Published:Updated:

மோடி செய்ததும் ஊழல்தான்!

மோடி செய்ததும் ஊழல்தான்!
பிரீமியம் ஸ்டோரி
மோடி செய்ததும் ஊழல்தான்!

ஓவியங்கள்: அரஸ்

மோடி செய்ததும் ஊழல்தான்!

ஓவியங்கள்: அரஸ்

Published:Updated:
மோடி செய்ததும் ஊழல்தான்!
பிரீமியம் ஸ்டோரி
மோடி செய்ததும் ஊழல்தான்!

‘ஊழல்’ என்ற வார்த்தைக்கு முழுமையான அர்த்தமாக காங்கிரஸ் கட்சியை உருவகப்படுத்துகிறது பி.ஜே.பி. காங்கிரஸ் தலைவர்களை உதாரணம் காட்டுகிறார் பிரதமர் மோடி. இந்தத் தேர்தலில் காங்கிரஸ் கட்சியின் பிரதான ஆயுதமாக இருப்பது ரஃபேல் விவகாரம். ஆனால், சமீபத்தில் ஒரு பிரசாரக் கூட்டத்தில் பேசிய மோடி, ‘‘கமிஷனை எதிர்பார்த்துதான் ரஃபேல் ஒப்பந்தத்தை காங்கிரஸ் ஆட்சி தாமதம் செய்தது’’ என அதிரடி அணுகுண்டு வீசியிருக்கிறார். மத்தியில் ஆட்சியை விட்டு அகற்றப்பட்டு ஐந்து ஆண்டுகள் கழித்து இந்தத் தேர்தலிலும் காங்கிரஸ் மீதான ஊழல் குற்றச்சாட்டுகளையே உயிர்ப்புடன் வைத்திருக்க முயல்கிறது பி.ஜே.பி.

நேஷனல் ஹெரால்டு டிரஸ்ட்டில் மோசடி செய்ததாக சோனியா குடும்பம் மீது வழக்கு போட்டிருக்கிறார் சுப்ரமணியன் சுவாமி. இந்த வழக்குக்காக சோனியா காந்தியும் ராகுல் காந்தியும் நீதிமன்றப் படியேறிக் கொண்டிருக்கிறார்கள். சோனியாவின் மருமகன் ராபர்ட் வதேரா, பண மோசடி வழக்கில் அமலாக்கத் துறையின் விசாரணை வளையத்தில் இருக்கிறார். ‘வதேராவைக் கைது செய்து விசாரிக்க வேண்டும்’ என நீதிமன்ற அனுமதி கேட்டிருக்கிறது அமலாக்கத் துறை. வதேரா தொடர்பான நில பேர விவகாரங்களைத் தோண்டிக் கொண்டிருக்கிறது சி.பி.ஐ. இந்த விஷயங்களை எல்லாம் சுட்டிக் காட்டி, ‘‘காங்கிரஸ் கட்சியின் குடும்பத் தலைமை இனி தலையெடுக்க முடியாது’’ என பி.ஜே.பி தலைவர்கள் பிரசாரம் செய்து வருகிறார்கள். இன்னொரு பக்கம், காங்கிரஸ் கட்சியின் இரண்டாம் கட்டத் தலைவர்கள் பலர்மீதும் இதேபோன்ற குற்றச்சாட்டுகளும் வழக்குகளும் இருக்கின்றன.

மோடி செய்ததும் ஊழல்தான்!

‘மாற்றம்’ என்ற முழக்கத்தை கடந்த தேர்தலில் முன்னெடுத்த மோடி, இம்முறை ‘வளர்ச்சி’ என்ற கோஷத்தை வைப்பார் என எதிர்பார்க்கப்பட்டது. ஆனால், ‘வளர்ச்சியாக எதை முன்னிறுத்துவது’ என்ற குழப்பம் பி.ஜே.பி தலைவர்களுக்கு இருந்தது. கூடவே, ‘பாசிட்டிவ் பிரசாரங்களைவிட நெகடிவ் பிரசாரங்களே தேர்தல் களத்தில் பலன் தரும்’ என பலரும் சொன்னதால், எதிர்க்கட்சிகள்மீது ஊழல் சேறு வாரி வீசப்படுகிறது.

பதிலுக்கு காங்கிரஸும் இதையே செய்கிறது. ‘‘பிரதமர் மோடி இந்த தேசத்தின் பாதுகாவலர் இல்லை, திருடர்’’ என நேரடியாகவே குற்றம் சாட்டுகிறார் ராகுல் காந்தி. ‘‘ரஃபேல் விவகாரத்தில் மோடியைக் கைது செய்து விசாரிக்க வேண்டும்’’ என முழங்கிப் பரபரப்பு ஏற்படுத்தினார். பண மதிப்பிழப்பு நடவடிக்கையையும் ஒரு மோசடி என்றே ராகுல் வர்ணிக்கிறார். பண மதிப்பிழப்பு நடவடிக்கை நேரத்தில் குஜராத்தில் பிட் காயின் டிஜிட்டல் கரன்சி பரிவர்த்தனை மூலம் 5,000 கோடி ரூபாய் மோசடி செய்ததாக பி.ஜே.பி ஆட்சிமீது குற்றம் சாட்டியது காங்கிரஸ். 

‘பி.ஜே.பி-யின் ஏ டு இஸட் ஊழல்கள்’ என மத்தியிலும், பல்வேறு மாநிலங்களிலும் எழுப்பப்படும் குற்றச்சாட்டுகளை பட்டியல் போட்டு வெளியிட்டது காங்கிரஸ். அதானி மின் ஊழல், பால்கோ ஊழல் என ஆங்கில எழுத்துகள் ஒவ்வொன்றுக்கும் வரிசையாக ஆரம்பிக்கும் இந்த ஊழல் பட்டியலில், மத்தியப் பிரதேச பி.ஜே.பி அரசை வீழ்த்திய வியாபம் ஊழலுக்கும் முக்கியமான இடம் இருக்கிறது.

www.corruptmodi.com
  என்ற பெயரில் இதற்காக இணையதளம் ஒன்றும் துவங்கப்பட்டுள்ளது. இதில் மோடியின் ஊழல் பட்டியலை வைத்து ஒரு மெமரி கேம் விளையாடும் வாய்ப்பையும் தருகிறார்கள்.

2015-ம் ஆண்டு ‘பிரதான் மந்திரி ஃபாசல் பீமா யோஜ்னா’ என்ற பெயரில் பயிர்க் காப்பீட்டுத் திட்டம் ஒன்றை விவசாயிகளுக்காக அறிமுகம் செய்தார் மோடி. இந்தத் திட்டத்தின்படி இயற்கைச் சீற்றங்களின்போது விளைச்சல் இழப்பு ஏற்பட்டால், விவசாயிகளுக்குக் காப்பீட்டு நிறுவனங்கள் இழப்பீடு வழங்கும். ஆனால், நிஜத்தில் அப்படிக் கிடைக்கவில்லை.

இந்தத் திட்டத்தைக் கடுமையாக விமர்சனம் செய்தவர்களில் சிவசேனா தலைவர் உத்தவ் தாக்கரேவும் ஒருவர். ‘‘ரஃபேல் ஊழல் போல பயிர்க் காப்பீட்டுத் திட்டமும் பெரிய ஊழல். ஆயிரக்கணக்கான கோடி ரூபாய் மோசடி இதில் நடந்துள்ளது. ஆயிரக்கணக்கில் இழப்பை சந்தித்த விவசாயிகளுக்கு வெறும் இரண்டு ரூபாய், ஐந்து ரூபாய், ஐம்பது ரூபாய் என்று இழப்பீடு கொடுத்திருக்கிறார்கள்’’ என்று இந்த ஜனவரியில்தான் ஒரு பொதுக்கூட்டத்தில் பேசினார்.

ஊழல் என்பது நேரடியாக பண மோசடி மற்றும் முறைகேடுகளில் ஈடுபடுவது மட்டுமா? நன்றாக இயங்கிக்கொண்டிருக்கும், பலருக்கு வேலைவாய்ப்பு அளித்துக்கொண்டிருக்கும் ஓர் அமைப்பை சிதைக்கும் செயலை எதில் வகைப்படுத்துவது? சுதேசிக்கொள்கையை வலியுறுத்தும் ஆர்.எஸ்.எஸ் அமைப்பில் பணிபுரிந்த பின்னணியுள்ள பிரதமர் மோடி, ‘மேக் இன் இந்தியா’ என்ற முழக்கத்தைச் சொன்னபோது, மத்திய மற்றும் மாநில அரசுகளின் கீழ் இயங்கும் பொதுத்துறை நிறுவனங்கள் வளம் பெறும் என பலரும் நம்பினார்கள். ஆனால், கார்ப்பரேட் நிறுவனங்களுக்காகப் பொதுத்துறை நிறுவனங்களைக் காவு கொடுக்கும் போக்குதான் தொடர்கிறது. மூன்று உதாரணங்கள் இதில் முக்கியமானவை.

ஒட்டுமொத்த விகடனுக்கும் ஒரே ஷார்ட்கட்!

மோடி செய்ததும் ஊழல்தான்!

• சமீபத்தில் ‘ஒரு முக்கியமான அறிவிப்பை வெளியிடப் போகிறேன்’ என தேசத்தையே பிரதமர் மோடி ஸ்தம்பிக்க வைத்தார். அதன்பின், ‘‘செயற்கைக்கோளைச் சுட்டு வீழ்த்தும் தொழில்நுட்பத்தை இந்தியா அடைந்து விட்டது. விண்வெளியில் பறந்த ஒரு செயற்கைக்கோளை இந்திய ஏவுகணை சுட்டு வீழ்த்தியது’’ என்று ‘மிஷன் சக்தி’ திட்டத்தின் வெற்றியை அறிவித்தார். அமெரிக்கா, ரஷ்யா, சீனா ஆகிய நாடுகளுடன் இந்தியாவையும் விண்வெளி வல்லரசுப் பட்டியலில் இணைக்கக் காரணமாக இருந்த இந்த சாதனையைப் புரிந்தது டி.ஆர்.டி.ஓ என்கிற பாதுகாப்பு ஆராய்ச்சி மற்றும் வளர்ச்சி அமைப்பு.

மத்திய அரசின் பாதுகாப்புத் துறையின்கீழ் இயங்கும் டி.ஆர்.டி.ஓ., இந்தியாவில் ராணுவ ஆராய்ச்சிகளைச் செய்யும், ஆயுதங்களை உருவாக்கும் மிக முக்கியமான நிறுவனம். உலகின் மிக வேகமான ஏவுகணையாகக் கருதப்படும் பிரமோஸ் ஏவுகணையை ரஷ்யக் கூட்டு முயற்சியுடன் உருவாக்கியது இந்த நிறுவனம்தான்.

ஆனால், இந்த நிறுவனத்துக்கான பட்ஜெட் ஒதுக்கீடு கடந்த சில ஆண்டுகளாகத் தொடர்ந்து குறைக்கப்படுகிறது. 2015-16 நிதியாண்டில் ரூ.14,358 கோடி தருவதாகச் சொன்ன மத்திய அரசு, அதில் சுமார் 2,000 கோடி ரூபாயைப் பிறகு குறைத்துக்கொண்டது. 2016-17 நிதியாண்டில் ரூ.18,782 கோடி கேட்டது டி.ஆர்.டி.ஓ. ஆனால், மத்திய அரசு கொடுத்தது ரூ.13,593 கோடி மட்டுமே! பாதுகாப்புத் துறைக்கான நாடாளுமன்ற நிலைக்குழு கடந்த 2018 ஜூலையில் இதற்கு எதிர்ப்பு தெரிவித்தது. ‘இப்படி பட்ஜெட்டைக் குறைப்பதால் எதிர்காலத் தொழில்நுட்பத்தைப் பெறுவதற்கான பல ஆராய்ச்சிகள் நிறுத்தி வைக்கப்பட்டுள்ளன’ என அது குற்றம் சாட்டியது. ஆனாலும், நிலைமை மாறவில்லை. இந்த சூழலில்தான் டி.ஆர்.டி.ஓ ‘மிஷன் சக்தி’ திட்டத்தை சாதித்துள்ளது.  

ராணுவ டாங்கிகளை தாக்கி அழிக்கும் ஏவுகணையை வெற்றிகரமாக சோதனை செய்து பார்த்துள்ளது டி.ஆர்.டி.ஓ. ஆனால், கிட்டத்தட்ட இதே தரமுள்ள ‘ஸ்பைக்’ என்ற ஏவுகணையை இந்தியாவுக்கு விற்க சில ஆண்டுகளாகவே முயற்சி செய்து வருகிறது இஸ்ரேல். அந்த நாட்டு அரசு நிறுவனமான இஸ்ரேல் ஏரோஸ்பேஸ் இண்டஸ்ட்ரீஸின் தயாரிப்பு இது. ‘அதை வாங்க வேண்டாம். நாமே தயாரித்துக்கொள்ளலாம்’ என டி.ஆர்.டி.ஓ இரண்டு ஆண்டுகளுக்கு முன்பே தெரிவித்தது.

ஆனால், சில மாதங்களுக்கு முன்பு ஐதராபாத்தைச் சேர்ந்த கல்யாணி ஸ்ட்ராடெஜிக் சிஸ்டம்ஸ் லிமிடெட் என்ற கார்ப்பரேட் நிறுவனத்துடன் இணைந்து இங்கு தொழிற்சாலை உருவாக்க ஒப்பந்தம் போட்டிருக்கிறது இஸ்ரேல். எனவே, டி.ஆர்.டி.ஓ அமைப்பைப் புறக்கணித்துவிட்டு இந்த இஸ்ரேல் - கார்ப்பரேட் கூட்டணிக்கு ஒப்பந்தம் போகக்கூடும்.

• ரஃபேல் விவகாரத்தில் புறக்கணிக்கப்பட்ட இந்துஸ்தான் ஏரோநாட்டிக்ஸ் லிமிடெட் (ஹெச்.ஏ.எல்) பற்றி நிறையவே பேசப்பட்டுவிட்டது. முந்தைய காங்கிரஸ் ஆட்சியில் 126 ரஃபேல் விமானங்கள் வாங்க பேச்சுவார்த்தை நடந்தபோது, அவற்றில் 108 விமானங்களை ஹெச்.ஏ.எல் தயாரிக்கும் என விதி இருந்தது. மோடி ஆட்சியில் 36 விமானங்கள் மட்டுமே வாங்குவதாக ஒப்பந்தம் போட்டபோது, அது மாறிவிட்டது. ரஃபேல் விமானத்தைத் தயாரிக்கும் பிரான்ஸின் டஸோ ஏவியேஷனுக்கு இந்தியக் கூட்டு நிறுவனமாக அனில் அம்பானியின் ரிலையன்ஸ் டிஃபன்ஸ் நிறுவனம் ஆக்கப்பட்டது.

இந்த ஒப்பந்தம் உருவானபோது பிரான்ஸ் மக்களுக்கு பெரும் ஏமாற்றம். அப்போது பிரான்ஸ் அதிபர் ஃபிராங்கோய்ஸ் ஹாலந்தே சொன்ன ஒரு விஷயம் முக்கியமானது. ‘‘முந்தைய விதிகளின்படி 126 விமானங்களை விற்றாலும், அதில் பெரும்பாலான வேலைவாய்ப்பு இந்தியாவுக்கே கிடைத்திருக்கும். இப்போது நாம் விற்பது 36 விமானங்கள்தான் என்றாலும், பிரான்ஸ் மக்களுக்கு அதிக வேலைவாய்ப்பு கிடைக்கும்’’ என்றார் அவர். ‘மேக் இன் இந்தியா’ முழக்கத்தின்மீது இதைவிட அதிகமாக யாராலும் கரி பூசி இருக்க முடியாது.

மத்திய அரசின் நிறுவனமான ஹெச்.ஏ.எல்., இந்த ரஃபேல் ஒப்பந்தத்தை இழந்தது. ரஷ்யாவுடன் இணைந்து ஐந்தாம் தலைமுறை போர் விமானங்கள் தயாரிக்கும் வாய்ப்பையும் மத்திய அரசு இதற்குத் தர மறுத்துவிட்டது. இப்படி இரண்டு பெரிய ஆர்டர்கள் ரத்தானதால், ஹெச்.ஏ.எல் நிறுவனத்தின் விமானத் தயாரிப்புப் பிரிவு முடங்கிப் போயிருக்கிறது. ஹெலிகாப்டர் பிரிவில் மட்டும் சில பணிகள் நடக்கின்றன.

மிக், ஜாகுவார், ஹாக், சுகோய் என இந்திய விமானப்படைக்கு வெளிநாடுகளில் வாங்கப்படும் விமானங்களை உருவாக்குவது, பராமரிப்பது, புதுப்பிப்பது போன்ற பணிகளை ஹெச்.ஏ.எல் மட்டுமே இதுவரை செய்து வந்தது. சமீபத்தில் பாகிஸ்தானில் தீவிரவாத முகாம்களை அழிக்கச் சென்ற இந்திய விமானப்படை விமானங்கள் அனைத்தும் ஹெச்.ஏ.எல் பராமரித்துக் கொடுத்த செல்லக்குழந்தைகள்தான். ஆனால், ஹெச்.ஏ.எல் நிறுவனத்தின் மீதும் சர்ஜிகல் ஸ்ட்ரைக் நிகழ்த்தி வருகிறது மத்திய அரசு.

இந்த ஜனவரி மாதம் தங்கள் ஊழியர்களுக்கு சம்பளம் கொடுக்க ஹெச்.ஏ.எல் நிறுவனத்திடம் நிதி இல்லை. ஆயிரம் கோடி ரூபாயைக் கடன் வாங்கி, ஊழியர்களுக்கு சம்பளம் கொடுத்தது ஹெச்.ஏ.எல் நிர்வாகம்.

இந்த நிறுவனம் ஒன்றும் நஷ்டத்தில் இயங்கவில்லை. இந்திய ராணுவத்துக்கும், விமானப் படைக்கும் ஹெலிகாப்டர்கள் மற்றும் விமானங்கள் சப்ளை செய்ததற்கு நிறைய பணம் வர வேண்டும். அவை பணம் தர மறுக்கின்றன. காரணம், மத்திய அரசு நிதி ஒதுக்கவில்லை என்பதுதான். இன்னொரு பக்கம், ஹெச்.ஏ.எல் நிறுவனத்தின் பங்குகளை விற்றும், லாபத்தில் டிவிடென்ட் கேட்டும் கடந்த ஐந்து ஆண்டுகளில் சுமார் 11,500 கோடி ரூபாயைப் பெற்றிருக்கிறது மத்திய அரசு. ‘இப்படி எல்லா வழிகளிலும் கிடுக்கிப்பிடி போட்டு ஹெச்.ஏ.எல் நிறுவனத்தை முடக்குவதால் யாருக்கு லாபம்’ என்பதைக் கண்டுபிடிக்க ராக்கெட் சயின்ஸ் படித்திருக்க வேண்டிய அவசியமில்லை.  

மோடி செய்ததும் ஊழல்தான்!

• பி.எஸ்.என்.எல் நிறுவனத்துக்கு நேர்ந்த கதி இன்னொரு துயரம். தங்கள் 1.7 லட்சம் ஊழியர்களுக்கு சம்பளம் தருவதற்கு அந்த நிறுவனத்திடம் நிதி இல்லை. மூன்று வார தாமதத்துக்குப் பிறகு சம்பளம் வழங்கப்பட்டது. ஒருகாலத்தில் தனிக்காட்டு ராஜாவாக கோலோச்சிக் கொண்டிருந்த நிறுவனம் இது. 2014-ம் ஆண்டு பி.ஜே.பி ஆட்சிக்கு வந்தபோது ரூ.8,000 கோடி நஷ்டத்தில் இயங்கியது பி.எஸ்.என்.எல். கார்ப்பரேட் செல்போன் நிறுவனங்க ளுடன் போட்டி போட இதனால் முடியவில்லை. 2016-ம் ஆண்டு அப்போதைய மத்திய தொலைத்தொடர்புத் துறை அமைச்சர் ரவிசங்கர் பிரசாத், ‘‘இன்னும் நான்கு ஆண்டுகளில் பி.எஸ்.என்.எல். லாபத்தில் இயங்கும்’’ என்றார். ஆனால், நஷ்டம்தான் அதிகமானது. 4ஜி வசதி இல்லாத பி.எஸ்.என்.எல் செல்போன் சேவையை பெற பலரும் தயாராக இல்லை. ரிலையன்ஸ் ஜியோ நிறுவனத்தால் இந்தியாவில் கடன் வாங்கி களைத்துப் போய் ஜப்பான் வரை சென்று கடன் வாங்க முடிகிறது. ஆனால், பி.எஸ்.என்.எல் நிறுவனத்தின் 4ஜி சேவை விஷயத்தில் மத்திய அரசும் ஆர்வம் காட்டவில்லை. தொலைத்தொடர்பு ஒழுங்குமுறை ஆணையமும் அலட்சியம் காட்டுகிறது.

இதுபோன்ற பொதுத்துறை நிறுவனங்கள்தான் இந்தியாவின் நம்பிக்கைகள். ‘மேக் இன் இந்தியா’ திட்டத்தின் ஆணிவேர்கள். பல லட்சம் இந்தியர்களுக்கு வேலைவாய்ப்பு அளிக்கும் வலிமையுள்ள அமைப்புகள். இவற்றை சிதைப்பது, பலரின் நம்பிக்கையை சிதைக்கும் செயல். இவற்றின் வீழ்ச்சியில் உருவாக்கப்படும் கார்ப்பரேட் அமைப்புகள் என்ன மாதிரி வேலைவாய்ப்புகளை வழங்குகின்றன? எப்படிப்பட்ட நம்பிக்கையை நம் இளைய தலைமுறைக்கு ஏற்படுத்துகின்றன?

‘‘கான்ட்ராக்ட் தொழிலாளர்கள் என்ற நவீன கொத்தடிமை முறையை மோடி அரசு உருவாக்குகிறது’’ என கொதித்து எழுந்து கடந்த செப்டம்பரில் போராட்ட அறிவிப்பு செய்தது கம்யூனிஸ்ட் தொழிற்சங்கங்கள் அல்ல; ஆளும் பாரதிய ஜனதா கட்சியைப் பின்னிருந்து இயக்கும் ஆர்.எஸ்.எஸ் அமைப்பின் தொழிற்சங்கமான பாரதிய மஸ்தூர் சங்கம்.

ஜவுளித் தொழிலில் மட்டும் இருந்த ஒப்பந்தத் தொழிலாளர் முறை அனைத்துத் துறைகளுக்கும் விரிவுபடுத்தப்படுவதாக கடந்த 2018 பட்ஜெட் உரையில் மத்திய நிதி அமைச்சர் அருண் ஜெட்லி அறிவித்தார். இதைத் தொடர்ந்து தொழில் நிறுவனச் சட்டம் திருத்தப்பட்டது.

‘‘இதனால் தொழில் துறையில் நிரந்தர வேலை என்பது கானல் நீராகி விட்டது. தனியார் நிறுவனங்கள் மட்டுமின்றி, அரசின் பொதுத்துறை நிறுவனங்களும் நிரந்தர ஊழியர்களை வேலைக்கு எடுப்பதை நிறுத்திவிட்டு கான்ட்ராக்ட் ஊழியர்களையே நியமனம் செய்கின்றன. தற்போது எல்லா நியமனங்களிலும் 67 சதவிகிதம் ஒப்பந்த ஊழியர்கள்தான். இன்னும் சில ஆண்டுகளில் எல்லா நிறுவனங்களிலும் ஒப்பந்த ஊழியர்களே இருப்பார்கள்.

ஒப்பந்தத் தொழிலாளர்களை நிறுவனங்கள் கசக்கிப் பிழிகின்றன. சித்திரவதைக்கு ஆளாக்குகின்றன. நிரந்தர ஊழியர்களுக்குத் தருவதில் பாதிக்கும் குறைவாகவே சம்பளம் தருகிறார்கள். விடுமுறை, மருத்துவ வசதி, கிராஜுவிட்டி போன்ற எதுவுமே கிடையாது. நிறுவனம் நினைத்தால் எப்போது வேண்டுமானாலும் ஒப்பந்தத்தை ரத்து செய்துவிட்டு, ஓர் ஊழியரை வேலையை விட்டுத் துரத்தலாம். பலரும் துரத்தப்படுகிறார்கள். பலர் வேலையை விட்டுவிட்டும் ஓடுகிறார்கள். இந்தியாவை உலுக்கும் வேலையில்லாத் திண்டாட்டத்துக்கு இதுதான் காரணம். ஐரோப்பிய நாடுகளில் இதுபோன்ற சட்டங்கள் வேலையில்லா திண்டாட்டத்தையே அதிகரித்துள்ளன’’ என்கிறார் பாரதிய மஸ்தூர் சங்கத்தின் தலைவர் சஜி நாராயணன்.

இந்தியாவின் வேலையில்லா திண்டாட்டம் பற்றி சமீப நாட்களில் நான்கு வெவ்வேறு அறிக்கைகள் வெளியாகின. அவை அனைத்தும் வெவ்வேறு புள்ளிவிவரங்களைக் கொடுத்து குழப்பின. ஆனால், ‘‘ரயில்வேயில் 90 ஆயிரம் வேலைகளுக்கு இரண்டரை கோடி பேர் விண்ணப்பம் செய்கிறார்கள். இளைஞர்கள் வேலைக்கான ஏக்கத்துடன் உள்ளனர் என்ற நிலவரத்தை இது உணர்த்துகிறது. அரசு வேலைதான் பாதுகாப்பானது என்ற நினைப்பு இளைஞர்களுக்கு வந்திருக்கிறது’’ என ரிசர்வ் வங்கியின் முன்னாள் கவர்னர் ரகுராம் ராஜன் சொல்கிறார்.

அரசு வேலைகளையும் பாதுகாப்பற்றவையாக மாற்றி, கார்ப்பரேட் வேலைகளையும் கான்ட்ராக்ட் முறைக்கு மாற்றி, ஒட்டுமொத்தமாக இளைய தலைமுறையின் நம்பிக்கையை சிதைப்பதைவிட பெரிய ஊழல் ஏதாவது இருக்கிறதா?

-தி.முருகன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism