Published:Updated:

மோடி நான்காண்டுகள் புராகிரஸ் ரிப்போர்ட் - சாதித்ததும் சறுக்கியதும்

மோடி நான்காண்டுகள் புராகிரஸ் ரிப்போர்ட் - சாதித்ததும் சறுக்கியதும்
பிரீமியம் ஸ்டோரி
மோடி நான்காண்டுகள் புராகிரஸ் ரிப்போர்ட் - சாதித்ததும் சறுக்கியதும்

ச.ஸ்ரீராம்

மோடி நான்காண்டுகள் புராகிரஸ் ரிப்போர்ட் - சாதித்ததும் சறுக்கியதும்

ச.ஸ்ரீராம்

Published:Updated:
மோடி நான்காண்டுகள் புராகிரஸ் ரிப்போர்ட் - சாதித்ததும் சறுக்கியதும்
பிரீமியம் ஸ்டோரி
மோடி நான்காண்டுகள் புராகிரஸ் ரிப்போர்ட் - சாதித்ததும் சறுக்கியதும்

“காங்கிரஸ் ஆட்சி, 60 ஆண்டுகளில் செய்யாததை, நாங்கள் 60 மாதங்களில் செய்வோம்” என்று 2014-ல் நாடாளுமன்றத் தேர்தல் பிரசார மேடைகளில் முழங்கினார் பாஜகவின் பிரதமர் வேட்பாளர் நரேந்திர தாமோதர்தாஸ் மோடி. இந்தியா முழுவதும் வீசிய மோடி அலையால், பிரதமராகவும் ஆனார். இதோ... அவர் பதவிக்கு வந்து நான்கு ஆண்டுகள் உருண்டோடிவிட்டன. இன்னும் ஓராண்டுதான் இருக்கிறது, மோடி தேர்தல் தேர்வை எழுத.  இந்த நான்காண்டுகளில் ‘Welcome Modi’யையும் பார்த்துவிட்டார்; ‘Goback Modi’யையும் பார்த்துவிட்டார். நான்காண்டுகள் மோடியின் ஆட்சி சாதித்தது என்ன, சறுக்கியது எவற்றில்...?

‘வளர்ச்சி ஒன்றே தன் ஆட்சியின் இலக்கு’ என்பது மோடியின் தாரக மந்திரம். அதற்கேற்ப, ‘மேக் இன் இந்தியா’, ‘தூய்மை இந்தியா’, ‘டிஜிட்டல் இந்தியா’ என திட்டங்களை வரிசையாக அறிவித்தார். புள்ளிவிவரங்களின் அடிப்படையில் பார்த்தால், மோடியின் ஆட்சியில் பொருளாதார வளர்ச்சி ஏற்பட்டுள்ளது என்பது உண்மை.

மோடி நான்காண்டுகள் புராகிரஸ் ரிப்போர்ட் - சாதித்ததும் சறுக்கியதும்

பொருளாதார வளர்ச்சி என்பது ஜி.டி.பி.யை அளவாகக் கொண்டே மதிப்பிடப்படுகிறது. கடந்த நான்காண்டுகளில் ஜி.டி.பி.யை  7-8 சதவிகிதத்துக்குள்ளாகவே வைத்திருக்கிறது மோடி அரசு. 5 சதவிகிதத்துக்கும் குறைவாகச் சென்ற ஜி.டி.பி.யை 7 சதவிகிதத்துக்கும் அதிகமாக மாற்றியது சாதனை. மோடியின் திட்டங்களும் அந்நிய முதலீடுகளும் இதற்கு உதவின. உலகச் சந்தைகள் ஏற்ற இறக்கத்துடன் இருந்தபோது, இந்தியப் பங்குச் சந்தை நான்கு ஆண்டுகளில் 11,000 புள்ளிகள் உயர்ந்துள்ளது. மோடி ஆட்சிக்கு வந்தபோது 24,000 புள்ளிகளில் இருந்த பங்குச்சந்தை, இப்போது 35,000 புள்ளிகளைத் தாண்டியுள்ளது என்பது குறிப்பிடத்தக்க முன்னேற்றம்.

காங்கிரஸ் ஆட்சிக்காலத்தில் 7.8 சதவிகிதமாக இருந்த நிதிப்பற்றாக்குறை, மோடி பதவியேற்ற முதல் வருடத்தில் 4.9 சதவிகிதமாகக் குறைந்தது. தற்போது, 3.2 சதவிகிதம் என்ற அளவுக்கு அது குறைந்துள்ளது நம்பிக்கையளிக்கக்கூடிய அம்சம்.

தற்போது பணவீக்கமும் கட்டுக்குள் இருக்கிறது. விலைவாசி உயர்வைக் குறிக்கும் குறியீடான பணவீக்கம், 2014க்கு முன் 12.1 என்று இரட்டை இலக்கத்தில் இருந்தது. அது, கடந்த 4 ஆண்டுகளில் 5 சதவிகிதத்தைத் தாண்டவில்லை என்பது பாசிட்டிவ்வான விஷயம்தான்.

ஏப்ரல் 2015 - 4.87
ஏப்ரல் 2016 - 5.47
ஏப்ரல் 2017 - 2.99
ஏப்ரல் 2018 - 4.44

தொழில் உற்பத்தி (IIP) வளர்ச்சி


தொழில் உற்பத்தி வளர்ச்சி என்பது தொழிற்துறையில் பெரிய தாக்கத்தை ஏற்படுத்தாத ஒன்றாகவே இருப்பது கவலையளிக்கும் அம்சம். எப்போதெல்லாம் மோடி அரசாங்கம் திட்டங்களை அறிவிக்கிறதோ, அப்போதெல்லாம் தொழில் உற்பத்தி வளர்ச்சி ஏறுமுகத்தில் செல்கிறது. ஆனால் இது நிலையானதாக இல்லை என்பதுதான் யதார்த்தம். எனவே மோடி ஆட்சியில் திட்டங்கள் அறிவிக்கப்பட்டதும் தொழில் உற்பத்தி வளர்ச்சி அதிகரிப்பதும், பிறகு சரிவதும் ஆரோக்கியமானது அல்ல.

 இந்த வளர்ச்சியானது மோடியின் நான்காண்டுகளில் ஒற்றை இலக்கத்தில்தான் தொடர்ந்து இருந்து வருகிறது. ஆனால், முந்தைய காங்கிரஸ் ஆட்சிக் காலத்தில் இந்தக் குறியீடானது இரட்டை இலக்கத்தில் இருந்தது குறிப்பிடத்தக்கது.

ஏப்ரல் 2015 - 2.3
ஏப்ரல் 2016 - 5.5
ஏப்ரல் 2017 - 2.7
ஏப்ரல் 2018 - 4.4

ஒரு நாட்டின் வளர்ச்சியை வெறும் திட்டங்கள் மூலம் மட்டுமல்ல, கடன் கொடுக்கும் திறனை வைத்தும் கணக்கிட முடியும். கடந்த இரண்டு ஆண்டுகளாக வங்கிகள் தரும் கடன் 10.32 சதவிகிதம் வளர்ச்சியடைந்துள்ளது. கடந்த இரண்டு ஆண்டுகளாக ஒற்றை இலக்கத்தில் இருந்து வந்த இந்த விகிதம், தற்போது இரட்டை இலக்கத்துக்கு வளர்ந்திருப்பது, தொழில் வளர்ச்சிக்கும், தொழில் முன்னேற்றங்களுக்கும் பயனளிப்பதாக இருக்கும் என்று கூறப்படுகிறது.

மின்சாரத் தேவையில் தன்னிறைவு அடைவது சாதாரண மக்களில் இருந்து தொழில் வளர்ச்சி வரைக்கும் அவசியமான ஒன்று. இந்தியாவைப் பொறுத்தவரை மின்சாரத் தட்டுப்பாடு என்பது பல ஆண்டுகளாகவே பெரும் சவாலாக இருந்து வந்தது. ‘உதய் மின்திட்டம்’ மூலம், மோடி அரசு மின்சாரத் தட்டுப்பாட்டைப் பெருமளவு குறைத்துள்ளது. முக்கியமாக, மாநிலங்களுக்கு இடையேயான மின்பகிர்வின்போது ஏற்படும் மின்இழப்பு என்பது மின்சாரத் தட்டுப்பாட்டுக்கு ஒரு காரணமாக இருந்தது. மின்இழப்பு மூலமாக 2016-17ல் மட்டும் 51,340 கோடி ரூபாய் இந்தியாவில் இழப்பு ஏற்பட்டிருந்தது. உதய் மின்  திட்டத்தின் கீழ் 40,295 கோடியாக இது குறைக்கப்பட்டுள்ளது. கிட்டத்தட்ட 21% மின்இழப்பு குறைக்கப்பட்டுள்ளது.

‘ஜன் தன்’ திட்டம் மூலம் இந்தியாவில் 31 கோடி பேருக்கு வங்கி கணக்கு துவங்கப்பட்டு 81,000 கோடி ரூபாய் பரிவர்த்தனைகள் நடைபெற்றுள்ளன. இந்தியாவில் எல்லாருக்கும் வங்கிக்கணக்கு உள்ளது என்ற நிலையை மோடி அரசு உருவாக்கியுள்ளது. 10 உள்நாட்டு நீர்வழிப் போக்கு வரத்துகள் உருவாக்கப்பட்டுள்ளன. நாள் ஒன்றுக்கு இந்தியாவில் 45 கிமீ  அளவுக்குப் புதிய சாலைகள் போடப்படுகின்றன. 12 துறைமுகங்கள் மூலம் மட்டும் கடந்த நான்கு ஆண்டுகளில் 19,000 கோடி ரூபாய் லாபம் அதிகரித்துள்ளது என்கிறது சாலை மற்றும் போக்குவரத்துத் துறை அமைச்சகத் தகவல்கள்.

ஜி.எஸ்.டி வரிவிதிப்பு வெற்றியா... தோல்வியா என்று ஒரே வருடத்தில் கூறிவிடமுடியாது என்பதுதான் பொருளாதார வல்லுநர்களின் கருத்து. ஆனால் வாங்கும் பொருள்களின் விலையேறிவிட்டதே என்ற கேள்விக்கு, நிகர விலையில் ஜி.எஸ்.டியைச் சேர்த்து விற்பனை செய்துள்ளார்கள் என்ற குற்றச்சாட்டு பதிலாக உள்ளது. ஜி.எஸ்.டி மூலம் மாநிலங்களுக்கான வரிவருவாய் அதிகரித்துள்ளது. 33 லட்சம் புதிய வரி கட்டும் நபர்கள் இணைந்துள்ளார்கள். அமல்படுத்தப்பட்ட 6 மாதங்களில் மொத்த ஜி.எஸ்.டி வரியில் மாநிலத்துக்கான வரி மட்டும் 87,888 கோடி வசூலாகியுள்ளது. ஜி.எஸ்.டி வரி வருவாயில்  தமிழ்நாடு இரண்டாமிடம் வகிக்கிறது.

ஒட்டுமொத்த விகடனுக்கும் ஒரே ஷார்ட்கட்!

மோடி நான்காண்டுகள் புராகிரஸ் ரிப்போர்ட் - சாதித்ததும் சறுக்கியதும்

வெளிநாட்டு உறவுகள்!

மோடி பதவியேற்ற நான்கு ஆண்டுகளில் 36 வெளிநாட்டுப் பயணங்கள் மூலம் அந்நிய முதலீடுகள் அதிகரித்துள்ளன. 2013-14வது நிதியாண்டில் 36.05 பில்லியன் டாலராக இருந்த அந்நிய முதலீடு  2016-17வது நிதியாண்டில் 60.08 பில்லியன் டாலராக இரட்டிப்பு வளர்ச்சி அடைந்துள்ளது.

2013-14 - 36.05 பில்லியன் டாலர்
2014-15 - 45.15 பில்லியன் டாலர்
2015-16 - 55.6 பில்லியன் டாலர்
2016-17 - 60.08 பில்லியன் டாலர்

வெளிநாட்டுப் பயணங்கள் வெறும் முதலீடுகளை மட்டும் கொண்டுவரவில்லை; வெளிநாட்டு உறவுகளிலும் நல்ல முன்னேற்றத்தைக் கொண்டு வந்துள்ளது. சீனா, சவூதி அரேபியா, இலங்கை, பாகிஸ்தான், அமெரிக்கா, ஐரோப்பிய நாடுகள் என அனைத்து நாடுகளுடனும் நல்லுறவை மோடி அரசு வளர்த்துள்ளது. சீனாவுடன் டோக்லாம் பிரச்னை, இலங்கையுடன் தமிழக மீனவர்கள் பிரச்னை என்று பல பிரச்னைகள் இருந்தாலும், மோதல் போக்கைக் கடைப்பிடிக்காமல், வர்த்தகம் மூலம் இணைப்பைப் பலமாகவே வைத்திருக்கிறார் மோடி. அதேசமயத்தில் அத்துமீறிய பாகிஸ்தானைத் தலையில் தட்டி ‘சர்ஜிக்கல் ஸ்ட்ரைக்’ செய்ததையும் மறக்க முடியாது.

மோடி ஆட்சிக்கு வருவதற்கு முன்பு, இந்தியாவில் உள்ள 18,000 கிராமங்களில் மின்சார வசதி இல்லாமல் இருந்தது. ‘ஒவ்வொரு கிராமமும் 1000 நாட்களுக்குள் மின்சார வசதி பெறும்’ என்றார் மோடி. 988 நாள்களுக்குள் இந்தியாவின் எல்லா கிராமங்களையும் மின்சார வசதி எட்டிவிட்டது. ‘ஆதார் அட்டை திட்டம்  தனிநபர் அந்தரங்க உரிமைகளுக்கு எதிரானது’, ‘நம்பகத்தன்மையற்றது’ என்று பல குற்றச்சாட்டுகள் எழுந்தாலும் ஆதார் மூலம் 3.5 கோடி சமையல் எரிவாயு இணைப்புகள் போலி என இந்தியா முழுவதும் கண்டறியப்பட்டுள்ளன. இதன் மூலம் போலியாக அரசுக்கு ஏற்படும் 50,000 கோடி இழப்பு தடுக்கப்பட்டுள்ளது.

மோடி அரசின் சறுக்கல்கள்:


அந்நிய முதலீடுகளை ஈர்த்தது, பங்குச்சந்தை வளர்ச்சி என்று சில குறிப்பிடத்தக்க பொருளாதார முன்னேற்றங்கள் இருந்தபோதும் இந்திய ரூபாயின் மதிப்பு சரிந்துள்ளது, மோடி அரசின் பெரும் வீழ்ச்சி. டாலருக்கு நிகரான ரூபாயின் மதிப்பு மோடி ஆட்சிக்கு வரும் போது 60 ரூபாயாக இருந்தது, தற்போது ஒரு டாலர் 66.82 ரூபாய். சர்வதேச வர்த்தகத்தில் கச்சா எண்ணெய் விலை குறைந்தாலும் இந்தியாவில் பெட்ரோல், டீசல் விலை ராக்கெட்வேகத்தில் அதிகரித்துக்கொண்டிருக்கிறது. ‘பெட்ரோல் டீசலின் விலையை எண்ணெய் நிறுவனங்களே தீர்மானிக்கலாம்’ என்ற அறிவிப்பு, மக்கள் நலனுக்கு விரோதமானது 2014ம் ஆண்டு தேர்தலுக்கு முன்பு மோடி இந்தியா முழுவதும் பல இடங்களுக்குச் சென்று மக்கள் மத்தியில் பல உரைகளை ஆற்றினார். தமிழகத்தில் சென்ற இடங்களில் எல்லாம் அந்த ஊரைப்பற்றிய ஒரு விஷயத்தை முன்னிலைப்படுத்திப் பேசுவது அவர் வழக்கம். ‘உலகமே திரும்பிப் பார்க்கும் சுற்றுலாத்தளமாக கன்னியாகுமரி மாறும்’,  ‘ராமநாதபுரம் மீனவர்கள் மீன்வளம் எங்குள்ளது என்று செயற்கைக்கோள் மூலம் அறியலாம்’, ‘திருப்பூரும், ஈரோடும் ஜவுளிக்கடலாகும்’ என்பதெல்லாம் அவரது அறிவிப்புகளில் சில. இவற்றில் ஒன்றுகூட செயல்படுத்தப்படவில்லை.

டெல்லியில் 100 நாட்களுக்கும் மேலாக எலி, பாம்பு என வாயில் கவ்வி..., ஏன் நிர்வாணமாகத் தலைநகர் வீதிகளில் ஓடி, போராடிய விவசாயிகளை ஒருநாள்கூட பிரதமர் திரும்பிப் பார்க்கவில்லை. போராடிய விவசாயிகள் என்றாலும் காவிரிப் பிரச்னை பற்றிப் பேசுவதற்காகத் தமிழக முதல்வர் என்றாலும் அவர்களைச் சந்திக்க நேரம் ஒதுக்க மறுப்பது, மோடியின் ஆணவச்செயல்பாடாகவே இருக்கிறது.

மேலும் எதிர்க்கட்சிகளும் அரசியல் விமர்சகர்களும் எழுப்பும் விமர்சனங்களுக்கு நாடாளுமன்றத்திலோ பத்திரிகையாளர் சந்திப்புகளிலோ பதில் சொல்ல மறுக்கும் மோடி, வெளிநாட்டுச் சுற்றுப்பயணங்களிலும் தேர்தல் பிரசாரங்களிலும் வீரதீர உரை ஆற்றுவது முறையானது அல்ல. குறிப்பாக, வெளிநாட்டுப் பயணங்களில் காங்கிரஸை விமர்சிப்பது, தேர்தல் பிரசாரங்களில் பிரதமர் என்ற தகுதியில் இருந்து குறைந்து சவால் விடுவது ஆகியவை அவமானகரமானது.

தலித் மக்கள், சிறுபான்மையினர், மதச்சார்பின்மைச் சிந்தனையாளர்கள் தொடர்ச்சியாகத் தாக்குதலுக்குள்ளாகும்போது, மௌனம் காத்துவிட்டு, அந்த விஷயங்கள் பெரிதாகும்போது, மோடி வாய்கிழிய சென்டிமென்ட் உரை ஆற்றுவது தொடர்கதையாக உள்ளது. கல்புர்கி முதல் கௌரி லங்கேஷ் வரை பல எழுத்தாளர்களும் சிந்தனையாளர்களும் மதவாதச் சக்திகளால் படுகொலை செய்யப்பட்டாலும் அதற்கு எதிரான கடும் நடவடிக்கைகளை மோடி மேற்கொள்ளவில்லை. வெறுப்புப் பேச்சால் வழக்குக்கு உள்ளாகுபவர்களில் பா.ஜ.க. எம்.எல்.ஏக்களும் எம்.பிக்களும்தான் முதலிடத்தில் உள்ளனர்.

அதேபோல் ‘மோடி ஆட்சியில் மாநில அரசின் உரிமைகள் பறிக்கப்படுகின்றன; தேசிய இனங்களின் அடையாளங்கள் நசுக்கப்படுகின்றன’ என்ற விமர்சனங்களிலும் உண்மை இல்லாமல் இல்லை. வாய்ப்பு கிடைக்கும்போதெல்லாம் இந்தியைத் திணிப்பது, சமஸ்கிருதத்தைத் தூக்கிப்பிடிப்பது ஆகிய மோடி அரசின் நடவடிக்கைகளால் தமிழகத்தில் மட்டும் இருந்த இந்தி எதிர்ப்பு அலை தெற்கில் கர்நாடகம் தொடங்கி வடக்கே மேற்குவங்கம் வரை பரவியது.

இந்தியா என்பது அடிப்படையில் பல மொழிகள், பல மதங்கள், பல தேசிய இனங்கள், பல பண்பாடுகளைக் கொண்ட நாடு. இந்தப் பன்மைத்துவத்தைக் குலைக்கும்வகையில் நடவடிக்கைகளை மேற்கொள்வதும் கடும் எதிர்ப்புகள் வரும்போது பின்வாங்குவதும் மோடி அரசின் வழக்கமாக இருக்கிறது. காவிரிப் பிரச்னையில் கர்நாடகத் தேர்தலை மனதில்கொண்டு, மோடி அரசு நடத்திய அரசியல் நாடகங்களால், தமிழகமே கிளர்ந்தெழுந்து  #GoBackModi என்று மோடியை விரட்டியது.

மோடி நான்காண்டுகள் புராகிரஸ் ரிப்போர்ட் - சாதித்ததும் சறுக்கியதும்

‘ஊழலற்ற இந்தியாதான் கனவு’ என்கிறார் மோடி. 2014ம் ஆண்டு இந்தியாவின் வாராக்கடன் 2.73 லட்சம் கோடி. இப்போதோ 8.4 லட்சம் கோடி. இந்த நான்கு ஆண்டுகளில், வாராக்கடன் நான்கு மடங்கு அதிகரித்துள்ளது. மல்லையா, நிரவ் மோடி போன்ற மோசடி மன்னர்கள் கோடி கோடியாக ஏமாற்றிவிட்டு லண்டனில் கோல்ஃப் ஆடிக்கொண்டிருக்கிறார்கள். காங்கிரஸின் ஊழலைக் கடுமையாக விமர்சிக்கும் மோடி, இந்த மோசடி மன்னர்களுக்கு எதிராக இதுவரை உறுதியான எந்த நடவடிக்கையையும் எடுக்கவில்லை. வெளிநாட்டிலிருந்து மோடி மீட்டுக்கொண்டு வருவதாகச் சொன்ன கறுப்புப்பணமும் இந்தியா வரவில்லை; இந்தியாவிலிருந்து சுருட்டிக்கொண்டு போனவர்களையும் மோடியால் இந்தியாவுக்குக் கொண்டுவர முடியவில்லை.

கர்நாடகாவில் ஏற்கெனவே ஊழல் கறை படிந்த எடியூரப்பாவை முதல்வராக்க முயற்சித்ததும், ரெட்டி சகோதரர்களின் செல்வாக்கில் கர்நாடக பா.ஜ.க. இருப்பதும் ஊழலில் காங்கிரஸுக்கும் பா.ஜ.க.வுக்கும் அதிகம் வித்தியாசமில்லை என்பதையே காட்டுகிறது.

கோவா, மணிப்பூர் போன்ற மாநிலங்களில் கவர்னர்களின் அதிகாரத்தை முறைகேடாகப் பயன்படுத்தி, கொல்லைப்புற வழியில் பா.ஜ.கவை ஆட்சிக்கட்டிலில் அமரவைப்பது, டெல்லி முதல் புதுச்சேரி வரை எதிர்க்கட்சி முதல்வர்களுக்கு ஆளுநர்கள் மூலம் குடைச்சல் கொடுப்பது ஆகியவை மோடி அரசின் ஜனநாயக விரோத நடவடிக்கைகள்.

சமூக ஊடகங்களில் பிரதமருக்கு எதிரான கருத்துகளைப் பகிர்பவர்கள் கைது செய்யப்படுவது வாடிக்கையாக இருக்கிறது. சமீபத்திய உதாரணமாக, பாடகர் கோவன் கைதைச் சொல்லலாம். ஆனால், தொடர்ச்சியாக சர்ச்சைக்குரிய கருத்துகளைச் சொல்லிவரும் ஹெச்.ராஜா, பத்திரிகையாளர்கள் குறித்து கீழ்த்தரமான கருத்துகளை உதிர்த்த எஸ்.வி.சேகர் ஆகியோர் கைது செய்யப்படாததற்கு வெறுமனே மாநில அரசு மட்டுமே காரணமில்லை என்பது எல்லோருக்கும் தெரிந்த உண்மை.

100 ஸ்மார்ட் நகரங்களை இந்தியாவில் உருவாக்குவோம் என்று வாக்குறுதி தந்தார் மோடி. 100 நகரங்களை உருவாக்க 731 திட்டங்கள் அறிவிக்கப்பட்டன. ஆனால் கடந்த ஆண்டு ஜனவரி வரை அதில் வெறும் 6 சதவிகிதத் திட்டங்கள் மட்டுமே நிறைவேற்றப்பட்டுள்ளன. 46,366 கோடி ரூபாயில் செலவில் உருவாக்கப்பட்ட இந்தத் திட்டத்தில் இன்னும் ஒரு நகரம்கூட இதுவரையில் கண்ணில் காட்டப்படவில்லை என்பது கவலையளிக்கும் விஷயமே.

உலக அளவில் மதக்கலவரங்களால் அதிகம் பாதிக்கப்படும் நாடுகளில் இந்தியா 4வது இடத்தில் உள்ளது. ஆண்டுக்கு சராசரியாக 700 மதக்கலவரங்கள் இந்தியாவில் நடக்கின்றன. ‘பசுமாடுகளைக் கொண்டு செல்கிறார்கள்’ என்று நாடெங்கும் மதவாதச் சக்திகளால் நடத்தப்பட்ட தாக்குதல்கள், மோடி ஆட்சியின் மிகப்பெரிய கரும்புள்ளி.

இந்தியாவில் இருந்து முற்றிலுமாக கறுப்புப் பணத்தை ஒழிக்கும் முயற்சியாக பணமதிப்பிழப்பு நடவடிக்கை அறிவிக்கப்பட்டது. எந்தவித முன்னேற்பாடும் இல்லாமல் மக்கள் ஏடிஎம் வாசல்களில் வரிசையில் கால்கடுக்க நின்றதும், இந்தியா முழுக்க 122 பேர் இறந்ததும் மீளாத்துயரங்களே. சரி, இவ்வளவு நடவடிக்கை எடுக்கப்பட்டதே, கறுப்புப்பணம் ஒழிந்ததா என்றால் அதுவும் இல்லை. ஆர்.கே.நகர் தேர்தலில் வாக்காளர்களுக்கு அளிக்கப்பட்ட பணமே, ‘கறுப்புப்பணம் ஒழிக்கப்படவில்லை’ என்பதற்குச் சாட்சி.

காஷ்மீரில் ஒரு குழந்தையைப் பாலியல் பலாத்காரம் செய்தவர்களை ஆதரித்து பா.ஜ.க. அமைச்சர்களே பேரணியில் கலந்துகொண்டது, உத்தரப்பிரதேசத்தில் பா.ஜ.க. எம்.எல்.ஏ பாலியல் பலாத்கார வழக்கில் கைதுசெய்யப்பட்டது ஆகியவை குறித்த கடுமையான நடவடிக்கைகள் மோடியிடமிருந்து எதுவும் இல்லை. 2014 முதல் 2016 -க்கு இடையே பெண்களுக்கு எதிரான குற்றங்கள் சராசரியாக 3 சதவிகிதம் அதிகரித்திருக்கின்றன என்று தேசியக்குற்றப்பிரிவு ஆணையம் சொல்கிறது.

ஒருபுறம் புள்ளிவிவரங்களைக் காட்டி மோடியை ‘வளர்ச்சியின் நாயகனாக’ அவர்களது ஆதரவாளர்கள் சித்திரிக்கிறார்கள். ‘மோடி கார்ப்பரேட் நிறுவனங்களின் கைப்பாவையாக இருக்கிறார், மாநில அரசின் உரிமைகளைப் பறிக்கும், மதவாதச் சக்திகளின் உற்ற நண்பனாய் விளங்குகிறார்’ என்ற குற்றச்சாட்டுகள் இன்னொருபுறம்.

மோடியின் இந்த நான்காண்டு ஆட்சி குறித்து மக்கள் என்ன நினைக்கிறார்கள் என்பதை, அடுத்த ஆண்டு நாடாளுமன்றத் தேர்தல் முடிவு சொல்லிவிடும்.

மோடி நான்காண்டுகள் புராகிரஸ் ரிப்போர்ட் - சாதித்ததும் சறுக்கியதும்

கேள்விகளுக்குப் பதிலளிக்கத் தயங்குகிறாரா மோடி?

-பீட்டர் அல்ஃபோன்ஸ், காங்கிரஸ்

“மாநிலங்களுக்கு முக்கியத்துவம் கொடுத்து, கூட்டாட்சித் தத்துவத்தில் நம்பிக்கையுள்ள தேசமாக இந்தியாவை காங்கிரஸ்தான் உருவாக்கியது.

ஆனால் தற்போது உள்ள பிஜேபி அரசோ ஒரே நாடு, ஒரே வரி, ஒரே மதம், ஒரே ஆட்சி என்ற பெயரில் மாநில உரிமைகளைப் பறித்து, இந்தியாவின் பன்முகத்தன்மையை சீர்குலைத்துவருகிறது. தமிழ்நாட்டை எடுத்துக்கொண்டால் திருப்பூர், சிவகாசி, கோயம்பத்தூரில் தொழிற்துறை வீழ்ந்துவிட்டது. தேர்தல் ஆணையம், ரிசர்வ் வங்கி, உச்ச நீதிமன்றம் என தனி அமைப்புகளை உருவாக்கி வைத்திருக்கிறோம். ஆனால் இந்த அமைப்புகளின் மதிப்புகள் இன்று சரிவை சந்தித்துள்ளன. அவற்றின் உரிமைகள் குறைந்துள்ளன. திட்டக்குழு என்ற ஒன்றே இன்று இல்லை. திட்டக்குழுவில்தான் மாநில முதலமைச்சர் தங்களது உரிமைகளை கேட்டுப் பெற முடியும். இன்றைய நிதி ஆயோக்கில் அந்த வசதி இல்லை.

பொருளாதார ரீதியாக கார்ப்பரேட்கள் கையில் நாடு சிக்கியுள்ளது. ஆனால் சாமானிய மக்கள் தங்கள் வாழ்க்கை ஆதாரங்களை இழந்துள்ளனர்.

மோடி என்ற பிம்பத்தைக் கட்டமைப்பதில் பாஜகவும், மோடியும் மிகவும் உறுதியாக இருந்தார்கள். இன்று மோடிதான் எல்லா ஊர்களிலும் பேச வேண்டியிருக்கிறது. கர்நாடகத் தேர்தலில் கூட மோடி-ராகுல் போட்டிதான் பிரதானமாக இருந்தது. மோடி என்ற பிராண்டைக் கட்டமைப்பதற்காகக் கோடிக்கணக்கில் செலவழித்தார்கள். ஆனால், பிரதமரோ நான்கு ஆண்டுகளில் ஒருநாள் கூட பத்திரிகையாளர்களைச் சந்திக்கவும் இல்லை; விமர்சனங்களுக்கு முறையான பதில் சொல்வதும் இல்லை. நான்கு ஆண்டுகளில் சாமானிய மக்களை நசுக்கி, ஒடுக்கிய மோசமான அரசுதான் மோடி அரசு!”

மோடி நான்காண்டுகள் புராகிரஸ் ரிப்போர்ட் - சாதித்ததும் சறுக்கியதும்

“வன்முறையும், தீவிரவாதமும் குறைந்துள்ளது!”

கே.டி.ராகவன், பா.ஜ.க மாநிலச் செயலாளர்

“ ‘ஒ
ரே நாடு.. ஒரே வரி’ என்ற நோக்கத்தில் கொண்டு வரப்பட்ட ஜி.எஸ்.டி மூலமாக மாநிலங்களுக்கு வரும் வரி வருவாய் அதிகரித்துள்ளது. தீவிரவாதத் தாக்குதல்கள் கடந்த நான்கு ஆண்டுகளில் பெரிய அளவில் குறைந்துள்ளன.

மக்களுக்கு உதவும் பல திட்டங்களை ஆளும் பாஜக அரசு அறிவித்துள்ளது. ‘அனைவருக்கும் வீடு’ என்ற திட்டத்தை அதிவேகமாக செயல்படுத்தி வருகிறது மத்திய அரசு. அனைத்து கிராமங்களையும் மின்சாரத்தின் மூலம் இணைப்பது, தொழில்முனைவோருக்கு பலனளிக்கும் ‘ஸ்கில் இந்தியா’ திட்டம், விவசாயப் பயிர் காப்புத் திட்டம், முத்ரா திட்டம்  என மக்கள் பலனளிக்கும் திட்டங்களை அறிமுகம் செய்துள்ளது.

பாலியல் துன்புறுத்தல்கள் இந்தியாவில் அதிகரித்து விட்டது என்கிறார்கள். ஆனால் பாலியல் துன்புறுத்தல்களுக்கு அதிகபட்ச தண்டனை தரவேண்டும் என்று சட்டம் கொண்டுவந்ததே இந்த அரசுதான்.

அதேபோல் சில திட்டங்களை ஐந்து வருடங்களுக்குள் செய்து முடிக்க முடியாது. அதனைத் தொலைநோக்குத் திட்டங்களாகத்தான் அணுக வேண்டும். உதாரணமாக ‘கங்கை தூய்மை’ திட்டம், ஸ்மார்ட் நகரங்கள் போன்றவற்றை நிறைவேற்ற நேரமெடுக்கும். மோடி ஆட்சியில் தான் இந்தியா மிகப்பெரிய பொருளாதார வளர்ச்சியை அடைந்துள்ளது என்பதை மறுக்க முடியாது”

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism