Published:Updated:

மீண்டும் எஃப்.ஆர்.டி.ஐ மசோதா... அச்சத்தில் வங்கி டெபாசிட்தாரர்கள்!

வி.கோபாலகிருஷ்ணன், Money Avenues

பிரீமியம் ஸ்டோரி

வங்கியில் எஃப்.டி வைத்திருப்பவர்களின் பணத்தை அரசாங்கமே எடுத்துக்கொள்ள வகை செய்யும் எஃப்.ஆர்.டி.ஐ மசோதா குறித்து மீண்டும் பேச்சு எழுந்து, வங்கிகளில் பணத்தை டெபாசிட் செய்திருப்பவர்களின் வயிற்றில் புளியைக் கரைத்திருக்கிறது. இரண்டு ஆண்டுகளுக்குப் பிறகு மீண்டும் இந்த மசோதா பற்றியப் பேச்சு எழ என்ன காரணம்?

சிக்கலில் வங்கித் துறை

மீண்டும் எஃப்.ஆர்.டி.ஐ மசோதா... அச்சத்தில் வங்கி டெபாசிட்தாரர்கள்!

சில வருடங்களாக இந்திய வங்கித் துறையில் புயல் வீசத் தொடங்கியிருக்கிறது. பல நிறுவனங்கள் தாங்கள் வாங்கிய கடனைத் திருப்பிச் செலுத்த முடியாத காரணத்தால், வாராக்கடன் அளவுக்கதிகமாக உயர்ந்துவந்தது. வாராக்கடன் பிரச்னையைத் தீர்க்க அரசும் இந்திய ரிசர்வ் வங்கியும் பல்வேறு முயற்சிகளை எடுத்தும்வந்த வேளையில், சில வங்கிகளில் ஏற்பட்ட நிர்வாகச் சீர்கேட்டால், வங்கித் துறை மேலும் சிக்கல்களில் சிக்கியிருக்கிறது.

அண்மையில், மகாராஷ்டிராவைத் தலைமையிடமாகக் கொண்ட பி.எம்.சி கூட்டுறவு வங்கியில் மிகப்பெரிய நிதி நிர்வாக மோசடி கண்டுபிடிக்கப்பட்டது. அது, அந்தத் துறைக்கே மிகப் பெரிய தலைவலியை ஏற்படுத்தியிருக்கிறது. ஒரு குறிப்பிட்ட கட்டுமான நிறுவனத்துக்கு அளவுக்கதிகமான கடன் வழங்கப்பட்டது தெரியவந்திருக்கிறது. இதன் காரணமாக, திடீரென அந்த வங்கி திவாலாகும் நிலைக்குச் சென்றது.

அந்த வங்கியில் பணம் டெபாசிட் செய்திருக்கும் பலர் அதிர்ச்சிக்குள்ளாகி பணத்தை எடுக்க முயன்றனர். இந்திய ரிசர்வ் வங்கி தலையிட்டு, திடீரென்று பணம் எடுக்கும் முறையை நெறிப்படுத்த பல கட்டுப்பாடுகளை விதித்தது. ஆனாலும், இந்தப் பிரச்னை காரணமாக முதலீட்டாளர்கள் போராட்டம் வரை சென்றனர். இப்படிப்பட்ட சூழலில், `யெஸ் பேங்க்’ என்ற தனியார் வங்கியும் கடும் நெருக்கடியில் சிக்கித் தவித்துவருகிறது. அந்த வங்கியின் கடன் புத்தகம் அபாயகரமான சூழலிலிருக்கும் காரணத்தால், யெஸ் பேங்கில் முதலீடு செய்தவர்களும் பெரும் அச்சத்தில் இருக்கிறார்கள்.

அண்மைக்காலமாக இந்திய வங்கித் துறை சில பலவீனங்களைச் சந்தித்திருந்தாலும், அடிப்படையில் வலுவான கட்டமைப்பில்தான் இருக்கிறது. கடந்த 2008-ம் ஆண்டில் உலகையே ஆட்டுவித்த நிதி நெருக்கடி, நம் வங்கிகளை பாதிக்காமல் இருந்ததற்கு முக்கியக் காரணம், நமது வலுவான அடிப்படைக் கட்டமைப்புதான்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

வாட்ஸ்அப் வதந்திகள்

சில நாள்களுக்கு முன்னால், `வங்கிகளின் முத்திரை இருந்தால் மட்டுமே இன்ஷூரன்ஸ் கிடைக்கும்’ என்பது போன்ற வதந்திகள் வாட்ஸ்அப்பில் வலம்வந்தன. பொதுவாக, இது போன்ற வதந்திகள்தான் நிதி மற்றும் வங்கித் துறை நெருக்கடிகளுக்கு மிக முக்கியக் காரணங்கள். ஒரே நேரத்தில் அனைத்து வாடிக்கையாளர்களும் பணத்தை எடுக்க வங்கிகளுக்குச் சென்றால் வங்கிகளால்தான் என்ன செய்ய முடியும்?

எஃப்.ஆர்.டி.ஐ மசோதா

மீண்டும் எஃப்.ஆர்.டி.ஐ மசோதா... அச்சத்தில் வங்கி டெபாசிட்தாரர்கள்!

`இது போன்ற பிரச்னைகளுக்குத் தீர்வுகளே இல்லையா?’ என்றால், `நிச்சயம் தீர்வுகள் இருக்கின்றன’ என்பதுதான் பதில். கடந்த 2016-ம் ஆண்டில் வங்கி மற்றும் நிதி நிறுவனத் துறையில் பல மாற்றங்களைக் கொண்டுவரும் பொருட்டு எஃப்.ஆர்.டி.ஐ என்ற ஒரு புதிய சட்ட வடிவத்தை அரசு முன்மொழிந்தது. அந்தச் சட்டவடிவின் மூலம் பரிந்துரைக்கப்பட்ட முக்கிய அம்சம் என்னவென்றால், நிதி நிறுவனங்களில் ஏற்படும் சிக்கல்களைத் தீர்க்கத் தனியாக ஒரு நிறுவனம் தொடங்கப்பட்டு, சிக்கலான நிறுவனங்களின் நிர்வாகம் அந்த பிரத்யேக நிறுவனத்தின் கட்டுப்பாட்டுக்குள் கொண்டுவரப்பட்டு, பிரச்னையைத் தீர்க்க வழிவகை செய்யப்படும்.

மேலும், நிதி நிறுவனங்களின் ரிஸ்க் அடிப்படையில் தரம் பிரிக்கப்பட்டு நிறுவனங்களின் உண்மைத் தன்மையை எடுத்துரைக்க அந்த பிரத்யேக நிறுவனம் பயன்படும். தற்போதைய சூழலில், டி.ஹெச்.எஃப்.எல் போன்ற வங்கியல்லாத நிதி நிறுவனங்கள் கடுமையான நிதி நெருக்கடியில் சிக்கி, சின்னாபின்னமாகி வருகின்றன. இது ஒரு நிறுவனம் சார்ந்த பிரச்னை என்றாலும், ஒட்டுமொத்த நிதிச் சந்தைகளிலும் இதன் தாக்கம் கடுமையாக இருக்கிறது. மேலும், பி.எம்.சி., யெஸ் பேங்க் போன்ற வங்கிகளின் பிரச்னைகளால் இந்தத் துறை கடும் நெருக்கடியில் இருந்துவருகிறது.

இது போன்ற சிக்கல்களைத் தீர்க்கத்தான் எஃப்.ஆர்.டி.ஐ எனும் சட்ட வடிவத்தை அரசு முன்மொழிந்தது. ஆனால், சிலபல காரணங் களுக்காக அந்தச் சட்ட வடிவம் முழுமை பெறவில்லை. முக்கியமாக ‘பெயில் இன்’ என்ற ஒரு வழிமுறை அதில் பரிந்துரைக்கப்பட்டது. அதாவது, ஒரு நிதி நிறுவனம் நிதி நெருக்கடியில் சிக்கும்போது, அதன் முதலீட்டாளர்களும் அந்தச் சிக்கலைத் தீர்க்க தங்கள் நிதிக் கோரிக்கையைக் குறைத்துக்கொள்ள வேண்டும் என்றரீதியில் அந்தப் பரிந்துரை அமைந்திருந்தது.

பெயில் இன்’ ஷரத்து நீக்கப்படும்!

ஆனால், இந்திய ரிசர்வ் வங்கி உட்பட பலரின் எதிர்ப்பால் அந்தச் சட்ட வடிவம் கிடப்பில் போடப்பட்டது. இந்த ‘பெயில் இன்’ முறை என்பது மிக மிக அரிதாகப் பயன்படுத்தப்படும் என்ற உத்தரவாதத்தை அரசு கொடுத்தாலும், அதன் மீதான எதிர்ப்பு காரணமாக அது முன்னெடுக்கப்படவில்லை.

ஆனால், இப்போது இந்த ‘பெயில் இன்’ ஷரத்தை நீக்கிவிட முடிவெடுக்கப்பட்டிருக்கிறது. `இந்த ஷரத்தை நீக்கிய பிறகு, அது அமைச்சரவையின் ஒப்புதலுக்கு அனுப்பப்படும். அதன் பிறகே நாடாளுமன்றத்தில் மசோதாவாகத் தாக்கல் செய்யப்பட்டு, சட்டமாக மாற்ற நடவடிக்கை எடுக்கப்படும்’ என்று சொல்லப்படுகிறது.

மிகக் குறைவான இன்ஷூரன்ஸ் இழப்பீடு

தவிர, `வங்கி முதலீட்டாளர்களுக்கான இன்ஷூரன்ஸ் தொகை உயர்த்தப்பட வேண்டும்’ என இந்தச் சட்ட வடிவில் மிக முக்கியப் பரிந்துரை கொண்டுவரப்பட்டிருக்கிறது. `ஒரு வங்கி திவாலாகும்பட்சத்தில், அந்த வங்கியில் டெபாசிட் செய்யப்பட்டிருக்கும் ஒவ்வொரு எஃப்.டி கணக்குக்கும் ஒரு லட்ச ரூபாய் இன்ஷூரன்ஸ் மூலம் இழப்பீட்டுத் தொகையாகத் தரப்பட வேண்டும்’ என 1993-ம் ஆண்டில் மாற்றப்பட்டது, அதற்குப் பிறகு இந்தத் தொகை மாற்றியமைக்கப்படவில்லை. மேலும், உலக நாடுகளுடன் ஒப்பிட்டுப் பார்க்கும்போது, வங்கி முதலீட்டு இன்ஷூரன்ஸ் தொகை இந்தியாவில்தான் மிகக் குறைவாக இருக்கிறது என்பதும் முக்கியமான விஷயம்.

தற்போதைய சூழலில், அரசு அந்தச் சட்ட வடிவத்தை மேலும் சில மாற்றங்களுடன் கொண்டுவரத் திட்டமிட்டிருக்கிறது. நம் நாட்டில் வங்கித் துறை வலுவாக இருக்கிறது. என்றாலும், தற்போதைய மாறிவரும் நிதிச் சந்தைச் சூழல், வாராக்கடன் போன்ற பிரச்னைகள் தலைக்குமேல் கத்தி என்பதுபோலத்தான் வங்கிகள் இயங்கிக்கொண்டிருக்கின்றன. வங்கி மற்றும் நிதி நிறுவனங்களைக் கட்டிக்காத்து வழிநடத்த இந்தச் சட்டம் மிக அவசியமானதாக இருக்கும். மேலும், சிறு முதலீட்டாளர்களுக்கும் வங்கிகளின் மீதான நம்பிக்கை சிதைந்து போகாமலிருக்க, இன்ஷூரன்ஸ் தொகை அதிகப்படுத்தப்பட்டால் அது வங்கித் துறை மீதான நம்பகத் தன்மையை உறுதிப்படுத்தும்.

பதற்றம் அடையத் தேவையில்லை!

எனவே, எஃப்.ஆர்.டி.ஐ சட்டமாகிவிட்டால், வங்கியில் டெபாசிட் செய்திருக்கும் பணத்தை எல்லாம் அரசே எடுத்துக்கொண்டுவிடும் என்று பயந்து, அந்தப் பணத்தை உடனே எடுக்கத் தேவையில்லை. இந்த விஷயத்தில் அரசின் நடவடிக்கை எப்படி இருக்கப்போகிறது என்பதைத் தெரிந்துகொண்ட பிறகு நடவடிக்கை எடுப்பது நல்லது!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு