Published:Updated:

நிதி கொடுக்கும் எம்.எல்.ஏ... வாங்க மறுக்கும் அதிகாரிகள்!

நிதி கொடுக்கும் எம்.எல்.ஏ... வாங்க மறுக்கும் அதிகாரிகள்!
பிரீமியம் ஸ்டோரி
News
நிதி கொடுக்கும் எம்.எல்.ஏ... வாங்க மறுக்கும் அதிகாரிகள்!

மன்னார்குடி மல்லுக்கட்டு

ரசு அதிகாரிகளாக இருப்பவர்கள் ஆளும்கட்சி எம்.எல்.ஏ., எதிர்க்கட்சி எம்.எல்.ஏ என்ற பாகுபாடு பார்க்காமல், மக்கள் நலன் எது என்று பார்த்துச் செயல்படுபவர்களாக இருக்க வேண்டும். ஆனால், மக்களின் அடிப்படை வசதிக்காக எதிர்க் கட்சியைச் சேர்ந்த ஓர் எம்.எல்.ஏ தனது தொகுதி மேம்பாட்டு நிதியிலிருந்து ஒதுக்கீடு செய்யும் பணத்தை அரசு அதிகாரிகள் நியாயமற்ற முறையில் புறக்கணிப்பதாகக் குற்றச்சாட்டு எழுந்துள்ளது.

திருவாரூர் மாவட்டம் மன்னார்குடி தொகுதி எம்.எல்.ஏ-வாக இருப்பவர் தி.மு.க-வைச் சேர்ந்த டி.ஆர்.பி.ராஜா. இவரது தொகுதியில் மக்களின் அடிப்படை வசதிகளுக்காக இவர் ஒதுக்கும் நிதியைத்தான் அதிகாரிகள் புறக்கணிக்கின்றனர். இதுதொடர்பாக நம்மிடம் பேசிய டி.ஆர்.பி.ராஜா, ‘‘மன்னார்குடி புதிய பஸ் நிலையத்தில் மேற்கூரையே இல்லை. மழையிலும் வெயிலிலும் மக்கள் சிரமங்களுக்கு ஆளாகிறார்கள். இந்த பஸ் நிலையத்துக்கு மேற்கூரை அமைக்க, எனது சட்டமன்ற உறுப்பினர் தொகுதி மேம்பாட்டு நிதியில் இருந்து 25 லட்சம் ரூபாய் நிதி ஒதுக்கித்தர முயற்சி செய்தேன். ஆனால், அதனை அதிகாரிகள் புறக்கணித்துவிட்டனர்.

நிதி கொடுக்கும் எம்.எல்.ஏ... வாங்க மறுக்கும் அதிகாரிகள்!

நீடாமங்கலத்தில் உள்ள ரயில்வே கேட்டினால் பல மணி நேரம் போக்குவரத்துத் தடைபடுவதால், பொதுமக்கள் கடுமையான பாதிப்புக்கு ஆளாகிறார்கள். புதிய பாலம் அமைக்க ஒரு கோடியே 20 லட்சம் ரூபாய் ஒதுக்கீடு செய்தேன். அது, பல ஆண்டுகளாகக் கிடப்பில் போடப்பட்டுள்ளது. மகாதேவபட்டினம் ஊராட்சியின் குடிநீர்க் கட்டமைப்பு வசதிக்காக, ரூ. 45 லட்சம் நிதி ஒதுக்கினேன். அதையும் அதிகாரிகள் வாங்க மறுத்துவிட்டார்கள். நீடாமங்கலத்தில் அண்ணா சிலை அருகே பஸ் நிறுத்தத்தில் உள்ள பயணிகள் நிழற்குடையின் மேற்கூரை அமைப்பதற்கு ரூ.25 லட்சம் நிதி கொடுத்தேன். அதையும் பயன்படுத்த அதிகாரிகள் மறுத்துவிட்டார்கள். மன்னார்குடி அரசுக் கலைக்கல்லூரியில் தேர்வெழுதும் கூடம், ஆடிட்டோரியம், நூலகம் போன்ற அடிப்படை வசதிகள்கூட இல்லை. இவற்றை ஏற்படுத்த ரூ.25 லட்சம் ஒதுக்கினேன். அதையும் அதிகாரிகள் புறக்கணித்துவிட்டனர். நான் எதிர்க்கட்சியைச் சேர்ந்தவன் என்பதால், என் சட்டமன்றத் தொகுதி மேம்பாட்டு நிதியை அதிகாரிகள் தொடர்ந்து புறக்கணித்துவருகிறார்கள். இந்த வெறுப்பு உணர்வை அவர்கள் கைவிட வேண்டும். மக்களுக்குச் சேவை செய்யத்தான் நாங்களும் இருக்கிறோம்; அதிகாரிகளும் இருக்கிறார்கள். அரசியல் காழ்ப்பு உணர்வுடன் அதிகாரிகள் நடந்துகொள்ளக் கூடாது’’ என்றார் வருத்தத்துடன்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
நிதி கொடுக்கும் எம்.எல்.ஏ... வாங்க மறுக்கும் அதிகாரிகள்!

இதுகுறித்து திருவாரூர் மாவட்ட ஆட்சியர் நிர்மல்ராஜிடம் கேட்டோம். “மன்னார்குடி சட்டமன்றத் தொகுதியில், சட்டமன்ற உறுப்பினர் மேம்பாட்டு நிதியில் 2017-18 நிதியாண்டுக்கு ஒதுக்கப்பட்டதில், இதுவரை ரூ. 2.38 கோடிக்கு நிர்வாக அனுமதி வழங்கப்பட்டுள்ளது. இதில், 49 பணிகள் நடைபெற்றுவருகின்றன. மீதித் தொகை ரூ.12 லட்சத்தைச் செலவிடவும் திட்டமிடல் நடக்கிறது. மன்னார்குடி அரசுக் கலைக் கல்லூரிக்கு எம்.எல்.ஏ ஒதுக்கிய ரூ.25 லட்சம் நிதி போதாது என்று பொதுப்பணித் துறை அதிகாரிகள் கூறிவிட்டனர். அதற்குப் பதிலாக, எம்.ஜி.ஆர் நூற்றாண்டு விழாக் கட்டட நிதியில் ரூ.4.23 கோடியை அரசு ஒதுக்கியுள்ளது. அதில் 16 வகுப்பறைகள், ஐந்து ஆய்வுக்கூடங்கள், 42 கழிப்பறைகள் கட்டப்படவுள்ளன” என்றார்.

அரசு அதிகாரிகள், ஆளும்கட்சி அரசியல்வாதிகள்போல செயல்படுவது நல்லதல்ல!

- கு.ராமகிருஷ்ணன், படங்கள்: க.சதீஷ்குமார்