Published:Updated:

பா.ம.க-வுக்குப் பாதகமான 3 தொகுதிகள்! - உளவுத்துறை அறிக்கையை சுட்டிக்காட்டிய அ.தி.மு.க

ஆ.விஜயானந்த்

கடலூர் தொகுதிக்கு முன்னிறுத்தப்படும் கோவிந்தசாமிக்கு உள்கட்சிக்குள்ளும் பெரிய அளவுக்கு ஆதரவு இல்லாததால், எதிர்க்கட்சிகள் வெற்றி பெறக்கூடிய சூழல் எளிதாகும் எனத் தெரிவித்துள்ளனர்.

பா.ம.க-வுக்குப் பாதகமான 3 தொகுதிகள்! - உளவுத்துறை அறிக்கையை சுட்டிக்காட்டிய அ.தி.மு.க
பா.ம.க-வுக்குப் பாதகமான 3 தொகுதிகள்! - உளவுத்துறை அறிக்கையை சுட்டிக்காட்டிய அ.தி.மு.க

தே.மு.தி.க பொதுச் செயலாளர் விஜயகாந்த்தை இன்று நேரில் சந்தித்துப் பேசியிருக்கிறார் பா.ம.க நிறுவனர் மருத்துவர் ராமதாஸ். `இரண்டு கட்சிகளின் வாக்குகளும் பரஸ்பரம் பரிமாறிக்கொள்வதில் சில பிரச்னைகள் இருந்தன. அவற்றைக் களைவதற்காகவே மருத்துவர் வந்தார். பா.ம.க போட்டியிடும் 7 தொகுதிகளுக்கான வேட்பாளர்கள் பட்டியலிலும் சில குழப்பங்கள் நிலவி வருகின்றன' என்கின்றனர் பா.ம.க வட்டாரத்தில். 

நாடாளுமன்றத் தேர்தல் தேதி நெருங்கிக்கொண்டிருப்பதால், மாநிலக் கட்சிகளும் தேசியக் கட்சிகளும் பிரசாரத்தைத் தொடங்கிவிட்டன. தி.மு.க கூட்டணியில் போட்டியிடக்கூடிய கட்சிகளுக்கான தொகுதிப் பட்டியலை விரைவில் வெளியிட இருக்கிறார் ஸ்டாலின். அ.தி.மு.க தரப்பிலும், `எந்தக் கட்சிக்கு எந்தத் தொகுதிகள்?' என்பது குறித்த அதிகாரபூர்வ பட்டியல் வெளியாகவில்லை. இந்தநிலையில், `அ.தி.மு.க கூட்டணியில் பா.ம.க-வும் தே.மு.தி.க-வும் இணக்கமாக நடந்துகொள்வதற்கு வாய்ப்பில்லை, இதற்குக் கடந்த 2014 மக்களவைத் தேர்தலே சாட்சி' என்பன போன்ற தகவல்கள் வெளியாகின. இந்தத் தகவல்களை முறியடிக்கும் வகையில் இன்று விருகம்பாக்கத்தில் உள்ள விஜயகாந்த் வீட்டுக்குச் சென்றார் ராமதாஸ். இந்தச் சந்திப்புக்குப் பிறகு பேட்டி கொடுத்த ராமதாஸ், ``விஜயகாந்த்தின் உடல்நலம் குறித்து விசாரிக்கவே இங்கு வந்தோம். சந்திப்பு நல்லபடியாகவே முடிந்தது. தொகுதிப் பங்கீடு தொடர்பாக எந்தப் பேச்சுவார்த்தையும் நடைபெறவில்லை. பொதுவாக, அனைத்துத் தேர்தலின்போதும் தொகுதிகள் ஒதுக்குவதில் காலதாமதம் ஏற்படும். தற்போதும் அந்தத் தாமதம்தான் எங்கள் கூட்டணியிலும் நிலவுகிறது. தே.மு.தி.க போட்டியிடும் தொகுதிகளில் அவர்களுக்கு ஆதரவாக நாங்கள் பிரசாரம் செய்வோம்’ என்றார். ஆனால், `இந்தச் சந்திப்பின் மூலம் வடக்கு மண்டலங்களில் உள்ள தே.மு.தி.க வாக்குகளைப் பா.ம.க-வுக்கு கொண்டு வரும் முயற்சியாகவே இந்தச் சந்திப்பு நடந்தது’ என்கின்றனர் அரசியல் வட்டாரத்தில். 

அதேசமயம், ராமதாஸின் பேட்டி மூலம் பா.ம.க - தே.மு.தி.க இடையே நிலவிவந்த கசப்பு உணர்வுகள் ஓரளவு தீர்க்கப்பட்டுவிட்டதாகக் கருதுகின்றனர் இரு கட்சிகளின் நிர்வாகிகளும். ``இந்தச் சந்திப்புகள் ஒருபுறம் இருந்தாலும், பா.ம.க போட்டியிடக்கூடிய 7 தொகுதிகளில் யாருக்கெல்லாம் சீட் என்பதில் இப்போதே  முட்டல் மோதல்கள் தொடங்கிவிட்டன’’ என விவரித்த பா.ம.க நிர்வாகிகள் சிலர், ``அ.தி.மு.க கூட்டணியில் ஒதுக்கப்பட்டுள்ள 7 தொகுதிகளில் எவையெல்லாம் வெற்றி பெறக்கூடிய தொகுதிகள், பாதகமாக இருக்கக்கூடிய தொகுதிகள் எவை என்பது குறித்து உளவுத்துறை தரப்பில் ஆய்வு நடத்தப்பட்டுள்ளது. அதன் அடிப்படையில் கிடைத்த தகவல்களை வைத்துக்கொண்டு, கட்சித் தலைமை ஆலோசனை நடத்தி வருகிறது. இந்தமுறை மருத்துவர் அன்புமணி ராமதாஸ் களத்தில் இறங்காவிட்டால் அவரின் மனைவி சௌமியாவை முன்னிறுத்தத் திட்டமிட்டுள்ளனர். முன்னாள் மத்திய அமைச்சர் ஏ.கே.மூர்த்தி, விழுப்புரம் (தனி) தொகுதியில் போட்டியிட உள்ள வடிவேல் ராவணன் ஆகியோர் வெற்றி பெறுவதற்கான வாய்ப்புகள் அதிகம் உள்ளன எனக் குறிப்பிட்டு, வெற்றிவாய்ப்பு மிகவும் குறைவாக உள்ள 3 தொகுதிகளையும் ஆளும்கட்சி தரப்பில் பட்டியலிட்டுள்ளனர். 

பா.ம.க சார்பில் மத்திய சென்னை தொகுதியில் போட்டியிடலாம் எனக் கூறப்படும் சாம் பால், திண்டுக்கல் தொகுதிக்கு என முடிவு செய்யப்பட்டுள்ள வேட்பாளர் திலகபாமா, கடலூர் தொகுதியில் போட்டியிடத் தேர்வான கோவிந்தசாமி ஆகியோரது தொகுதிகளில் எதிர்பார்த்த வெற்றி கிடைப்பது கடினம் என்கின்றனர். இந்த 3 தொகுதிகளும் பா.ம.க-வுக்கு பாதகமாக அமையலாம் எனவும் அ.தி.மு.க தரப்பில் இருந்து தெரிவிக்கப்பட்டுள்ளது. குறிப்பாக, கடலூர் தொகுதிக்கு முன்னிறுத்தப்படும் கோவிந்தசாமிக்கு உட்கட்சிக்குள்ளும் பெரிய அளவுக்கு ஆதரவு இல்லாததால், எதிர்க்கட்சிகள் வெற்றி பெறக்கூடிய சூழல் எளிதாகும் எனத் தெரிவித்துள்ளனர். இதற்கான காரணமாக முன்வைப்பது ஒன்றைத்தான்.

அடிப்படையில் மருத்துவராக இருக்கும் கோவிந்தசாமி, பண்ருட்டி பகுதியில் வன்னியர் சங்கம் வேர்விட்ட காலத்திலிருந்தே ராமதாஸுடன் இணைந்து ஒன்றாகச் செயல்பட்டு வருகிறார். மருத்துவராகவும் இருப்பதால் அவரையே வேட்பாளராக்கலாம் எனப் பா.ம.க தலைமை முடிவெடுத்துள்ளது. இதே தகுதியுடன் கடந்த 2001-ம் ஆண்டு நடந்த சட்டமன்றத் தேர்தலில் விருத்தாசலம் தொகுதியின் வேட்பாளராக நிறுத்தப்பட்டார். இவரை எதிர்த்துக் களமிறங்கிய விஜயகாந்த் வெற்றி பெற்றார். இதன்பின்னர், 2016-ம் ஆண்டு நடந்த சட்டமன்றத் தேர்தலில் பா.ம.க தனித்து நின்றபோது, `விருத்தாசலம் தொகுதியில் போட்டியிடுவது குடும்பத்தோடு தற்கொலை செய்வதற்கு சமமானது' என விமர்சனம் செய்துவிட்டு போட்டியில் இருந்தும் பின்வாங்கிவிட்டார் கோவிந்தசாமி. இதனால் பா.ம.க தொண்டர்களே அதிருப்தியில் உள்ளனர். 

வன்னிய வாக்குகள் நிறைந்துள்ள கடலூர் தொகுதியில், சொந்த சமூக மக்களிடம்கூட அவருக்கு நல்ல பெயர் இல்லை எனக் கட்சிக்காரர்களே புலம்புகின்றனர். அதுமட்டும் அல்லாமல், தி.மு.க முன்னாள் அமைச்சர் எம்.ஆர்.கே.பன்னீர்செல்வத்திடமும் அவர் நட்பில் இருக்கிறார் எனக் கட்சிக்காரர்களே ஆதங்கப்படுகின்றனர். இதே கடலூர் தொகுதிக்கு முன்னாள் எம்.பி பேராசிரியர் தன்ராஜின் பெயரும் அடிபடுகிறது. தன்ராஜுக்கு கட்சிப் பிரமுகர்கள் மத்தியிலும் செல்வாக்கு இருப்பதையும் சுட்டிக் காட்டுகின்றனர். தே.மு.தி.க-வும் கூட்டணிக் கட்சியாக இருப்பதால், நல்ல வேட்பாளரைத் தேர்வு செய்தால் பா.ம.க நிச்சயம் வெற்றி பெறும் என உள்ளூர் பிரமுகர்களே தெரிவிக்கின்றனர். வேட்பாளர் பட்டியலை அறிவிப்பதற்கு முன்னதாக, தொகுதிகளில் உள்ள அனைத்து அம்சங்களையும் தலைமை பரிசீலிக்க வேண்டும் என்பதே தொண்டர்களின் வேண்டுகோளாக இருக்கிறது’’ என்கின்றனர் இயல்பாக.