Published:Updated:

‘‘அரிசியில் இருந்து எத்தனால் தயாரிப்பதா... பசியால் வாடும் ஏழைகளுக்கு என்ன பதில்?’’

பசியால் வாடும் ஏழைகள்
பிரீமியம் ஸ்டோரி
News
பசியால் வாடும் ஏழைகள்

மத்திய அரசுக்கு வலுக்கும் எதிர்ப்பு

‘உணவுக்கழக குடோன்களில் உபரியாக உள்ள அரிசியை சானிடைஸர்களின் மூலப்பொருளான எத்தனால் தயாரிப்புக்காக வெளிநாடுகளுக்கு ஏற்றுமதி செய்யலாம்’ என்று சமீபத்தில் மத்திய அரசு கொள்கை முடிவு எடுத்ததற்கு, பல்வேறு தரப்பிலிருந்தும் எதிர்ப்பு கிளம்பியிருக்கிறது.

‘மதுபான மற்றும் மருந்து தயாரிப்பு நிறுவனங்களுக்கு சாதகமான இந்த அறிவிப்பை மத்திய அரசு கைவிட்டு, பசியால் வாடும் ஏழைகளுக்கு அந்த அரிசியை வழங்க வேண்டும்’ என்று பல்வேறு தரப்புகளில் இருந்தும் குரல்கள் எழுகின்றன.

பசியால் வாடும் ஏழைகள்
பசியால் வாடும் ஏழைகள்

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

‘‘கொரோனா வைரஸ் தொற்றில் இருந்து தற்காத்துக்கொள்ள உதவும் சானிடைஸர் களுக்கு நாடு முழுவதும் கடும் தட்டுப்பாடு நிலவுகிறது. இந்த சானிடைஸர்களின் தயாரிப்பில் எத்தனால் முக்கியப் பங்கு வகிக்கிறது. எனவேதான், அரிசியில் இருந்து சானிடைஸர் தயாரிக்கும் திட்டத்தை மத்திய அரசு முன்னெடுத்திருக்கிறது. இந்தியாவில் அரிசியில் இருந்து எத்தனால் தயாரிக்கும் ஆலைகள் மிகக்குறைவே. அவையும் அரிசியுடன் வேறு சில பொருள்கள் கலந்தே எத்தனால் தயாரிக்கின்றன. எனவே, உணவுக்கழக குடோன்களில் உபரியாக இருக்கும் அரிசியை வெளிநாடுகளுக்கு ஏற்றுமதி செய்து, எத்தனாலைப் பெற மத்திய அரசு முடிவு செய்திருக்கிறது. அதற்காக உணவுக் கழக கிடங்குகளில் உபரியாக இருக்கும் அரிசியைப் பயன்படுத்த இருக்கின்றனர்’’ என்று பா.ஜ.க தரப்பில் சொல்லப்பட்டாலும், விமர்சனங்கள் குறையவில்லை.

காஙகிரஸ் முன்னாள் தலைவர் ராகுல் காந்தி, ‘‘நீங்கள் பட்டினியால் செத்துக் கொண்டிருக்கிறீர்கள். உங்களுக்கு கிடைக்க வேண்டிய அரிசியைக்கொண்டு சானிடைஸர் தயாரிக்கப்போவதாக மத்திய அரசு அறிவித்துள்ளது. பணக்காரர்கள் கை கழுவ பயன்படுத்தும் சானிடைஸருக்குத் தரப்படும் முக்கியத்துவம்கூட, பசியில் வாடும் ஏழைகளுக்கு இல்லையா? இந்த முடிவை அரசு கைவிடவேண்டும்’’ என்று ட்விட்டரில் தனது கருத்தைப் பதிவுசெய்திருக்கிறார்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

இந்தியாவில் 284.95 மில்லியன் டன் அரிசி 2019-20 ஆண்டில் உற்பத்தி செய்யப்பட்டதாக மத்திய அரசின் நுகர்வோர் விவகாரம், உணவு மற்றும் பொது விநியோகத்துறையின் புள்ளிவிவரம் சொல்கிறது. மத்திய அரசு குடோன்களில் வைக்கப்பட்டிருக்கும் அரிசியில் வீணானவை என்ற கணக்கில் 2831.224 மெட்ரிக் டன் காட்டப்பட்டுள்ளதாக விவசாயத்துறை அதிகாரிகள் சொல்கிறார்கள்.

அரிசி
அரிசி

தமிழக அனைத்து விவசாயிகள் சங்கங்களின் ஒருங்கிணைப்புக்குழுவின் தலைவர் பி.ஆர்.பாண்டியன், ‘‘உணவு உற்பத்தி செய்கிற விவசாயிகள் பலவித இடபாடுகளைச் சந்தித்து வருகின்றனர். அவற்றைத் தீர்க்க மத்திய அரசு முன்வரவில்லை. கொரோனா ஊரடங்கால் விரைவில் அரிசித் தட்டுப்பாடு வரும் நிலை ஏற்பட்டுள்ளது. இந்த நேரத்தில் கையிருப்பில் உள்ள அரசியை எத்தனால் தயாரிக்கப் பயன்படுத்துவது தவறு. உபரி அரிசியைத்தான் பயன்படுத்தப்போவதாக மத்திய நுகர்வோர் நலத்துறை அமைச்சர் ராம்விலாஸ் பஸ்வான் சொல்லியிருக்கிறார். எது உபரி அரிசி? குடோன்களில் அரசாங்கம் வீணடிக்கும் அரிசிதான் அது. ‘அரிசியை எத்தனால் தயாரிக்க பயன்படுத்துவதால், நாட்டில் வரலாறு காணாத உணவு தட்டுப்பாடு ஏற்படும்’ என்ற கோணத்தில் ராகுல் காந்தி சொல்லும் கருத்துக்களில் உள்ள நியாயத்தை மத்திய அரசு புரிந்துகொள்ள வேண்டும்’’ என்றார்.

உழவர் உழைப்பாளர் கட்சித் தலைவர் செல்லமுத்து, ‘‘உபரி அரிசியை கோழி, மாட்டுத் தீவனம் தயாரிக்க மானிய விலையில் வழங்கலாம். அப்படி செய்தால், முட்டை, இறைச்சி என்று அந்த அரிசி மீண்டும் உணவுப் பொருளாகத் திரும்ப கிடைக்கும். அதைவிடுத்து, சானிடைஸர் தயாரிக்கும் மூலப்பொருளாகப் பயன்படுத்தக் கூடாது’’ என்றார்.

இளங்கோவன் ராமசாமி - கே.எஸ்.அழகிரி -  பி.ஆர்.பாண்டியன் - எல்.முருகன்
இளங்கோவன் ராமசாமி - கே.எஸ்.அழகிரி - பி.ஆர்.பாண்டியன் - எல்.முருகன்

தமிழக காங்கிரஸ் கட்சியின் தலைவர் கே.எஸ்.அழகிரி, ‘‘கொரோனா தொற்று பரவிவரும் இந்த நேரத்தில் வட மாநிலங்களில் கூலித் தொழிலாளர்கள் பசியும் பட்டினியுமாக பல ஆயிரம் கிலோமீட்டர் தூரம் நடந்தே சொந்த ஊருக்குப் போகிறார்கள். உணவுப் பஞ்சத்தை நோக்கி நாடே சென்றுகொண்டிருக்கிது. சாதாரண மக்கள் சாப்பாட்டுக்காக கஷ்டப்படும்போது, அவர்களுக்கு அவசர காலத்தில் வழங்க வேண்டிய அரிசியை எத்தனால் தயாரிக்கப் பயன்படுத்துவது கண்டிக்கத்தக்கது. நவீன விஞ்ஞான காலத்தில் எத்தனால் உற்பத்தி செய்ய எத்தனையோ வழிகள் உள்ளன. ஆனால், அத்தியாவசிய உணவுப்பொருளான அரிசியில் இருந்து தயாரிப்பது தவறான செயல். உணவுக் கொள்கையில் மத்திய அரசு தவறான அணுகுமுறையை தொடர்ந்து கடைப்பிடித்து வருகிறது. இதை நீதிமன்றம்கூட கண்டித்திருக்கிறது’’ என்றார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

கேரள பல்கலைக்கழகத்தில் பேராசிரியர் மற்றும் துறைத்தலைவர் பதவியில் இருந்து ஓய்வுபெற்ற பிரபல விவசாய விஞ்ஞானியான இளங்கோவன் ராமசாமியிடம், ‘‘அரிசியில் இருந்து எத்தனால் தயாரிப்பது சரியா, தவறா?’’ என்று கேட்டோம்.

‘‘அரிசியும் கோதுமையும் இந்தியாவின் அடிப்படை உணவு ஆதாரம். அதனால், அரிசியிலிருந்து நேரடியாக எத்தனால் தயாரிப்பதைவிட, மற்ற பொருள்களில் இருந்து தயாரிக்கலாம். மக்காச்சோளம், சோளம் உள்ளிட்ட தானியங்களின் தட்டைகளில் நிறைய இனிப்பு சுவை இருக்கிறது. அதில் இருந்து எத்தனால் எடுப்பது மிகவும் எளிதாக இருக்கும். இதுமட்டுமல்லாமல், அரிசி உற்பத்தி ஆலைகளில் எஞ்சுகிற குருணை வடிவ அரிசி மற்றும் பதர் நெல்மணிகள் மற்றும் சேமிப்புக் கிடங்குகளில் சேதாரம் ஆகிற அரிசி கொண்டு எத்தனால் தயாரிக்கலாம்’’ என்றார்.

‘‘அரிசியில் இருந்து எத்தனால்   
 தயாரிப்பதா... பசியால் வாடும் ஏழைகளுக்கு என்ன பதில்?’’

பா.ஜ.க-வின் தமிழகத் தலைவர் எல்.முருகனிடம் பேசியபோது, ‘‘மத்திய நுகர்வோர் விவகாரம், உணவு மற்றும் பொது விநியோகத்துறை அமைச்சர் ராம்விலாஸ் பஸ்வான், 18 மாதங்களுக்கு தேவையான அரிசி மற்றும் உணவுப்பொருட்கள் கையிருப்பில் இருப்பதாக மிகத் தெளிவாகக் கூறியிருக்கிறார். நமக்குத் தேவையானது போக, உபரி அரிசியைத்தான் சானிடைஸருக்காக எத்தனால் தயாரிக்க அனுப்பப்போகிறார்கள். ஏழை மக்களுக்குத் தேவையான அரிசியை ரேஷன் கடைகள் மூலமாக வழங்கி வருகிறோம். இந்த வருடம் தட்பவெப்ப நிலை நன்றாக அமைந்து, இந்தியா முழுகக நல்ல விளைச்சல் கிடைத்துள்ளது. எனவே, உணவுத் தட்டுப்பாடு வரும் என்கிற பேச்சுக்கே இடமில்லை.

கொரோனா பரவல் உள்ள இந்தக் கால கட்டத்தில் இந்தியாவில் உள்ள ஏழை மக்களுக்கும் சானிடைஸர் சென்று சேர வேண்டும் என்ற நல்ல நோக்கத்தில்தான் உபரி அரிசி மூலம் எத்தனால் தயாரிக்க முடிவெடுத்திருக்கின்றனர். காங்கிரஸ் தலைவர் ராகுல் காந்தி, இந்த விவகாரத்தில் உள்நோக்கத்துடன் எதிர்மறையான அரசியல் செய்கிறார். மத்திய அரசின் இந்த நல்ல முயற்சிக்கு ராகுல் காந்தி ஒத்துழைப்பு தர வேண்டும்’’ என்றார்.

எப்படி தயாரிக்கப்படுகிறது எத்தனால்?

தமிழகத்தில் உள்ள மதுபான உற்பத்தி நிறுவனங்களில் எஸ்.என்.ஜே-யும் ஒன்று. இந்த நிறுவனத்துகாக எத்தனால் தயாரிக்கும் ஆலை ஆந்திராவில் உள்ளது. அங்கே கரும்பு, மக்காச்சோளம் மற்றும் அரிசியை அடிப்படையாக வைத்து எத்தனால் தயாரிக்கின்றனர். அதைப் பயன்படுத்தி மதுபான உற்பத்தி செய்கின்றனர். அரிசியில் இருந்தும் அங்கே எத்தனால் தயாரிப்பதாகக் கேள்விப்பட்டு, அதன் உரிமையாளர் ஜெயமுருகனிடம் பேசினோம்.

‘‘கரும்பில் இருந்து எத்தனால் தயாரிக்கிறோம். அதேபோல், மக்காச் சோளம், குருணை அரிசி, பதர் நெல்லில் இருந்து கிடைக்கும் கறுப்பு அரிசி ஆகியவற்றில் இருந்து எத்தனால் தயாரிக்கும் பிளான்ட்களை வைத்திருக்கிறோம். கரும்பு ஆலையின் ஒரு டிவிஷன் இது.

கறுப்பு அரிசி, குருணை அரிசி ஆகியவற்றை எங்கள் ஆலைக்கு வாங்கிவர ஏஜென்டுகள் இருக்கின்றனர். கறுப்பு அரிசி மற்றும் குருணை அரிசி 20 சதவிகிதம், மக்காச்சோளம் 80 சதவிகிதம் என கலந்து இரண்டையும் அரைத்து வேகவைத்து சில பிராசஸிங் முறையில் மெத்தனால் தயாரிக்கிறோம். தேவைப்பட்டால், ஸ்பிரிட் கூட தயாரிக்கலாம். ஒரு கிலோவுக்கு 400 முதல் 420 மில்லி கிராம் மெத்தனால் கிடைக்கும். அதிலிருந்து எத்தனால் தயாரிக்கிறோம்.

நல்ல அரிசியின் விலை, தரத்துக்கு ஏற்ப அதிகமாக இருக்கும். கறுப்பு அரிசி, குருணை என்றால் விலை மிகமிகக் குறைவு. மத்திய அரசு குடோன்களில் வேஸ்ட் ஆகும் அரிசியையும் சில சமயங்களில் ஏஜென்ட்கள் வாங்கி வருவார்கள். எங்கள் ஆலையில் பயன்படுத்திக் கொள்வோம்’’ என்றார்.