Published:Updated:

அலறி ஓடும் மூத்த தலைவர்கள்...அதிர்ந்து நிற்கும் ராகுல் காந்தி!

Vikatan Correspondent
அலறி ஓடும் மூத்த தலைவர்கள்...அதிர்ந்து நிற்கும் ராகுல் காந்தி!
அலறி ஓடும் மூத்த தலைவர்கள்...அதிர்ந்து நிற்கும் ராகுல் காந்தி!
அலறி ஓடும் மூத்த தலைவர்கள்...அதிர்ந்து நிற்கும் ராகுல் காந்தி!

புதுடெல்லி: வரவிருக்கும் நாடாளுமன்ற தேர்தலில் ப.சிதம்பரம், ஜெயந்தி நடராஜன், மணிஷ் திவாரி உள்ளிட்ட காங்கிரஸ் கட்சியின் மூத்த தலைவர்கள் பலர் போட்டியிட விரும்பாத நிலையில், அவர்கள் போட்டியிட வேண்டும் என ராகுல் காந்தி வலியுறுத்துவதாக தகவல் வெளியாகி உள்ளது.

மணிஷ் திவாரி லூதியானா தொகுதியில் போட்டியிடுவார் என எதிர்பார்க்கப்பட்ட நிலையில், அவர் அதில் ஆர்வம் காட்டாமல் உள்ளதாக காங்கிரஸ் வட்டாரங்கள் தெரிவிக்கின்றன.

அதேப்போன்று நிதியமைச்சரான ப.சிதம்பரம், தனது பழைய சிவகங்கை தொகுதியில் பல இடங்களில் உள்ளூர் தலைவர்களை சந்தித்து, சிறிய கூட்டங்களை நடத்தி வருகிறார். இதனால் அவர் தேர்தலில் போட்டியிடுவார் என எதிர்பார்க்கப்பட்ட நிலையில், தனது மகன் கார்த்தியை களமிறக்கவே சிதம்பரம் இந்த அளவுக்கு மெனக்கிட்டுள்ளதாகவும், அதே சமயம் மாநிலங்களவை மூலம் நாடாளுமன்றத்திற்கு செல்ல அவர் விரும்புவதாகவும் அவருக்கு நெருக்கமான வட்டாரங்கள் தெரிவிக்கின்றன.

அதேப்போன்றுதான் ஜெயந்தி நடராஜனும் போட்டியிட ஆர்வம் காட்டவில்லை. கடந்த செவ்வாய்க்கிழமையன்று தமிழக காங்கிரஸ் கட்சியின் வேட்பு மனு ஆய்வுக் குழு கூட்டம் நடைபெற்றபோது, ஜெயந்தி நடராஜனிடம் போட்டியிடுமாறு கேட்டுக்கொள்ளப்பட்டதாகவும், ஆனால் அவர் தனக்கு விருப்பம் இல்லை எனக் கூறிவிட்டதாகவும் சத்தியமூர்த்தி பவன் வட்டாரங்கள் கூறுகின்றன.

இன்னொரு மத்திய அமைச்சரான ஜி.கே. வாசன் தான் போட்டியிடப்போவதில்லை என நேற்றே செய்தியாளர்கள் கூட்டத்தில் அறிவித்துவிட்டார்.

இதுதவிர கே.வி. தங்கபாலு, ஈவிகேஎஸ் இளங்கோவன் போன்ற தலைவர்களும் போட்டியிடுவதில்லை என முடிவு செய்திருப்பதாக தகவல் வெளியாகி உள்ளது.

இதுமட்டுமல்லாது ஊழல் குற்றச்சாட்டுக்கு உள்ளான முன்னாள் ரயில்வே அமைச்சர் பவன் பன்சால், மகாராஷ்ட்ரா முன்னாள் முதல்வர் அசோக் சவாண் மற்றும் சுரேஷ் கல்மாடி ஆகியோர் கூட அலறி ஓடும் தலைவர்கள் பட்டியலில் இடம்பெற்றுள்ளதாக டெல்லி காங்கிரஸ் வட்டாரங்கள் தெரிவிக்கின்றன.

இந்நிலையில் நாடாளுமன்ற தேர்தலுக்கான தனது இரண்டாவது வேட்பாளர் பட்டியலை வெளியிட தயாராகி வருகிறது காங்கிரஸ் கட்சி. இந்நிலையில் வேட்பாளர் பட்டியலை இறுதி செய்யும் பணியில் ஈடுபட்டுள்ள கட்சியின் துணைத் தலைவரான ராகுல் காந்தி, மூத்த தலைவர்களே தோல்வி பயத்தில் தேர்தலில் போட்டியிடுவதிலிருந்து ஓட்டம் பிடிப்பதால், அதிர்ச்சியடைந்துள்ளார்.

இருப்பினும் அவர்கள்  கண்டிப்பாக இந்த தேர்தலில் போட்டியிட வேண்டும் என ராகுல் கூறி வருவதால், காங்கிரஸ் கட்சிக்குள் குழப்பமும், சிக்கலும் உருவாகி உள்ளது.