Published:Updated:

“எடப்பாடி உட்பட ஆறு அமைச்சர்கள் துரோகிகள்!”

“எடப்பாடி உட்பட ஆறு அமைச்சர்கள் துரோகிகள்!”
பிரீமியம் ஸ்டோரி
“எடப்பாடி உட்பட ஆறு அமைச்சர்கள் துரோகிகள்!”

- தங்க தமிழ்ச்செல்வன் தடாலடி

“எடப்பாடி உட்பட ஆறு அமைச்சர்கள் துரோகிகள்!”

- தங்க தமிழ்ச்செல்வன் தடாலடி

Published:Updated:
“எடப்பாடி உட்பட ஆறு அமைச்சர்கள் துரோகிகள்!”
பிரீமியம் ஸ்டோரி
“எடப்பாடி உட்பட ஆறு அமைச்சர்கள் துரோகிகள்!”

‘‘அ.தி.மு.க ஆட்சியைக் கலைக்க வேண்டும் என்பது டி.டி.வி.தினகரனின் நிலைப்பாடு. எடப்பாடி, ஓ.பி.எஸ் உட்பட ஆறு அமைச்சர்களை நீக்கிவிட்டு ஆட்சி தொடர வேண்டும் என்பதுதான், தகுதிநீக்கம் செய்யப்பட்டு வழக்கை சந்தித்துவரும் 18 எம்.எல்.ஏ-க்களின் நிலைப்பாடு’’ என்று தங்க தமிழ்ச்செல்வன், சொல்லியிருப்பது பலரையும் குழப்பத்தில் ஆழ்த்தியுள்ளது. தமிழக ஆட்சி விஷயத்தில் தினகரனுக்கும் அவரின் ஆதரவு எம்.எல்.ஏ-க்களுக்குமிடையே ஒருமித்த கருத்து இல்லையோ என்ற கேள்வியை இது எழுப்பியுள்ளது. இப்படிக் கூறினாலும், தினகரன் கலந்துகொள்ளும் அனைத்து நிகழ்ச்சிகளிலும் தங்க தமிழ்ச்செல்வன் உட்பட 18 எம்.எல்.ஏ-க்களும் பங்கேற்கிறார்கள். கடந்த 16-ம் தேதி அ.ம.மு.க சார்பில் மதுரையில் நடந்த கட்டபொம்மன் நினைவு தின நிகழ்ச்சியில் தினகரனோடு தங்க தமிழ்ச்செல்வனும் இருந்தார். அவரிடம் சில கேள்விகளை முன்வைத்தோம்.

“எடப்பாடி உட்பட ஆறு அமைச்சர்கள் துரோகிகள்!”

தினகரன் அணியில் இரண்டு நிலைப்பாடுகள் உள்ளனவா?  உங்களுக்கும் தினகரனுக்கும் இடையில் முரண்பாடு ஏதும் உள்ளதா?

‘‘எங்களுக்கு ஒரே நிலைப்பாடுதான் உள்ளது. நாங்கள் எப்போதும் தினகரன் பின்னால்தான் இருக்கிறோம். அம்மாவுக்காகத்தான் மக்கள் வாக்களித்தார்கள். அம்மா மறைவுக்குப்பின் சிலர் துரோகம் செய்தார்கள். சின்னம்மா கைகாட்டிய எடப்பாடியே துரோகியாக மாறிவிட்டார். அதனால்தான், ‘அம்மா உருவாக்கிய இந்த ஆட்சி தொடர வேண்டும். துரோகம் செய்த எடப்பாடி, பன்னீர், தங்கமணி, வீரமணி, ஜெயகுமார், உதயகுமார் ஆகியோரை ஆட்சியிலிருந்தும் கட்சியிலிருந்தும் நீக்க வேண்டும்’ என்கிறோம். கட்சி ஆரம்பித்த பிறகு தமிழகம் முழுவதும் சுற்றி வரும் தினகரனிடம், ‘எடப்பாடி அரசு ஊழல் நிறைந்ததாக உள்ளது. இது அம்மாவின் ஆட்சி போல இல்லை. அமைச்சர்கள்மீது ஊழல் புகார்கள் தினமும் வந்து கொண்டிருக்கின்றன. அதனால் இந்த ஆட்சி போக வேண்டும்’ என்று மக்கள் புகார் தெரிவிக் கின்றனர். அதனால்தான் அவர், ‘இந்த ஊழல் ஆட்சியைக் கலைக்க வேண்டும்’ என்கிறார். இதில் எந்த முரண்பாடும் இல்லை.”

‘‘எடப்பாடி, பன்னீர் உட்பட நீங்கள் குறிப்பிட்ட சில அமைச்சர்களை நீக்கினால் போதுமா... மற்ற அமைச்சர்கள் நல்லவர்கள் என்கிறீர்களா?”

‘‘அப்படிச் சொல்லவில்லை. நாங்கள் குறிப்பிடும் இவர்கள்தான், அரசியலில் தங்களை அடையாளம் காட்டிய சின்னம்மாவையும், தினகரனையும் நன்றி மறந்து இழிவுபடுத்திப் பேசி வருகிறார்கள். இவர்கள் ஆட்சியிலும் கட்சியிலும் இருப்பதை உண்மையான அ.தி.மு.க தொண்டர்கள் ஏற்றுக் கொள்ள மாட்டார்கள். அதனால்தான் அவர்களை நீக்க வேண்டும் என்கிறோம்.”

‘‘எடப்பாடியும் தினகரனும் ரகசிய உடன்பாடு வைத்துள்ளார்கள். பன்னீரை நீக்கிவிட்டு இருவரும் இணைந்து கொள்ள நினைக்கிறார்கள். அதனால்தான் தினகரனை பன்னீர் சந்தித்த விவகாரத்தை வெளியிட்டு பன்னீருக்கு நீங்கள் சங்கடத்தை உண்டாக்கியதாகச் சொல்லப்படுகிறதே?”

“அது சிலரின் கற்பனை. ஆட்சி அதிகாரத்தைக் கையில் வைத்திருக்கும் எடப்பாடி, எங்களுக்கும் தினகரனுக்கும் பல வகையிலும் இடைஞ்சல்களைக் கொடுக்கிறார்.  எந்தக் காலத்திலும் அவருடன் உடன்பாடு கிடையாது. அதைத் தொண்டர்களும் ஏற்றுக்கொள்ள மாட்டார்கள். பன்னீரின் உண்மை முகத்தை மக்கள் தெரிந்துகொள்ளவேண்டும் என்பதற்காகத்தான் சந்திப்பு விவகாரத்தை வெளியிட்டோம். சுயநலத்துக்காகவும் பதவி ஆசைக்காகவும் அவர் யாருக்கும் துரோகம் செய்வார், யாரிடமும் சரணடைவார் என்பதை வெளிப்படுத்தினோம்.”

‘‘தினகரனுக்கும், பி.ஜே.பி-க்கும் இடையே உறவு துளிர்க்க ஆரம்பித்திருப்பதாக சொல்லப்படுகிறதே?’’

‘‘தினகரன்மீது வழக்கு போட்டு, அவரின் அரசியல் செயல்பாட்டைத் தடுத்தவர்கள் பி.ஜே.பி-யினர். தொடர்ந்து தடைகளையும் துன்பங்களையும் கொடுப்பவர்களும்  பி.ஜே.பி-யினர்தான். அவர்கள்தான் எடப்பாடியையும் பன்னீரையும் வைத்து அ.தி.மு.க-வை இயக்குகிறார்கள். அவர்களுடன் எப்படி உடன்படுவோம்?’’

‘‘தினகரனுக்குப் போட்டியாக திவாகரன், பாஸ்கரன் கட்சி ஆரம்பித்துள்ளார்களே... அதற்கு என்ன காரணம்? இதெல்லாம் தினகரனுக்குப் பின்னடைவைத் தருமா?’’

‘‘எல்லாம் எடப்பாடி அரசு ஆதரவில் செய்கிறார்கள். அவர்கள் பின்னால் யாருமில்லை. தினகரனின் அரசியலுடன் அவர்களால் போட்டி போட முடியாது. எடப்பாடி பதவி போனதும், அந்தக் கட்சிகளும் காணாமல் போய்விடும்.’’

‘‘தகுதிநீக்கம் செய்யப்பட்ட நீங்கள் உட்பட 18 எம்.எல்.ஏ-க்கள் சம்பந்தப்பட்ட வழக்கின் தீர்ப்பு விரைவில் வழங்கப்பட வேண்டும் என வலியுறுத்தி உண்ணாவிரதம் நடத்தப்போவதாக ஒரு தகவல் வந்ததே?’’

‘‘தவறான தகவலை சிலர் பரப்புகிறார்கள். எங்களுக்கு நீதித்துறைமீது நம்பிக்கை உள்ளது. நியாயமான தீர்ப்பு வரும். என் பதவி பறிக்கப்பட்ட பிறகு ஆண்டிபட்டி தொகுதியில் எந்த அடிப்படை வசதிகளும் செய்து தரப்படவில்லை. அதைக் கண்டித்துத்தான் போராட்டம் நடத்தப்போகிறோம்.’’

‘‘ஆர்.கே. நகரில் இருபது ரூபாய் டோக்கன் கொடுத்ததாக குற்றச்சாட்டை தொடர்ந்து கூறிவருகிறார்களே?’’

‘‘அப்படியெல்லாம் செய்ய முடியுமா? தற்போது திருப்பரங்குன்றம் தொகுதியில் அ.தி.மு.க-வினர் ஓட்டுக்கு 5,000 ரூபாய் வழங்க உள்ளார்கள். என்ன செய்தாலும் திருப்பரங்குன்றம், திருவாரூர் இடைத்தேர்தலில் அ.ம.மு.க அமோக வெற்றியைப் பெறும்.’’

- செ.சல்மான் 
படம்: வீ.சக்தி அருணகிரி

ஒட்டுமொத்த விகடனுக்கும் ஒரே ஷார்ட்கட்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism