‘‘தி.மு.க. எம்.எல்.ஏ-க்கள் கீழ்த்தரமான நடவடிக்கைகளில் ஈடுபட மாட்டார்கள்’’ - துரைமுருகன் கடிதம்!

‘அ ரசு டெண்டர்... பங்கு பிரிக்கப்படுகிறதா பணம்?’ என்ற தலைப்பில் கடந்த 19.7.17 தேதியிட்ட ஜூ.வி-யில் கவர் ஸ்டோரி வெளியிட்டிருந்தோம். இது தொடர்பாக தி.மு.க முதன்மைச் செயலாளரும், சட்டமன்ற கட்சித் துணை தலைவருமான துரைமுருகன் நமக்குக் கடிதம் அனுப்பியிருக்கிறார். அதன் சுருக்கம்:

. க ட்டுரையில் ‘பிரிக்கும் கணக்கு’ என்று பெயரிட்டு ‘எதிர்க்கட்சி எம்.எல்.ஏ - 2 சதவிகிதம்’ என்று எழுதியிருக்கிறீர்கள். பிரதான எதிர்க்கட்சியான தி.மு.க-வின் சார்பில் 89 சட்டமன்ற உறுப்பினர்கள், எதிர்க்கட்சி வரிசையில்தான் அமர்ந்துள்ளார்கள். எதிர்க்கட்சித் தலைவர் மு.க.ஸ்டாலின் தலைமையில், அ.தி.மு.க அரசின் ஊழல்களை, ஜனநாயக விரோத செயல்களை, மக்கள் விரோத நடவடிக்கைகளைச் சட்டமன்றத்தில் தினந்தோறும் எழுப்பி வருகிறோம். அதற்கு அனுமதி மறுக்கப்படுகிற நேரத்தில் ஜனநாயக ரீதியில் எதிர்ப்பு தெரிவிக்க, வெளிநடப்பு செய்கிறோம். மீண்டும் உடனே அவை நடவடிக்கைகளில் பங்கேற்று, மக்கள் பிரச்னைகளை ஆக்கபூர்வமான முறையில் ஆணித்தரமாக எடுத்து வைக்கிறோம். ஸ்டாலினும் தினமும் ஒரு முக்கியப் பிரச்னையில் பேசுகிறார். மேலும், நீட் தேர்வு, குட்கா டைரி பிரச்னை, நம்பிக்கை வாக்கெடுப்புக்குப் பண பேரம் நிகழ்த்தியது, சென்னையில் போலீஸ் ஸ்டேஷனில் பெட்ரோல் குண்டு வீசப்பட்டது, நெடுவாசல் போராட்டம், கதிராமங்கலம் போராட்டம், விவசாயிகள் கடன் தள்ளுபடி உள்ளிட்ட பல்வேறு பொது முக்கியத்துவம் வாய்ந்த பிரச்னைகளில் ஆக்கபூர்வமான விவாதங்களை எடுத்து வைத்து, தி.மு.க சட்டமன்ற உறுப்பினர்களை வழிநடத்தி வருகிறார்.

இந்த நிலையில், தி.மு.க-வின் பெயருக்கும், சட்டமன்றப் பணிகளுக்கும், மக்கள் பிரச்னைகளுக்காக நடத்தும் போராட்டங்களுக்கும் இழுக்கு ஏற்படுத்தும் வகையில், பொத்தாம் பொதுவாக ‘எதிர்க்கட்சி எம்.எல்.ஏ-க்கள் - 2 சதவிகிதம்’ என்று பிரசுரித்திருப்பது வேதனையளிக்கிறது. தி.மு.க சட்டமன்ற உறுப்பினர்கள் யாரும் அதுபோன்ற கீழ்த்தரமான நடவடிக்கைகளில் ஈடுபட மாட்டார்கள் என்பது தெரிந்திருந்தும் இப்படிச் செய்தி வெளியிட்டிருப்பது வருத்தமளிப்பது மட்டுமின்றி, பிரதான எதிர்க்கட்சியின் ஜனநாயகப் பணி குறித்து களங்கம் விளைவிக்கும் வகையிலும் அமைந்திருக்கிறது. தி.மு.க சட்டமன்ற கட்சித் துணைத் தலைவர் என்ற முறையில், எங்கள் சட்டமன்ற உறுப்பினர்கள் யாரும் ஆளுங்கட்சியினரிடம் டெண்டரில் பணம் வாங்குவதில்லை என்பதை அழுத்தம் திருத்தமாகத் தெரிவித்துக்கொள்கிறேன். தி.மு.க சட்டமன்ற உறுப்பினர்கள் யாரேனும் ஆளுங்கட்சியிடம் கமிஷன், பணம் பெற்றார்கள் என ஆதாரம் இருந்தால், அதுபோன்ற சட்டமன்ற உறுப்பினர்கள் மீது நடவடிக்கை எடுக்க ஸ்டாலின் காத்திருக்கிறார் என்று தெரிவித்துக்கொள்கிறேன்.

‘‘தி.மு.க. எம்.எல்.ஏ-க்கள் கீழ்த்தரமான நடவடிக்கைகளில் ஈடுபட மாட்டார்கள்’’ - துரைமுருகன் கடிதம்!

Vikatan Correspondent