Published:Updated:

சகலகலா சுப்பிரமணியம்! - முதல்வரின் சம்பந்தி வளர்ந்த கதை

ஒட்டுமொத்த விகடனுக்கும் ஒரே ஷார்ட்கட்

Use App
சகலகலா சுப்பிரமணியம்! - முதல்வரின் சம்பந்தி வளர்ந்த கதை
சகலகலா சுப்பிரமணியம்! - முதல்வரின் சம்பந்தி வளர்ந்த கதை

சகலகலா சுப்பிரமணியம்! - முதல்வரின் சம்பந்தி வளர்ந்த கதை

பிரீமியம் ஸ்டோரி

‘‘தமிழகம் முழுவதும் எனக்கு உறவினர்கள் உள்ளனர். எங்கு ரெய்டு நடந்தாலும் எனக்குத் தொடர்பு இருப்பதாகக் கூறுகின்றனர். தமிழகத்தில் அனைத்து அரசு டெண்டர்களும் சட்டத்துக்கு உட்பட்டே நடக்கின்றன’’ என ஜூலை 18-ம் தேதி கோவையில் ஆதங்கத்துடன் பேட்டி கொடுத்தார் முதல்வர் எடப்பாடி பழனிசாமி. ‘‘ஈரோடு ராமலிங்கம் அண்டு கோ நிறுவனத்தை நடத்திவரும் ராமலிங்கம், என் மகனின் சகலைக்கு அப்பா. அவர், 30 ஆண்டுகளாக கான்ட்ராக்ட் தொழில் செய்கிறார். தி.மு.க ஆட்சியில்தான் அதிகமாக கான்ட்ராக்ட் எடுத்தார்’’ என்றார்.

தன் மகனின் சகலைக்கு அப்பா பற்றியெல்லாம் பேசிய எடப்பாடி பழனிசாமி, தன் மகனின் மாமனார் பற்றிப் பேச மறந்துவிட்டார். தன் சம்பந்தி பெருந்துறை சுப்பிரமணியம் பற்றிய தகவல்களை, திட்டமிட்டே அவர் தவிர்த்திருக்க வேண்டும். ‘‘முதல்வர் எடப்பாடி பழனிசாமியைக் குறிவைத்தே இப்போது எஸ்.பி.கே நிறுவனத்தில் ரெய்டுகள் நடந்தன’’ என அரசியல் வட்டாரங்களில் பரபரப்பாகப் பேசப்படுகிறது. ‘‘எஸ்.பி.கே நிறுவனத்தின் உரிமையாளர்களில் ஒருவரான நாகராஜன், முதல்வரின் சம்பந்தியுடன் இந்த ரெய்டுக்குப் பிறகு, முதல்வரின் சம்பந்தி பங்குதாரராக இருக்கும் இரு நிறுவனங்கள் பற்றியும் விசாரணை நடைபெறும். அப்போது, அதிகார மையத்தில் இருக்கும் பலரின் வீடுகளில் எங்கள் அதிகாரிகள் நுழைவார்கள்’’ என வருமானவரித் துறை அதிகாரிகள் சூசகமாகத் தெரிவிக்கிறார்கள். ‘‘முதல்வரின் சம்பந்தி பங்குதாரராக உள்ள நிறுவனத்துக்கு, முதல்வரின் கையில் இருக்கும் நெடுஞ்சாலைத் துறையில் ஆயிரக்கணக்கான கோடி ரூபாய் மதிப்புள்ள அரசு டெண்டரை எப்படிக் கொடுக்கலாம்’’ என ஸ்டாலின் இதனால்தான் கேள்வி எழுப்பினார்.

சகலகலா சுப்பிரமணியம்! - முதல்வரின் சம்பந்தி வளர்ந்த கதை

எஸ்.பி.கே நிறுவனங்களில் ரெய்டு தொடங்கிய நிமிடத்திலிருந்து ஆணியடித்ததுபோல பெருந்துறையில் இருந்தபடி, நடப்பவை பற்றிப் பரபரப்பாக விசாரித்துக்கொண்டிருந்தார் சுப்பிரமணியம். அவரை வருமானவரித் துறை அதிகாரிகள் சென்னையில் வைத்து விசாரணை செய்வதாகப் பரவிய தகவலையும், அவர் பெருந்துறையில் இருந்தபடி மறுத்திருந்தார்.

இந்த சுப்பிரமணியம் குறித்து எடப்பாடி பழனிசாமி குடும்பத்துக்கு நெருக்கமானவர் களிடம் விசாரித்தோம்.

‘‘முதல்வர் எடப்பாடி பழனிசாமி - ராதா தம்பதிக்கு ஒரே மகன் மிதுன். பெருந்துறை சுப்பிரமணியம் - ஜெயந்தி தம்பதிக்கு திவ்யா, சரண்யா என் இரு மகள்கள். ஈரோடு காஞ்சிக்கோவில் சின்னப்பன் மூலமாக எடப்பாடி பழனிசாமியின் மகன் மிதுனுக்கும் பெருந்துறை சுப்பிரமணியத்தின் மூத்த மகள் திவ்யாவுக்கும் 20.11.2013 அன்று திருமணம் நடைபெற்றது. அப்போது, நெடுஞ்சாலைத் துறை அமைச்சராக எடப்பாடி பழனிசாமி இருந்தார்.

சுப்பிரமணியம் விவசாயக் குடும்பத்தைச் சார்ந்தவராக இருந்தாலும், ஆரம்ப காலத்தில் பைனான்ஸ் தொழில் செய்து வசதியாகவே இருந்தார். தொழில் ரீதியாகத் தன்னுடன் நெருக்கமாக இருந்தவர்களைப் பங்குதாரர்களாக இணைத்துக்கொண்டு, 1996-ம் ஆண்டு சத்தியமங்கலம் பகுதியில் ஸ்ரீஆண்டாள் பேப்பர் மில்ஸ் பிரைவேட் லிமிடெட் என்ற நிறுவனத்தைத் தொடங்கினார். அதன்பிறகு 2003-ல், ஸ்ரீஆண்டாள் பேப்பர்ஸ் அண்டு போர்ட்ஸ் பிரைவேட் லிமிடெட், 2009-ல் ஆண்டாள் பேப்பர் மில்ஸ் யூனிட் -2 ஆகியவை தொடங்கப்பட்டன. இந்த மூன்று நிறுவனங்களிலும் நிர்வாக இயக்குநர் சுப்பிரமணியம்தான்.

சகலகலா சுப்பிரமணியம்! - முதல்வரின் சம்பந்தி வளர்ந்த கதை

இந்த மூன்று நிறுவனங்களும் சுமார் ரூ.52 கோடி கடனில் செயல்பட்டு வந்தன. எடப்பாடி பழனிசாமியின் மகன் மிதுனுக்கு தன் மூத்த மகள் திவ்யாவை சுப்பிரமணியம் திருமணம் செய்துகொடுத்த பிறகு, ஒன்றரை மாதங்களில் - அதாவது, 13.1.2014 அன்று மூன்று நிறுவனங்களுக்கும் இருந்த மொத்தக் கடன் ரூ.52 கோடியும் கட்டி முடிக்கப்படுகிறது.

‘நம் குடும்ப நிறுவனங்களில் வெளிநபர்கள் எதற்குப் பங்குதாரர் களாக இருக்கவேண்டும்?’ என்று எடப்பாடி தன் சம்பந்தியிடம் கேட்டிருக்கிறார். அதன்பிறகு, பலரும் அந்த நிறுவனங்களிலிருந்து வலுக்கட்டாயமாக விலக்கப்பட்டுள்ளனர். இதில் ஒருவர் பிரச்னை செய்து வழக்கு போடப் போக, அவரிடம் சமரசம் பேசிப் பிரச்னையைத் தீர்த்திருக்கிறார்கள்.

இன்று சுப்பிரமணியம் இருக்கும் ரேஞ்சே வேறு! இப்போது வருமானவரித் துறை சோதனைக்கு உள்ளான கான்ட்ராக்டர் நாகராஜன் செய்யாத்துரை, 2016-ம் ஆண்டு பிப்ரவரி 26-ம் தேதி சென்னை முகப்பேர் பகுதியைத் தலைமையிடமாகக் கொண்டு ஸ்ரீபாலாஜி டோல்வேஸ் (மதுரை) பிரைவேட் லிமிடெட் என்ற கட்டுமான நிறுவனத்தைத் தொடங்கி அதன் நிர்வாக இயக்குநராக உள்ளார். இதில் எடப்பாடி பழனிசாமியின் சம்பந்தி சுப்பிரமணியமும், ஏற்கெனவே வருமானவரித் துறை சோதனையில் சிக்கிய கான்ட்ராக்டர் சேகர் ரெட்டியும் இயக்குநர்களாக உள்ளனர். இந்த நிறுவனம்தான், 200 கோடி மதிப்பிலான மதுரை ரிங் ரோடு நான்குவழிப் பாதைப் பணியை டெண்டர் எடுத்துள்ளது.

சகலகலா சுப்பிரமணியம்! - முதல்வரின் சம்பந்தி வளர்ந்த கதை

இதேபோல், நாகராஜன் செய்யாத்துரை 2018 மார்ச் 12-ம் தேதி அருப்புக்கோட்டையைத் தலைமையிடமாகக் கொண்டு எஸ்.பி.கே அண்டு கம்பெனி எக்ஸ்பிரஸ்வே என்ற நிறுவனத்தைத் தொடங்கினார். இதிலும் சுப்பிரமணியம் இயக்குநராக இருக்கிறார். இந்த நிறுவனம், ஆரம்பித்த வேகத்தில் 2,000 கோடி ரூபாய்க்கு மேல் மதிப்புள்ள இரு டெண்டர்களை எடுத்திருக்கிறது’’ என்கிறார்கள் அவர்கள். அதேசமயம், ‘‘சுப்பிரமணியத்துக்கு பேப்பர் பிசினஸ் தவிர வேறெதுவும் தெரியாது. இந்த நிறுவனங்களில் அவர் பெயரளவில்தான் இருக்கிறார். அவர் பெயரைச் சொல்லி இயங்குபவர்கள் வேறு யாரோ’’ என்று சொல்பவர்களும் உண்டு.

முதல்வரின் கையில் நெடுஞ்சாலைத் துறை... சகலகலா சம்பந்தி கையில் வெயிட்டான டெண்டர்கள். பேஷ்  பேஷ்!

- வீ.கே.ரமேஷ், நவீன் இளங்கோவன்
படங்கள்: ரமேஷ் கந்தசாமி

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு