Published:Updated:

சசிகலா ஜாதகம் - 48 - ‘‘கவிதை அல்லாததைப் பிரசுரிக்க முடியாது!’’

ஒட்டுமொத்த விகடனுக்கும் ஒரே ஷார்ட்கட்

Use App
சசிகலா ஜாதகம் - 48 - ‘‘கவிதை அல்லாததைப் பிரசுரிக்க முடியாது!’’
சசிகலா ஜாதகம் - 48 - ‘‘கவிதை அல்லாததைப் பிரசுரிக்க முடியாது!’’

எஸ்.ஏ.எம்.பரக்கத் அலி

பிரீமியம் ஸ்டோரி

மிழ்த் துறையைச் சேர்ந்தவர்கள்தான் கவிதை, கட்டுரைகளில் ஆர்வம் கொண்டிருப்பார்கள். ஆனால், கல்லூரியில் உயிரியல் படித்துக் கொண்டிருந்த நடராசனுக்குத் தமிழ் மீது கொள்ளைப் பிரியம். அதற்குக் காரணமாக இருந்தவர், புலவர் முத்துக்குமரன். பள்ளி, கல்லூரிக் காலங்களில் கட்டுரை, கவிதைகள் எழுதுவதில் நடராசன் ஆர்வம் கொண்டிருந்தார். பள்ளியில் படிக்கும்போது ‘லிப்டன்’ டீ நிறுவனம் நடத்திய கட்டுரைப் போட்டியில் முதல் பரிசு வாங்கினார். பாரதியார், பாரதிதாசன் பாடல் வரிகளில் ஈர்ப்புகொண்டு கவிதைகள் எழுத ஆரம்பித்தார். கல்லூரி தமிழ்ப் பேரவை கவியரங்கங்களில் பங்குபெற்றார். கவிதையோடு நிற்காமல் பட்டிமன்றங்களிலும் தடம் பதித்தார்.

‘நான் ஆசிரியன் ஆனால்...’ என்ற தலைப்பில் ஒரு முறை நடராசன் கவிதைப் பாடினார். பிறகு உண்மையிலேயே ஆசிரியர் ஆனார். பெருமகளூர் பள்ளியில் சிறிதுகாலம் ஆசிரியர் வேலைப் பார்த்தார். அதன்பிறகு அரசு வேலையில் சேர்ந்து, அதையும் உதறிவிட்டு பல ஆண்டுகள் கழித்து ‘தமிழ் அரசி’ என்கிற பத்திரிகையை ஆரம்பித்து அதற்கு ஆசிரியர் ஆனார். ‘நான் ஆசிரியன் ஆனால்...’ என்ற தலைப்பில் நடராசன் பாடிய கவிதையில்,

‘மதம் - கட்சி இவையிரண்டுங் கல்விக் கென்ன
மாமன்மகள் உறவாநாம் கலந்து பேச?
இதமாகக் கவியொடு இவற்றைச் சேர்க்க
இனிக்கின்ற கத்திரிக்காய்க் கூட்டாக் கல்வி!’
எனக் கேள்வி எழுப்பினார்.

சசிகலா ஜாதகம் - 48 - ‘‘கவிதை அல்லாததைப் பிரசுரிக்க முடியாது!’’

மதம் அரசியலை மட்டுமின்றி மொத்த சமுதாயத்தையும் சீரழிக்கும் என்பதுதான் அவர் பாடிய கவிதையின் சாரம். இப்படியாக மதம், கட்சி என அப்போதே நடராசன் அரசியல் பேச ஆரம்பித்தார். அந்த ‘மதம்’ பிரச்னையைக் கடைசி வரை தூக்கிப் பிடித்தார் நடராசன். அது 2017 பொங்கல் விழாவில் எதிரொலிக்க... மத்திய பி.ஜே.பி ஆட்சி வரை சூடேற்றியது. அது பன்னீர்செல்வத்துக்குச் சிவப்புக் கம்பளத்தையும் தினகரனுக்கு திகார் சிறைவாசத்தையும் பெற்றுத் தந்தது.

‘தாய்’ பத்திரிகையில் ஒரு முறை ‘கர்நாடக’ சிறப்பிதழ் வெளியிட்டார்கள். அந்த நேரத்தில் அதன் ஆசிரியர் வலம்புரி ஜான், ஜெயலலிதாவைப் பார்க்க போயஸ் கார்டன் போயிருந்தார். அவருக்காகக் காத்திருந்த நேரத்தில் ‘தாய்’ பத்திரிகையைக் கையில் வைத்துக்கொண்டிருந்த சசிகலா, ‘‘கர்நாடகச் சிறப்பிதழில் அம்மாவைப் பற்றி எதுவுமே இல்லையே. அக்காவே ரொம்ப வருத்தப்பட்டார்’’ என வலம்புரி ஜானிடம் தெரிவித்தார். ‘‘அம்மா கர்நாடகத்தைச் சேர்ந்தவர் எனத் தமிழர்கள் பேச மாட்டார்களா? அதனால்தான் அம்மாவின் கட்டுரை இதில் இடம்பெறாமல் பார்த்துக் கொண்டேன்.’’ என்றார் வலம்புரி ஜான். உடனே சசிகலா,

‘‘எம்.ஜி.ஆரை மலையாளிகள் என்றார்கள். அது எடுபட்டதா?’’ என்றார். இது எம்.ஜி.ஆர் முதல்வராக இருந்தபோது நடைபெற்ற உரையாடல். எம்.ஜி.ஆரின் பத்திரிகைதான் தாய். அப்போதே எம்.ஜி.ஆர் ரேஞ்சுக்கு ஜெயலலிதாவை சசிகலா நிறுத்தியிருந்தார்.

சசிகலா ஜாதகம் - 48 - ‘‘கவிதை அல்லாததைப் பிரசுரிக்க முடியாது!’’

வலம்புரி ஜானுடனான அந்தச் சந்திப்பில் ஒரு கவிதையை அவரிடம் கொடுத்து, ‘‘இது அம்மா எழுதின கவிதை.’’ என்றார் சசிகலா. அதைப் படித்துப் பார்த்த வலம்புரி ஜானுக்கு, அது வேறொருவர் எழுதியது என்பது புரிந்துவிட்டது. அதாவது சசிகலா, தான் எழுதியதை ஜெயலலிதாவின் கவிதை எனச் சொல்லி வலம்புரி ஜானிடம் கொடுத்துப் பிரசுரம் செய்ய நினைத்தார். ஆனால், அந்தக் கவிதையை வலம்புரி ஜான் ‘தாய்’ இதழில் வெளியிடவில்லை. அதே சந்திப்பின்போது, ‘‘எனது கணவர் நல்ல எழுத்தாளர். அவர் ஏதாவது எழுதிக் கொடுத்தால் பிரசுரிக்க வேண்டும்.’’ என வலம்புரி ஜானிடம் கேட்டுக் கொண்டார் சசிகலா. ‘‘தகுதியாக இருந்தால் பிரசுரிக்கலாம்’’ எனச் சொன்னார் ஜான்.

சில மணி நேரத்திலேயே நடராசன் ‘தாய்’ அலுவலகத்துக்கு வந்து வலம்புரி ஜானைச் சந்தித்தார். ‘‘அண்ணாவின் நினைவு நாளுக்காக நான் எழுதியது.’’ எனச் சொல்லி ஒரு கவிதையை நீட்டினார். அது பிரசுரம் ஆகவில்லை. அதற்கு வலம்புரி ஜான் சொன்ன விளக்கம் இது.

‘‘கவிதை அல்லாததைப் பிரசுரிக்க முடியாது.’’

(தொடரும்)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு