Published:Updated:

மோடி கற்றுக்கொள்வார்... ராகுல்?

மோடி கற்றுக்கொள்வார்... ராகுல்?
பிரீமியம் ஸ்டோரி
மோடி கற்றுக்கொள்வார்... ராகுல்?

மோடி கற்றுக்கொள்வார்... ராகுல்?

மோடி கற்றுக்கொள்வார்... ராகுல்?

மோடி கற்றுக்கொள்வார்... ராகுல்?

Published:Updated:
மோடி கற்றுக்கொள்வார்... ராகுல்?
பிரீமியம் ஸ்டோரி
மோடி கற்றுக்கொள்வார்... ராகுல்?

டந்த ஐந்து ஆண்டுகளில் நடந்த பல்வேறு மாநிலங்களில் நடந்த சட்டப்பேரவைத் தேர்தல் முடிவுகள் வெளியான மறுநாள், இந்திய செய்தித்தாள்கள் பெரும்பாலானவற்றில் முதல் பக்கத்தில் அந்தப் புகைப்படம் இருக்கும். சூழல் முழுக்கக் கொண்டாட்டமாக இருக்க, பி.ஜே.பி தேசியத் தலைவர் அமித் ஷாவுக்கு பிரதமர் மோடி இனிப்பு ஊட்டும் காட்சியே அது. முதல்முறையாக அப்படிப்பட்ட புகைப்படம் ஏதுமில்லாமல் டிசம்பர் 12-ம் தேதி செய்தித்தாள்கள் வந்தன.

ஐந்து மாநிலங்களில் நடைபெற்ற தேர்தல்களில் பி.ஜே.பி பெரும் இழப்பைச் சந்தித்திருக்கிறது. அடுத்த ஆண்டு தொடக் கத்தில் நடைபெற உள்ள நாடாளுமன்றத் தேர்தலுக்கு முன்பாக, மோடிக்கு எதிரான கட்சிகள் அணி திரள்வதற்கு ஒரு தலைமை தேவை; ஒரு பாதை தேவை. காங்கிரஸ் தலைமையில் அவர்கள் செல்லப்போகும் பாதைக்குத் தொடக்கப்புள்ளியாக இந்தத் தேர்தல் அமைந்திருக்கிறது. கடந்த ஆண்டு தொடக்கத்தில் உத்தரப் பிரதேசத் தேர்தல் முடிவுகள் வெளியானபோது, ‘2019 நாடாளுமன்றத் தேர்தலை எதிர்க்கட்சிகள் மறந்துவிட வேண்டியதுதான். அந்தத் தேர்தலிலும் மோடி ஜெயிப்பதை யாராலும் தடுக்க முடியாது’ என்று காஷ்மீர் முன்னாள் முதல்வர் உமர் அப்துல்லா கூறியிருந்தார். ஆனால், இப்போது அப்படித் தீர்மானமாகச் சொல்ல முடியாது. மோடியின் தேர்தல் வியூகங்களும் பிரசார உத்திகளும் இந்தத் தேர்தலில் எந்தப் பலனையும் தரவில்லை. ஏற்கெனவே டெல்லியிலும் பீகாரிலும் பி.ஜே.பி தோல்வியைச் சந்தித்தது என்றாலும், அதில் நேரடியாக காங்கிரஸ் பலனடையவில்லை. முதல்முறையாக இப்போதுதான் அந்தக் கட்சி வெற்றியை ருசித்திருக்கிறது.

மோடி கற்றுக்கொள்வார்... ராகுல்?

ஆனால், சத்தீஸ்கர் மாநிலத்தில் பெற்ற வெற்றியைத் தவிர காங்கிரஸ் இதைப் பெரிதாகக் கொண்டாடிவிட முடியாது. மத்தியப் பிரதேசத்திலும் சத்தீஸ்கரிலும் பி.ஜே.பி தொடர்ச்சியாக 15 ஆண்டுகள் ஆட்சியில் இருந்தது. எப்போதும் இல்லாத அளவுக்குக் கடந்த ஐந்து ஆண்டுகளில், மத்தியப் பிரதேச முதல்வராக இருந்த சிவராஜ்சிங் சவுகானும், சத்தீஸ்கர் முதல்வராக இருந்த ராமன் சிங்கும் சர்ச்சைகளையும் நெருக்கடிகளையும் சந்தித்துவந்தார்கள். ராஜஸ்தானில் முதல்வராக இருந்த வசுந்தரா ராஜே சிந்தியா தனது முரட்டுத்தனமான நடவடிக்கைகளால் மக்கள் எதிர்ப்பை மட்டுமல்லாமல், கட்சிக்காரர்கள் எதிர்ப்பையும் சம்பாதித்து வைத்திருந்தார். எனவே, மேற்கண்ட மாநிலங்களில் பெரும் வெற்றியைப் பெற்று விடலாம் என்று காங்கிரஸ் எதிர்பார்த்தது. கருத்துக் கணிப்புகளும்கூட, ராஜஸ்தானில் காங்கிரஸ் சுலபமாக ஜெயிக்கும் என்றே வந்தன.

ஆனால், அப்படி எதுவும் நிகழவில்லை. இந்த மூன்று மாநிலங்களிலுமே மாயாவதியின் பகுஜன் சமாஜ் கட்சி ஒரு குறிப்பிடத்தக்க சக்தியாக இருக்கிறது. அகிலேஷ் யாதவின் சமாஜ்வாடி கட்சிக்கு, உத்தரப் பிரதேசத்தின் எல்லையோரமாக இருக்கும் மத்தியப் பிரதேச மாவட்டங்களில் கணிசமான ஆதரவு இருக்கிறது. உ.பி-யில் அமையவிருக்கும் மெகா கூட்டணிக்கு முன்னோட்டமாக இங்கு காங்கிரஸுடன் இவர்கள் கூட்டணி அமைப்பார்கள் எனக் கருதப்பட்டது. அதற்கான பேச்சுவார்த்தைகளும் தொடங்கின. ஆனால், தனிப்பட்ட முறையில் காங்கிரஸுக்கு இன்னமும் செல்வாக்கு இருக்கும் மிகச்சில மாநிலங்களில் இந்த மூன்றும் முக்கியமானவை. ‘மாயாவதி மற்றும் அகிலேஷுடன் கூட்டணி அமைத்தால், தேவையில்லாமல் அவர்களை வளர்த்துவிட்ட மாதிரி ஆகிவிடும்’ என உள்ளூர் காங்கிரஸ் தலைவர்கள் கணக்கு போட்டனர். தங்கள் ஓட்டு வங்கியை இவர்களுடன் பங்குபோட காங்கிரஸ் தயாராக இல்லை.

மோடி கற்றுக்கொள்வார்... ராகுல்?

இந்தச் சூழலில், சத்தீஸ்கரில் அஜித் ஜோகியின் ஜன்தா காங்கிரஸ் சத்தீஸ்கர் (ஜே) கட்சியுடன் மாயாவதி திடீர்க் கூட்டணி அமைத்தார். இதற்குமுன் காங்கிரஸில் இருந்த அஜித் ஜோகி, சத்தீஸ்கர் மாநிலம் உருவானபோது, அதன் முதல் முதல்வராக இருந்தவர். இவர், சத்தீஸ்கர் பழங்குடி மக்கள் மத்தியில் கணிசமான செல்வாக்கு பெற்ற தலைவர். கட்சி விரோத நடவடிக்கைகளுக்காக காங்கிரஸிலிருந்து நீக்கப்பட்டு, கடந்த ஆண்டுதான் தனிக்கட்சி ஆரம்பித்திருந்தார். அவருடன் மாயாவதி கைகோக்க, ‘‘மாயாவதிதான் அடுத்த தேர்தலில் பிரதமர் வேட்பாளர்’’ என்றார் அஜித் ஜோகி. ‘‘சத்தீஸ்கர் முதல்வர் வேட்பாளர் அஜித் ஜோகிதான்’’ என்றார் மாயாவதி. இவர்கள் பி.ஜே.பி-யைத் தாக்கியதுபோலவே காங்கிரஸையும் தாக்கினார்கள். இந்தக் கூட்டணி காங்கிரஸைக் கவிழ்த்துவிடும் எனக் கருதப்பட்டது. ஆனால், இதைத் தாண்டி மொத்தமுள்ள 90 இடங்களில் 68 இடங்களை காங்கிரஸ் பெற்றது. எந்தக் கருத்துக்கணிப்பும் ‘காங்கிரஸ் இப்படி ஒரு வெற்றியைப் பெறும்’ என்று சொல்லவில்லை.

கணிப்புகளைப் பொய்யாகி இதைச் சாதித்தவர், சத்தீஸ்கர் மாநில காங்கிரஸ் தலைவர் பூபேஷ் பெஹல். மாநிலம் முழுக்க எல்லாக் கிராமங்களிலும் பூத் கமிட்டிகள் அமைத்துக் கட்சியின் அடிமட்டக் கட்டமைப்பை வலுவாக்கினார். அஜித் ஜோகியுடன் மூத்த தலைவர்கள் பலர் சென்றுவிட, கட்சிக்குள் இள ரத்தம் பாய்ச்சப்பட்டது. பூபேஷின் வியூகம்தான் அங்கு யாருமே எதிர்பார்க்காத வெற்றியை காங்கிரஸுக்குக் கொடுத்திருக்கிறது.

ராஜஸ்தானில் பெரும் போராட்டம் நடத்தி, பார்டரில் பாஸ் செய்திருக்கிறது காங்கிரஸ். மாநில முதல்வராக இருந்த வசுந்தரா, அடுத்தடுத்து தவறான முடிவுகளை எடுத்து, காங்கிரஸை உற்சாகப்படுத்திக்கொண்டிருந்தார். ஆனாலும், பி.ஜே.பி-யைவிட காங்கிரஸ் வெறும் 0.5 சதவிகித ஓட்டுகள் மட்டுமே அதிகமாகப் பெற்றது. நான்கு சதவிகித வாக்குகளைப் பெற்று, ஆறு தொகுதிகளில் இங்கு மாயாவதியின் கட்சி ஜெயித்தது. மாயாவதியுடன் கூட்டணி அமைக்காததும், காங்கிரஸ் கட்டமைப்பு வலுவாக இல்லாததும், கட்சிக்குள் ஆங்காங்கே நிகழ்ந்த கலகங்களுமே, காங்கிரஸ் தீர்மானமாகப் பெற்றிருக்க வேண்டிய வெற்றியைத் தடுத்தன.

மத்தியப் பிரதேசம் இதைவிட விநோதமான களம். அங்கு காங்கிரஸ் பெற்றதைவிட, பி.ஜே.பி 47,827 ஓட்டுகள் அதிகம் பெற்றது. ஆனால், அங்கு ஆட்சியைப் பிடித்தது காங்கிரஸ்தான். ஐந்து சதவிகித ஓட்டுகளைப் பெற்று இரண்டு இடங்களில் ஜெயித்த மாயாவதியுடன் ஒருவேளை காங்கிரஸ் கூட்டணி அமைத்திருந்தால், பி.ஜே.பி மிக மோசமாக இங்கு தோற்றிருக்கும்.

மோடி கற்றுக்கொள்வார்... ராகுல்?

சத்தீஸ்கர் முதல்வராக இருந்த ராமன் சிங் கள நிலவரங்களை உணர்ந்தே இருந்தார். அவரும் ம.பி-யில் காங்கிரஸ் பாணியிலான கவர்ச்சிகரமான வாக்குறுதிகளைத் தரத் தயாரானார். ஆனால், விவசாயக் கடன் தள்ளுபடிக்கு மோடி ஒப்புக்கொள்ளவில்லை. மத்தியப் பிரதேச முதல்வராக இருந்த சிவராஜ்சிங் சவுகான் இதை வேறு மாதிரி அணுகினார். ஏழைகளுக்குக் குறைந்த மின் கட்டணம், பெண்களுக்குக் கடனுதவி என்று பல நலத்திட்டங்களை இணைத்த ‘சம்பல் திட்டம்’ என்ற திட்டத்தை அறிமுகம் செய்து மாநிலம் முழுக்க யாத்திரை போனார். அதுதான் கடைசி நேரத்தில் அங்கு பி.ஜே.பி-யைக் காப்பாற்றியிருக்கிறது.

இந்த ஐந்து மாநிலங்களின் தேர்தல்களை, நாடாளுமன்றத் தேர்தலுடன் இணைத்தே மோடி எதிர்கொள்வார் என்ற எதிர்பார்ப்பு பல மாதங்களுக்கு முன்பே எழுந்தது. ஆனால், இந்தத் தேர்தல்களை மக்களின் பல்ஸ் பார்க்கும் தேர்வாகவே மோடி கருதியிருக்கிறார். இந்தத் தேர்தல்களிலிருந்து பாடம் கற்றுக்கொண்டு,

பி.ஜே.பி தனது தேர்தல் வியூகங்களை வகுக்கக்கூடும். ‘வளர்ச்சி’ என்பதுதான் மோடியின் பிரதான முழக்கமாக இந்தத் தேர்தல் வரையிலும்கூட இருந்தது. அது இனி எடுபடாது. ரஃபேல் விவகாரத்தை வைத்து மோடி மீது நேரடியாகவே ஊழல் குற்றச்சாட்டு சுமத்தினார் ராகுல். அது பிரசாரத்தில் எடுபட்டது. எனவே, ரஃபேல் விவகாரத்திலிருந்து மீண்டு வருவதற்கு மோடி முயற்சி எடுக்கக்கூடும். அதேநேரத்தில், சோனியா காந்தியின் மருமகன் ராபர்ட் வதேரா தொடர்பான ரெய்டுகளை இறுக்கமாக்கி, காங்கிரஸ் மீதான ஊழல் குற்றச்சாட்டுகளை உயிர் பெறவைக்க மோடி திட்டமிடக்கூடும்.

விஜய் மல்லையா விவகாரத்தில் மத்திய அரசு தீவிரம் காட்டுகிறது. அவரை இந்தியாவுக்குக் கொண்டுவந்தால், அதைத் தனது தனிப்பட்ட வெற்றியாக மோடி காட்டக்கூடும். அடுத்தடுத்து நிரவ் மோடி, மெகுல் சோக்சி ஆகியோரைக் கூட்டிவந்து, மோடி ஸ்கோர் செய்யலாம். ஜனவரிக்குப் பிறகு உச்ச நீதிமன்றத்தில் அயோத்தி வழக்கு வருகிறது. ராமர் கோயில் விவகாரம் மீண்டும் தேசப் பிரச்னையாக மாறலாம். ஓட்டு வங்கியை உணர்ச்சிமயமாகத் திரட்டலாம். 

அருண் ஜெட்லி தாக்கல் செய்யவிருக்கும் இடைக்கால பட்ஜெட்டும், பி.ஜே.பி-யின் தேர்தல் அறிக்கையும் பல்வேறு கவர்ச்சித் திட்டங்களைக் கொண்டதாக இருக்கக்கூடும். விவசாயிகளையும் மிடில் கிளாஸையும் குறிவைத்த அறிவிப்புகள் வெளியாக உள்ளன.

இன்னொரு பக்கம், எதிர்க்கட்சிகளின் அணிதிரட்டலைச் செய்வதில் காங்கிரஸ் தீவிரமாகக்கூடும். ஆனால், இந்தத் தேர்தல் முடிவுகளுக்கு முன்பாக டெல்லியில் காங்கிரஸ் ஏற்பாடு செய்திருந்த எதிர்க்கட்சிகள் கூட்டத்தில் மாயாவதியும் அகிலேஷ் யாதவும் பங்கேற்கவில்லை. மேற்கு வங்க முதல்வர் மம்தா பானர்ஜி அரைமனதுடன் பங்கேற்றார்.
 
இந்தியாவின் தலையெழுத்தை மாற்றக்கூடிய 80 எம்.பி தொகுதிகள் உ.பி மாநிலத்தில் உள்ளன. இங்கு மாயாவதியும் அகிலேஷ் யாதவும் அமைக்க உள்ள மெகா கூட்டணியில் காங்கிரஸுக்கு இடம் இருக்கிறதா என்பது இதுவரை தெரியவில்லை. காங்கிரஸ் தன் பலத்துக்கு மீறிய எண்ணிக்கையில் தொகுதிகளைக் கேட்பதாக இவர்கள் கருதுகின்றனர்.

பி.ஜே.பி-யின் வெற்றியைத் தடுக்கக்கூடிய சக்திமிக்கவர்களாகக் கருதப்படும் மம்தா பானர்ஜி, மாயாவதி, அகிலேஷ், நவீன் பட்நாயக், சந்திரசேகர ராவ் ஆகிய ஐந்து பேருமே காங்கிரஸுடன் நேரடித் தேர்தல் உறவுக்குத் தயாராக இல்லை. எப்படி பி.ஜே.பி செல்வாக்குடன் இருப்பதை அவர்கள் விரும்பவில்லையோ, அதே போல காங்கிரஸ் மீண்டும் பலம் பெறுவதையும் அவர்கள் விரும்பவில்லை. ‘வலிமையான தேசியக் கட்சிகள் எப்போதுமே மாநிலக் கட்சிகளை நசுக்க முயற்சி செய்யும். அதனால், பி.ஜே.பி வலுவிழக்க வேண்டும். காங்கிரஸும் வளர்ந்துவிடக்கூடாது’ என்பதே அவர்களின் எண்ணம்.

காங்கிரஸ் இந்த யதார்த்த சூழலைப் புரிந்து கொண்டு, தனது பெரியண்ணன் நடவடிக்கை களைக் கைவிட வேண்டும். வலிமையான மாநிலக் கட்சிகளின் முதுகில் ஏறிச் சவாரி செய்ய விரும்பும் காங்கிரஸ், தன் முதுகிலும் அவற்றைச் சுமக்க வேண்டிய தேவை இருப்பதை உணர வேண்டும்.

தோல்விகளிலிருந்து பாடம் கற்றுக்கொண்டு மீண்டுவர மோடியால் முடியும். வெற்றிகளிலிருந்து பாடம் கற்றுக்கொள்வாரா ராகுல்?

-  தி.முருகன்