற்றுமதி விகிதமான 13.1 சதவிகிதத்தைவிட இது அதிகம். அடுத்ததாக, சுமார் 2.8 லட்சம் கோடி ரூபாய் (1.8%

ஜி.டி.பி மதிப்பு) 500 ரூபாய் தாள்களும், சுமார் 3.8 லட்சம் கோடி ரூபாய் (2.8% ஜி.டி.பி மதிப்பு) 1,000 ரூபாய் தாள்களும் புழக்கத்திலிருந்து அகற்றப்பட்டுள்ளன. இது பணமதிப்பு நீக்கத்தால் நடைபெற்ற சாதனை. பணமதிப்பு நீக்க நடவடிக்கைக்குப் பிறகு வருமானவரி வசூல் 2 சதவிகிதத்திலிருந்து 2.4 சதவிகிதமாக உயர்ந்துள்ளது.

. ஆன்லைன் பணப்பரிமாற்றத் துறை பெரும்வளர்ச்சி கண்டுள்ளது. 12,50,000 கோடி ரூபாயை ஆன்லைனில் நெஃப்ட் முறையில் பரிமாற்றம் செய்துள்ளார்கள். கிரெடிட், டெபிட் கார்டுகளின் பயன்பாடு அதிகரித்துள்ளது. 2017-ம் ஆண்டு இறுதியில் 2,214 கோடி ரூபாயாக இருந்த கிரெடிட், டெபிட் கார்டு பரிமாற்றங்கள், 8,353 கோடி ரூபாயாக உயர்ந்துள்ளது.

. ஜி.டி.பி வளர்ச்சி விகிதம் 9 சதவிகிதத்திலிருந்து 5 சதவிகிதம் வரை குறைந்தது. உரம், பூச்சிமருந்து வாங்குவது, கூலி கொடுப்பது போன்ற விவசாயச் செயல்பாடுகளில் ரொக்கத்தைப் பயன்படுத்த முடியவில்லை; விவசாயிகள் பெரிதும் பாதிக்கப்பட்டனர். இதனால் மட்டுமே

ஜி.டி.பி வளர்ச்சியில் 2-3 சதவிகிதம் இழப்பு ஏற்பட்டிருக்கலாம். ரியல் எஸ்டேட், கட்டுமானத் துறை பெரிய அளவுக்கு பாதிக்கப்பட்டது. இதுவும் ஜி.டி.பி வளர்ச்சிக் குறைவுக்கு ஒரு காரணம். சிறுதொழில்முனைவோரின் தினசரி பணப்புழக்கம் பெரிதும் பாதிக்கப்பட்டது.

குறு, சிறு தொழில்முனைவோர் தொழிலிலிருந்தே வெளியேற்றப்பட்டனர்.

பறிமுதல் செய்த பழைய நோட்டுகளைக் கையாளவும், புதிய நோட்டுகளை அச்சடிக்கவும் அரசுக்கு அதிக செலவுபிடித்தது. ஆனாலும், நீண்டகால நோக்கத்தில் பார்க்கையில் இன்னும் இரண்டு அல்லது மூன்று ஆண்டுகளில் நம் நாட்டின் பொருளாதார நிலை மேம்பாடு அடைந்து, வளர்ச்சியை நோக்கிப் பயணிக்கத் தொடங்கும்” என்றார்.

அகில இந்திய வங்கி அதிகாரிகள் கூட்டமைப்பின் முன்னாள் தலைவர் தாமஸ் பிராங்கோவின் கருத்துகள் வேறு மாதிரி இருக்கின்றன. ‘‘பணமதிப்பிழப்பு நடவடிக்கையால் பயங்கரவாதம் ஒழிந்துவிடும்; போலி கரன்சிகளையும் லஞ்சத்தையும் ஒழிக்கலாம் என்றார்கள். இந்த மூன்றாண்டில் அப்படி எதுவும் நடக்கவில்லை.

புதிதாக அறிமுகப்படுத்தப்பட்ட 2,000 ரூபாய் நோட்டுகளே கள்ளநோட்டுகளாக அச்சடிக்கப்பட்டு வலம்வந்தன. டிஜிட்டலுக்கு மாறினால் நல்லது என்றார்கள். ஒருபக்கம் ஆன்லைன் திருட்டுகள் அதிகரிக்க... மறுபக்கம் ஸ்வைப்பிங் மெஷினைப் பயன்படுத்தும் போதெல்லாம் சேவைக் கட்டணம் பிடித்தம் செய்தார்கள். மெஷினுக்கான மாத வாடகையைக் கட்டுவது சிறுதொழில் வணிகர்களுக்கு கூடுதல் செலவை ஏற்படுத்தியுள்ளது” என்றார்.

காலம் அனைத்தையும் மாற்றிவிடும் சக்தி வாய்ந்தது என்பார்கள். பணமதிப்பு நீக்க நடவடிக்கையால் ஏற்பட்ட பாதிப்புகள் நீங்க, இன்னும் எவ்வளவு காலம் ஆகுமோ?

பணமதிப்பு நீக்கம்... மூன்றாண்டுகள் நிறைவு! - சாதகங்கள் என்ன, பாதகங்கள் என்ன?

தெ.சு.கவுதமன்

பெ.மதலை ஆரோன்Follow

பிரியங்கா.ப

எம்.மகேஷ்