Published:Updated:

தலையங்கம் - காவிரிக் காட்சிகள்..!

தலையங்கம் - காவிரிக் காட்சிகள்..!

தலையங்கம் - காவிரிக் காட்சிகள்..!

தலையங்கம் - காவிரிக் காட்சிகள்..!

Published:Updated:
தலையங்கம் - காவிரிக் காட்சிகள்..!

காவிரி நீர்ப் பங்கீடு எப்போதுமே நமக்கு கல்லில் நார் உரிக்கும் கதைதான். மத்தியிலும் கர்நாடகத்திலும் ஒரே கட்சி ஆட்சி செய்யும் சமயங்களிலேயே அந்தக் கதி என்றால், அங்கே காங்கிரஸும் இங்கே பாரதிய ஜனதாவும் ஆளும்போது அவதிக்குக் கேட்கவா வேண்டும்?

 நதிநீர் ஆணையத்தின் சமீபக் கூட்டத்தில் எதிர்பார்த்த வேதனைக் காட்சியே அரங்கேறியது. தமிழகத்தின் கோரிக்கையை அடியோடு நிராகரித்தார் கர்நாடக முதல்வர் ஜெகதீஷ் ஷட்டர். ஆணையத் தலைவர் என்ற முறையில், 'விநாடிக்கு 9,000 கன அடிகளாவது கொடுங்கள்' என்று தீர்ப்பு சொன்னார் பிரதமர். சொந்தக் கட்சியிலேயே அவர் சொல் எடுபடாதபோது, மாற்றுக் கட்சியா செவி கொடுக்கும்... புறங்கை வீசிப் புறக்கணித்து, வெளிநடப்பு செய்தார் ஷட்டர்.

தமிழகம் வைத்த கோரிக்கைக்கும் பிரதமர் சொன்ன தண்ணீரின் அளவுக்கும் ஏணி வைத்தாலும் எட்டாது. பிரதமர் முடிவில் தனக்கும் சம்மதம் இல்லை என்பதால், நீதிமன்ற   உதவியை நாடப்போவதாகச் சொல்லிவிட்டுத் திரும்பினார் தமிழக முதல்வர். எடுத்த முடிவில் உறுதி காட்டி, வலுவான நீதிப் போர் தொடுப்பதோடு... மாறிவரும் நடப்பு அரசியல் சூழலைப் பயன்படுத்தி, பாரதிய ஜனதா தலைமை மூலமாகவும் கர்நாடகத்தை வழிக்குக் கொண்டுவர ராஜதந்திர முயற்சிகளை முதல்வர் மேற்கொள்ள வேண்டும். அதே சமயம், 'அம்மையார் மாட்டிக்கொண்டு முழிக்கட்டும்' என்று தி.மு.க. தலைவர் ஒதுங்கி நின்று வேடிக்கை பார்க்கக் கூடாது. மாநிலத்தில் ஆட்சியை இழந்தாலும், மக்கள் கொடுத்த பலம் மத்தியில் அவருக்கு அப்படியேதான் இருக்கிறது. சில்லறை வணிகம் தொட்டு பல்வேறு சிக்கல்களால்... ஆட்டம் கண்டிருக்கும் காங்கிரஸுக்குத் தி.மு.க-வின் நாடாளுமன்ற உறுப்பினர் ஒவ்வொருவருமே உயிர்க் காற்றைப் போன்றவர்கள்.

சொந்த லாபங்களுக்காக இதுவரை செய்துகொண்ட சமரசங்களுக்கு எல்லாம் பரிகாரம் தேடவாவது, காவிரி நீரில் தமிழகத்தின் உரிமையை நிலைநாட்ட தி.மு.க. தன் பலத்தைப் பயன்படுத்த வேண்டும்.