Published:Updated:

மறுமலர்ச்சி காணுமா ம.தி.மு.க?

மறுமலர்ச்சி காணுமா ம.தி.மு.க?
பிரீமியம் ஸ்டோரி
News
மறுமலர்ச்சி காணுமா ம.தி.மு.க?

தேர்தல் 2019 - இந்த வாரம் ம.தி.மு.க!

நொச்சிப்பட்டி தண்டபாணி... இடிமழை உதயன்... மேலப்பாளையம் ஜஹாங்கீர்... கோவை பாலன்... உப்பிலியாபுரம் வீரப்பன் - ‘மறுமலர்ச்சி திராவிட முன்னேற்றக் கழகம்’ உருவாக உயிர்கொடுத்தவர்கள். வைகோவுக்கு எதிராக நடத்தப்பட்ட வேள்வியில் தீக்குளித்தவர்கள்.  

மறுமலர்ச்சி காணுமா ம.தி.மு.க?

தி.மு.க-வில் போர்வாளாக இருந்த வைகோ, அன்றைய அரசியல் சூழ்நிலையால் தி.மு.க-விலிருந்து பிரிந்து ம.தி.மு.க. உருவாக்கியபோது  அவர் நடத்தி நடைப்பயணம் இளைஞர்களிடையே எழுச்சியை ஏற்படுத்தியிருந்தது. `இது ஓட்டாக மாறுமா?’ என்கிற கேள்விக்கு விடை தந்தது ம.தி.மு.க சந்தித்த முதல் தேர்தல். ஜெயலலிதாவுக்கு எதிராக அலைவீசிக் கொண்டிருந்த 1996 சட்டசபைத் தேர்தலில் மார்க்சிஸ்ட், ஜனதாதளம் கட்சிகளோடு இணைந்து களம் கண்டது. 177 தொகுதிகளில் போட்டியிட்ட ம.தி.மு.க ஒன்றில்கூட ஜெயிக்கவில்லை. மிகுந்த எதிர்பார்ப்பை உண்டாக்கிய ம.தி.மு.க 15.69 லட்சம் ஓட்டுகளைத்தான் வாங்கியது. 5.78 சதவிகித ஆதரவுதான். ஆனால், இப்போது இதில் பாதியளவுகூட ம.தி.மு.க-வுக்குச் செல்வாக்கு இல்லை என்பதுதான் நிஜம்.

‘சரியான சந்தர்ப்பத்தில் தவறான முடிவுகளை எடுக்கக் கூடியவர்’ என்கிற விமர்சனம் வைகோ மீது உண்டு. ஜெயலலிதாவைக் கடுமையாக விமர்சித்த வைகோ, அடுத்த இரண்டே ஆண்டுகளில் நடந்த எம்.பி தேர்தலில் அ.தி.மு.க-வோடு கூட்டணி அமைத்தார். ‘தனித்துப் போட்டியிட்டால் தற்கொலைக்குச் சமம்’ எனத் துல்லியமாகக் கணித்து, 1998 நாடாளுமன்றத் தேர்தலில் கூட்டணிக்குப்  பாதை போட்டார். முதன்முறையாக ‘மக்கள் பிரதிநிதி’ அங்கீகாரம் ம.தி.மு.க.வுக்குக் கிடைத்தது. வாக்கு சதவிகிதம் 6.26  ஆக உயர்ந்தது.

எந்த தி.மு.க-வை எதிர்த்துக் கட்சி தொடங்கினாரோ அதே தி.மு.க-வோடு 1999 நாடாளுமன்றத் தேர்தலில் கூட்டணி வைத்தார் வைகோ. மக்கள் மத்தியில் ம.தி.மு.க-வின் நம்பகத்தன்மை குலைய ஆரம்பித்தது இந்த இடத்திலிருந்துதான். கட்சி தொடங்கியபோது,  “தி.மு.க., அ.தி.மு.க கட்சிகளுக்கு மாற்று ம.தி.மு.க-தான்’’ என முழங்கிய வைகோவின் வார்த்தைகள் அர்த்தம் இழந்தன. அதே கட்சிகளோடு அடுத்தடுத்து கூட்டணி அமைத்தது, வைகோவின் தலைமைப் பண்பையே கேலிப் பொருளாக்கியது. பிளவுக்குப் பிறகு ஆறு ஆண்டுகள் கழித்து, கருணாநிதியைச் சந்தித்தபோது ‘தனிக் குடித்தனம் செய்ய ஆரம்பித்த மகன் தந்தையைப் பார்க்கப் பிறந்த வீட்டுக்கு வருவது போலத்தான் வந்திருக்கிறேன்’ என வியாக்கியானம் கொடுத்தார் வைகோ. ஆறு தொகுதிகளை கருணாநிதியிடம் கேட்டார் வைகோ. வேறு வழியில்லாமல் ஐந்து தொகுதிகளுக்குள் சமரசம் ஆனார்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
மறுமலர்ச்சி காணுமா ம.தி.மு.க?

இந்த உரசல் 2001 சட்டசபைத் தேர்தலில் வெடித்தது. தொகுதிப் பங்கீட்டில் எழுந்த பிரச்னை, கூட்டணியை உடைத்தது. 2 சீட்டுக்காக சண்டை போட்டு, தி.மு.க கூட்டணியிலிருந்து விலகி, தனித்து நின்றார் வைகோ. பி.ஜே.பி போட்டியிட்ட 23 இடங்களைத் தவிர்த்து, 211 தொகுதிகளில் போட்டியிட்ட ம.தி.மு.க., ஒரு தொகுதியில்கூட வெற்றிபெறவில்லை. டெபாசிட்டையே விரல்விட்டு எண்ணக்கூடிய தொகுதிகளில்தான் திரும்பப் பெற்றது. வாக்கு சதவிகிதம் 4.65 ஆகச் சரிந்தது.

1996-2001 ஆட்சி நிறைவடைந்து, 2001 சட்டசபைத் தேர்தலை நம்பிக்கையோடு எதிர்கொண்டது தி.மு.க. ‘தொடரட்டும் இந்தப் பொற்காலம்’ எனப் பிரசாரம் செய்தது. ஜெயலலிதா மீண்டும் தலைதூக்க மாட்டார் எனப் பல தரப்பும் நினைத்தார்கள். ஆனால், நடந்தது வேறு. தமிழகத் தேர்தல் வரலாற்றிலேயே மிகக் குறைந்த தொகுதிகளில் அ.தி.மு.க போட்டி யிட்டது 2001 சட்டசபைத் தேர்தலில்தான். 141 தொகுதிகளில் போட்டியிட்டு, 132 இடங்களைப் பிடித்தது. 27 தொகுதிகளில் தி.மு.க கூட்டணியின் வெற்றியை ம.தி.மு.க பறித்ததால்தான் அ.தி.மு.க மெஜாரிட்டிக்கு நெருக்கத்தில் வர முடிந்தது. தி.மு.க கூட்டணியிலேயே ம.தி.மு.க இருந்திருந்தால் குறைந்தபட்சம் அ.தி.மு.க-வுக்கு மெஜாரிட்டிகூடக் கிடைக்காமல் போயிருக்கலாம். அந்த வகையில் அந்தத் தேர்தல் ம.தி.மு.க-வுக்குச் செல்வாக்கான தேர்தல்தான்.

2001 சட்டசபைத் தேர்தலுக்குப் பிறகு ம.தி.மு.க தனித்துப் போட்டியிடவே இல்லை. அந்தத் தேர்தலில் வாங்கிய ஓட்டுகள்தான் இன்று வரையில் ம.தி.மு.க-வின் அளவுகோலாக இருக்கின்றன. 25 தொகுதிகளில் பத்தாயிரத்துக்கும் அதிகமான ஓட்டுகளும் 14 தொகுதிகளில்  ஐந்தாயிரத்துக்கும் அதிகமான வாக்குகளும் வாங்கியிருந்தது ம.தி.மு.க. இந்தச் செல்வாக்கு எல்லாமே விஜயகாந்த் அரசியல் என்ட்ரிக்குப் பிறகு சரிந்துபோனது.

வைகோ ஆதரித்த பா.ஜ.க அரசு கொண்டுவந்த பொடா சட்டத்தைப் பயன்படுத்தியே வைகோவைச் சிறையில் தள்ளினார் ஜெயலலிதா. ஒன்றரை ஆண்டுகளாகச் சிறையில் இருந்த வைகோ, 2004 நாடாளுமன்றத் தேர்தல் பிரசாரத்தைச் சிறைவாயிலில் தொடங்கினார்.

இரண்டு சீட்டுக்காக 2001 சட்டசபைத் தேர்தலில் தி.மு.க கூட்டணியிலிருந்து முறுக்கிக் கொண்டு வெளியேறிய வைகோ அதே தி.மு.க-வோடு மூன்றாண்டில் கூட்டணி வைத்தார். ‘`திராவிட இயக்கத்தைச் சூழ்ந்து நிற்கும் பகையை வீழ்த்தக் கருணாநிதியோடு சேர்ந்து என் வாளும் சுழலும்’’ என்றார். அந்தப் போர்வாள் தேர்தலில் போட்டியிடாமல் போனது துரதிர்ஷ்டம்.  ``ம.தி.மு.க-வின் இயக்கப் பணிகளை முன்னிலும் முனைப்பாகத் தீவிரப்படுத்த வேண்டும் என்பதற்காகவே தேர்தலில் போட்டியிடவில்லை’’ என்ற வைகோவின் நிலைப்பாடு பலன் அளிக்கவில்லை. ‘`இனி என் வாழ்நாளில் கலைஞரை எதிர்க்க மாட்டேன்’’ என அந்தத் தேர்தலில் திருவாய் மலர்ந்தார். இரண்டு ஆண்டுகள்கூட அது நீடிக்கவில்லை.

அடுத்து வந்த 2006 சட்டசபைத் தேர்தலில் ரிவர்ஸ் கியர் போட்டது ம.தி.மு.க. 25 தொகுதிகள் கேட்டார் வைகோ. 22-க்கு ஓகே என்றார் கருணாநிதி. ‘`துரியோதனன் அமைத்த சக்கர வியூகத்தில் நுழையத் தெரிந்த அபிமன்யுவுக்கு வெளியில் வரத் தெரியவில்லை. ‘வெளியில் வந்துவிடு’ என்று பீமன் சொன்னதுபோல நான் வைகோவை அழைக்கிறேன்’’ என அ.தி.மு.க அவைத் தலைவர் காளிமுத்து சொல்ல... திருச்சியில் தி.மு.க மாநாட்டு நடந்து கொண்டிருந்த நேரத்தில், தி.மு.க கூட்டணியிலிருந்து வெளியேறினார் ‘அபிமன்யு’ வைகோ. 2002-ல் பொடாவில் சிறையானார். 2006-ல் ஜெயலலிதாவுக்கு இரையானார்.

‘`பாசிச வெறி பிடித்த ஜெயலலிதா ஆட்சியை மக்கள் சக்தியைத் திரட்டித் தூக்கியெறிவோம்’’ என, பொடாவில் கைதான அன்று கர்ஜித்த வைகோ, ஜெயலலிதாவோடு கூட்டணி சேர்ந்து, “அ.தி.மு.க-வும், ம.தி.மு.க-வும் ஒரு கொடியில் பூத்த இரு மலர்கள்” என உருகியபோது அவரின் இமேஜ் சிதைந்துபோயிருந்தது.  35 இடங்களில் நின்று ஆறு இடங்களை மட்டுமே கைப்பற்றியது ம.தி.மு.க. இந்தத் தேர்தல்தான் ம.தி.மு.க, சரிவை நோக்கிப் போவதற்குப் பாதை போட்டது. ஆறு ம.தி.மு.க எம்.எல்.ஏ-க்களில் மூன்று பேர் தி.மு.க-வுக்குத் தாவினார்கள்.

2009 நாடாளுமன்றத் தேர்தலில்தான் முதன்முறையாக, தான் இடம்பெற்ற கூட்டணியிலேயே இரண்டாம் முறையாகவும் வைகோ தொடர்ந்தார். அ.தி.மு.க கூட்டணியில் 4 தொகுதியில் போட்டியிட்டு ஒன்றில் மட்டுமே வென்றது ம.தி.மு.க. முந்தைய தேர்தலில் போட்டியிட மறுத்த வைகோ, இம்முறை விருதுநகரில் களமிறங்கினார். காலம் தவறி எடுத்த முடிவு பலன் தரவில்லை. ம.தி.மு.க-வின் ஓட்டு சதவிகிதம் 3.67 ஆகச் சரிந்தது.  

மறுமலர்ச்சி காணுமா ம.தி.மு.க?

தேர்தலுக்குத் தேர்தல் அணி மாறுவது பா.ம.க-வின் வாடிக்கை என்றால், எலக்‌ஷனுக்கு எலக்‌ஷன் எமோஷனல் முடிவு எடுப்பது ம.தி.மு.க-வின் ஸ்டைல். மூன்றாவது முறையாக அ.தி.மு.க கூட்டணியில் 2011 சட்டசபைத் தேர்தலைச் சந்திக்கப்போன ம.தி.மு.க-வுக்கு வைகோவால் வந்தது அடுத்த சோதனை. கேட்ட தொகுதிகளை ஜெயலலிதா கொடுக்கவில்லை என்று சொல்லி, தேர்தலிலும் போட்டியிடாமல், அ.தி.மு.க-வுக்கு எதிர்க்கட்சியான தி.மு.க-வுக்கும் ஆதரவளிக்காமல் தேர்தலையே ஒட்டுமொத்தமாகப் புறக்கணித்தார்.

அடுத்து வந்த 2014 நாடாளுமன்றத் தேர்தலில் மோடியைத் தூக்கிப் பிடித்தார். தே.மு.தி.க - பி.ஜே.பி கூட்டணியில் 7 தொகுதிகளில் நின்றும் எதிலும் ஜெயிக்கவில்லை. 2 தொகுதிகளில் டெபாசிட் இழந்தது. விருதுநகரில் வைகோ தோல்வியைத் தழுவினார். அதன்பின் கடைசியாக நடைபெற்ற 2016 சட்டமன்றத் தேர்தலில் தே.மு.தி.க - மக்கள் நலக் கூட்டணியில் 29 தொகுதிகளில் போட்டியிட்டு ஒன்றில்கூட ஜெயிக்கவில்லை. தேர்தல் ஆணையத்தால் பதிவு பெற்ற மாநிலக் கட்சியாக இருந்த ம.தி.மு.க அந்த அங்கீகாரத்தை இழந்த நிலையில், கடைசியாக நடந்த சட்டசபைத் தேர்தலில் 0.86 சதவிகித வாக்குகள் என்று அதல பாதாளத்தில் விழுந்தது.

இப்படிச் சரிந்துபோயிருக்கும் ம.தி.மு.க இந்த நாடாளுமன்றத் தேர்தலை தி.மு.க தலைமையில் எதிர்கொள்ளப்போகிறது. ம.தி.மு.க-வின் 19-வது பொதுக்குழுவில் பேசிய வைகோ, “இந்தத் தேர்தலுக்குப் பிறகு  தி.மு.க அழிந்துவிடும். அதன்பின் உண்மையான தி.மு.க நாம்தாம். ம.தி.மு.க மறுபிறவி எடுத்து தி.மு.க-வாக மாறும்’’ என்றார். ம.தி.மு.க., தி.மு.க-வாக மாறுமா என்பது தெரியாது. ஆனால், ம.தி.மு.க-வுக்கு மறுபிறவி எடுக்க வேண்டிய நேரம் வந்துவிட்டது.

2006 சட்டசபைத் தேர்தலின் கடைசி நேரத்தில், சீட் பிரச்னையால் தி.மு.க கூட்டணியை விட்டு விலகி ஜெயலலிதாவிடம் ஐக்கியமானார் வைகோ. அந்தத் தேர்தல் முடிவுகள் வெளியாகிக் கொண்டிருந்தபோது நடந்த சம்பவத்தைப் பத்திரிகையாளர்களிடம் சொல்லிக் கொதித்தார் வைகோ. ‘`என்னுடைய அண்ணாநகர் வீட்டுக்கு ஸ்டாலின் மகன் உதயநிதி, மருமகன் சபரீசன் வேதமூர்த்தி ஆகியோர் அடியாட்கள், உருட்டுக் கட்டைகளோடு வந்தனர். வீட்டு முன்பு பட்டாசு கொளுத்தி வெடி போட்டார்கள். அவர்கள் வந்த கார்களின் எண்களைக் குறித்து வைத்திருக்கிறேன். தப்பி ஓடும்போது சபரீசனின் அடையாள அட்டை கீழே விழுந்துவிட்டது’’ எனச் சொல்லி, அதை மீடியாவிடம் காட்டினார் வைகோ. அந்த சபரீசன் கோலோச்சும் தி.மு.க கூட்டணியில்தான் வைகோ இப்போது இடம்பெற்றிருக்கிறார். ஸ்டாலினுக்கு இப்போது சபரீசன்தான் ஆல் இன் ஆல்.

கடந்த சட்டசபைத் தேர்தலில் தி.மு.க-வுடன் ம.தி.மு.க கூட்டணி அமைக்கும் எனக் கிட்டத்தட்ட முடிவான நிலையில், மு.க.தமிழரசு இல்லத் திருமணத்தில் பங்கேற்றார் வைகோ. அங்கே முதல் வரிசையில் அவருக்கு நாற்காலி போடாததும், தமிழிசை சௌந்தரராஜனை முன்னால் பேசச் சொன்னதும் அவமானமாகக் கருதினார் வைகோ. திடீரென மக்கள் நலக் கூட்டணி தேர்தலைச் சந்திக்கும் என்றார்.  கிட்டத்தட்ட தி.மு.க-வின் ஆட்சிக் கனவைப் பறித்தவர் வைகோதான்.

2004 எம்.பி. தேர்தலுக்குப் பிறகு இந்த நாடாளுமன்றத் தேர்தலில்தான் தி.மு.க-வுடன் கூட்டணி சேர்ந்திருக்கிறது ம.தி.மு.க. 2004 எம்.பி. தேர்தலின்போது ம.தி.மு.க-வுக்கு 9 ஆயிரம் கிளைகளும் 35 லட்சம் உறுப்பினர்களும் இருந்தனர். இதில் பெருமளவு சரிவு ஏற்பட்டிருக்கிறது என்பதை தி.மு.க அறிந்து வைத்திருக்கிறது. அதனால் பழைய கூட்டணிகளில் தந்த அளவுக்கான சீட்டுகளை வைகோ எதிர்பார்க்க முடியாது என்பதுதான் நிதர்சனம்.

இந்தத் தேர்தல் ம.தி.மு.க-வுக்கு வாழ்வா, சாவா தேர்தல். சரிந்துவிட்ட வாக்குவங்கியை மீண்டும் எழுப்பித் தக்கவைத்துக்கொள்ளும் அவசியம் வைகோவுக்கு இருக்கிறது. வைகோ ஒரு சிறந்த பேச்சாளர். ஆனால் அவரது பேச்சே பல சமயங்களில் கூட்டணி முறிவுக்கும் அரசியல் சரிவுக்கும் காரணமாகவும் இருந்திருக்கிறது. ம.தி.மு.க-வுக்கு எத்தனை சீட்டுகள் கிடைக்கின்றன, எத்தனை தொகுதிகளில் வெற்றிபெறும், தேர்தல் முடிவுகள் எப்படி இருக்கும் என்பதோடு இந்தக் கூட்டணியிலாவது வைகோ தொடர்ந்து நீடிப்பாரா, சரிந்துவிட்ட செல்வாக்கை மீட்டெடுப்பாரா என்ற கேள்விகள் முக்கியமானவை.

எஸ்.ஏ.எம். பரக்கத் அலி

அங்கீகாரம் வேண்டி..!

ட்டசபைத் தேர்தலில் ஒரு கட்சியின் வேட்பாளர்கள், செல்லத்தக்க மொத்த வாக்குகளில் 6 சதவிகிதத்துக்கும் குறையாமல் ஓட்டுகள் பெறுவதுடன், 2 தொகுதிகளிலாவது வெற்றிபெற்றிருக்க வேண்டும். அல்லது, நாடாளுமன்றத் தேர்தலில், செல்லத்தக்க மொத்த ஓட்டுகளில் 6 சதவிகிதத்துக்குக் குறையாமல் வாக்குகள் பெறுவதுடன், ஒரு தொகுதியிலாவது வெற்றிபெற்றிருக்க வேண்டும். இதற்கும் வாய்ப்பு இல்லையெனில் சட்டமன்றத் தேர்தலில், மொத்தத் தொகுதிகளில் 3 சதவிகித தொகுதிகளிலோ அல்லது 3 தொகுதிகளிலோ வெற்றி பெற்றிருக்க வேண்டும். அல்லது, நாடாளுமன்றத் தேர்தலில் 25 தொகுதிகளுக்கு ஒரு தொகுதி வீதம் வெற்றிபெற்றிருக்க வேண்டும்.

இதுதான் சின்னம் தொடர்பாக உள்ள விதி. ‘அங்கீகரிக்கப்பட்ட மாநிலக் கட்சி’ என்கிற அங்கீகாரத்தை 2010-ல் பறிகொடுத்துவிட்டது ம.தி.மு.க. கட்சி அங்கீகாரமும் பம்பரச் சின்னமும் கிடைக்க வேண்டுமென்றால் இந்தத் தேர்தலில் குறைந்தபட்சம் 6 சதவிகித வாக்குகளை ம.தி.மு.க பெறவேண்டும். அதற்கேற்றவாறு தொகுதிகளில் போட்டியிட்டால்தான் இது சாத்தியம்!

நிர்வாகிகள் கழன்றுபோன கட்சிகளில் முதலிடம்!

வை
கோ எங்கே சறுக்கினார்? தேர்தல்களில் எடுத்த தவறான முடிவுகளால் தொண்டர்களை மட்டுமல்ல, நிர்வாகிகளையும்கூட அவரால் தக்க வைக்க முடியவில்லை. வைகோவுக்காகத் தி.மு.க-வை விட்டு விலகிய பலரும் தாய்க்கட்சிக்கே திரும்ப ஆரம்பித்தார்கள். தமிழகக் கட்சிகளிலேயே அதிகமான தாவல் நடந்த கட்சி ம.தி.மு.க-தான். எல்.கணேசன், செஞ்சி ராமச்சந்திரன், கண்ணப்பன், கலைப்புலி தாணு, நாஞ்சில் சம்பத், கம்பம் ராமகிருஷ்ணன், செல்வராஜ், மாசிலாமணி, சீமா பஷீர், விஜயா தாயன்பன், பாலவாக்கம் சோமு, சபாபதி மோகன், ஜோயல், குமாரி விஜயகுமார், பொன்.முத்துராமலிங்கம், செ.ராமச்சந்திரன், டி.பி.எம். மைதீன்கான், எஸ்.தங்கவேலு, மதுராந்தகம் ஆறுமுகம் கே.எஸ்.ராதாகிருஷ்ணன், சேலம் தாமரைக்கண்ணன் எனப் பெரிய பட்டியல் நீள்கிறது. கடந்த சட்டமன்றத் தேர்தலின்போது 4 மாவட்டச் செயலாளர்கள் ஒரே நாளில் கட்சியை விட்டு விலகி தி.மு.க-வில் தஞ்சமடைந்தனர். இப்படி அடுத்தடுத்து நிர்வாகிகள் கழன்று போனபோது ‘`ஜீவ நதி ஓடும்போது அதில் பல நீர்க்குமிழிகள் தோன்றி மறையும், ம.தி.மு.க ஜீவநதி. விலகுவோர் நீர்க்குமிழிகள்’’ என்றார் வைகோ.

சரிவு தொடங்கிய இடம்!

க்களின் பல்ஸை பல நேரங்களில் தங்கள் வீடுகளிலேயே பார்த்துவிடுவார்கள் பத்திரிகையாளர்கள். அப்படித்தான் 2004 எம்.பி. தேர்தலில் வாக்குச் சாவடிக்குப் போய்விட்டு வந்த என் அம்மாவிடம், ‘`யாருக்கு ஓட்டு போட்டீர்கள்’’ என்றேன். ‘`வைகோ இருக்கிற அணிக்கு’’ என்றார். ‘`எதற்கு?’’ என்றேன். ‘`பொடாவுல 19 மாசம் சிறையில இருந்திருக்காரு. அதனால் ஓட்டு போட்டேன்’’ எனச் சிரித்துக்கொண்டே சொன்னார். அரசியல் ஞானம் இல்லாதவர்களிடமும் வைகோ சம்பாதித்த இந்தப் பெயர் சிதைந்து போனதற்கு காரணம் வைகோவேதான். அடுத்து வந்த 2006 சட்டசபைத் தேர்தலில் அதே கேள்வியைக் கேட்டபோது, ‘`சிறையில் அடச்ச ஜெயலலிதாவிடமே சரணாகதியான வைகோ இருக்கிற கூட்டணிக்கு ஓட்டு போடல’’ என்றார் அம்மா.