Published:Updated:

'கடத்தி கையெழுத்து வாங்கினார் வீரபாண்டி ஆறுமுகம்'

கோர்ட்டுக்கு வந்த குடும்பம்

'கடத்தி கையெழுத்து வாங்கினார் வீரபாண்டி ஆறுமுகம்'

கோர்ட்டுக்கு வந்த குடும்பம்

Published:Updated:
##~##

வீரபாண்டி ஆறுமுகம் இறந்து ஒருவருடம் கூட ஆகாத நிலையில், அவரது குடும்பத்துக்குள் இப்படி ஒரு சிக்கல் வரும் என யாரும் எதிர்பார்க்கவில்லை. 

ஆறுமுகத்தின் முதல் மனைவி ரங்கநாயகியும், மூத்த மருமகள் பிருந்தா செழியனும் சேலம் மாவட்ட முதன்மை நீதிமன்றத்தில் 8 பேர் மீது வழக்கு தொடர்ந்துள்ளனர். அந்த 8 பேர் யார் தெரியுமா? ஆறுமுகத்தின் மகள்கள் மகேஸ்வரி, நிர்மலா, இரண்டாவது மனைவி லீலாவதி, அவரது மகன் பிரபு, முதல் மனைவி ரங்கநாயகியின் மூத்த மகன் செழியனின் மகள்கள் சூர்யா, சிந்து, அவரது இரண்டாவது மகன் ராஜேந்திரனின் மகள்கள் கிருத்திகா, மலர்விழி என்று விரிகிறது அந்த அதிரவைக்கும் பட்டியல். அதாவது, முதல்மனைவி ரங்கநாயகியும் மூத்தமகன் செழியனின் மனைவி பிருந்தாவும் ஒரு கோஷ்டியாகவும் மற்றவர்கள் இன்னொரு அணியாகவும் பிரிந்து நிற்கிறார்கள்.

ஒட்டுமொத்த விகடனுக்கும் ஒரே ஷார்ட்கட்!

நீதிமன்றத்தில் தொடரப்பட்ட வழக்கில் இருப்பது இதுதான்... ''எஸ்.ஆறுமுகம், 2007 செப்டம்பர் 6-ம் தேதி செவ்வாய்பேட்டை ஜனார்த்தனராவிடம் இருந்து 97.5 சென்ட் நிலத்தையும், அவரது சகோதரர் கங்காராமிடம் இருந்து 50.5 சென்ட் நிலத்தையும் வாங்கினார். எஸ்.ஆறுமுகம், ரங்கநாயகி, பிருந்தா

'கடத்தி கையெழுத்து வாங்கினார் வீரபாண்டி ஆறுமுகம்'

செழியன் ஆகிய மூவர் பெயரிலும் சூரமங்கலம் சார்பதிவாளர் அலுவலகத்தில் பதிவுசெய்தார். கடந்த 2011 டிசம்பர் 23-ம் தேதி இரவு ரங்கநாயகி, பிருந்தா செழியன் ஆகிய இருவரையும் கடத்திச் சென்ற எஸ்.ஆறுமுகம் (அதாவது சொந்த மனைவியையும் மருமகளையும் வீரபாண்டி ஆறுமுகம் கடத்திச் சென்றதாகச் சொல்கிறார்கள்!) சூரமங்கலம் சார்பதிவாளர் அலுவலகத்துக்கு கொண்டுசென்று, மிரட்டி எங்களுடைய பெயரில் வாங்கிய இரண்டு சொத்துக்கள் மற்றும் மேலும் எங்களிடம் இருந்த எட்டுச் சொத்துக்களையும் தன் பெயருக்கு மாற்றி எங்களிடம் கையெழுத்து வாங்கிக்கொண்டார்.

ரங்கநாயகி தன் கணவருக்கு தானமாகக் கொடுப்ப​தாகவும், மருமகள் பிருந்தா செழியன் அந்த நிலத்தை 37.66 லட்சத்துக்கு விற்பனை செய்துள்ளதாகவும் பத்திரம் தயாரித்து வைத்திருந்தனர். நான்கு காசோலைகளில் தலா 9 லட்சமும், ஐந்தாவது காசோலையில் 1.66 லட்சமும் வழங்குவதாகவும் ஆறுமுகம் தெரிவித்தார். ஆனால், அந்தத் தொகை​யைத் தரவே இல்லை. ஆறுமுகம் பணத்தைத் தராததால் அந்தச் சொத்துப் பதிவை ரத்துசெய்து உத்தரவிட வேண்டும்.

இந்தச் சொத்துக்களை வாங்கிய ஆறுமுகம் சட்டமுறைப்படி பங்கீடு செய்யவில்லை. முதல் மனைவி ரங்கநாயகியின் இரண்டாவது மகன் ராஜேந்திரனுக்குப் பங்கு கொடுக்காமல், இரண்டாவது மனைவி லீலாவதி, அவரது மகன் பிரபு, முதல் மனைவியின் மகள்கள் மகேஸ்வரி, நிர்மலா, முதல் மனைவியின் மூத்த மகன் செழியனின் மகள்கள் சூர்யா, சிந்து,  இரண்டாவது மகன் ராஜேந்திரனின் மகள்களான கிருத்திகா, மலர்விழி ஆகியோருக்கு தானமாக வழங்கப்பட்டுள்ளது. இந்த தான சொத்துப் பரிமாற்றப் பதிவு செல்லாது என அறிவிக்க வேண்டும்'' என்று, அந்த மனுவில் குறிப்பிடப்பட்டுள்ளது.

'என்னோட சொத்தை பறித்து விட்டார்’ என்று அடுத்தவர் வந்து புகார் கொடுப்பதுதான் வழக்கம். ஆனால், வீரபாண்டி ஆறுமுகம் வீட்டுக்குள்ளேயே பறிப்பு நடந்துள்ளது.

வீரபாண்டி ஆறுமுகத்துக்கு இரண்டு மனைவிகள். மூத்த மனைவி ரங்கநாயகி. இவர் சேலத்தில் வசிக்கிறார். இவருக்கு மகேஸ்வரி, செழியன், நிர்மலா, ராஜேந்திரன் (எ) ராஜா என நான்கு வாரிசுகள். செழியன் இப்போது உயிருடன் இல்லை. அவரது மனைவி பிருந்தா. இவர்களுக்கு சூர்யா, சிந்து இரண்டு மகள்கள். நிர்மலாவுக்கு கயல்விழி, பாரிவேல் என இரண்டு வாரிசுகள். ராஜாவின் மனைவி சாந்தி.

'கடத்தி கையெழுத்து வாங்கினார் வீரபாண்டி ஆறுமுகம்'

இவர்களுக்கு மலர்விழி, கிருத்திகா இரண்டு மகள்கள்.

ஆறுமுகத்தின் இரண்டாவது மனைவி லீலாவதி. இவர் சென்னையில் வசிக்கிறார். இவரின் ஒரே மகன் பிரபு. இவருடைய மனைவி கௌதமி. இவர்களுக்கு சித்தார்த் என்று ஒரு மகன்.

வீரபாண்டி ஆறுமுகம் இருந்தவரை இலைமறைகாயாக இருந்த பூசல், இப்போது நீதிமன்றத்துக்கு வந்து விட்டது. வீரபாண்டி குடும்பத்துக்கு நெருக்கமான வட்டாரத்தில் விசாரித்தோம். ''வீரபாண்டியார் வீட்டு மூத்த மருமகளான பிருந்தாவுக்கு எப்போதுமே அந்தக் குடும்பத்தில் நல்ல மரியாதை உண்டு. அவரது கணவன் செழியன் இறந்ததும் எல்லாம் தலைகீழாக மாறியது. செழி​யன் இறந்து ஒரே மாதத்தில் அந்த வீட்டில் இருந்து வெளியேறினார் பிருந்தா. வெளியேற்றப்பட்டார் என்பதுதான் உண்மை. சொத்தில் பங்குக்கு வந்துவிடுவார் என்று வீரபாண்டியார் வீட்டில் இருந்தவர்களால் விரட்டப்பட்டார். ஒவ்வொரு வருடமும் தன் கணவர் நினைவு நாளுக்கு மட்டுமே பூலாவரி கிராமத்துக்கு வருவர். வீரபாண்டியார் சொத்தில் பிருந்தாவுக்குப் பங்கு எதுவும் கொடுக்கவில்லை.

'கடத்தி கையெழுத்து வாங்கினார் வீரபாண்டி ஆறுமுகம்'

வீரபாண்டியார் அவரது மூத்த மகள் மகேஸ்வரியின் கட்டுப்பாட்டில் இருந்தார். அவர் சொல்வதை மட்டுமே செய்தார். பிருந்தா தரப்பில் இருந்து பலமுறை பேச்சுவார்த்தை நடத்தியும் எந்த பிரயோஜனமும் இல்லை. சில வாரங்களுக்கு முன் சென்னை வந்த பிருந்தா, ஸ்டாலினைச் சந்தித்து முறையிட்டுள்ளார். 'உங்கள் பக்கம் நியாயம் இருக்கு. நீங்க சட்டப்படி என்ன செய்யணுமோ அதைச் செய்யுங்க’ என்று அவர் சொன்னாராம். அதன்பிறகே, நீதிமன்றத்துக்குப் போயிருக்கிறார் பிருந்தா. வீரபாண்டியாரின் முதல் மனைவி ரங்கநாயகி படுத்த படுக்கையாக இருக்கிறார். சொத்தில் அவரும் பங்குதாராக இருப்பதால் வழக்கில் அவருடைய பெயரையும் சேர்த்திருக்கிறார்'' என்கிறார்கள்.

பிருந்தாவைச் சந்திக்க நாம் பலவகையிலும் முயற்சித்தோம். ஆனால் அவர் பேச மறுத்து விட்டார். வீரபாண்டி ஆறுமுகத்தின் முதல் மனைவியின் மகன் ராஜேந்திரனிடம் பேசினோம். ''அப்பா உயிரோடு இருக்கும்போது எங்க அண்ணி பிருந்தாவுக்கு பவர் கொடுத்தார். அதை ஒழுங்குபடுத்த கையெழுத்து வாங்கினார். இப்போது தன்னுடைய பங்கு கிடைக்கவேண்டும் என்பதற்காக நீதிமன்றத்துக்குப் போயிருக்கிறார். யாரையும் கடத்தவோ, மிரட்டவோ வேண்டிய அவசியம் எங்க அப்பாவுக்கு கிடையாது. அவர் அப்படிப்பட்டவரும் இல்லை.

பிற்காலத்தில் எந்தப் பிரச்னையும் வரக்கூடாது என்பதற்காக நீதிமன்றத்துக்குச் சென்று தீர்ப்பை வாங்கிக் கொள்வார்கள். பெரிய குடும்பங்களில் இப்படி நடப்பது சகஜம்தான். எங்களுக்கும், அண்ணிக்கும் இடையில் எந்த மனக்கசப்பும் இல்லை. குழந்தைகளின் படிப்புக்காகத்தான் அண்ணி சேலத்தில் தங்கியிருந்தார். நாங்கள் கிராமத்தில் இருந்தோம். நாங்கள் அனைவரும் ஒற்றுமையுடன் வாழ்கிறோம்'' என்று, நிதானமாகச் சொன்னார். ஆனால், விவகாரம் நீதிமன்றத்தில் போய் நிற்கிறது.

மொத்தத்தில் நிம்மதியை இழந்து தவிக்கிறது ஆறுமுகத்தின் குடும்பம்!

- வீ.கே.ரமேஷ்

படங்கள்: எம்.விஜயகுமார்