Published:Updated:

கடல் மீன்வள ஒழுங்குமுறை மசோதாவை நிறைவேற்ற முயற்சியா?

மீன்பிடி படகுகள்
பிரீமியம் ஸ்டோரி
News
மீன்பிடி படகுகள்

- அச்சத்தில் மீனவர்கள்

கொரோனா ஊரடங்கால் தமிழகத்தில் அனைத்து வகை மீன்பிடித் தொழிலுக்கும் தடை விதிக்கப்பட்டிருந்தது. அதேசமயத்தில், அண்டை மாநிலமான கேரளாவில் கட்டுமரங்கள், வள்ளங்கள் ஆகியவற்றில் மீன்பிடிக்க அனுமதி அளிக்கப்பட்டுள்ளது.

அதேபோன்று தமிழகத்திலும் விசைப்படகைத் தவிர்த்து பாரம்பர்ய முறையில் மீன்பிடிக்க அனுமதி அளிக்க வேண்டும் என்ற கோரிக்கை வலுத்துவந்தது. இதையடுத்து, தமிழக அரசு 11 நிபந்தனைகளுடன் மீன்பிடிக்க அனுமதி அளித்தது. இந்த நிபந்தனைகள் அனைத்தும் மீனவர்களுக்கு அச்சத்தை ஏற்படுத்தியுள்ளன.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

‘`ஊரடங்கு காலத்தில் மீன்பிடிக்க அனுமதிக்கும் நிபந்தனைகளும் விதிமுறைகளும், தேசிய கடல் மீன்வள ஒழுங்குமுறை மற்றும் மேலாண்மை வரைவு மசோதாவில் உள்ள அம்சங்களைப் போன்று உள்ளன’’ என்கின்றனர் மீனவர்கள். ‘கொரோனா காலத்துக்குப் பிறகும் இந்த விதிமுறைகள் தொடர வாய்ப்பு இருப்பதால், அந்த நிபந்தனைகளை ஏற்றுக்கொண்டு மீன் பிடிக்கச் செல்ல வேண்டாம்’ என்று மீனவர்கள் முடிவெடுத்துள்ளனர். இதுதொடர்பாக, கடலோர கிராமங்களில் தீர்மானங்களும் நிறைவேற்றிவருகின்றனர்.

கடல் மீன்வள ஒழுங்குமுறை மசோதாவை நிறைவேற்ற முயற்சியா?

இதுகுறித்து மீனவர்களின் நலனுக்காகச் செயல்பட்டுவரும் கடலோர அமைதி மற்றும் வளர்ச்சி மையத்தின் இயக்குநர் ஸ்டீபனிடம் பேசினோம். ‘‘மீனவர்கள் கடலில் மீன்பிடிக்கச் செல்வதற்காக 11 விதிமுறைகளை அரசு வெளியிட்டுள்ளது. அதில், ‘கட்டுமரம் மற்றும் இயந்திரம் பொருத்திய வள்ளம் ஆகியவற்றில் மீன்பிடிக்கச் செல்லலாம். விசைப்படகுகளில் மீன்பிடிக்கச் செல்லக் கூடாது. பிடித்து வந்த மீன்களை ஏலமுறையில் விற்பனை செய்யக் கூடாது. அனைத்து மீன்களையும் மொத்த வியாபாரியிடம்தான் விற்பனை செய்ய வேண்டும். காலை 10 மணிக்குமேல் மீன்களை விற்றால், அந்த மீன்கள் பறிமுதல் செய்யப்படுவதோடு படகு உரிமமும் பறிக்கப்படும்’ எனக் கூறப்பட்டுள்ளது.

‘நாட்டுப்படகில் மூன்று பேருக்குமேல் மீன்பிடிக்கச் சென்றால், அந்தக் கிராமத்துக்கே மீன்பிடிக்க அனுமதி மறுக்கப்படும். படகுகள் தனித்தனியாக மீன்பிடித் தொழிலில் ஈடுபட வேண்டும். மீறினால், மீன்வளத் துறை மற்றும் காவல்துறை மூலமாக நடவடிக்கை எடுக்கப்படும்’ என்பது போன்ற கடும் நிபந்தனைகள் விதிக்கப் பட்டுள்ளன.

மொத்த வியாபாரியிடம் மீனை விற்றால், அவர் நிர்ணயிப்பதுதான் விலையாக இருக்கும். இதனால், மீனவர்களுக்கு கூலிகூட மிஞ்சாது. மொத்த வியாபாரிகள் மீனை வாங்கி அப்படியே கேரளா மற்றும் பிற மாநிலங்களுக்குக் கொண்டு போய்விடுவார்கள். இதனால், உள்ளூரில் கூடையில் சுமந்து மீன் வியாபாரம் செய்யும் சில்லறை வியாபாரிகளுக்கு எந்தப் பயனும் இல்லை. உள்ளூர் மக்களுக்கும் அந்த மீன் பயன்படாது.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

அதிலும் வாரத்துக்கு இரண்டு நாள்தான் மீன்பிடிக்க அனுமதிக்கிறார்கள். நள்ளிரவில் மீன் பிடிக்கச் செல்லும் மீனவர்கள் காலை 6 மணியில் இருந்து 10 மணிக்குள்ளாக கரைக்கு வந்து மீன்களை விற்றுவிட வேண்டும் என்கிறார்கள். கடலுக்குச் செல்லும் மீனவர்களுக்கு மீன் கிடைத்தால்தான் கரை திரும்ப முடியும். குறிப்பிட்ட நேரத்துக்குள் கரை திரும்ப வேண்டும் எனக் கூறினால், எரிபொருள் செலவுசெய்து கடலுக்குச் சென்ற மீனவர் நஷ்டப்பட்டுத்தான் கரை திரும்ப வேண்டியிருக்கும்.

கடல் மீன்வள ஒழுங்குமுறை மசோதாவை நிறைவேற்ற முயற்சியா?

எல்லாவற்றுக்கும்மேலாக மீன் பிடிக்கச் செல்லும் மீனவர்கள் மீன்வளத் துறை அலுவலகத்தில் பதிவுசெய்ய வேண்டும் எனக் கூறியுள்ளனர். இந்த நிபந்தனைகளை கொரோனா தடை முடிந்த பிறகும் தொடர்வார்கள். பிறகு, படிப்படியாக தேசிய கடல் மீன்வள ஒழுங்குமுறை மற்றும் மேலாண்மை வரைவு மசோதாவைத் திணித்து விடுவார்கள். ஏற்கெனவே, அந்த மசோதாவை எதிர்த்து மீனவர்கள் போராட்டம் நடத்திவருகிறார்கள். இந்த நிலையில் கொரோனா தடைக்காலத்தில் மீன்பிடிக்க அனுமதி அளிக்கிறோம் என்ற பெயரில் மறைமுகமாக அந்தச் சட்டத்தை அமல்படுத்தப் பார்ப்பதாக மீனவர்கள் அஞ்சுகின்றனர். அதனால்தான், கன்னியாகுமரி மாவட்டத்தில் உள்ள 45 கடலோர கிராமங்களில் பெரும்பாலானவற்றில் மீன்பிடிக்கப் போவதில்லை எனத் தீர்மானம் போட்டுவிட்டார்கள். மற்ற கிராமங்களிலும் தீர்மானம் போட்டுவருகின்றனர்’’ என்றார்.

இதுபற்றி மீன்வளத் துறை துணை இயக்குநர் இளம்வழுதியிடம் பேசினோம். ‘‘மீன்பிடிக்கச் செல்பவர்களை வரைமுறைப்படுத்துவதற்காக மீனவர் கூட்டுறவுச் சங்கங்களில் பதிவுசெய்யச் சொல்லியிருக்கிறோம். அப்போதுதான் எத்தனை படகுகள் மீன்பிடிக்கப் போகின்றன, எவ்வளவு மீன்பிடித்துவிட்டு வந்திருக்கின்றன எனக் கணக்கெடுக்க முடியும். ஊரடங்கு காரணமாக மீனவர்கள் கூட்டமாகப் போகக் கூடாது என்பது உள்ளிட்ட அரசு அறிவித்துள்ள வழிமுறைகளைக் கடைப்பிடிக்கிறோம். தமிழ்நாடு முழுவதும் கடைப்பிடிக்கப்படும் முறைதான் குமரி மாவட்டத்திலும் கடைப்பிடிக்கப்படுகிறது.

தேசிய கடல் மீன்வள ஒழுங்குமுறை மற்றும் மேலாண்மை வரைவு மசோதாவுக்கும் இதற்கும் சம்பந்தமில்லை என மீனவர்களிடம் விளக்கிக் கூறியுள்ளோம். ஆனால் மீனவர்கள், ‘கொரோனா பாதிப்பு முடிந்து மீன்பிடிக்கச் செல்லலாம்; அதுவரை காத்திருக்கிறோம்’ என்றார்கள். இதுவரை குமரி மாவட்டத்தில் மீனவர்கள் எவரும் மீன்பிடிக்கச் செல்லவில்லை. இது சம்பந்தமாக மீனவர்களிடம் தொடர்ந்து பேசிவருகிறோம்’’ என்றார்.

குமரி மாவட்டத்தைத் தொடர்ந்து தூத்துக்குடி உள்ளிட்ட பிற கடலோர மாவட்டங்களில் உள்ள மீனவர்களும் கடலுக்கு மீன்பிடிக்கச் செல்ல மாட்டோம் எனத் தீர்மானம் போட்டுவருவதாக தகவல்கள் வருகின்றன.

அலைகளைப்போலவே மீனவர்களின் கவலைகளும் ஓயாதோ?