Published:Updated:

"வார்த்தை தவறிவிட்டார் ராமதாஸ்!" - பா.ம.க-வை விளாசும் முன்னாள் நிர்வாகி

"வார்த்தை தவறிவிட்டார் ராமதாஸ்!" - பா.ம.க-வை விளாசும் முன்னாள் நிர்வாகி
பிரீமியம் ஸ்டோரி
News
"வார்த்தை தவறிவிட்டார் ராமதாஸ்!" - பா.ம.க-வை விளாசும் முன்னாள் நிர்வாகி

"வார்த்தை தவறிவிட்டார் ராமதாஸ்!" - பா.ம.க-வை விளாசும் முன்னாள் நிர்வாகி

அ.தி.மு.க - பா.ம.க கூட்டணி கையெழுத்தானதைத் தொடர்ந்து பா.ம.க-விலிருந்து வெளியேறியிருக்கிறார், அந்தக் கட்சியின் மாநில இளைஞர் அணிச் செயலாளர் ராஜேஸ்வரி பிரியா. பிப்ரவரி 20-ம் தேதி செய்தியாளர்களைச் சந்தித்த இவர், சுமார் ஒரு மணி நேரத்துக்கும் மேலாக ராமதாஸ் மீது கடும் விமர்சனங்களை வைத்தார். அவரை சந்தித்துப் பேசினோம்.

“பா.ம.க-விலிருந்து நீங்கள் வெளியேறியதற்கு உண்மையான காரணம் என்ன?’’

“எட்டு ஆண்டுகள் சிங்கப்பூரில் வசித்துவந்த நான், ‘இந்தியாவிலும் சிங்கப்பூர் போன்ற நேர்மையான அரசியலைக் கொண்டுவர வேண்டும்’ என்ற சேவை நோக்கத்துடன்தான் தாயகம் திரும்பினேன். ‘கொள்கைப் பிடிப்பில்லாத, ஊழல் கட்சிகளான திராவிடக் கட்சிகளை ஒழிப்போம்’ என்று சொல்லிவந்த பா.ம.க-வை நம்பி, அந்தக் கட்சியில் இணைந்தேன். இப்போது, அவர்களும் மற்றக் கட்சிகளைப்போல சொன்ன வார்த்தையைக் காப்பாற்றத் தவறிவிட்டார்களே என்ற விரக்தியில், கட்சியை விட்டு வெளியேறிவிட்டேன். இதுதான் உண்மை!’’

"வார்த்தை தவறிவிட்டார் ராமதாஸ்!" - பா.ம.க-வை விளாசும் முன்னாள் நிர்வாகி

“தேர்தல் அரசியலில், கொள்கை முரண்பாடுகள் கொண்ட கட்சிகள், கூட்டணி அமைப்பது ஒன்றும் புதிதல்லவே?’’

“எனக்கும் அது தெரியும். ஆனால், 2014-ம் ஆண்டிலிருந்தே தனித்திருந்த பா.ம.க., கொள்கைரீதியாக முன்வைத்த திட்டங்கள் என்னைக் கவர்ந்தன. கூடவே திராவிடக் கட்சிகளுடன் கூட்டணி கிடையாது என்று அடித்துப்பேசிய ராமதாஸை நம்பினேன். தமிழக அரசியலில், பா.ம.க ஒரு மாற்றத்தை ஏற்படுத்தும் என்று நம்பித்தான் 2017-ம் ஆண்டு அந்தக் கட்சியில் இணைந்தேன்.’’

“பா.ம.க ஆரம்பிக்கப்பட்டபோது கொடுத்த வாக்குறுதிகளையே பின்னாளில், அந்தக் கட்சியின் தலைமை மீறிவிட்டதாகக் குற்றச்சாட்டு உண்டு. பிறகு எப்படி அந்தக் கட்சியில் சேர்ந்தீர்கள்?’’

“கோடிகளில் ஊழல் செய்துவரும் திராவிடக் கட்சிகளுடன் ஒப்பிடும் போது, கொடுத்த வாக்குறுதிகளை மீறிவிட்டதாக பா.ம.க மீது வைக்கப்படும் குற்றச்சாட்டு எனக்குப் பெரிதாகத் தெரியவில்லை. எல்லாக் கட்சிகளிலுமே குறைகள் இருக்கின்றன. எனவே, குறைந்த அளவிலான குறைகள் கொண்ட கட்சியாகத்தான் அப்போது எனக்குப் பா.ம.க தெரிந்தது. நான் 2016-ம் ஆண்டு இந்தியா திரும்பிய நேரத்தில், நேர்மையான அரசியல் இயக்கத்தை ஆரம்பிக்க வேண்டும் என்று எண்ணியிருந்தேன். அப்போது, ‘இயற்கை விவசாயம்’ சம்பந்தப்பட்ட நிகழ்ச்சியொன்றில், இயக்குநர் தங்கர்பச்சானைச் சந்தித்துப் பேசினேன். அவர்தான், ‘உங்களைப் போன்ற ஆர்வம் கொண்டவர்களைத்தான் பா.ம.க தேடிக்கொண்டிருக்கிறது’ என்றுகூறி அன்புமணி ராமதாஸைச் சந்திக்க அனுமதி வாங்கிக் கொடுத்தார். ஏற்கெனவே, 2016 சட்டமன்றத் தேர்தலில் பா.ம.க கொடுத்த வாக்குறுதிகளும், மருத்துவர் அன்புமணி ராமதாஸ் வண்டலூர் மாநாட்டில் பேசிய பேச்சுகளும் எனக்கு அந்தக் கட்சியின் மீது மிகப்பெரிய நம்பிக்கையை ஏற்படுத்தியது. வெளிநாடுகளில் செயல்படுத்தப்படும் திட்டங்களுக்கு ஈடாக பா.ம.க-வின் கருந்துகளும் இருந்ததால், நம்பி அக்கட்சியில் சேர்ந்தேன்.’’

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
"வார்த்தை தவறிவிட்டார் ராமதாஸ்!" - பா.ம.க-வை விளாசும் முன்னாள் நிர்வாகி

“பா.ம.க-வைச் சேர்ந்தவர்கள்மீதும் ஊழல் குற்றச்சாட்டுகள், வழக்குகள் உள்ளனவே?’’

“எனக்கு 35 வயதுதான் ஆகிறது. அரசியலைப் பொறுத்தவரையில், இது இளமைப் பருவம்தான். வயதாகி அனுபவங்கள் அதிகமாகும்போதுதான் கடந்தகாலத் தவறுகளை எல்லாம் கருத்தில் கொண்டு எந்தவொரு முடிவையும் எடுக்க முடியும். மற்றபடி இப்போதைய என் வயதில், என் முடிவுகள் எல்லாம், ‘இனிமேல் இவர்கள் திருந்திவிடுவார்கள். தவறு செய்யமாட்டார்கள்’ என்ற நேர்மறை சிந்தனை கொண்டதாகத்தான் இருக்கும். அதை நீங்கள் ‘சிறுபிள்ளைத்தனமானது’ என்றுகூட சொல்லலாம்!’’

“கூட்டணி குறித்த பேச்சு வார்த்தையின்போதே, உங்கள் அதிருப்தியைக் கட்சியின் தலைமைக்கு எடுத்துரைத்தீர்களா?’’

“ ‘தேர்தல் வெற்றியைவிட, கொள்கை வெற்றியே உயர்வானது’ என்று ஃபேஸ்புக்கில் பதிவுசெய்திருந்தேன். உடனடியாக அந்தப் பதிவை நீக்கிவிடுமாறு மேலிடத்திலிருந்து உத்தரவு வந்தது. நானும் அப்பதிவை நீக்கிவிட்டேன். அதேபோல், தி.மு.க தலைவர் மு.க.ஸ்டாலின் பற்றி நான் பேசியிருந்த ஒரு வீடியோ பதிவையும் நீக்கச் சொல்லியிருந்தனர். ஆனால், தனிப்பட்ட முறையில் நான் பேசியிருந்த அந்த வீடியோவை மட்டும் நீக்கவில்லை.’’

“நாடாளுமன்றத் தேர்தலில், பா.ம.க யாருடன் கூட்டு வைத்திருக்க வேண்டும் என்று நினைக்கிறீர்கள்?’’

“திராவிடக் கட்சிகள் அல்லாது மற்ற கட்சிகளுடன் கூட்டுச் சேர்ந்திருக்க வேண்டும்.’’

“பி.ஜே.பி., காங்கிரஸ் கட்சிகளுடன் கூட்டணி சேர்வதில், உங்களுக்கு எந்தவிதத் தயக்கமும் இல்லையா?’’

“இவை இரண்டும் தேசியக் கட்சிகள்தான். எனவே, அவற்றுடன் எனக்கு எந்தவித முரணும் இல்லை.’’

“அப்படியென்றால், இப்போது பி.ஜே.பி அங்கம் வகிக்கும் கூட்டணியில்தானே பா.ம.க இணைந்திருக்கிறது?’’

(சிரிக்கிறார்) ‘‘பா.ம.க., பி.ஜே.பி-யுடன் சேர்ந்ததுதான் முரணா அல்லது அ.தி.மு.க-வுடன் இணைந்ததுதான் முரணா... என்று சொல்ல முடியாத மனநிலையில் இருக்கிறேன். தேர்தல் வரப்போகிறது என்ற மனநிலையுடன் எதிர்க் கட்சிகள் மீதான விமர்சனங்களைக் குறைத்துக் கொண்டு பா.ம.க அரசியல் செய்திருந்தால்கூட, இந்தளவு மனது  காயப்பட்டிருக்காது. ‘வீரர்களாக இருங்கள்’ என்றே இதுவரை சொல்லிவந்துவிட்டு, திடீரென இவர்களே கூழைக்கும்பிடு போடுவதைத்தான் ஏற்க முடியவில்லை.”

- த.கதிரவன்
படம்: வெ.நரேஷ்குமார்

திருத்துறைப்பூண்டியைச் சேர்ந்த ராஜேஸ்வரி பிரியாவின் தந்தை கம்யூனிஸ்ட்டாக இருந்து பின்னர் கட்சியைவிட்டு விலகி வழக்கறிஞர் தொழில் செய்துவந்துள்ளார்.

திருமணத்துக்கு முன்பே சிங்கப்பூர் சென்றவர், அங்கு எட்டு ஆண்டுகளாக சிஸ்டம் மேனேஜராகப் பணிபுரிந்துள்ளார். 2016 இறுதியில் சென்னை வந்தவர், கிழக்குக் கடற்கரைச் சாலையில் சூப்பர் மார்க்கெட் நடத்திவருகிறார்.