Published:Updated:

ஜூனியர் 360: வராத கோதாவரிக்கு வக்காலத்து! - எடப்பாடி ஏடாகூட வாய்ஸ்

ஜூனியர் 360: வராத கோதாவரிக்கு வக்காலத்து! - எடப்பாடி ஏடாகூட வாய்ஸ்
பிரீமியம் ஸ்டோரி
News
ஜூனியர் 360: வராத கோதாவரிக்கு வக்காலத்து! - எடப்பாடி ஏடாகூட வாய்ஸ்

ஜூனியர் 360: வராத கோதாவரிக்கு வக்காலத்து! - எடப்பாடி ஏடாகூட வாய்ஸ்

ட்டுக்கோட்டைக்கு வழிகேட்டால், கொட்டைப் பாக்குக்கு விலை சொல்வதைப் போல திசைதிருப்புவது அரசியல்வாதிகளுக்குப் புதுசில்லை. ஆனால், ஒரு முதல்வரே இதைச் செய்வதுதான் வேதனை. காவிரி விவகாரத்தில் தமிழகத்துக்கு மத்திய அரசு இழைத்துவரும் அநீதிகள் குறித்து எதிர்க்கட்சிகள் கொதிப்போடு பேசிவரும் சூழலில், வராத கோதாவரி தண்ணீருக்கு வக்காலத்து வாங்கியிருக்கிறார் தமிழக முதல்வர் எடப்பாடி பழனிசாமி.

‘‘சில மாதங்களுக்கு முன்பு மத்திய நீர்வளத்துறை அமைச்சர் நிதின் கட்கரியை சென்னையில் சந்தித்தேன். ‘தமிழகத்தின் தண்ணீர்ப் பிரச்னையைத் தீர்க்க, நதிநீர் இணைப்பை விரைவுபடுத்த வேண்டும் என்று பாரதப் பிரதமரிடம் கோரிக்கை வைத்தீர்கள். என்னிடமும் அதுகுறித்து பேசினீர்கள். அதன் முதற்கட்டமாக காவிரி - கோதாவரி நதிகளை இணைக்கும் மிகப் பெரிய அளவிலான திட்டத்தை உருவாக்கியி ருக்கிறோம்’ என்றார் கட்கரி. கோதாவரியிலிருந்து பல ஆயிரம் டி.எம்.சி தண்ணீர் வீணாகக் கடலில் கலக்கிறது. அதைத் தமிழகம் கொண்டு வர மத்திய அரசு திட்டமிட்டிருக்கிறது. இதன்மூலம் தமிழகத்துக்கு 125 டி.எம்.சி தண்ணீர் கிடைக்கும்’’ என்று சேலத்தில் நடந்த அரசு விழாவில் எடப்பாடி பழனிசாமி சொன்னார். 

ஜூனியர் 360: வராத கோதாவரிக்கு வக்காலத்து! - எடப்பாடி ஏடாகூட வாய்ஸ்

காவிரி - கோதாவரி இணைப்பு குறித்து பழனிசாமி பேசியிருப்பது மொத்தமுமே அபத்தமானவை; உண்மைக்குப் புறம்பானவை. ஏதோ பிரதமரிடம் முதல்வர் வைத்த கோரிக்கை யால்தான் இந்தத் திட்டம் முன்னெடுக்கப் பட்டிருப்பதாக அவர் சொல்வது வெறும் விளம்பரம் மட்டுமே. காரணம், காவிரி - கோதாவரி இணைப்புத் திட்டம் என்பது 1970-களிலிருந்தே தொடர்ந்து விவாதிக்கப்பட்டு வரும் விஷயம்தான். இந்த நதிநீர் இணைப்பு விஷயத்தில் ஏராளமான கேள்விகளும் பிரச்னைகளும் சிக்கல்களும் இருக்கும் நிலையில், அடிப்படை ஆதாரமே இல்லாமல் ‘தமிழகத்துக்கு 125 டி.எம்.சி தண்ணீர் கிடைக்கும்’ என்று ஒரு தவறான நம்பிக்கையை மக்கள் மனதில் விதைத்துள்ளார்.

இணைப்பு சாத்தியமாகுமா?

2017-ம் ஆண்டு நவம்பர் மாதம், மத்திய நீர்வளத்துறை அமைச்சர் நிதின் கட்கரி தமிழகம் வந்தார். அப்போது முதல்வர் எடப்பாடி பழனிசாமியைச் சந்தித்து காவிரி - கோதாவரி நதிநீர் இணைப்புக் குறித்துப் பேசினார். அந்த சந்திப்பு முடிந்ததும் நிதின் கட்கரி, ‘‘இந்தத் திட்டம் நிறைவேற்றப்பட்டால் தமிழகத்துக்கு 150 டி.எம்.சி தண்ணீர் கிடைக்கும்’’ என்று சொன்னார். இப்போது முதல்வர் 125 டி.எம்.சி என்கிறார். 150 டி.எம்.சி அல்லது 125 டி.எம்.சி என எதுவாகவும் இருக்கட்டும். இவர்கள் சொல்வதைக் கேட்டால், ஏதோ நாளையே தமிழகத்தின் தண்ணீர்ப் பிரச்னை தீர்ந்துவிடும் என்பது போல் தெரியும். ஆனால், இதில் அடிப்படைக் கேள்வி, இந்தத் திட்டம் முதலில் சாத்தியப்படுமா? காவிரி - கோதாவரி இணைப்பு என்பது ஆறு மாநிலங்கள் சம்பந்தப்பட்டது. தமிழ்நாடு, கர்நாடகா, ஆந்திரா, தெலங்கானா ஆகிய நான்கு மாநிலங்கள் மிக முக்கிய அங்கமாக இருக்கும். சத்தீஸ்கர் மற்றும் மகாராஷ்டிராவும் இதில் சம்பந்தப்படுகிறது.

உபரி நீர் இருக்கிறதா?

கோதாவரியிலிருந்து ஆண்டுதோறும் 3,000 டி.எம்.சி தண்ணீர் கடலில் கலப்பதாக மத்திய அரசு சொல்கிறது. எனவே, தெலங்கானாவின் அகினேபள்ளி தடுப்பணையிலிருந்து உபரியாக இருக்கும் 300 டி.எம்.சி தண்ணீரை எடுக்க இருப்பதாகச் சொன்னது மத்திய அரசு. ஆனால், தெலங்கானா அதற்குக் கடும் எதிர்ப்பு தெரிவித்தது. ‘‘மத்திய அரசு தவறான தகவல்களைச் சொல்கிறது. அகினேபள்ளியில் கடந்த 110 வருடக் கணக்கை ஆராய்ந்து பார்க்கும்போது, அங்கு உபரியாக 177 டி.எம்.சி தண்ணீருக்கு மேல் இருந்ததில்லை. இங்கிருந்து 300 டி.எம்.சி தண்ணீரை எடுக்க வாய்ப்பில்லை’’ என்று சொன்னது தெலங்கானா அரசு. அதன்பின் ஆந்திராவின் போலவரம் அணையிலிருந்து தண்ணீர் எடுக்கப்போவதாகச் சொன்னது மத்திய அரசு.

உமாபாரதி நீர்வளத்துறை அமைச்சராக இருந்தபோதே இந்தத் திட்டத்தை முன்னெடுத்து பல மாநில முதல்வர்களையும் சந்தித்துப் பேசினார். அந்த சமயத்தில் ஆந்திராவும், தெலங்கானாவும் இந்தத் திட்டத்தை மிகக் கடுமையாக எதிர்த்தன. பின்னர், நிதின் கட்கரி நீர்வளத்துறை அமைச்சராகப் பொறுப்பேற்றதும் இரு மாநில முதல்வர்களையும் சமாதானப்படுத்தி ஒப்புக்கொள்ள வைத்தார். அப்போதும்கூட அவர்கள், ‘‘கோதாவரியில் எங்களுக்கான உரிமை இருக்கும் அளவிலான தண்ணீரை மீறி உபரி வந்தால் மட்டுமே, அதை மத்திய அரசு பயன்படுத்திக்கொள்ளலாம்’’ என்று சொன்னார்கள்.

ஆனால், 2018 மார்ச் மாதம் முதல் தெலங்கானா இந்தத் திட்டத்தை முழுமையாக எதிர்த்து வருகிறது. ‘எங்களுக்கு 1,500 டி.எம்.சி தண்ணீர் கோதாவரியிலிருந்து வேண்டும்’ என உரிமை கொண்டாடுகிறது தெலங்கானா. இப்போது இருக்கும் அணைகள், புதிதாகக் கட்டப்பட்டு வரும் அணைகள், எதிர்காலத்தில் கட்டப்போகும் அணைகள் என தெலங்கானா சொல்லும் கணக்கே மலைக்கவைக்கிறது. மேலும், ‘‘இந்தத் திட்டம் நிறைவேற்றப் பட்டால் தெலங்கானாவில் 45 கிராமங்கள் நீரில் மூழ்கிப் போகும் அபாயம் உள்ளது. 70 ஆயிரத்திற்கும் அதிகமானோர் தங்கள் வாழ்விடங்களை இழக்க நேரிடும்’’ என்றும் சொல்லி வருகிறது. மேலும், ‘‘கோதாவரியின் நீரோட்டமும் புவியியல் அமைப்பும் கோதாவரி-காவிரி நதிநீர் இணைப்புக்கு உகந்ததாக இல்லை. மத்திய அரசு இந்தத் திட்டம் குறித்து நீரியல் ஆய்வுகளை முதலில் மேற்கொள்ள வேண்டும்’’ என்றும் வற்புறுத்தியுள்ளது.

ஜூனியர் 360: வராத கோதாவரிக்கு வக்காலத்து! - எடப்பாடி ஏடாகூட வாய்ஸ்

பேப்பரில் காட்டலாம்!

இந்த விவகாரங்கள் குறித்து ஆந்திர மாநிலம் விஜயவாடாவில் இருக்கும் ஆந்திர விவசாய சங்கத் தலைவர் நாகேந்திரநாத்திடம் பேசினோம். ‘‘தெலங்கானாவுக்கு உயிராதாரமாக இருப்பது, கோதாவரி நதியில் செயல்படுத்தப்பட்டிருக்கும் ‘ஸ்ரீராம்சாகர் திட்டம்’தான். 15 லட்சம் ஏக்கர் நிலங்களுக்குப் பாசன நீர் அதிலிருந்துதான் கிடைக்கிறது. ஆனால், இன்று அங்கும்கூட தண்ணீர்ப் பற்றாக்குறை அதிகமாக இருக்கிறது. சராசரியாக ஐந்து வருடங்களில் மூன்று வருடங்கள் நீரில்லாமல் கஷ்டப்படும் சூழல் இருக்கிறது. ஜூலை, ஆகஸ்ட், செப்டம்பர் ஆகிய மூன்று மாதங்களில்தான் கோதாவரியில் நீர் ஆர்ப்பரிக்கும். மீதமிருக்கும் ஒன்பது மாதங்களும் கோதாவரியில் உபரி நீர் ஏதும் இருக்காது. இதனால் தெலங்கானா 80 ஆயிரம் கோடி ரூபாய் செலவில் கோதாவரியில் காளீஸ்வரம் நீரேற்றுத் திட்டத்தை உருவாக்கிக் கொண்டிருக்கிறது. இன்னொரு பக்கம் ஆந்திர மாநிலம், கிருஷ்ணா - கோதாவரியை இணைத்து போலவரம் அணையைக் கட்டிக்கொண்டிருக்கிறது.

அதுமட்டுமில்லாமல், கோதாவரியில் தெலங்கானா இன்னும் மூன்று புதிய திட்டங்களைச் செயல்படுத்த உள்ளது. இதெல்லாம் அடுத்த மூன்று வருடங்களுக்குள் முடிந்துவிடும். அப்படி முடிந்தால், கோதாவரியில் இப்போது இருக்கும் அளவுக்குக்கூட உபரி நீர் இருக்காது. ஒருவேளை மத்திய அரசு சொல்லும் அளவுக்கு உபரி வந்தாலும்கூட, அது மழைக்காலத்தில் மட்டுமே வரும். அந்த நீரைச் சேமிக்க பெரிய அணைகளைக் கட்ட வேண்டும். அதற்கு நிறைய காடுகளை அழிக்க வேண்டிவரும். அதுவுமில்லாமல், இது பல மாநிலங்கள் சம்பந்தப்பட்ட விவகாரம். பல பிரச்னைகள் இருக்கின்றன. இந்தத் திட்டத்தை பேப்பரில் வேண்டுமானால் காட்டலாம். ஆனால், நிஜத்தில் இதைச் செயல்படுத்துவது, மிக மிக அரிதான சாத்தியங்களைக் கொண்டது. அப்படியே எல்லாவற்றையும் கடந்து இது நடந்தாலும்கூட, தமிழகத்தின் தண்ணீர்ப் பிரச்னைக்கான தீர்வாக இது ஒருபோதும் இருக்காது” என்றார் அவர்.

அண்டை மாநிலங்கள் ஆதரிக்காது!

கோதாவரி நதி நீர், ஆந்திராவையும் கர்நாடகாவையும் தாண்டித்தான் தமிழகத்துக்கு வரவேண்டும். ‘‘கர்நாடகா ஏற்கெனவே காவிரி நதி நீரில் வஞ்சிக்கிறது. பாலாற்றின் குறுக்கே பல அணைகளைக் கட்டி, தமிழகத்துக்குத் தண்ணீர் வரவிடாமல் செய்கிறது ஆந்திரா. தெலுங்கு கங்கை திட்டத்தில் ஒப்பந்தப்படி சென்னையின் குடிநீர்த் தேவைக்குத் தரவேண்டிய தண்ணீரையே சரியாகத் தருவதில்லை. இவர்களையா நாம் மீண்டும் நம்பியிருக்க வேண்டும்?’’ என்று கேட்கிறார்கள் விவசாயிகள் சங்கத் தலைவர்கள். 

ஜூனியர் 360: வராத கோதாவரிக்கு வக்காலத்து! - எடப்பாடி ஏடாகூட வாய்ஸ்

ஆனால், காவிரி டெல்டா விவசாய சங்கங்கள் கூட்டமைப்பின் பொதுச் செயலாளர் ஆறுபாதி கல்யாணம் மட்டும் நம்பிக்கையுடன் பேசுகிறார். ‘‘காவிரி டெல்டாவில் நாங்கள் தண்ணீர் இல்லாமல் மிகவும் கஷ்டப்படுகிறோம். ஏதோ ஒருவழியில் எங்களுக்குத் தண்ணீர் கிடைத்தால் நல்லதுதான். இந்தத் திட்டம் குறித்து மத்திய அரசு நன்றாக ஆராய்ந்து இதை விரைவில் செயல்படுத்த வேண்டும். இதோடு இணைத்து நீர்வழிச்சாலைகள் அமைப்பது குறித்தும் மத்திய அரசு யோசிக்க வேண்டும்” என்றார் அவர்.

தமிழகத்தின் உரிமையை நிலைநாட்ட வலுவான காவிரி மேலாண்மை வாரியம் அமைக்க வேண்டியதைக் குறித்துப் பேசாமல், அதை மடை மாற்றும் விதத்தில் காவிரி - கோதாவரி இணைப்பு குறித்துப் பேசுவதாக சூழலியலாளர்கள் குற்றம்சாட்டுகிறார்கள். ‘‘முதலில் இங்கிருக்கும் பிரச்னைகளை முதல்வர் கவனிக்க வேண்டும். காவிரிக்குத் தமிழகத்தில் மட்டும் 40 கிளை நதிகள் இருக்கின்றன. அவை அத்தனையுமே இன்று நாறிக்கொண்டிருக்கின்றன. முதல்வரின் மாவட்டமான சேலத்தில் மட்டும் காவிரியில் எத்தனை கிளை நதிகள் இருக்கின்றன? அவற்றில் ஒன்றையாவது மீட்டெடுக்க இவர் இதுவரை என்ன செய்திருக்கிறார்? அது குறித்துப் பேசாமல், எங்கோ வெளி மாநிலத்திலிருந்து தண்ணீர் கொண்டு வருவேன் என்று ஏடாகூடமாகப் பேசுவது எதற்காக? கர்நாடகாவுடனான ஒரு மாநிலப் பிரச்னையையே இவர்களால் தீர்க்க முடியவில்லை. கோதாவரி இணைப்பு என்று வந்தால், அது நான்கு மாநிலங்களின் பிரச்னையாக மாறும். சிக்கல்கள்தான் அதிகரிக்கும். என் வீட்டை எரித்துவிட்டு, பக்கத்து வீட்டுக்காரனை அழைத்து ‘எனக்கு வீடு கட்டிக்கொடு’ என்று கேட்பது என்ன நியாயம்?

முதலில் காவிரியில் தமிழகத்துக்கான உரிமையை மீட்டுத் தாருங்கள். சுப்ரமணியன் சுவாமி ‘காவிரி கிடைக்காது. வேண்டுமானால், கடல்நீரை குடிநீராக்கிப் பயன்படுத்துங்கள்’ என்று சொன்னதற்கும், எடப்பாடி இப்போது சொல்லியிருப்பதற்கும் பெரிய வித்தியாசங்கள் இல்லை. ‘காவிரி கிடைக்குமா’ என்று கேட்டால், ‘கோதாவரி வரும்’ என்கிறார்கள். எடப்பாடி சொல்லியிருப்பது மிகவும் அபத்தமான, ஆபத்தான கருத்து’’ என்று கோபத்தோடு சொல்லி முடிக்கிறார் சூழலியலாளர் பியூஸ் மானுஷ்.

‘சேக்கிழார்’ தந்த கம்ப ராமாயணத்தைப் படித்த முதல்வருக்கு, இளங்கோவடிகள் தந்த சிலப்பதிகாரம் உணர்த்தும் ஓர் உண்மையை நினைவுபடுத்த வேண்டியிருக்கிறது... ‘அரசியல் பிழைத்தோர்க்கு அறம் கூற்றாகும்.’

- இரா.கலைச்செல்வன்

கோதாவரி எந்த வழியாக வரும்?

ஜூனியர் 360: வராத கோதாவரிக்கு வக்காலத்து! - எடப்பாடி ஏடாகூட வாய்ஸ்

ந்திராவில் கோதாவரியின் குறுக்கே உள்ள போலவரம் அணையிலிருந்து 300 டி.எம்.சி நீர், கிருஷ்ணா நதியில் இருக்கும் நாகார்ஜுன சாகர் அணைக்கு எடுத்து வரப்படும். அங்கிருந்து அது பெண்ணாறில் இருக்கும் சோமசீலா அணை வழியாக காவிரிக்கு வந்து சேரும். இறுதியில் கல்லணைக்கு அந்த நீர் கொண்டு வரப்படும் என்பதுதான் இந்தத் திட்டத்தின் சாராம்சம். இதன் இன்னொரு கட்டமாக, கோதாவரியின் துணை நதியான இந்திராவதி நதியில் அணை கட்டி, அதிலிருந்து கோதாவரியை நாகார்ஜுன சாகர் மற்றும் சோமசீலா அணைகள் வழியாக, கர்நாடகாவுக்குள் கொண்டு செல்லாமலேயே தமிழகத்துக்குத் தண்ணீரை அனுப்ப ஒரு திட்டம் இருப்பதாக மத்திய அரசு சொல்லியிருக்கிறது. இவை அனைத்துமே காற்றில் வரைந்த கோடுகளாகத்தான் இன்று வரை உள்ளன. இதுகுறித்த திட்ட அறிக்கையையோ, ஆய்வறிக்கையையோ மத்திய அரசு இதுவரை வெளியிடவில்லை.

காவிரி - கோதாவரி இணைப்பு ஒரு மத்திய அரசுத் திட்டம். இதில் 90 சதவிகித செலவை மத்திய அரசே ஏற்றுக் கொள்ளும். மீதமிருக்கும் 10 சதவிகித செலவையே மாநில அரசுகள் ஏற்க வேண்டும். இந்தத் திட்டத்தில் கால்வாய்கள் இல்லாமல், பிரமாண்ட ஸ்டீல் குழாய்கள் வழியாகத் தண்ணீர் எடுத்து வரப்படும்.