Published:Updated:

உயிரோடு ஏழாயிரம் கோழிகள்! - அ.தி.மு.க எம்.எல்.ஏ தீபாவளி பரிசு...

உயிரோடு ஏழாயிரம் கோழிகள்! - அ.தி.மு.க எம்.எல்.ஏ தீபாவளி பரிசு...
பிரீமியம் ஸ்டோரி
News
உயிரோடு ஏழாயிரம் கோழிகள்! - அ.தி.மு.க எம்.எல்.ஏ தீபாவளி பரிசு...

உயிரோடு ஏழாயிரம் கோழிகள்! - அ.தி.மு.க எம்.எல்.ஏ தீபாவளி பரிசு...

மிழக அரசியல் வட்டாரத்தில் தீபாவளி கவனிப்புகள் பலவிதம். அதில் புதுவிதமாக உயிருடன் கோழியை, மசாலாப் பொருள்களுடன் கொடுத்து அசத்தியிருக்கிறார் அ.தி.மு.க எம்.எல்.ஏ ஒருவர்.

திருவண்ணாமலை மாவட்டம், கலசப்பாக்கம் தொகுதி எம்.எல்.ஏ-வான பன்னீர்செல்வம் தனது தொகுதிக்கு உட்பட்ட கலசப்பாக்கம் மற்றும் புதுப்பாளையம் ஒன்றியக் கட்சி நிர்வாகிகள் மற்றும் தொண்டர்கள் ஏழாயிரம் பேருக்குத் தீபாவளிப் பரிசு கொடுக்கத் தீர்மானித்தார். பிரியாணி விருந்து கொடுப்பது அரசியல்வாதிகளின் வழக்கமான ஸ்டைல். இவரோ, ‘நீங்களே பிரியாணி சமைத்துக்கொள்ளுங்கள்’ என்று சொல்வதுபோல பிரியாணி சமைப்பதற்குத் தேவையானவற்றைப் பரிசாகக் கொடுத்துவிட்டார். உயிருடன் ஒன்றரைக் கிலோ கோழி, இஞ்சி, பூண்டு மசாலா பேஸ்ட், பட்டை, லவங்கம், ஏலக்காய், பிரியாணி இலை அடங்கிய பாக்கெட், மிளகாய் தூள், மஞ்சள் தூள், நெய் பாக்கெட், இரண்டு கிலோ பாசுமதி பிரியாணி அரிசி... இவை எல்லாம் போதாது என்று கடிகாரம், ஸ்வீட் பாக்ஸ், பட்டாசு... என்று நீள்கிறது பரிசுப் பொருள்களின் பட்டியல். புதுமாதிரியான பரிசைப் பார்த்துக் குஷியாகியிருக்கிறார்கள் கட்சித் தொண்டர்கள்.

உயிரோடு ஏழாயிரம் கோழிகள்! - அ.தி.மு.க எம்.எல்.ஏ தீபாவளி பரிசு...

பன்னீர்செல்வத்திடம் பேசினோம். “அம்மா வழியில் கட்சித் தொண்டர்களை குஷிப்படுத்தவே இந்த ஏற்பாடு. தொண்டர்களை மட்டுமல்லாமல், அவர்களின் குடும்பங்களையும் குஷிப்படுத்தணும். ஏன்னா, கட்சித் தொண்டனைப் பார்த்து அவங்க குடும்பத்தினர் ‘கட்சி உனக்கு என்ன பண்ணுச்சி?’ என்று கேட்கக் கூடாது இல்லையா... அதற்காகதான் உயிரோட கோழி. அதேசமயம் தொண்டன் மட்டும் வந்து மண்டபத்தில் பிரியாணி சாப்பிட்டால் போதாது; குடும்பத்துடன் பிரியாணி சுடச்சுட சாப்பிடணும். எனவேதான், பிரியாணி சமைக்கிறதுக்கான பொருள்களையும் கொடுத்திருக்கேன்” என்றவர், கோழிகளையும் மற்ற பொருள்களையும் வாங்கியதை விவரித்தார்.

“ஏழாயிரம் கோழிகளை பல்லடத்துல பிடிச்சேன். நூறு மூட்டை சீரக சம்பா அரிசியை ஆந்திராவிலிருந்து வரவழைச்சேன். மசாலாப் பொருள்களை சென்னையில் வாங்கினேன். கடிகாரம் ஹைதராபாத்தில் ஆர்டர் பண்ணது. வேலூர், ஆரணியில் ஸ்வீட் வாங்கினேன். தொண்டனுக்காகத் தேடித் தேடிப் பொருள்களை வாங்குனதுல தனி சந்தோஷம். தொண்டன் நல்லா இருந்தாதான், கட்சி நல்லா இருக்கும். கட்சி நல்லா இருந்தாதான், நான் நல்லா இருப்பேன். தீபாவளியை நான் மட்டுமல்லாம, அ.தி.மு.க-வின் அத்தனை அடிமட்டத் தொண்டர்களும் சந்தோஷமா கொண்டாடணும். அப்போதுதான் அம்மாவின் ஆன்மா சாந்தி அடையும்” என்றார். பன்னீர்செல்வத்தின் ஆதரவாளர் ஒருவர், “தீபாவளிக்கே எங்க அண்ணன் 35 லட்சம் ரூபாய்க்குப் பரிசு கொடுத்து இருக்கார். பொங்கல் பரிசு இதுமாதிரி டபுளா இருக்கும்...” என்று நைசாகக் கோத்துவிட்டார். தொகுதி மக்களோ, “தொண்டர்களுக்குப் பரிசு கொடுக்குறது எல்லாம் சரி... தொகுதிக்கு அவர் என்ன செஞ்சாரு?” என்று கேட்கிறார்கள். பதில் சொல்லுங்க பன்னீர்செல்வம்!

- கா.முரளி

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz