Published:Updated:

பொய்... புரட்டு... பித்தலாட்டம்! - எடப்பாடி ஆட்சியின் கேவலங்கள்!

பொய்... புரட்டு... பித்தலாட்டம்! - எடப்பாடி ஆட்சியின் கேவலங்கள்!
பிரீமியம் ஸ்டோரி
பொய்... புரட்டு... பித்தலாட்டம்! - எடப்பாடி ஆட்சியின் கேவலங்கள்!

ப.திருமாவேலன்படங்கள்: வீ.சிவக்குமார், தி.குமரகுருபரன், மீ.நிவேதன்

பொய்... புரட்டு... பித்தலாட்டம்! - எடப்பாடி ஆட்சியின் கேவலங்கள்!

ப.திருமாவேலன்படங்கள்: வீ.சிவக்குமார், தி.குமரகுருபரன், மீ.நிவேதன்

Published:Updated:
பொய்... புரட்டு... பித்தலாட்டம்! - எடப்பாடி ஆட்சியின் கேவலங்கள்!
பிரீமியம் ஸ்டோரி
பொய்... புரட்டு... பித்தலாட்டம்! - எடப்பாடி ஆட்சியின் கேவலங்கள்!

ந்தக் காலத்தில் ‘அரிச்சந்திர மயான காண்டம்’ நாடகம் பிரபலமாய் நடத்தப்பட்டது போல இன்று பிரபலமாய் நடக்கிறது ‘அம்மா மயான காண்டம்’. அரிச்சந்திர நாடகம் பார்க்க நன்றாக இருக்கும். இப்போது நடப்பதும், நாம் பார்ப்பதும் கேவலமாக இருக்கிறது.

தன்னைச் சத்தியகீர்த்தியாகவும், அரிச் சந்திரனாகவும் பாவித்துக்கொண்டு அமைச்சர் திண்டுக்கல் சீனிவாசன் பேச ஆரம்பித்திருக்கிறார். ‘`தவறான தகவலைத் தந்து விட்டோம். அதற்காகப் பொதுமக்களிடம் மன்னிப்புக் கேட்டுக் கொள்கிறேன்” என்று அமைச்சர் சொன்னால் என்ன, முதலமைச்சர் சொன்னால் என்ன? எடப்பாடி பழனிசாமி தலைமையிலான அமைச்சரவையே மன்னிப்புக் கேட்டு மக்கள் மன்றத்தில் அம்மணமாக நிற்கிறது.

``இந்திய அரசியலமைப்புச் சட்டத்தின்பால் மாறாப்பற்றுக்கொண்டிருப்பதாக...” பதவிப் பிரமாணம் எடுக்கும் அமைச்சர்கள், இன்னொரு பிரமாணத்தையும் எடுத்துக்கொள்வார்கள். அதுதான், ரகசியக் காப்புப் பிரமாணம்!

பொய்... புரட்டு... பித்தலாட்டம்! - எடப்பாடி ஆட்சியின் கேவலங்கள்!

``எனக்கு நேரடியாகவும் மறைமுகமாகவும் தெரிய வருவதை மற்றவர்களுக்கு நேரடியாகவோ மறைமுகமாகவோ தெரிவிக்க மாட்டேன்” என்பதுதான் ரகசியக் காப்புப் பிரமாணத்தின் சாராம்சம். அதாவது நான் அமைச்சர் என்ற அடிப்படையில் இந்த அரசாங்கத்தின் பல்வேறு தகவல்கள், பிரச்னைகள், ரகசியங்கள் எனக்குத் தெரியவரும். அதை வெளிப்படுத்த மாட்டேன் என்பதுதான் இதன் பொருள். தமிழ்நாட்டின் முதலமைச்சராக இருந்த ஜெயலலிதா கடந்த ஆண்டு செப்டம்பர் 22-ம் தேதி இரவு 10 மணிக்கு சென்னை அப்போலோ மருத்துவமனையில் சேர்க்கப்பட்டது முதல், அவரது அமைச்சரவை சகாக்கள் அவரது உடல்நிலை குறித்து மக்கள் முன்னால் சொன்னது அனைத்தும் அரசாங்க ரகசியம் என்றால்... இப்போது திண்டுக்கல் சீனிவாசன் வாக்குமூலத்தைப் பார்க்கும்போது அனைத்து ரகசியங்களையும் வெளிப்படையாகச் சொல்ல ஆரம்பித்துவிட்டது தெரிகிறது. ‘நாங்கள் இதற்கு முன் சொன்னது அனைத்தும் பொய்’ என்று சொல்வதன் மூலம் எடப்பாடி தலைமையிலான அமைச்சர்கள் அனைவருமே சேர்ந்து தமிழக அரசாங்கத்தையே ‘பொய்யர் கூடம்’ ஆக மாற்றிவிட்டார்கள். பொய்யிலே பிறந்து, பொய்யிலேயே வளர்ந்தவர்கள் என்பதையும் அவர்கள் வாக்குமூலங்களில் இருந்து தெரிந்துகொள்ள முடிகிறது.

என்ன சொல்லி இருக்கிறார் வனத்துறை அமைச்சர் திண்டுக்கல் சீனிவாசன்? ``இந்திய அளவில் அ.தி.மு.க-வை மூன்றாவது பெரிய கட்சியாக உயர்த்திக் காட்டியவர் மறைந்த முதல்வர் ஜெயலலிதா. ஆனால், அவருக்கு முறையான சிகிச்சை அளிக்காமல் மருத்துவமனையிலேயே வைத்திருந்தனர். அந்த நிலையில் கட்சியைக் காப்பாற்ற வேண்டும் என்ற நோக்கத்தில்தான் மருத்துவமனையில் ஜெயலலிதா இட்லி சாப்பிட்டார், சட்னி சாப்பிட்டார் என்று பொய் சொல்ல வேண்டிய நிலைக்குத் தள்ளப்பட்டோம். கட்சியின் நிலையைக் கருத்தில்கொண்டு கட்சியைக் காப்பாற்ற வேண்டும் என்ற ஒரே நோக்கத்தில்தான் அவ்வாறு கூறினோம். இதற்காகப் பொது மக்களிடம் நாங்கள் பகிரங்கமாக மன்னிப்புக் கேட்டுக்கொள்கிறோம்.

பொய்... புரட்டு... பித்தலாட்டம்! - எடப்பாடி ஆட்சியின் கேவலங்கள்!

ஜெயலலிதாவைப் பார்ப்பதற்காக நிதி அமைச்சர் அருண்ஜெட்லி, பா.ஜ.க. தலைவர் அமித்ஷா, அப்போது மத்திய அமைச்சராக இருந்த வெங்கய்யா நாயுடு ஆகியோர் மருத்துவமனைக்கு வந்தனர். அவர்கள் அனைவரும் அப்போலோ தலைவர் பிரதாப் ரெட்டியையும் சசிகலா குடும்பத்தினரையும் மட்டுமே பார்த்துச் சென்றனர். யாரும் ஜெயலலிதாவைப் பார்க்கவில்லை. எங்களுடைய சந்தேகம் என்னவென்றால் ஜெயலலிதாவை நாங்கள் பார்த்திருந்தால் அவர் எங்களிடம் உண்மை நிலையைக் கூறியிருப்பாரோ என்பதுதான்” - என்று நல்ல பிள்ளையைப் போல் முகத்தை வைத்துக்கொண்டு திண்டுக்கல் சீனிவாசன் குண்டு போட்டுள்ளார்.நைட்ரஸ் ஆக்ஸைடு என்பதால் சிரிப்பும்  சேர்ந்து வருகிறது.

ஜெயலலிதா மரணத்தில் மர்மம் இருக்கிறது என்பது பள்ளிப் பிள்ளைகளுக்குக்கூடத் தெரியும். ``சாதாரண காய்ச்சல் காரணமாகச் சேர்க்கப் பட்டுள்ளார். இரண்டு நாள்களில் வீட்டுக்கு வந்துவிடுவார்” என்றுதான் அப்போலோவின் முதல் அறிக்கை சொன்னது. ``முதலமைச்சர் குணமடைந்துவிட்டார். அவர் எழுந்து நடக்க வேண்டியதுதான் பாக்கி. வீட்டுக்கு எப்போது செல்ல வேண்டும் என்பதை அவரே முடிவு செய்வார்” என்பதுதான் அப்போலோ தலைவர் பிரதாப் ரெட்டியின் இறுதிப் பேச்சும். குணமடைந்துவிட்டார் என்று சொல்லப்பட்டவர், சடலமாகத்தான் தரப்பட்டார். அகதா கிறிஸ்டி கதைகளைவிட அம்மா சிருஷ்டிக் கதைகள் மக்களிடம் அதிகமாகப் பேசப்படுகின்றன. இன்னமும் பேசப்படும். எப்போதும் பேசப்படும்.

யாருமே பார்க்கவில்லை என்றால்,பார்த்தது யார்?  ``நான் போனபோது கையைத் தூக்கி ‘தம்ஸ் அப்’ போலக் காட்டினார்” என்று மகாராஷ்டிரா, தமிழ்நாடு கவர்னர் (!) வித்யாசாகர் ராவ் சொன்னதும், உண்மையா, பொய்யா? தஞ்சாவூர், அரவக்குறிச்சி, திருப்பரங்குன்றம் ஆகிய மூன்று தொகுதி இடைத்தேர்தலுக்காக வேட்பாளர் படிவத்தில் பொதுச் செயலாளர் என்ற இடத்தில் தனது அழகான கையெழுத்தை இடாமல் கைநாட்டுப் பதித்து வெளி யிட்டார்களே... அது உண்மையா, பொய்யா? முதலில் அது ஜெயலலிதாவின் கைநாட்டுதானா? வலது கையைத் தூக்க முடியவில்லை என்றார்களே... உண்மையில் அதைத் தூக்க முடியவில்லையா அல்லது வலது கைக்கு உணர்ச்சியே இல்லையா? அப்படிக் கைநாட்டு வைக்கும்போது சுய சிந்தனை கொண்டவராக முதலமைச்சர் இருந்தாரா இல்லையா? தேர்தல் ஆணையத்தையே ஏமாற்றி இருப்பார்கள் என்றால், அந்த மூன்று தொகுதி இடைத்தேர்தலே செல்லுமா செல்லாதா? வெற்றி பெற்ற மூவரும் தகுதி நீக்கம் செய்யப் பட வேண்டுமா வேண்டாமா? செப்டம்பர் 22 முதல் டிசம்பர் ஐந்து வரை ஜெயலலிதா கையெழுத்து அல்லது கைநாட்டு வைத்த கோப்புகள் இருக்கின்றனவா? அவை எவை? இவை அனைத்துமே அடுத்தடுத்து வரும் சந்தேகங்கள். இட்லி சாப்பிட்டதிலேயே இவ்வளவு பொய்கள் என்றால் மற்றவற்றில் எவ்வளவு இருக்கும்?

பொய்... புரட்டு... பித்தலாட்டம்! - எடப்பாடி ஆட்சியின் கேவலங்கள்!

`மரணத்தில் மர்மம்’ என்று எதுவும் தெரியாத புனிதர்போலக் கேட்ட பன்னீர் செல்வம், இப்போது துணை முதல்வர் ஆகிவிட்டதாலேயே அவர் கேட்ட கேள்விகள் எல்லாம் காலாவதியாகிவிடாது. தனக்காகவே தர்மயுத்தம் தொடங்கித் தனக்கு மட்டும் பதவி வாங்கிக்கொண்டு தர்மயுத்தத்தை முடித்துக் கொண்ட பன்னீர்தான் சொன்னார், ‘`நாங்கள் அம்மாவைப் பார்க்க அனுமதிக்கப் படவில்லை. விசாரணை கமிஷன் அமைக்கப்பட்டால் சுகாதாரத் துறை அமைச்சர் விஜயபாஸ்கர்தான் முதலில் விசாரிக்கப்படுவார்” என்று. குற்றம் சாட்டிய பன்னீரும், குற்றம் சாட்டப்பட்ட விஜயபாஸ்கரும் இப்போது ஒரே அமைச்சரவையில் இருக்கிறார்கள். ஒரே புகைப்படத்தில் புன்னகைக்கிறார்கள். ``விசாரணை கமிஷன் அமைத்தால் பன்னீர்தான் முதலில் விசாரிக்கப் படுவார்” என்று அப்போது சொன்னார் அமைச்சர் விஜயபாஸ்கர். இவர்கள் இருவருமே விசாரிக்கப்பட வேண்டியவர்கள் என்பதில் மாற்றுக்கருத்து இல்லை.

ஜெயலலிதா இறந்து ஏழு மாதங்கள் கழித்து விசாரணை கமிஷன் அமைக்கப்படும் என முதலமைச்சர் எடப்பாடி பழனிசாமி அறிவித்தார். இவ்வளவுதான் இவர்களுக்கு ஜெயலலிதா மீதான அக்கறை. இந்த அறிவிப்பைச் செய்து ஒருமாத காலம் ஆன பிறகுதான் விசாரணை கமிஷனின் தலைவர் என்று  நீதிபதி ஆறுமுகச்சாமியை அறிவித்திருக்கிறார்கள். ஜெயலலிதா படத்தை சட்டசபையில் திறப்போம் என்றார்கள். இன்று வரை திறக்கப்படவில்லை. ஜெயலலிதா சமாதியில் நினைவகம் கட்டுவோம் என்றார்கள். இன்றுவரை அதற்கான முயற்சிகள் எடுக்கப்படவில்லை. இவ்வளவுதான் இவர்களுக்கு ஜெயலலிதா மீதான அக்கறை. ஜெயலலிதா விஷயத்திலேயே இவ்வளவு பொய்கள் என்றால், மற்ற விஷயங்களில் எவ்வளவு சொல்வார்கள், சொல்லியிருப்பார்கள்?

பொய்... புரட்டு... பித்தலாட்டம்! - எடப்பாடி ஆட்சியின் கேவலங்கள்!

``நீட் தேர்வு இந்த ஆண்டு தமிழகத்துக்கு இருக்காது. நீட் தேர்வில் தமிழகத்துக்கு விலக்கு. 85 சதவிகித மருத்துவ இடங்கள் மாநிலப் பாடத்திட்டத்தில் படித்தவர்களுக்குத்தான்.பிரதமர் ஒப்புதல் தந்துவிட்டார். மத்திய அரசு கையெழுத்துப் போட்டுவிட்டது. எந்த உரிமையையும் விட்டுத்தர மாட்டோம்...’’ என்றெல்லாம் நித்தமும் நாளிதழைத் திறந்தால், மூன்று மாத காலம் பொய்யாய் கொட்டியவர்கள் தமிழக அமைச்சர்கள். லட்சக்கணக்கான மக்களை, பல்லாயிரக்கணக்கான மாணவர்களை நம்ப வைத்துக் கழுத்தறுத்தவர்கள் இவர்கள்.

``தமிழகத்துக்கான நீரை சரியாகக் கொடுப்பதாக இருந்தால், மேக்கேதாட்டூவில் கர்நாடக அரசு அணை கட்டிக்கொள்வதில் ஆட்சேபணை இல்லை” என்று உச்ச நீதிமன்றத்தில் தமிழக அரசு சார்பிலான வழக்கறிஞரைச் சொல்ல வைத்துவிட்டு... அது வெளியில் வந்ததும், ``அப்படிச் சொல்லவே இல்லை” என்று பொய் சொன்ன ஆட்சியாளர்கள் இவர்கள். தமிழகத்துக்குத் தர வேண்டிய தண்ணீரைத் தராமல் தடுப்பதற்காகத்தான் மேக்கேதாட்டூவில் அணையே கட்டப்படுகிறது என்ற தெளிவே இல்லாமல் ஒரு பதிலைச் சொல்லிவிட்டு, அப்படிச் சொல்லவில்லை என்று பொய் மழுப்பல் செய்கிறார்கள்.

இட்லியில் ஆரம்பித்த பொய் மேக்கேதாட்டூவில் போய் நிற்கிறது. சட்னியில் ஆரம்பித்த பொய் நீட் வரைக்கும் தொடர்கிறது. ‘காயமே இது பொய்யடா; வெறும் காற்றடைத்த பையடா’ என்பார்கள் சித்தர்கள். அதாவது உடம்பைப் பொய் என்றார்கள். இவர்களுக்கு உடம்பு முழுக்கவே பொய் என்பது மட்டுமே மெய்!