புரட்சிப் புயல் இப்போது புலிகளின் வக்கீலாக மாறி இருக்கிறார். விடுதலைப்

புலிகள் இயக்கம் இந்தியாவில் தடை செய்யப்பட்டு இருப்பது தொடர்பாக, டெல்லி உயர் நீதிமன்றத்தின் மூத்த நீதிபதி விக்ரம்ஜித் சென் தலைமையில், சட்ட விரோத நடவடிக்கை கள் தடுப்புச் சட்ட விசாரணை ஆணையம் அமைக்கப்பட்டு உள்ளது. அந்த விவாதங்களில், மனு தாக்கல் செய்த வைகோ, தானே வக்கீலாகவும் ஆகி, தனதுதரப்புவாதங்களைவைத்துவிட்டு வந்திருக்கிறார்.

"விடுதலைப் புலிகள் இயக்கத்தின் உறுப்பினராக இல்லாத நீங்கள், அவர்களுக்கு ஆதரவாக எப்படி வாதாடலாம் என்று உங்களை விமர்சனம் செய்கிறார்களே?"

"இதே கேள்வியை நீதிபதி விக்ரம்ஜித் சென் கேட்டார். 'நான் விடுதலைப் புலிகள் அமைப்பின் உறுப்பினர் அல்ல; ஆனால், ஆதரவாளன்' என்று பதில் சொன்னேன். 'இப்படிச் சொல்வதால் உங்களுக்கு பிரச்னை வராதா?' என்று கேட்டார். 'பரவாயில்லை'என்று பதில் அளித்தேன். இரண்டு ஆண்டுகளுக்கு ஒரு முறை எந்த ஆதாரங்களும் இல்லாமல், புலிகள் அமைப்பைத் தடை செய்து கொண்டே இருப்பார்கள். அதை தமிழர்கள் வேடிக்கை பார்த்துக் கொண்டு இருக்க வேண்டும் என்று நினைக்கிறார்களா? 18 கல் தொலைவில், சொத்து, சுகம் அனைத்தையும் இழந்து, இலங்கையைத் தவிர, வேறு எங்காவது போய் வாழ முடியாதா என்று ஏங்கி, பக்கத்தில் உள்ள நம் நாட்டுக்கு... அகதியாக, அநாதையாக வருகிறான். அவனை உள்ளேவிடாமல், 'விடுதலைப் புலிகள் அமைப்பைத் தடை செய்திருக் கிறோம்' என்று சொல்லித் தடை போடுகிறார்கள். அநாதைத் தமிழனை உள்ளேவிடாமல் தடுக்கும் இந்தத் தடையைத் தகர்ப்பதுதான் என்னுடைய நோக்கம். இதனால் எந்தக் கஷ்ட நஷ்டங்கள் வந்தாலும், நான் தாங்கிக்கொள்ளத் தயாராக இருக்கிறேன். புலிகள் அமைப்பு மீதான தடையை எதிர்த்து வாதாடுவது இந்த இனத்தில் பிறந்த என்னுடைய ஆத்ம திருப்திக்காக. அரசியலுக்கும் இதற்கும் எந்த சம்பந்தமும் இல்லை!"

"புலிகள் அமைப்பைத் தடை செய்வதற்கு வலுவான காரணங்களை மத்திய அரசாங்கம் வைத்திருந்ததாகக் கூறுகிறார்களே?"

"அத்தனை காரணங்களையும் என்னுடைய வாதங்களால் தவிடுபொடியாக்கி இருக்கிறேன்! கூடுதல் சொலிசிட்டர் ஜெனரல் சந்தியோக், தீர்ப்பாயத்தின் முன்பாகச் சில ஆவணங் களைச் சமர்ப்பித்தார். அரசாங்கத்துக்கு மட்டுமே தெரிந்து இருக்க வேண்டிய செய்திகள், வெளியே சொல்லக் கூடாத தகவல்கள் அதில் அடங்கி இருப்ப தாகச் சொன்னார். இவற்றை நீதிபதி விக்ரம்ஜித் சென் ஏற்றுக்கொள்ள மறுத்தார். 'இன்டர்நெட்டில் இருந்து எடுக்கப் பட்ட இந்தத் தகவல்களை யார் வேண்டுமா னாலும் தாக்கல் செய்ய முடியும். இதை ஏற்றுக் கொள்ள மாட்டேன்' என்று நீதிபதி மறுத்து விட்டார். 'தமிழ் ஈழம் என்று விடுதலைப் புலி கள் சொல்வது இலங்கையில் உள்ள தமிழர் வாழும் பகுதிகளை மட்டும் அல்ல; இந்தியாவில் உள்ள தமிழ்நாட்டையும் உள்ளடக்கியதுதான்' என்பதுதான் தடைக்கான மிக முக்கியக் காரணமாகச் சொல்கிறார்கள். இந்திய நாட்டின் ஒரு பகுதியைப் பிரித்துத் துண்டாடுவதால்தான், புலிகள் அமைப்பைத் தடை செய்கிறார்களாம். 'இதில் ஒரு துளிகூட உண்மை இல்லை' என்று சொன்ன நான், 'அதற்கு ஏதாவது ஓர் ஆவணத் தையாவது மத்திய அரசாங்கம் காட்டினால், நான் புலிகள் சார்பாகப் பேசுவதில் இருந்து வாபஸ் வாங்கிக்கொள்கிறேன்' என்று சொல்லிவிட்டு, ஈழத் தந்தை செல்வா காலத்தில் வட்டுக் கோட்டை மாநாட்டில் வைக்கப்பட்ட தீர்மானத்தைச் சொன்னேன். 'தமிழீழ அரசு என்பது இலங்கையின் வடக்கு, கிழக்கு மாகாண மக்களைக்கொண்டதுதான்' என்று அன்று செல்வா வரையறுத்தார். அதைத்தான் தனது மாவீரர் தின உரைகளில் பிரபாகரன் வழி மொழிந்தார். பிரபாகரன் எப்போதும் உரையாற் றும் மேடையில் ஒரு வரைபடம் இருக்கும். அதில் இலங்கையில் உள்ள வடக்கு, கிழக்கு மாகாணங்கள் மட்டும்தான் இருக்கும். இதைப் பார்த்தாலே போதுமே. வேறு என்ன ஆதாரம் வேண்டும் என்று கேட்டேன். இன்றைக்கு நாடு கடந்த தமிழ் ஈழ அரசாங்கத்தின் வரைபடம் வெளியிடப்பட்டு உள்ளது. அதிலும் இருப்பது வட கிழக்குப் பகுதிகள்தானே தவிர, தமிழ்நாடு அல்ல. புலிகள் மீதான தடைக்கு மிக முக்கிய மாகச் சொல்லப்படும் காரணமே ஆதார பூர்வமாகத் தகர்க்கப்பட்டுள்ளது!"

"இலங்கையில் இருந்து ரகசியமாக தமிழ்நாட்டுக்குள் புலிகள் வந்துவிடுகிறார்கள் என்கிறார்களே?"

"சென்னையில் நடந்த விசாரணையின்போது க்யூ பிராஞ்ச் போலீஸ் அதிகாரி ஒருவர், இந்தக் காரணத்தைச் சொன்னார். அவரிடம், 'சட்ட விரோத நடவடிக்கைகள் தடுப்புச் சட்டத்தின் 10 (ஏ) (1)ன் படி இதுவரை யாரையாவது கைது செய்திருக்கிறீர்களா?' என்று நான் கேட்டேன். 'இல்லை' என்று அவர் பதில் அளித்தார்விடுதலைப் புலிகள் அமைப்பின் உறுப்பினராக ஒருவர் இருந்தால் மட்டுமே, இந்தப் பிரிவின்படி கைது செய்ய முடியும். அதன்படி பார்த்தால், இவர்கள் அந்த அமைப்பைச் சேர்ந்த யாரையும் கைது செய்யவில்லை. பிறகு, எப்படி புலிகள் உள்ளே நுழைந்துவிடுகிறார்கள் என்று காரணம் சொல்ல முடியும்?

நியூஸிலாந்து நாட்டின் உச்ச நீதிமன்றம், கடந்த ஆகஸ்ட் மாதம் ஒரு தீர்ப்பைக்கொடுத்து இருக்கிறது. அகதி அந்தஸ்து கேட்டு விண்ணப் பித்த ஈழத் தமிழர் தொடர்பான வழக்கு அது. 'விடுதலைப் புலிகள் இயக்கமானது, ஓர் அரசியல் இயக்கம். அது இலங்கையில் வாழும் வடக்கு, கிழக்கு மாகாண மக்களின் உரிமைக்காகப் போராடுகிறது' என்று அந்தத் தீர்ப்பில் கூறப்பட்டு உள்ளது. நியூஸிலாந்து உச்ச நீதிமன்றத்தின் அத்தாட்சியைப் பெற்று, அந்தத் தீர்ப்பின் நகலை நான் சமர்ப்பித்து இருக்கிறேன். நியூஸிலாந்துக்குத் தெரிகிற விஷயங்கள் நம் நாட்டுக்குத் தெரிய வில்லை என்பதுதான் ஆச்சர்யமானது!"

"இதில் தமிழக அரசாங்கத்தின் வாதங்கள் என்ன?"

"தடையை நீட்டிக்க வேண்டும் என்பதுதான் தி.மு.க. அரசின் வாதம்! தடை நீட்டிக்கத் தேவை யான ஆதாரங்களைத் திரட்டிக் கொடுத்து, கடந்த இரண்டு ஆண்டுகளில் நடந்த சம்பவங் களைப் பட்டியலிட்டுக் கொடுத்து இருப்பதும் தி.மு.க. அரசுதான். மத்திய அரசாங்கம் எதை எதிர்பார்க்கிறதோ, அதை சிரமேற்கொண்டு செய்து முடிப்பதைத்தானே தனது வாழ்நாள் கடமையாக கருணாநிதி கருதுகிறார்!"

"இலங்கை விவகாரத்தில் மத்திய அரசு முனைப்புக் காட்ட வேண்டும் என்று பிரதமர் மற்றும் சோனியாவிடம் தொடர்ந்து வலியுறுத்தி வருகிறாரே முதல்வர்?"

"ஈழத் தமிழர் படுகொலை மிகக் கொடூர மாக நடந்து வரும்போது, 'மத்திய அரசாங்கத்தின் கொள்கைதான் என்னுடைய கொள்கை' என்று சொன்னார். இன்றைக்கு மத்திய அரசாங்கத்துக்கு ஏன் கோரிக்கை வைக்கிறார்? ஈழ தேசத்தில் நடந்த எல்லா நாசக் காரியங்களுக்கும் மன்மோகன் சிங் அரசாங்கத்துக்கு பாதிப் பங்கு இருப்பதை உலகம் உணர்ந்து வருகிறது. காங்கிரஸ் அரசாங்கம் செய்த அழிவுக் காரியங்களுக்கு கருணாநிதி உடந்தையாக இருந்ததால் மட்டுமே இது சாத்தியமானது என்பதையும் உலகத் தமிழர்கள் தெரிந்து கொண்டுவிட்டார்கள். இதை எப்படியாவது திசை திருப்ப முடியுமா என்று கருணாநிதி துடிக்கிறார். டெல்லிக்குக் கடிதம் போடுவது எல்லாம் இந்தக் கபட நாடகம்தான். இன்று மட்டும் அல்ல... எத்தனை ஜென்மம் எடுத்தாலும் தமிழர்கள் இந்தத் துரோகத்தை மறக்க மாட்டார்கள் என்று மன்மோகன் சிங்குக்குக் கடிதம் எழுதியவன் நான்!"

"ஆனால், தமிழகத்தில் காங்கிரஸ் கட்சியுடன் கூட்டுச் சேர்வதற்குத்தானே பலரும் துடிக்கிறார்கள்?"

"இன்றைக்கு மத்திய அரசாங்கத்தை வழி நடத்தும் லகான் காங்கிரஸ் கட்சியின் கையில் இருக்கிறது. அந்தக் கட்சியுடன் கூட்டணி வைத்தால், அரசியல்ரீதியாக லாபங்கள் அடையலாம் என்று சிலர் கணக்குப் போடக்கூடும். அதுதான் இதற்குக் காரணம். தமிழ் நாட்டில் அந்தக் கட்சிக்கு செல்வாக்கு மலைஅளவு இருக்கிறது என்ற மயக்கம் யாருக்கும் இல்லை. எங்களைப் பொறுத்தவரை அ.தி.மு.க. தலைமையிலான கூட்டணியில் உறுதியாக இருக்கிறோம். ஈழத் தமிழனையும் தமிழகத்தின் வாழ்வாதாரங்களையும் அடகுவைத்து, ஐஸ்வர்யங்களைக் குவிப்பதற்குத் துடிக்கும் கருணாநிதியின் குடும்ப ஆட்சி வீழ்த்தப்பட வேண்டும் என்பதிலும், ராஜபக்ஷே அரசாங் கத்துக்கு அத்தனை உதவிகளையும் செய்த காங்கிரஸ் கட்சி அரசியல்ரீதியாக தமிழகத்தில் அப்புறப்படுத்தப்பட வேண்டும் என்பதிலும் எங்களுக்கு மாற்றுக் கருத்து இல்லை!"

"சட்டம்-ஒழுங்கு பிரச்னையே இல்லாத அமைதித் தமிழகமாக்கி வைத்திருப்பதாக முதல்வர் சொல்கிறாரே?"

"முதல்வர் முதலில் தமிழ்நாட்டுப் பத்திரிகை களைப் படிக்க வேண்டும். அவர் இந்த வார்த்தை களைச் சொல்லியதற்கு முந்தைய ஒரு மாதத்தில் மட்டும், நாட்டு மக்களை அச்சுறுத்தும் எத்தனையோ சம்பவங்கள் நடந்திருக்கின்றன. கோவையில் இரண்டு பிஞ்சுப் பிள்ளைகளைக் கடத்திக் கொன்றிருக்கிறார்கள். சென்னை மாணவன் கீர்த்திவாசன் கடத்தல் கும்பலிடம் பணம் கொடுத்து மீட்கப்பட்டுள்ளான். அதற்கு முந்தைய நாள், சென்னையில் புரட்சி பாரதம் கட்சிப் பிரமுகர் கொலை செய்யப்பட்டு இருக்கிறார். ஆலங்குடி தி.மு.க. செயலாளர் கொலை, முன்னாள் அமைச்சர் வெங்கடாசலம் கொலை... என்று வரும் செய்திகளை அவர் படிப்பதே இல்லையா? மக்கள் மனதில் பீதியைக் கிளப்பும் சம்பவங்கள் நித்தமும் நடக்கின்றன. ஆனால், போலீஸைக் கையில் வைத்திருக்கும் கருணாநிதி மட்டும் 'எல்லாம் சுபம்' என்கிறார்!"

"அ.தி.மு.க. கூட்டணிக்கு புதிதாக யார் யார் வர வாய்ப்பு இருக்கிறது?"

"ஆரூடங்கள் சொல்ல நான் விரும்பவில்லை. ஆளும் தி.மு.க. மீதான வெறுப்பு அ.தி.மு.க. அணிக்கு நித்தமும் பலத்தைக் கூட்டிக்கொண்டே இருக்கிறது. விலைவாசி உயர்வால் தனது அன்றாட வாழ்க்கையை ஓட்ட முடியாத மத்திய தரவர்க்கத்தினர், மின்வெட்டு காரணமாக சொந்தத் தொழிலைக்கூட உருப்படியாகச் செய்ய முடியாத சிறு தொழிலதிபர்கள், எந்தச் சிறு சலுகையையும்கூட லஞ்சம் இல்லாமல் வாங்க முடியாத பொதுஜனம், சினிமா தொடங்கி எந்தத் தொழிலையும் நிம்மதியாகச் செய்யவிடாமல் கருணாநிதி குடும்பத்தினரால் தடுக்கப்படும் பெருமுதலாளிகள், வாழ்க்கையை இழந்த விவசாயிகள், நைந்துபோன நெசவாளிகள், அராஜகம் மற்றும் மிரட்டல் கும்பல்களால் பாதிக்கப்பட்ட அப்பாவி மக்கள்... எனத் திரளான மக்கள் சக்தி அ.தி.மு.க. பக்கம் கூடிக்கொண்டே போகிறது. கட்சிகளின் எண்ணிக்கையைவிட இந்த ஏழு சக்திகளின் ஆதரவுதான் பலமான கூட்டணி!"