Published:Updated:

கறுப்புப் பூனைப்படை முதல் குருமூர்த்தி வரை!

கறுப்புப் பூனைப்படை முதல் குருமூர்த்தி வரை!
பிரீமியம் ஸ்டோரி
News
கறுப்புப் பூனைப்படை முதல் குருமூர்த்தி வரை!

அவகாசம் வாங்கிய ஆறுமுகசாமி ஆணையம்

றுமுகசாமி விசாரணை ஆணையத்தின் பதவிக்காலத்தை மேலும் ஆறு மாதங்களுக்கு நீட்டித்து தமிழக அரசு உத்தரவு பிறப்பித்துள்ளது. ‘‘ஜெயலலிதாவின் மரண நேரம் குறித்த சர்ச்சை இப்போது எழுந்திருப்பதாலேயே விசாரணை இன்னும் இழுத்துக்கொண்டே செல்கிறது’’ என்கிறார்கள் ஆணையத்தின் தரப்பில்.

2017-ம் ஆண்டு செப்டம்பர் 25-ம் தேதி, ஜெயலலிதா மரணம் தொடர்பாக விசாரிக்க விசாரணை ஆணையம் அமைக்கப்பட்டது. நீதிபதி ஆறுமுகசாமி இந்த ஆணையத்தின் தலைவராக நியமிக்கப்பட்டார். முதலில் மூன்று மாதங்கள் மட்டுமே ஆணையத்துக்கு அவகாசம் அளிக்கப்பட்டது. ஆணையம் கூடுதல் அவகாசம் கேட்டதால், மேலும் ஆறு மாதங்களுக்கு நீட்டித்தது தமிழக அரசு. இந்நிலையில், ‘குறுக்கு விசாரணை இன்னும் முடிவடையாமல் இருப்பதாலும், ஆணையத்தில் மருத்துவர்கள் அளித்த சாட்சியங்களில் குழப்பம் நிலவி வருவதாலும், விசாரணை முடிவுறவில்லை. எனவே, இன்னும் ஆறு மாதம் அவகாசம் வேண்டும்’ என ஆணையத்தின் தரப்பில் கோரிக்கை வைக்கப்பட்டது. அரசு இப்போது மேலும் நான்கு மாத காலம் ஆணையத்துக்கு அவகாசம் வழங்கியுள்ளது.

கறுப்புப் பூனைப்படை முதல் குருமூர்த்தி வரை!

இந்த நிலையில், மேலும் சிலரைப் புதிதாக விசாரணைக்கு அழைத்துள்ளது ஆணையம். அப்போலோ மருத்துவர் நளினி, செவிலியர் பிரேமா உள்ளிட்டோர் விசாரணைக்கு அழைக்கப்பட உள்ளார்கள். அதேபோல், ஜெயலலிதாவுக்குச் சிகிச்சை அளித்த மருத்துவர் சிவக்குமார் வாக்குமூலத்துக்கும், சசிகலாவின் வாக்குமூலத்துக்கும் இடையே முரண்பாடுகள் இருந்த நிலையில், சிவக்குமாரை மீண்டும் விசாரணைக்கு அழைத்துள்ளது ஆணையம்.

ஜெயலலிதாவுக்குப் பாதுகாப்பு வழங்கிய கறுப்புப் பூனைப்படை குறித்த சர்ச்சை, ஆறுமுகசாமி ஆணையத்தின் விசாரணையில் எழுந்துள்ளது. ‘ஜெயலலிதா, அப்போலோ மருத்துவமனைக்கு அழைத்துச்செல்லப்பட்ட போது கறுப்புப் பூனைப்படைக்கு ஏன் தகவல் தெரிவிக்கவில்லை?’ எனப் பலரிடமும் ஆணையம் விசாரணை நடத்தியுள்ளது. ‘‘ஜெயலலிதா வெளியில் செல்லும்போது மட்டுமே கறுப்புப் பூனைப்படையின் பாதுகாப்பு கோரப்படும். அவரது பயணத்திட்டம் முன்னரே சொல்லப் பட்டு, அதற்குத் தகுந்தாற்போல கறுப்புப் பூனைப்படை பாதுகாப்பு வழங்கும். ஆனால், 2016 செப்டம்பர் 22-ம் தேதி ஜெயலலிதா மருத்துவமனைக்குக் கொண்டு செல்லப்பட்ட போது, கறுப்புப் பூனைப்படைக்குத் தகவல் தெரிவிக்கப்படாததால் அவர்கள் பாதுகாப்புக்குச் செல்லவில்லை” என்று ஆணையத்தில் பலர் சாட்சியம் அளித்துள்ளார்கள்.

ஜெயலலிதாவின் பாதுகாப்பு அதிகாரி பெருமாள்சாமி, “ஜெயலலிதாவுக்கு மாநில போலீஸார் எந்த அளவுக்குப் பாதுகாப்பு அளிக்க முடியுமோ, அந்த அளவுக்கு மட்டும் நாங்கள் பாதுகாப்பை வழங்கினோம். அவரது அறைக்குள் சென்று பாதுகாப்பு வழங்கும் அதிகாரம் எங்களுக்கு இல்லை” என்று சொல்லியுள்ளார். இதையும் ஆணையம் தீவிரமாக விசாரணைக்கு எடுத்துக் கொள்ள உள்ளது. குறிப்பாக, ‘ஜெயலலிதாவின் வீட்டுக்கு வெளியே காவலுக்கு இருந்த கறுப்புப் பூனைப்படை காவலர்களிடம் கூடத் தகவல் சொல்லாமல் அவரை மருத்துவமனைக்கு அழைத்துச் சென்றது ஏன்?’ என்ற கோணத்தில் ஆணையம் விசாரணையைக் கொண்டுசெல்கிறது.

‘ஜெயலலிதா 2016 டிசம்பர் 4-ம் தேதியே மரணமடைந்துவிட்டார்’ எனவும், ‘5-ம் தேதி வரை அவரை வென்டிலேட்டரில் வைத்திருந்தார்கள்’ எனவும் சாட்சிகள் பலர் மாற்றி மாற்றிச் சொல்லியுள்ளதாக ஆணையத்தின் தரப்பில் சொல்லப்படுகிறது. இதனால், அப்போலோவுக்குச் சென்றே விசாரணை நடத்த ஆணையம் முடிவு செய்தது. அதில் சில சட்டச் சிக்கல்கள் எழவே, அந்தத் திட்டத்தை ஆணையம் கைவிட்டது. அதற்குப் பதிலாக ஆணையம் சார்பில் மருத்துவக்குழுவை அமைத்துள்ளனர். அப்போலோ மருத்துவர்கள் தரும் சாட்சியங்களை ஆய்வுசெய்து ஆணையத்துக்கு இந்தக் குழு ஆலோசனைகளை வழங்கும்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
கறுப்புப் பூனைப்படை முதல் குருமூர்த்தி வரை!

ஆறுமுகசாமி விசாரணை ஆணையம் இப்போது `துக்ளக்’ ஆசிரியர் ஆடிட்டர் குரூமூர்த்தியை விசாரணைக்கு ஆஜராகச் சொல்லி சம்மன் அனுப்பியுள்ளது. ஏற்கெனவே ஆணையத்தில் சாட்சியம் அளித்த ‘துக்ளக்’ சோவின் மகன் ஸ்ரீராம், “சொத்துக் குவிப்பு வழக்கில் உச்ச நீதிமன்றம் வழங்கிய தீர்ப்பு குறித்தும், அந்தத் தீர்ப்பில் `துக்ளக்’ நிலைப்பாடு குறித்தும் ‘துக்ளக்’கில் செய்தி வெளியானது. அது, `துக்ளக்’கின் மற்றோர் இயக்குநர் குருமூர்த்தியின் மேற்பார்வையில் வெளியான செய்தி” என்று குறிப்பிட்டிருந்தார். திவாகரன் சாட்சியம் அளித்தபோது, “சசிகலாவைத் தவிர, வேறு யாரிடமாவது ஜெயலலிதா தனது தனிப்பட்ட கருத்துகளைப் பகிர்ந்திருப்பார் என்று நான் கருதினால் அது சோ மற்றும் குருமூர்த்தி ஆகியோர்தான்” என்று குறிப்பிட்டிருந்தார். இதனால், குருமூர்த்தியை விசாரணைக்கு அழைத்துள்ளது ஆணையம்.

சசிகலா தரப்பு வழக்கறிஞர் ராஜா செந்தூர்பாண்டியன், “ஆணையமே ஒருநபர் ஆணையமாகச் செயல்படும்போது, அதிலிருந்து தவறான தகவல்கள் எதற்காக வெளியே சொல்லப்படுகின்றன? ஆணையத்தில் சாட்சியம் சொன்னது ஒன்றாகவும், செய்திகள் வெளியாகும்போது வேறுவிதமாகவும் இருப்பது ஆணையம்மீதான நம்பிக்கையைக் கேள்விக்குள்ளாக்குகிறது. சசிகலாவின் வாக்குமூலத்துக்கும் சிவக்குமாரின் வாக்குமூலத்துக்கும் இடையே மாறுபட்ட கருத்துகள் இருப்பதாகச் சொல்லப்பட்டது. ஆனால், அது சிவக்குமாரின் குறுக்கு விசாரணையில் முழுமையாகத் தீர்க்கப்பட்டுவிட்டது. மேலும் சிலரிடம் நாங்கள் குறுக்கு விசாரணை நடத்த உள்ளோம். அப்போது உண்மைத் தகவல்கள் முழுமையாக வெளியே வரும்” என்கிறார்.

ஆணையத்தில் இதுவரை 50-க்கும் மேற்பட்டவர்கள் சாட்சியம் அளித்துள்ளனர். இவர்களில் 39 பேரைக் குறுக்கு விசாரணை செய்துள்ளது சசிகலா தரப்பு. கடைசியாக வந்த பல சாட்சிகள், அப்போலோவில் அளிக்கப்பட்ட சிகிச்சை தொடர்பாகவே சந்தேகம் கிளப்பினர். ‘‘சசிகலாவுக்கு அனுப்பியது போலவே அப்போலோ மருத்துவமனைக்கும் ஆணையம் நோட்டீஸ் அனுப்பியுள்ளது. இதுவரை விசாரணையில் அப்போலோ நிர்வாகம் பங்கேற்கவில்லை. ஒருவேளை அவர்களும் ‘எல்லாச் சாட்சிகளையும் நாங்கள் குறுக்கு விசாரணை செய்ய வேண்டும்’ என்று கேட்டால், அதற்கு ஆணையம் அனுமதி தர வேண்டும். அப்போது விசாரணை இன்னும் இழுத்துக்கொண்டு போகும்’’ என்கிறார் ஆணைய வழக்கறிஞர் ஒருவர். 

- அ.சையது அபுதாஹிர்