Published:Updated:

“அடித்த காற்றில் பறந்து வந்தவர் சுதீஷ்!”

“அடித்த காற்றில் பறந்து வந்தவர் சுதீஷ்!”
பிரீமியம் ஸ்டோரி
“அடித்த காற்றில் பறந்து வந்தவர் சுதீஷ்!”

“அடித்த காற்றில் பறந்து வந்தவர் சுதீஷ்!”

“அடித்த காற்றில் பறந்து வந்தவர் சுதீஷ்!”

“அடித்த காற்றில் பறந்து வந்தவர் சுதீஷ்!”

Published:Updated:
“அடித்த காற்றில் பறந்து வந்தவர் சுதீஷ்!”
பிரீமியம் ஸ்டோரி
“அடித்த காற்றில் பறந்து வந்தவர் சுதீஷ்!”

கொளுத்தும் வெயிலுக்கு ஈடாக நாடாளுமன்றத் தேர்தல் களமும் ‘கூட்டணிக் கணக்குகள், குற்றச்சாட்டுகள், பேச்சுவார்த்தை இழுபறிகள்...’ என அனலடிக்கின்றன.

2016-ம் ஆண்டு சட்டமன்றத் தேர்தலின்போது, ‘பழம் நழுவிப் பாலில் விழும்’ என்று கூட்டணிக்காகக் காத்து நின்ற தி.மு.க-வுக்கு கடுக்காய் கொடுத்துவிட்டுப்போனது தே.மு.தி.க! ஆனால், இந்தமுறை அப்படியே ‘உல்டா.’

‘என்னதான் நடந்தது...’ என்ற கேள்விக்கு விடைதேடி, தி.மு.க முன்னாள் அமைச்சரும் அக்கட்சியின் முன்னணித் தலைவர்களில் ஒருவருமான பொன்முடியைச் சந்தித்துப் பேசினேன்...

“அடித்த காற்றில் பறந்து வந்தவர் சுதீஷ்!”

பொன்முடி

ஒட்டுமொத்த விகடனுக்கும் ஒரே ஷார்ட்கட்!

“தி.மு.க - தே.மு.தி.க கூட்டணிப் பேச்சுவார்த்தை குறித்து துரைமுருகன் தெரிவித்த கருத்துகள் பலத்த சர்ச்சையை ஏற்படுத்தியுள்ளதே?’’

“தி.மு.க-விடம் கூட்டணி பேசிக்கொண்டே அ.தி.மு.க-வில் காரியம் சாதிக்கவேண்டும்; அ.தி.மு.க-வில் பேசிக்கொண்டே தி.மு.க-வில் சாதிக்கவேண்டும் என நினைக்கிறார்கள் தே.மு.தி.க-வினர். இவர்களது நாடகம் எங்களுக்கும் தெளிவாகத் தெரிகிறது.

கூட்டணி குறித்துப் பேசுவதற்கென தி.மு.க அமைத்துள்ள கமிட்டி யிடம் வந்து பேச்சுவார்த்தை நடத்தாமல், அக்கட்சியைச் சேர்ந்த இரண்டு நிர்வாகிகள் துரைமுருகனைச் சந்தித்துப் பேசியிருக்கி றார்கள். அப்போதும்கூட, ‘ஏற்கெனவே எங்கள் கூட்டணியில் தொகுதிப் பங்கீடெல்லாம் முடிந்துவிட்டதே’ என்று உண்மையைத்தானே துரைமுருகன் தெரிவித்திருக்கிறார். இதிலென்ன தவறு இருக்கிறது?’’

“அரசியலில், கட்சிகளுக்கிடையிலான கூட்டணிப் பேச்சுவார்த்தை என்பது இயல்பான விஷயம்தான். ஆனால், அதை வெளிப்படையாகப் பொதுவெளியில் போட்டுடைப்பது அரசியல் நாகரிகம்தானா?’’

“தமிழகத்தைப் பொறுத்தவரை, ஓர் அரசியல் கட்சி, கூட்டணிக்காக தி.மு.க., அ.தி.மு.க என இரு கட்சிகளிடையேயும் பேச்சுவார்த்தை நடத்துவ தென்பது காலம் காலமாக நடைமுறையில் இருந்துவருவதுதான். ஒரு கட்சியுடன் கூட்டணிப் பேச்சு வார்த்தை சரிப்பட்டு வரவில்லையென்றால், அடுத்த கட்சியுடன் பேச்சுவார்த்தையை ஆரம்பிப்பார்கள். ஆனால், ஒரே சமயத்தில் இரு கட்சி களிடமும் ஒரு  கட்சி பேச்சுவார்த்தை நடத்தியதாக எந்த வரலாறும் கிடையாது. 3 மணிக்கு அ.தி.மு.க-வில் பேச்சுவார்த்தை நடத்திக் கொண்டிருக்கும்போது, அதே 3 மணிக்கு தி.மு.க-வுடனும் பேச்சுவார்த்தை நடத்த வருகிறார்கள் என்றால்... நாங்கள் என்ன இளித்தவாயர்களா? இல்லை இதுதான் அரசியல் நாகரிகமா?’’

“ ‘தனிப்பட்ட முறையில், தி.மு.க தலைமை குறித்து துரைமுருகன் என்னிடம் தெரிவித்த கருத்துகளை நான் பொதுவெளியில் சொல்லட்டுமா’ என்று சுதீஷ் கேட்கிறாரே...?’’

“சொல்லச் சொல்லுங்களேன்.... அப்படியெல்லாம் ஒன்றும் கிடையாது. சுதீஷ் பேசுகிற அரசியலுக்கெல்லாம் துரைமுருகனோ அல்லது நாங்களோ பதில் சொல்ல வேண்டும் என்று எந்தக் கட்டாயமும் கிடையாது! எங்கள் கொள்கையைப் பற்றி, தலைமையைப் பற்றி யெல்லாம் பேசுவதற்கு சுதீஷுக்குத் தகுதி இருப்பதாகவே நான் நினைக்கவில்லை. இவரெல்லாம் ஏதோ அடித்தகாற்றில் பறந்துவந்தவர்... அவ்வளவுதான்!’’

“அ.தி.மு.க - பா.ம.க கூட்டணி முரண்பாடான கூட்டணி என்று விமர்சிக்கிறீர்கள். தி.மு.க - ம.தி.மு.க கூட்டணி எப்படிப்பட்டது?’’

“மு.க.ஸ்டாலினை எதிர்த்து ஆரம்பிக்கப்பட்ட கட்சிதான் ம.தி.மு.க. அதை மறுப்பதற்கில்லை. ஆனாலும் அந்தக் காலகட்டத்துக்குப் பிறகு, தி.மு.க-வுடன் கூட்டணி சேர்ந்த ம.தி.மு.க-வினர் மத்திய அமைச்சரவையிலும் அங்கம் வகித்திருக்கிறார்கள். அதன்பிறகு 2016-ம் ஆண்டு தனியாக ‘மக்கள் நலக் கூட்டணி’ என்று ஆரம்பித்துத் தேர்தலைச் சந்தித்தார்கள். இப்போது இந்திய அளவில், மதவாதத்தை ஒழிப்பதற்காக எங்களோடு மறுபடியும் கூட்டணி சேர்ந்திருக்கிறார்கள்... அவ்வளவுதான்! ஆனால், அ.தி.மு.க அரசின் ஊழல்கள் குறித்துப் புத்தகம் எழுதிய பா.ம.க, ஆளுநரைச் சந்தித்து அ.தி.மு.க அரசின் ஊழல்கள் குறித்துப் புகார் மனு கொடுத்த பா.ம.க இப்போது அதே அ.தி.மு.க-வுடன் கூட்டணி சேர்ந்திருப்பது முரண்பாடு இல்லையா?’’

“அடித்த காற்றில் பறந்து வந்தவர் சுதீஷ்!”

“ ‘சிகரம் தொட்ட ஊழல்’ என்ற தலைப்பில், தி.மு.க-வைத் தாக்கி இந்தியக் கம்யூனிஸ்ட் கட்சித் தோழர் தா.பாண்டியன் புத்தகம் எழுதியிருக்கிறார். இந்தியக் கம்யூனிஸ்ட் கட்சியுடன் இப்போது தி.மு.க கூட்டணி வைத்திருக்கிறதே...?’’

‘`எங்கள் கூட்டணிக் கட்சிகளுக்குள் சின்னச் சின்ன வேறுபாடுகள், மனக் கசப்புகள் இருக்கலாம். இவை யெல்லாம் இல்லாமல், எந்தக் கூட்டணியும் உருவாகி விட முடியாது. ஆனாலும் இன்றைய அரசியல் சூழலில், மதவாதத்தை எதிர்க்க வேண்டும் என்ற ஓர் அடிப் படையான கொள்கையோடு நாங்கள் இப்போது ஒன்று சேர்ந்திருக் கிறோம். ஆனால், அ.தி.மு.க - பா.ம.க இடையிலான கூட்டணியில், இப்படியான அடிப்படைக் கொள்கை ஏதேனும் இருக்கிறதா?’’

“குடும்ப ஆட்சி செய்துவரும் தி.மு.க-வுடன் கூட்டணி சேரமாட்டோம் என்று கூறிய இந்திய ஜனநாயகக் கட்சிக்கு தி.மு.க கூட்டணி யில் ஒரு சீட் வழங்கப்பட்டுள்ளதே...?’’

‘’அரசியலுக்குள் வருகிறபோது எல்லோரும் சொல்கிற வழக்கமான பேச்சுதான் இது... இதுநாள் வரையிலும் பா.ஜ.க-வோடு இருந்தவர்கள் இப்போது தி.மு.க-வுக்கு ஆதரவு தருகிறோம் என்கிறார்கள். அதனால் அவருக்கும் ஒரு சீட் கொடுத்திருக்கிறோம்... மற்றபடி கட்சியின் கொள்கையை விட்டுக் கொடுத்துவிட்டு எங்கள் கூட்டணிக்குள் ஐ.ஜே.கே வருகிறதென்றால், இந்தக் கேள்வியை நீங்கள் அவர்களிடம்தான் கேட்கவேண்டும்!’’

“தி.மு.க கூட்டணிக் கட்சிகளை ‘உதய சூரியன்’ சின்னத்தில் போட்டியிடச் சொல்லி வற்புறுத்துகிறீர்களாமே...?’’

‘‘உதயசூரியன் சின்னத்தில் போட்டியிடச்சொல்லிக் கேட்டிருக் கிறோம். அவர்களும் இதுகுறித்து ஆலோசித்து விட்டுச் சொல்வதாகச் சொல்லியிருக்கிறார்கள், அவ்வளவு தான்!’’

“பதிவு பெற்ற அரசியல் கட்சிகள், வேறு ஓர் அரசியல் கட்சியின் சின்னத்தில் போட்டி யிடுவதென்பது, தேர்தல் ஆணைய விதிகளின் படி சட்டச் சிக்கல்களை ஏற்படுத்தாதா?’’

“சி.பி.எம்., சி.பி.ஐ. மற்றும் இந்திய யூனியன் முஸ்லிம் லீக் போன்ற தேசியக் கட்சிகள், சின்ன அங்கீகாரம் பெற்ற கட்சிகள். அவர்களது சின்னத்திலேதான் போட்டியிடவிருக்கின்றனர். சின்ன அங்கீகாரம் பெறாத ம.தி.மு.க மற்றும் விடுதலைச் சிறுத்தைகள் கட்சிகளிடம் தான் உதய சூரியன் சின்னத்தில் போட்டியிடுமாறு நாங்கள் கேட்டிருக்கிறோம்!’’

“அடித்த காற்றில் பறந்து வந்தவர் சுதீஷ்!”

‘’உதய சூரியன் சின்னத்தில் போட்டியிட மறுத்ததால்தான் மனித நேய மக்கள் கட்சிக்கு சீட் ஒதுக்கப்படவில்லையா?’’

“இஸ்லாமியர்களுக்குப் பிரதிநிதித்துவம் கொடுக்கவேண்டும் என்ற அடிப்படையில்தான், இந்திய யூனியன் முஸ்லிம் லீக் கட்சிக்கு ஒரு இடம் கொடுத்துள்ளோம். நாடாளு மன்றத் தேர்தலில் இடங்கள் மிகவும் குறைவு. எனவே இக்கட்டான இந்தச் சூழலை, மனிதநேய மக்கள் கட்சித் தலைவர்களிடம் விளக்கிக் கூறியதோடு அடுத்த தேர்தல்களில் வாய்ப்பு வழங்கப்படும் என்றும் எங்கள் கட்சித் தலைவர் எடுத்துக்கூறியிருக்கிறார். அவர்களும் சமாதானமாகி, தி.மு.க கூட்டணிக்கு ஆதரவு தருவதாகவே கூறியிருக்கிறார்கள். எனவே, சின்னம் தான் பிரச்னை என்பது தவறான செய்தி!’’

“ ‘என்னைப் பார்த்துக் காப்பியடித்துத்தான் தி.மு.க-வினர் கிராம சபைக் கூட்டங்கள் நடத்துகிறார்கள்’ என்று கமலஹாசன் கூறிய கருத்துகள் உண்மைதானே?’’

“கிராம சபைக் கூட்டங்கள் என்பது சேர சோழ பாண்டியர் காலத்திலிருந்தே நடந்துகொண்டிருக்கிறது. கமலஹாசன் ஒன்றும் புதிதாகக் கண்டுபிடித்து விடவில்லை. 

தமிழகத்தில், மு.க.ஸ்டாலின் போகாத கிராமங்கள் ஏதேனும் உண்டா..? கமலஹாசன்தான் ஏதோ ஒரு கிராமத்துக்குப் போய், அங்கேயும் எதிர்பார்த்த அளவு கூட்டம் கூடவில்லை என்றதும், கோபித்துக்கொண்டு திரும்பிவிட்டதாகச் செய்திகள் படித்தேன். ஆக, அரசியலில் சிறுபிள்ளையான கமலஹாசனுக்கெல்லாம் நாங்கள் பதில் சொல்லவேண்டிய அவசியமே இல்லை!’’

“ராகுல்காந்தியைப் பிரதம வேட்பாளராக தி.மு.க முன் மொழிந்தாலும்கூட, மற்ற கட்சிகளிடையே இதுகுறித்து ஒருமித்த கருத்து எழவில்லையே?’’

“2014-ம் ஆண்டு நடைபெற்ற நாடாளுமன்றத் தேர்தலில், யார் பிரதமர் என்ற கேள்விக்கு நாங்களேகூட பதில் சொல்லவில்லைதான். தேர்தல் முடிவுகளுக்குப் பிறகு, ‘பிரதமர் வேட்பாளர் யார் என்று மக்களிடம் எடுத்துச் சொல்லாததே எதிர்க்கட்சிகளின் தோல்விக்குக் காரணம்’ என்று பத்திரிகைகள் செய்திகள் வெளியிட்டன. இந்த முறை ‘ராகுல்காந்திதான் பிரதம வேட்பாளர்’ என்று மு.க.ஸ்டாலின் முன்மொழிந்துவிட்டார். இப்போது ‘ஏன் பிரதமர் வேட்பாளர் யார் என்று சொன்னீர்கள்?’ என்று கேட்கிறீர்கள்.

மத்தியில் அடுத்து காங்கிரஸ் கட்சிதான் ஆட்சிக்கு வரவேண்டும் என்பதில் நாங்கள் உறுதியாக இருக்கிறோம். அதனால்தான், காங்கிரஸ் கட்சியின் தலைவர் ராகுல்காந்தி தான் பிரதமர் வேட்பாளர் என்று தி.மு.க தலைவரும் கூறினார். நாங்கள் கூறியதையே மற்றவர்களும் ஏற்றுக் கொண்டு வருவார்கள் என்றால், எங்களுக்கு வேறுபாடு எதுவும் கிடையாது. அல்லது தேர்தலுக்குப் பிறகு, ராகுல் காந்தியேகூட, ‘நான் பிரதமராகவில்லை’ என்று சொல்லி, அவர்கள் கட்சிக்குள்ளேயே வேறு ஒருவரைத் தேர்வு செய்து ஏற்றுக்கொள்ளலாம் என்று சொன்னால், அதில் எங்களுக்கும் சம்மதம்தான்!’’

“ ‘வேண்டும் மோடி; மீண்டும் மோடி’ என்ற பா.ஜ.க-வின் பலமான பிரசாரத்துக்கு மத்தியில், யாரையும் பிரதம வேட்பாளராகவே முன்னிறுத்த முடியாத எதிர்க்கட்சிகளின் நிலைமையென்பது பின்னடைவுதானே?’’

‘’இது மாநிலத்துக்கு மாநிலம் வேறுபடக்கூடிய ஒன்று. அந்தந்த மாநிலங்களில் இருக்கக்கூடிய அரசியல் சூழ்நிலைகளுக்கேற்ப அவரவர்கள் முடிவு செய்கிறார்கள். தமிழகத்தைப் பொறுத்தவரையில், ‘ராகுல்காந்திதான் பிரதமர் வேட்பாளர்’ என்று அறிவித்திருப்பது எங்களுக்குப் பெரிதாகத் தெம்பூட்டுகிற நிகழ்ச்சியாகத்தான் இருக்கிறது. தமிழக மக்களும் இதை ஏற்றுக்கொண்டிருக்கிறார்கள்!’’ 

- த.கதிரவன்

படங்கள்: பா.காளிமுத்து, ஓவியம்: பிரேம் டாவின்ஸி

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism