Published:Updated:

கனிமொழிக்கு ED சம்மன்; கருணாநிதி தீவிர ஆலோசனை

Vikatan Correspondent

புதுடெல்லி, மே 4,2011

 

கனிமொழிக்கு ED சம்மன்; கருணாநிதி தீவிர ஆலோசனை

2ஜி ஸ்பெக்ட்ரம் வழக்கு தொடர்பாக நாளை (மே 5) நேரில் ஆஜராகி விளக்கமளிக்குமாறு முதல்வர் கருணாநிதியின் மகளும், மாநிலங்களவை திமுக எம்.பி.யுமான கனிமொழிக்கு அமலாக்கத்துறை சம்மன் அனுப்பியுள்ளது.

பண மோசடி தடுப்புச் சட்டத்தின் கீழ் இந்த சம்மன்கள் அனுப்பப்பட்டிருப்பதாக அதிகாரிகள் தெரிவித்துள்ளனர்.

கனிமொழியுடன், இதே வழக்கில் தொடர்புடைய கலைஞர் டி.வி.யின் நிர்வாக இயக்குனர் சரத்குமார், ஸ்வான் டெலிகாம் மேம்பாட்டாளரும், உஸ்மான் பல்வாவின் சகோதரர் ஆசிஃப் பல்வா, குசேகாவோன் பழங்கள் மற்றும் காய்கறிகள் நிறுவனத்தின் இயக்குனர் ராஜீவ் அகர்வால், சினியுக் நிறுவன இயக்குநர் கரீம் மொரானி ஆகியோருக்கும் சம்மன்கள் அனுப்பப்பட்டுள்ளது.

பணப் பரிவர்த்தனைகள், வருவாய் ஆதாரங்கள், சொத்துகள் பற்றிய ஆவணங்களையும் கனிமொழி உள்ளிட்ட ஐந்து பேரிடமும் அமலாக்கத்துறை கேட்டுள்ளதாக தெரிகிறடு.

முன்னதாக, சிபிஐ கடந்த ஏப்ரல் 25-ம் தேதி தாக்கல் செய்த துணைக் குற்றப்பத்திரிகையில், 2ஜி முறைகேட்டில் கூட்டுச் சதியாளராக கனிமொழி மீது குற்றம்சாட்டியது. சரத்குமார், மொரானி உள்ளிட்ட 5 பேரின் பெயர்களும் அதில் இடம்பெற்றிருந்தன.

இவர்கள் 5 பேரும் வரும் 6-ம் தேதி சிறப்பு நீதிமன்றத்தில் ஆஜராக வேண்டும் என்று சம்மன் அனுப்ப சிபிஐ நீதிபதி ஓ.பி.சைனி அப்போது உத்தரவிட்டார்.

இந்த நிலையில், இவர்கள் 5 பேருக்கும் அமலாக்கத்துறையும் சம்மன் அனுப்பியியுள்ளது.

சி.ஐ.டி. காலனியில் ஆலோசனை...

டெல்லி சிபிஐ சிறப்பு நீதிமன்றத்தில் கனிமொழி வரும் 6-ம் தேதி ஆஜராகவுள்ள நிலையில், இந்த விவகாரத்தை எவ்வாறு அணுகுவது குறித்து அமைச்சர்கள் மற்றும் சட்ட நிபுணர்களுடன் முதல்வர் கருணாநிதி தீவிர ஆலோசனை நடத்தினார்.

முதல்வரின் சி.ஐ.டி. காலனி வீட்டில் செவ்வாய்க்கிழமை காலை 10 மணி அளவில் தொடங்கிய இந்த ஆலோசனை மதியம் 1.20 மணி வரை நடந்தது.

இந்த ஆலோசனையில் முதல்வர் கருணாநிதி, துணை முதல்வர் மு.க.ஸ்டாலின், சட்ட நிபுணர்கள் பி.எஸ்.ராமன், சண்முகசுந்தரம், திராவிடர் கழக தலைவர் கி.வீரமணி, அமைச்சர்கள் துரைமுருகன், பொன்முடி, கே.என்.நேரு, எ.வ.வேலு உள்பட பலர் கலந்து கொண்டனர். வீட்டில் இருந்த கனிமொழியும் இந்த ஆலோசனையில் கலந்து கொண்டார்.

இந்தத் தகவல் பரவியதும் சி.ஐ.டி. காலனி வீடு அருகே பத்திரிகை மற்றும் தொலைக்காட்சி நிருபர்கள் குவிந்தனர்.

ஆலோசனை கூட்டம் முடிந்து வெளியில் வந்த கி.வீரமணியிடம் இதுபற்றி கேட்டபோது,
"இது வழக்கமான சந்திப்பு தான், வேறு ஒன்றுமில்லை'' என்றார். அவரைத் தவிர, வேறு எவரும் பேச மறுத்துவிட்டனர்.