ஆபரேஷன் தாமரை அவுட்... தப்பியது குமாரசாமி ஆட்சி!

கர்நாடகத்தில் எம்.எல்.ஏ-க்கள் குதிரைப்பேர விவகாரம் ஏற்படுத்திய பரபரப்பு தற்காலிகமாக முடிவுக்கு வந்துள்ளது. மூன்று நாள்கள் மட்டுமே முதல்வராக இருந்த எடியூரப்பா, மீண்டும் முதல்வராகும் கனவில், அதிருப்தி காங்கிரஸ் எம்.எல்.ஏ-க்களை இழுக்க முயற்சி செய்வதாக எழுந்த பரபரப்பும் ஓய்ந்திருக்கிறது. மும்பைக்கு ‘பேக்’ செய்யப்பட்ட அதிருப்தி எம்.எல்.ஏ-க்களைச் சரிகட்டி, குமாரசாமி ஆட்சியைக் காப்பாற்றியிருக்கிறது காங்கிரஸ்.

கர்நாடகத்தில் காங்கிரஸ் துணையுடன் நடக்கும் மதச்சார்பற்ற ஜனதா தளம் ஆட்சியில் அமைச்சர் பதவி கிடைக்காத காங்கிரஸ் எம்.எல்.ஏ-க்கள் சிலர் அதிருப்தியில் இருந்தார்கள். அதிருப்தியைச் சரிகட்ட காங்கிரஸ் கட்சியுடன் பேசி, அமைச்சரவையை மாற்றியமைத்தார் முதல்வர் குமாரசாமி. இதில் காங்கிரஸ் எம்.எல்.ஏ ரமேஷ் ஜார்கிஹோளி, சுயேச்சை எம்.எல்.ஏ சங்கர் ஆகியோரின் அமைச்சர் பதவிகள் பறிக்கப்பட்டன. பெல்லாரி தொகுதி எம்.எல்.ஏ-வான துக்காராமுக்கு அமைச்சர் பதவி கொடுக்கப்பட்டது. இதன் தொடர்ச்சியாக, சுயேச்சை எம்.எல்.ஏ-க்கள் சங்கர், நாகேஷ் இருவரும், ‘காங்கிரஸ் - ம.ஜ.த கூட்டணி அரசுக்கு அளித்த ஆதரவை விலக்கிக்கொள்கிறோம். பி.ஜே.பி-க்கு ஆதரவு அளிக்கிறோம்’ என்று கர்நாடக கவர்னர் வாஜுபாய் வாலாவிடம் கடிதம் கொடுத்துப் பரபரப்பைக் கிளப்பினர். 

துக்காராமுக்கு அமைச்சர் பதவி கொடுக்கப்பட்டதற்கு, இன்னொரு காங்கிரஸ் எம்.எல்.ஏ-வான நாகேந்திரா கடும் எதிர்ப்புத் தெரிவித்தார். இவருடன், காங்கிரஸ் எம்.எல்.ஏ-க்கள் சிலரும் சேர்ந்துகொள்ள கர்நாடக அரசியலில் சூடு கிளம்பியது. இதனால் சுறுசுறுப்பு அடைந்த பி.ஜே.பி தரப்பு ஆபரேஷன் தாமரை என்ற பெயரில் மீண்டும் ஆட்சி அமைக்கும் முயற்சியில் ஈடுபடுவதாகவும், அதிருப்தி எம்.எல்.ஏ-க்களுக்கு தலா 50 கோடி ரூபாய்வரை பேரம் பேசப்படுவதாகப் பரபரப்பு எழுந்தது.

இந்த விவகாரம் குறித்து நம்மிடம் பேசிய கர்நாடக அரசியல் பார்வையாளர்கள், “இப்படி ஒரு செய்தி வெளியானதும், காங்கிரஸ் தலைமையிலிருந்து, மும்பையில் தங்கியிருந்த அதிருப்தி
எம்.எல்.ஏ-க்களிடம், ‘கட்சித் தாவல் சட்டத்தின் மீது நடவடிக்கை எடுத்தால், பதவி பறிபோகும். உடனே ஊர் திரும்புங்கள்’ என்று எச்சரிக்கை விடப்பட்டது. இன்னொருபுறம், முதல்வர் குமாரசாமி தரப்பிலிருந்தும் அதிருப்தி எம்.எல்.ஏ-க்களிடம் ‘உங்கள் கோரிக்கைகள் கவனத்தில் கொள்ளப்படும்’ என்று வாக்குறுதி கொடுக்கப்பட்டது. இதையடுத்து அதிருப்தி எம்.எல்.ஏ-க்கள் சமாதானம் அடைந்திருக்கிறார்கள். இதைத் தொடர்ந்தே ஆட்சி அமைக்கும் நடவடிக்கைகளில் இருந்து பி.ஜே.பி பின்வாங்கிவிட்டது” என்றார்கள்.

இதுகுறித்து பேசிய முன்னாள் முதல்வர் எடியூரப்பா, ‘‘கர்நாடக அரசியலில் குழப்பம் நீடித்துவருகிறது. எங்கள் கட்சியின் பலத்தை நிரூபிக்க வேண்டியுள்ளது. அதற்காக நாங்கள் காங்கிரஸ்
எம்.எல்.ஏ-க்களுடன் குதிரைப் பேரத்தில் ஈடுபட வேண்டிய அவசியம் எல்லாம் இல்லை” என்று மறுத்துள்ளார். தற்காலிகமாகத் தப்பியிருக்கிறது குமாரசாமியின் ஆட்சி. ஆனால், நீடிக்குமா என்பது கர்நாடக அரசியல் நிலவரத்தைப் பொறுத்தே இருக்கிறது.

- எம்.வடிவேல்