Published:Updated:

தேர்தலுக்காக விட்டுக்கொடுத்தல்கள் தவறு இல்லை!

ஒட்டுமொத்த விகடனுக்கும் ஒரே ஷார்ட்கட்

Use App
தேர்தலுக்காக விட்டுக்கொடுத்தல்கள் தவறு இல்லை!
தேர்தலுக்காக விட்டுக்கொடுத்தல்கள் தவறு இல்லை!

தேர்தலுக்காக விட்டுக்கொடுத்தல்கள் தவறு இல்லை!

பிரீமியம் ஸ்டோரி

மு.க.ஸ்டாலின் உட்பட எதிர்க்கட்சித் தலைவர்களைத் திரட்டி, திருச்சியில் விடுதலைச் சிறுத்தைகள் நடத்திய ‘தேசம் காப்போம்’ மாநாட்டில் முன்வைக்கப்பட்ட முக்கியக் கேள்வி, ‘சனாதனமா... ஜனநாயகமா?’ என்பதுதான். அந்த மாநாட்டில் பேசிய ஸ்டாலின், திருமாவளவன் உள்ளிட்டோர் சனாதானக் கோட்பாட்டைக் கடுமையாக விமர்சித்தனர். அதற்கு பி.ஜே.பி தரப்பிலிருந்து எதிர் விமர்சனங்கள் வந்துகொண்டிருக்கின்றன. இந்த நிலையில், விடுதலைச் சிறுத்தைகள் கட்சித் தலைவர் திருமாவளவனிடம் சில கேள்விகளை முன்வைத்தோம்.

‘‘பி.ஜே.பி-யின் மாநிலத் தலைவர் தமிழிசை சவுந்திரராஜன் உங்களை, ‘மதவெறித் தீயைப் பரப்பும் சாதிவெறியாளர்’ என்கிறாரே?’’

‘‘இந்துத்துவத்துக்கு எதிராகப் பேசினால், ‘இந்துக்களுக்கு எதிராகப் பேசுகிறார்கள்’ என்று திரித்துப் பேசுவார்கள். நாங்கள் எல்லாவற்றுக்கும் அடிப்படையான ‘சனாதனம்’ என்ற கொடூரக் கோட்பாட்டை எதிர்த்துப் பேசிவருகிறோம். இது பி.ஜே.பி-யின் மென்னியைப் பிடித்துத் திருகுகிறது. அதைத் தாங்கிக்கொள்ள முடியாமல்தான், காழ்ப்பு உணர்ச்சியுடன் தனிநபர்கள் மீது இப்படி அபாண்டமான குற்றச்சாட்டுகளைக் கூறுகிறார்கள்!’’

தேர்தலுக்காக விட்டுக்கொடுத்தல்கள் தவறு இல்லை!

‘‘ ‘ரெட்டைமலை சீனிவாசன், கக்கன் போன்ற தலைவர்கள் சமூக ஒற்றுமைக்காகப் பாடுபட்டார்கள். ஆனால் திருமாவளவனோ, ‘இந்து சமூகங்களுக்கு இடையே பிளவை ஏற்படுத்துகிறார்’ என்கிறாரே பொன்.ராதாகிருஷ்ணன்?’’

‘‘காங்கிரஸ் அமைச்சரவையில் இருந்தவர், தலைவர் கக்கன். அவருக்கு அம்பேத்கர் - பெரியார் சிந்தனைகள் தொடர்பான தாக்கம் இல்லை. ஆனால், எனக்குள், அம்பேத்கர் - பெரியார் சிந்தனைகள் தாக்கத்தை ஏற்படுத்தியிருக்கின்றன. சனாதன எதிர்ப்பு என்பது அம்பேத்கர் முன்வைத்த அரசியல்தான். மற்றபடி நானாகப் புதிதாக எதையும் கண்டுபிடித்துச் சொல்லவில்லை. எனவே, என்மீது பொன்.ராதாகிருஷ்ணன் வைக்கிற குற்றச்சாட்டு என்பது அம்பேத்கருக்கு எதிராக அவர் வைக்கிற குற்றச்சாட்டு என்றுதான் அர்த்தம்.’’

‘‘ ‘10 சதவிகித இடஒதுக்கீடு என்ற பெயரில் முற்பட்ட சமூகத்தினரையும் பி.ஜே.பி அரசு ஏமாற்றுகிறது’ என்கிறீர்கள். விளக்கமாகச் சொல்ல முடியுமா?”

‘‘நீண்ட காலமாகக் கல்வி மறுக்கப்பட்டு வந்த சமூகங்களுக்கு, சட்டப்படி வாய்ப்பு அளிக்க வேண்டும் என்ற சமூக நீதிக்காகத்தான் இடஒதுக்கீடு கொண்டுவரப்பட்டது. இதன்படி, ஒதுக்கப்பட்டவர்களுக்காக 49 சதவிகித இடஒதுக்கீடு நடைமுறையில் உள்ளது. ஆக, 51 சதவிகித இடஒதுக்கீடு என்பது முற்பட்ட சமூகத்தினருக்காகத்தான் இருக்கிறது. இதிலும்கூட போட்டியிட்டு வரமுடியாதவர்களுக்குப் பொருளாதாரத்தைக் காரணம் காட்டி, சட்டப்படி 10 சதவிகித இடத்தை ஒதுக்கீடு செய்வது திட்டமிட்ட ஏமாற்று வேலை. மேலும், ‘இடஒதுக்கீடு என்பது முற்பட்ட சமூகத்தினருக்கும் உண்டு’ என்றும், ‘பொருளாதார ரீதியாகவும் இடஒதுக்கீடு அளிக்கலாம்’ என்றும் கூறி, அடிப்படை சமூகநீதியையே குழிதோண்டிப் புதைத்திருக்கிறார்கள்.’’

“இந்த இடஒதுக்கீட்டை மார்க்சிஸ்ட் கம்யூனிஸ்ட் கட்சி ஆதரிக்கிறது. இதை எப்படிப் பார்க்கிறீர்கள்?’’

‘‘மார்க்சிஸ்ட் கம்யூனிஸ்ட் கட்சியின் அடிப்படையே பொருளாதாரக் கோட்பாடுதான். எனவே, ஏழைகள் யாராக இருந்தாலும் அவர்களுக்கு உதவுவது தவறல்ல என்கிற அடிப்படையில் ஆதரிக்கிறார்கள். வாக்குவங்கி என்கிற அரசியலைக் கொண்டுவரும் பி.ஜே.பி-யின் தந்திரத்தை, அதே வாக்குவங்கி அரசியல் மூலமாகவே இவர்களும் எதிர்கொள்கிறார்கள். சமூகநீதிக்கு எதிரான இந்தச் செயல்பாட்டில் காங்கிரஸ் மற்றும் கம்யூனிஸ்ட்களுடன் எங்களுக்கு உடன்பாடு இல்லை. ஆனால், பி.ஜே.பி எதிர்ப்பு என்ற நிலைப்பாட்டில் நாங்கள் ஒன்றாகவே நிற்கிறோம்.’’

‘‘உங்களின் இந்த நிலைப்பாடு கூட்டணிக்குத் தலைமை வகிக்கும் தி.மு.க-வுக்கு தர்மசங்கடத்தை ஏற்படுத்தாதா?’’

‘‘தேர்தலுக்கான சில விட்டுக்கொடுத்தல்களைக் கொள்கை நிலைப்பாடுகளாகப் பார்க்கத் தேவையில்லை. பி.ஜே.பி என்ற சனாதன சக்தி வந்துவிடக் கூடாது. அதை வீழ்த்திவிட வேண்டும் என்ற ஒற்றைப்புள்ளியில் தி.மு.க., காங்கிரஸ், கம்யூனிஸ்ட் கட்சிகளுடன் விடுதலைச் சிறுத்தைகளும் ஒன்றுபட்டு நிற்கிறோம். மதச்சார்பற்ற அணிகள் சிதறிவிடக்கூடாது என்பதுதான் முக்கியமே தவிர, சில விட்டுக்கொடுத்தல்கள் தவறு இல்லை.’’

‘‘ஒரே கூட்டணியில் காங்கிரஸும் விடுதலைச் சிறுத்தைகள் கட்சியும் இருக்கின்றன. உங்களுக்குள் இப்போதும் முரண்பாடுகள் உள்ளனவே?’’

‘‘காங்கிரஸ் கட்சிக்கும் எங்களுக்கும் ஈழத் தமிழர் பிரச்னையில் முரண்பாடு உண்டு. ஆனால் இவை இரண்டாம், மூன்றாம் இடத்தில் உள்ள முரண்பாடுகள்தான். இந்தப் பிரச்னைகளும் முரண்பாடுகளும் விரைவில் பின்னுக்குத் தள்ளப்பட்டுவிடும்.’’

‘‘தமிழகத்தில், அ.தி.மு.க - பி.ஜே.பி கூட்டணி அமையாவிட்டால், பி.ஜே.பி-க்கு எதிரான உங்கள் பிரசார நிலைப்பாடு என்னவாகும்?’’

‘‘பி.ஜே.பி., தமிழகத்தில் யாருடன் கூட்டணி சேரப்போகிறது என்பது முக்கியம் அல்ல. மத்தியில் பி.ஜே.பி-யை ஆட்சிக்கு வரவிடாமல் தடுக்க வேண்டுமென்றால், தமிழகத்தில் தி.மு.க தலைமையிலான மதச்சார்பற்ற கூட்டணி 40 தொகுதிகளிலும் வெற்றிபெற வேண்டும். எனவே, அ.தி.மு.க-வுடன் கூட்டணி சேராமல், பி.ஜே.பி தனித்து நின்றாலும்கூட, பி.ஜே.பி-க்கு எதிரான எங்கள் நிலைப்பாட்டில் உறுதியாக நிற்போம்.’’

- த.கதிரவன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு