Published:Updated:

புரோஹித் புயல்! - ஆய்வு செய்கிறாரா... ஆட்சி நடத்துகிறாரா?

புரோஹித் புயல்! - ஆய்வு செய்கிறாரா... ஆட்சி நடத்துகிறாரா?
பிரீமியம் ஸ்டோரி
புரோஹித் புயல்! - ஆய்வு செய்கிறாரா... ஆட்சி நடத்துகிறாரா?

ஜோ.ஸ்டாலின், படங்கள்: எல்.ராஜேந்திரன், க.விக்னேஷ்வரன், ரா.ராம்குமார்

புரோஹித் புயல்! - ஆய்வு செய்கிறாரா... ஆட்சி நடத்துகிறாரா?

ஜோ.ஸ்டாலின், படங்கள்: எல்.ராஜேந்திரன், க.விக்னேஷ்வரன், ரா.ராம்குமார்

Published:Updated:
புரோஹித் புயல்! - ஆய்வு செய்கிறாரா... ஆட்சி நடத்துகிறாரா?
பிரீமியம் ஸ்டோரி
புரோஹித் புயல்! - ஆய்வு செய்கிறாரா... ஆட்சி நடத்துகிறாரா?

புறப்பட்டுவிட்டார் புரோஹித். அவரது பயணம், நல்லதா கெட்டதா என்று ஆளும்கட்சிக்கும் புரியவில்லை; எதிர்க் கட்சிகளுக்கும் புரியவில்லை.  மாநில சுயாட்சிக்குப் பாதகம் என்று, எதிர்க்கட்சிகள் எகிறி அடிக்கின்றன. ஆளும்கட்சியோ... மென்று முழுங்குகிறது. ``முன்பு இருந்த வித்யாசாகர் ராவ், எப்போதாவது வந்தார். ஆனால், இப்போது வந்திருக்கும் பன்வாரிலால் புரோஹித் எல்லா இடங்களிலும் புகுந்து புறப்படுகிறார். இது ஆய்வா... அல்லது மறைமுகமாக ஆட்சி நடத்துகிறாரா?’’ என்று விவாதங்கள் நடக்கின்றன. ``சில நாள்கள் இப்படியே, ஆய்வு நடத்திவிட்டு... கவர்னர் ஆட்சியைக் கொண்டுவரும் திட்டமும் மத்திய அரசுக்கு இருக்கிறது. அதற்கான ட்ரெய்னிங்தான் பன்வாரிலாலின் ரயில் பயணங்கள்’’ என்கிறார்கள் அரசியல் விமர்சகர்கள்

புரோஹித் புயல்! - ஆய்வு செய்கிறாரா... ஆட்சி நடத்துகிறாரா?

ஒவ்வோர் ஆண்டும் சட்டமன்ற முதல் கூட்டத் தொடரில், முதல்நாள் கவர்னர் உரையாற்றுவார்! அது கவர்னர் உரை என்ற பெயரில் தலைப்புச் செய்தியாக இடம்பெறும். ஆனால், அந்த உரையைக்கூட கவர்னர் சொந்தமாக எழுதிக்கொள்ள முடியாது. முதல் அமைச்சர், முதல் அமைச்சர் பணிக்கும் அதிகாரிகள்தாம் கவர்னர் உரையைத் தயார் செய்வார்கள்; அப்படித் தயார் செய்யப்படும் உரையைத்தான் கவர்னர் சட்டமன்றத்தில் வாசிப்பார். அதற்குத்தான் கவர்னர் உரை என்று பெயர்! பெயர்தான் கவர்னர் உரை... ஆனால், அது கவர்னரின் சொந்த உரையன்று! அதில் இடம்பெற்றுள்ள சிந்தனைகள் கவர்னரின் சிந்தனையில் உதித்தவை அல்ல;  அதில், இடம்பெறும் செயல்திட்டங்களைத் தீட்டியவரும் கவர்னர் அல்லர்! அதைத் தயாரித்தது முதல் அமைச்சரும், அவருக்கு உதவியாக இருக்கும் அதிகாரிகளும்தாம். இதைப் புரிந்துகொண்டால், கவர்னரின் உண்மையான அதிகாரத்தைப் புரிந்துகொள்ள முடியும். ஆனால், தமிழக கவர்னர் பன்வாரிலால் நேரடியாகக் களத்தில் இறங்க... தமிழக அரசியல் களம் அனலடிக்கத் தொடங்கியுள்ளது. 

ஒட்டுமொத்த விகடனுக்கும் ஒரே ஷார்ட்கட்!

ஆளுநர் பதவிக்கான தகுதிகள், விதிமுறைகள்!

சர்க்காரியா கமிஷன் பரிந்துரைப்படி ஆளுநராக நியமிக்கப்படுபவர்,  ``அறிவார்ந்த நபராக (Eminent Person) இருக்க வேண்டும். ஒருவர் எந்த மாநிலத்துக்கு ஆளுநராக நியமிக்கப்படுகிறாரோ, அவர் அந்த மாநிலத்தைச் சேர்ந்தவராக இருக்கக்கூடாது. ஆளுநராக நியமிக்கப்படுவதற்கு முன், சில வருடங்களாவது அவர் அரசியலிலிருந்து ஒதுங்கி இருந்திருக்க வேண்டும்; உள்ளூர் அரசியலோடு தொடர்புடையவராக இருக்கக்கூடாது; துணை ஜனாதிபதி, நாடாளுமன்ற சபாநாயகர் மற்றும் சம்பந்தப்பட்ட மாநில முதல்வருடன் கலந்தாலோசித்து ஆளுநர் நியமனம் நடக்க வேண்டும்; ஆளுநரை அவர் பதவிக்குரிய ஐந்தாண்டுக் காலத்திற்குள் நீக்கக் கூடாது. அப்படி நீக்கினால், அவருக்கு முன்கூட்டியே விளக்கம் கேட்டு நோட்டீஸ் கொடுக்க வேண்டும். அதுமட்டுமன்றி, ஆளுநர் நீக்கம் குறித்து நாடாளுமன்றத்தின் இரு அவைகளிலும் சூழ்நிலையை விளக்கி அறிக்கை தாக்கல் செய்ய வேண்டும்; ஆளுநர் பதவிக்காலம் உறுதி செய்யப்பட வேண்டும் என்றும், அவர் தவறு செய்தால் குடியரசுத் தலைவரை நீக்குவதற்கு உள்ள ‘இம்பீச்மென்ட்’ முறையை ஆளுநருக்கும் கொண்டு வர வேண்டும். ஒரு மாநிலத்தின் ஆளுநராகப் பதவி வகித்தவர், அவருடைய பதவிக்காலம் முடிந்தபிறகு, மத்திய, மாநில அரசுகளில் வேறு எந்தப் பொறுப்புகளுக்கும் விண்ணப்பிக்க முடியாது. போட்டியிட முடியாது. விதிவிலக்காக, மீண்டும் 5 ஆண்டுகளுக்கு அவர் ஒரு மாநிலத்தின் ஆளுநராக நியமிக்கப்படலாம். துணை ஜனாதிபதி அல்லது ஜனாதிபதி தேர்தலில் அவர் போட்டியிடலாம்.

புரோஹித் புயல்! - ஆய்வு செய்கிறாரா... ஆட்சி நடத்துகிறாரா?

ஆளுநரின் அதிகாரங்கள்!

``ஆளுநருக்கு இருப்பதை அதிகாரம் என்று சொல்ல முடியாது; அவருக்குப் பொறுப்பும் கடமைகளும் மட்டுமே இருக்கின்றன. இந்திய அரசியல் அமைப்புச் சட்டமும் அதைத்தான் உறுதி செய்கிறது. அதனால்தான், அவரை `டைட்டில் ஹெட்’ என்கிறார்கள். உண்மையான அதிகாரம் படைத்த ‘ஹெட்’ முதல் அமைச்சர்தான். காரணம், கவர்னர் என்பவர்  மக்களால் தேர்தெடுக்கப்பட்ட மக்கள் பிரதிநிதி அல்லர்; மத்திய அரசின் பிரதிநிதி. மாநிலத்தில் அவரை நியமிக்கும் நோக்கம், மத்திய அரசுக்கும்-மாநில அரசுக்கும் பாலமாகச் செயல்படுவதற்கு மட்டுமே! அதுதவிர்த்து, அவர் ஆட்சியை நடத்தவோ... நிர்வாகத்தைக் கண்காணிக்கவோ அவருக்கு அதிகாரம் கிடையாது. அதை அரசியல் அமைப்புச் சட்டம் அவருக்கு வழங்கவில்லை. உதாரணத்துக்கு, முதல் அமைச்சர், அமைச்சர்களுக்குப் பதவிப்பிரமாணம் செய்து வைப்பது, மாநிலத் தலைமை வழக்கறிஞரை நியமிக்கும் அரசின் முடிவில் ஒப்புதல் அளிப்பது (அதை மறுக்கும் அதிகாரம் கவர்னருக்கு இல்லை), நிதி மசோதாக்களை சட்டமன்றத்தில் தாக்கல் செய்வதற்குப் பரிந்துரை செய்வது உள்ளிட்ட அதிகாரங்கள்தான் உண்டு. மாநிலத்தின் நிர்வாகம் சரியில்லை என்றால், ஆர்டினன்ஸ் என்ற உரிமைக் கட்டளைகளைக் கொடுக்க முடியும். மற்றபடி, அவர் நிர்வாகத்தைக் கண்காணிக்கவும் ஆலோசனை வழங்கவும் விரும்பினால், அதை மாநில முதல் அமைச்சரிடம்தான் சொல்ல வேண்டும்; மாநில அரசாக நம் அரசியல் அமைப்புச் சட்டம் வரையறுத்துள்ள தலைமைச் செயலாளரிடம் ஆலோசனை நடத்தலாம்; வழிகாட்டுதல்களைக் கொடுக்கலாம். துறைச் செயலாளர்களிடம் கலந்துரையாடலாம். ஆனால், அவர்களுக்குக் கட்டளையிட முடியாது. அதுபோல, மாநில ஆட்சி நிர்வாகத்தில்... மாவட்ட நிர்வாகத்திலெல்லாம் தலையிட முடியாது. இதைத்தான் அரசியலமைப்புச் சட்டம் வரையறுத்துள்ளது’’ என்கிறார் மூத்த வழக்கறிஞர் `தடா’ எஸ்.துரைசாமி.

மேலும் ஆய்வு குறித்து சில விளக்கங்கள் சொல்கிறார் துரைசாமி. ``உதாரணத்துக்கு, சுகாதாரத்துறையை கவர்னர் ஆய்வு செய்கிறார் என்று வைத்துக்கொள்ளுங்கள். ஒரு கழிப்பறை உடைந்து கிடக்கிறது. அதைச் சரி செய்ய ஐந்தாயிரம் ரூபாய் செலவழிக்க வேண்டும் என்றால்கூட, அதைச் செலவு பண்ணச் சொல்ல அதிகாரம் கிடையாது. இவர் சொல்லி, அதை யாரும் செலவு செய்துவிடவும் முடியாது. அது அமைச்சரவைக்குப் போக வேண்டும். அங்கு ஒப்புதல் பெற வேண்டும். இவர் அறிவுரை சொல்ல முடியாது. அந்த `டைட்டில் ஹெட்’ தன் தலைக்கு தானே அறிவுரை சொல்லவோ, செயல்படுத்த உத்தரவிடவோ முடியாது.’’

புரோஹித் புயல்! - ஆய்வு செய்கிறாரா... ஆட்சி நடத்துகிறாரா?

பழனிசாமிக்காக எதிர்க்கவில்லை!

``அரசு நிர்வாகத்தில் ஒவ்வொரு துறைக்கும் ஒரு புரோட்டோகால் இருக்கிறது. யார், யாருக்குப் பதில் சொல்ல வேண்டும் என்று தெளிவாக வரையறுக்கப்பட்டுள்ளது; யார் சொல்லும் வேலைகளை, யார் செய்ய வேண்டும்... அதற்கு என்ன வரம்பு என்பதெல்லாம் இருக்கிறது.  கவர்னர் திடீரென ஒரு மாவட்ட கலெக்டருக்கு ஒரு வேலையைக் கொடுக்கிறார் என்றால், கவர்னர் சொல்லிவிட்டார் என்று அதை அவர் செய்ய முடியுமா? அவர் செய்ய வேண்டுமானால், அமைச்சரவை சொல்ல வேண்டும், அல்லது முதல் அமைச்சர் சொல்ல வேண்டும், அவருக்குப் பொறுப்பான துறைச் செயலாளர் சொல்ல வேண்டும். அதை விட்டுவிட்டு, கவர்னர் சொன்னால், அதை அந்த மாவட்ட ஆட்சியரால் எப்படிச் செய்ய முடியும்? நாங்கள் முதல்வர் எடப்பாடி பழனிசாமியின் தனிப்பட்ட உரிமைகள் பறிபோகிறது என்பதற்காக எதிர்க்கவில்லை. மாறாக, முதல்வர் என்ற தகுதிக்கு, பொறுப்புக்கு, பதவிக்கு ஊறு நேரக்கூடாது என்பதற்காகத்தான் எதிர்க்கிறோம். இப்போது எதிர்க்காவிட்டால், எல்லா மாநிலங்களிலும் இதுபோல் மக்கள் பிரதிநிதிகளின் உரிமைகளை எடுத்துக்கொண்டு, கவர்னர்கள் ஆட்சி நடத்தினால், அது மக்களாட்சியாக இருக்காது!’’ என்கிறார் விடுதலைச் சிறுத்தைகள் கட்சியின் தலைவர் தொல். திருமாவளவன்.

புரோஹித் புயல்! - ஆய்வு செய்கிறாரா... ஆட்சி நடத்துகிறாரா?

``தேர்ந்தெடுக்கப்பட்ட அரசாங்கம் இருக்கும் ஒரு மாநிலத்தில், ஆளுநர் என்பவர் மத்திய அரசின் பிரதிநிதி மட்டுமே. உண்மையான அதிகாரம் முதல் அமைச்சருக்குத்தான்.இப்போது குடியரசுத் தலைவர் இருக்கிறார். அவர் பிரதமர் செய்கிற வேலைகளை எல்லாம் செய்ய முடியுமா? பிரதமர் வேலைகளில் தலையிடத்தான் முடியுமா? அப்படிச் செய்வதற்கு அதிகாரம் எப்படி அளிக்கப்படவில்லையோ... அதே தான் மாநில முதல்வர்- மாநில ஆளுநர் விவகாரத்திலும். மேலும், பாரதிய ஜனதா ஆட்சி செய்கிற எந்த மாநிலத்திலும் ஆளுநர்கள் ஆய்வுக்குப் போகவில்லை. எதிர்க்கட்சிகள் ஆளுகிற மாநிலங்களில் மட்டும்தான் ஆளுநர்கள் இந்தக் காரியத்தைச் செய்கிறார்கள் என்று பார்க்கும்போது, இதில் ஏதோ உள்நோக்கம் இருக்கிறது என்று கருதத் தோன்றுகிறது’’  என்கிறார் தி.மு.க-வின் மாநிலங்களவை உறுப்பினர் திருச்சி சிவா.

ஆளுநர் சட்டத்துக்கு உட்பட்டுதான் ஆய்வுகள் மேற்கொள்வதாகத் தொடர்ந்து அறிக்கைகள் அளித்துவருகிறார். ஆனால், தமிழகத்தை ஆளும்கட்சியோ ஆளுநர் ஆய்வு பற்றி எந்த எதிர்க்கருத்தும் சொல்லாமல் மெளனம் காக்கிறது. எடப்பாடி அரசு ``நாம்தான் செயல்படவில்லை, ஆளுநராவது செயல்படட்டுமே’’ என்று நினைக்கிறதோ!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism