Published:Updated:

மைத்துனர் கைகாட்டினால் பதவி! - சர்ச்சையில் தினகரன்

ஒட்டுமொத்த விகடனுக்கும் ஒரே ஷார்ட்கட்

Use App
மைத்துனர் கைகாட்டினால் பதவி! - சர்ச்சையில் தினகரன்
மைத்துனர் கைகாட்டினால் பதவி! - சர்ச்சையில் தினகரன்

மைத்துனர் கைகாட்டினால் பதவி! - சர்ச்சையில் தினகரன்

பிரீமியம் ஸ்டோரி

‘குடும்பம் வேறு, கட்சி வேறு. குடும்பத்தினருக்குக் கட்சிப் பொறுப்புகள் தரமுடியாது’ என்றெல்லாம் அடிக்கடி சொல்லிவருகிறார் டி.டி.வி.தினகரன். ஆனால், அம்மா மக்கள் முன்னேற்றக் கழகத்தில் தினகரனின் மைத்துனர் டாக்டர் வெங்கடேஷ் கைகாட்டும் உறவினர்கள் மற்றும் நண்பர்களுக்கு முக்கியப் பொறுப்புகள் தரப்படுவதால், கட்சியினர் கடும் அதிருப்தியில் உள்ளனர். அ.ம.மு.க-வின் தஞ்சாவூர் மாநகர மாவட்டச் செயலாளர் என்ற பதவியைப் புதிதாக உருவாக்கி, அதற்கு ராஜேஸ்வரன் என்பவரைச் சமீபத்தில் நியமித்தார் தினகரன். இதுதான் இப்போது பெரும் சர்ச்சைகளை ஏற்படுத்தியுள்ளது.

இதுகுறித்து அ.ம.மு.க வட்டாரத்தில் பேசினோம். ‘‘தினகரனுக்கும் திவாகரனுக்கும் இடையே ஏற்பட்ட மோதலின்போது, தஞ்சாவூரில் ஒரு பொதுக்கூட்டம் நடந்தது. அதில் பேசிய தினகரன், ‘குடும்பத்தினருக்கும் நண்பர்களுக்கும் பொறுப்பு களை கொடுக்க, இது ஒன்றும் கம்பெனி இல்லை’ என்றார். ஆனால், டெல்லி சிறையில் தினகரன் இருந்தபோது அவருக்காக உழைத்தவர்களை எல்லாம் விட்டுவிட்டு, டாக்டர் வெங்கடேஷின் நண்பர் என்பதற்காக ராஜேஸ்வரனுக்குப் பொறுப்பு கொடுத்துள்ளார். மேலும், கழக அமைப்புச் செயலாளராக வெங்கடேஷின் மாமனார் பண்ணைவயல் பாஸ்கரன் உள்ளார். மாவட்ட மாணவரணித் துணைச்செயலாளராக வெங்கடேஷின் தாய்மாமன் மகன் சதீஷ் இருக்கிறார். வெங்கடேஷின் நண்பர்களான பழனிவேல், சூரக்கோட்டை பாலு உள்பட பலரும் முக்கியப் பொறுப்புகளில் உள்ளனர்.

மைத்துனர் கைகாட்டினால் பதவி! - சர்ச்சையில் தினகரன்

தெற்கு மாவட்டச் செயலாளரான சேகர், தினகரன் வரும்போதெல்லாம் கூட்டத்தைச் சேர்ப்பதற்குக் கடுமையாக உழைப்பார். அதனால் இவரை, ‘சோழமண்டலத் தளபதி’ என தினகரனே அழைப்பார். இவரது வளர்ச்சியை விரும்பாத சிலர், வெங்கடேஷ் மூலம் காய்களை நகர்த்தி, இவரை ஓரங்கட்டியுள்ளனர். வெங்கடேஷுடன் ஒன்றாகப் பள்ளியில் படித்தவர் ராஜேஸ்வரன். ஜெயலலிதா இருந்தபோதே, அ.தி.மு.க-வில் பல பொறுப்புகளை ராஜேஸ்வரனுக்கு பெற்றுத்தந்தார் வெங்கடேஷ். தினகரன் தஞ்சாவூர் வந்தால், அவருக்குத் தேவையான அனைத்தையும், செய்துகொடுப்பவர் ராஜேஸ்வரன்தான். அதனாலேயே இவருக்குப் பொறுப்பு கொடுக்கப்பட்டுள்ளது’’ என்றனர்.

மேலும் சிலர், “சேகருக்கு ஒரத்தநாடு பகுதியில்தான் செல்வாக்கு. தஞ்சாவூர் நகரத்தில் இவர் அவ்வளவுப் பிரபலம் கிடையாது. அதனால்தான், தஞ்சாவூரில் வேறு ஒருவருக்குப் பொறுப்பு கொடுக்கப்பட்டுள்ளது” என்றனர்.

இதுகுறித்து ராஜேஸ்வரனிடம் பேசினோம். “அ.தி.மு.க-வில் அடிமட்டத் தொண்டனாக ஆரம்பித்து, பல முக்கியப் பொறுப்புகளையும் வகித்தவன் நான். கட்சியின் வளர்ச்சிக்காக உழைத்ததாலேயே, தினகரன் எனக்கு இந்தப் பொறுப்பை வழங்கியுள்ளார்” என்றார்.

மைத்துனர் கைகாட்டினால் பதவி! - சர்ச்சையில் தினகரன்

கட்சியின் பொருளாளரும், தகுதிநீக்கம் செய்யப்பட்டுள்ள 18 எம்.எல்.ஏ-க்களில் ஒருவருமான ரெங்கசாமி, “நிர்வாகம் எளிமையாக இருக்க வேண்டும் என்பதற்காகக் குறைந்தபட்சம் இரண்டு சட்டமன்றத் தொகுதிகளையும், அதிகபட்சம் நான்கு சட்டமன்றத் தொகுதிகளையும் உள்ளடக்கியிருப்பது போல் பிரிக்கப்பட்டு, மாவட்டச் செயலாளர்கள் நியமிக்கப்படுகிறார்கள். நண்பர், உறவினர் என்பதற்காகப் பதவிகள் தரப்படுவதில்லை.

எஸ்.டி.எஸ் காலத்திலிருந்தே கட்சியில் இருந்துவருபவர் ராஜேஸ்வரன். தீவிரமாகச் செயல்படக்கூடியவர் என்ற அடிப்படையில் அவருக்குப் பொறுப்பு தரப்பட்டுள்ளது” என்றார்.

சேகரிடம் பேசியபோது, ‘‘தமிழகம் முழுவதும் பொறுப்பாளர்கள் நியமிக்கப்பட்டுவருகிறார்கள்.மாநகர மாவட்டச் செயலாளராக ராஜேஸ்வரன் நியமிக்கப்பட்டதில் எனக்கு வருத்தம் இல்லை. இதுகுறித்து யாரிடமும் நான் பேசவில்லை. அ.தி.மு.க-வில் மாநகர மாவட்டச் செயலாளர் என்ற ஒரு பதவி இல்லை” என்றார்.

- கே.குணசீலன்
படங்கள்: ம.அரவிந்த்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு