Published:Updated:

மு.க. கணக்கு... ஜெ. சூத்திரம்!

மு.க. கணக்கு... ஜெ. சூத்திரம்!

மு.க. கணக்கு... ஜெ. சூத்திரம்!

மு.க. கணக்கு... ஜெ. சூத்திரம்!

Published:Updated:
மு.க.கணக்கு... ஜெ.சூத்திரம்!  
அரசியல் அல்வா கூட்டணி குருமா
மு.க. கணக்கு... ஜெ. சூத்திரம்!

ஒட்டுமொத்த விகடனுக்கும் ஒரே ஷார்ட்கட்!

மு.க. கணக்கு... ஜெ. சூத்திரம்!
ப.திருமாவேலன்
.
மு.க. கணக்கு... ஜெ. சூத்திரம்!
.

சுனாமி இங்கு வருமா என்பதை இந்தோனேசியக் கடல் அறிவிக்கும். தேர்தல் இங்கு எப்போது வரும் என்பதைக் கட்சிகளுக்குள் வந்திருக்கும் உள்காய்ச்சல் தெரிவிக்கும்!

''சட்டமன்றத்துக்கான தேர்தல் முன்கூட்டியே வருமா?'' என்று முதல்வர் கருணாநிதியிடம் கேட்டபோது, ''முன்கூட்டியே தேர்தல் நடத்தும் திட்டம் இப்போதைக்கு இல்லை'' என்றார். அதாவது இப்போதைக்கு இல்லையாம். கோவையில் ஜூன் மாதம் உலகத் தமிழ் செம்மொழி மாநாடு நடந்து முடிந்தவுடன் சட்டமன்றத் தேர்தலுக்கான வேலைகள் மும்முரமாகிவிடும் என்று அரசியல் ஆரூடங்கள் சொல்கின்றன. அதை மெய்ப்பிப்பது மாதிரியே கருணாநிதியும் ஜெயலலிதாவும் தங்களது அணியைப் பலப்படுத்துவதில் தீவிரமாகி உள்ளனர். இன்றைய நிலையில், அவர்களது யோசனைகள் இப்படித்தான் இருக்கின்றன...

கருணாநிதியின் மனக் கணக்கு:

மு.க. கணக்கு... ஜெ. சூத்திரம்!

காங்கிரஸூம் விடுதலைச் சிறுத்தைகளும் மட்டுமே இன்று தி.மு.க அணியின் முக்கியக் கூட்டணிக் கட்சிகள். 13 கட்சிகளின் கூட்டணி என்று பட்டியல் போட்டாலும், அவை அவரால் வெளியில் சொல்ல முடியாத லக்கேஜ்கள்தான். ஆறாவது முறையும் ஆட்சியில் அமர ஆசைப்பட்டால், இவை போதாது.

ஆக, கருணாநிதியின் மனக்கண் முன்னால் முதலாவது தோன்றுபவர் டாக்டர் ராமதாஸ். 'கருணாநிதியின் பார்வை தன் மீது படாதா?' என்று ராமதாஸ் ஏங்கித் திரியும் காலம் இது. இருந்தாலும், பென்னாகரம் இடைத் தேர்தலில் பா.ம.க வாங்கிய 40 ஆயிரம் வாக்குகள் ராமதாஸூக்கு மரியாதையைக் கூட்டியிருக்கிறது. 'ராமதாஸூக்குப் பழைய செல்வாக்கு இல்லை' என்று உளவுத் துறை சொன்னதையும் மீறி, தனது செல்வாக்கை ராமதாஸ் நிரூபித்துக் காட்டினார். எனவே, அன்புமணிக்கு எம்.பி. பதவி, பா.ம.க மீதான வழக்குகளைத் திரும்பப் பெறுவது என்று கொஞ்சம் சார்பான மன நிலைக்கு கருணாநிதி மாறி வருகிறார். இதை அண்ணன், தம்பிகளான அழகிரியும் ஸ்டாலினும் விரும்பவில்லை.

'பா.ம.க. நம் கூட்டணிக்கு வரட்டும். அதுபற்றிக் கவலை இல்லை. அதற்காக ஒரு எம்.பி. பதவியைக் கொடுத்துதான் இழுக்க வேண்டுமா?' என்று அழகிரி கேட்டதாக தி.மு.க. வட்டாரம் சொல்கிறது. 'பா.ம.க. நமது அணிக்குள் வந்தால் வட மாவட்டங்களில் பல தொகுதிகளை அவர்களுக்குத் தாரை வார்க்க வேண்டி வரும். இதனால், தனது ஆதரவாளர்கள் வெற்றிபெறும் எண்ணிக்கை குறையுமே' என்பது ஸ்டாலினின் கவலை. ஆனால், இதைப்பற்றி எல்லாம் கருணாநிதி யோசிக்கவில்லை. பா.ம.க. தன் அணியில் இணைவதையே அவர் விரும்புகிறார்.

டெல்லி காங்கிரஸ் தலைமையின் சுற்றுவட்டாரம், விஜயகாந்த்தை இணைத்துக்கொள்ளச் சொல்லி இருக்கிறது. ஆனால், இதில் கருணாநிதிக்கு உடன்பாடு இல்லை. தன் மீது விஜயகாந்த் வைத்த விமர்சனங்களைக்கூட மறக்க கருணாநிதி தயாராக இருக்கிறார். ஆனால், காங்கிரஸூக்கும் விஜயகாந்த்துக்கும் சேர்த்து 100 இடங்கள் தேவை என்று சொல்லப்படும் கணக்குதான் அவருக்கு எரிச்சலை ஏற்படுத்துகிறது. அப்ப டிக் கொடுத்தால், அடுத்த முறையும் இதேபோன்ற மைனாரிட்டி அரசையே ஆள வேண்டியிருக்கும். அல்லது அவர்கள் இருவரும் இன்ன பிற கட்சிகளுடன் இணைந்து ஒரு கூட்டணி ஆட்சியை அமைத்துவிட்டால் என்னாவது என்ற பயமும் கருணாநிதிக்கு உண்டு. எனவே, காங்கிரஸின் விஜயகாந்த் கனவை முளையிலேயே முறித்துவிடுவது நல்லது என்று நினைக்கிறார்.

'விஜயகாந்த் தனித்து நின்று வாக்குகளைப் பிரித்தால்தான், தி.மு.க. கூட்டணி பிரச்னை இல்லாமல் வெற்றி பெறும். ஒருவேளை அவர் அ.தி.மு.க-வுடன் ஐக்கியமானால் வெற்றிக்குச் சிக்கல் வரும்' என்று காங்கிரஸில் இருக்கும் சில 'நட்பு' சக்திகள் விஷம அறிவுரைகளைச் சொல்கிறார்கள். 'கருணாநிதியைக் கழற்றிவிட்டு காங்கிரஸ் தனியாக வந்தால், நான் கூட்டணியைப் பற்றி யோசிப்பேன். நீங்கள் கருணாநிதியுடன்தான் இருப்பீர்கள் என்றால், எனக்கு எந்த அட்வைஸூம் பண்ண வேண்டாம்' என்று விஜயகாந்த் தரப்பு பதில் அளித்துள்ளது. என்றாலும், அவரைக் கடைசி வரை தனித்து நிற்கவைப்பதற்கான வேலைகளை அறிவாலயமும் டெல்லியும் இணைந்து பார்க்கும்.

சரத்குமாருக்கு ஒரு முக்கியத்துவம் தர வேண்டும் என்று கருணாநிதியை ராதிகா சந்தித்து கோரிக்கைவைத்தார். ஆனால், 'முன்கூட்டியே முக்கியத்துவம் தராமல் தேர்தல் நேரத்துத் தேவைக்காக அவரைப் பயன்படுத்திக்கொள்ளலாம்' என்பது கருணாநிதியின் திட்டமாக இருக்கிறது.

இந்த நிலையில், காங்கிரஸின் வாக்கு வங்கி, பா.ம.க. மற்றும் விடுதலைச் சிறுத்தைகளுக்கு வட மாவட்டங்களில் இருக்கும் செல்வாக்கு, மத்திய - மாநில அரசுகளின் அதிகார பலம், அரசு ஊழியர்களின் ஆதரவு, இலவச டி.வி-யை வாங்கியவர்கள், ஒரு ரூபாய் அரிசியை வாங்குபவர்கள், ஸ்டாலின் மற்றும் குஷ்புவின் பிரசார பலம், அழகிரியின் தேர்தல் வேலைகள் ஆகியவற்றைவைத்து மீண்டும் அதிகாரத்தைக் கைப்பற்றலாம் என்பது கருணாநிதி போட்டுவைத்திருக்கும் மனக் கணக்கு!

ஜெயலலிதா ஜெயிக்கும் சூத்திரம்!

மு.க. கணக்கு... ஜெ. சூத்திரம்!

ம.தி.மு.க., இந்திய கம்யூனிஸ்ட் கட்சி, மார்க்சிஸ்ட் கம்யூனிஸ்ட் ஆகிய மூன்றும் இன்றைய நிலையில் அ.தி.மு.க-வுடன் ஐக்கியமாகி உள்ளன. இதில் மார்க்சிஸ்ட் கட்சியின் செயல்பாடுகள் ஜெயலலிதாவுக்கு சிறு மனக்கசப்பை ஏற்படுத்தினாலும் சமீபத்தில் நடந்த பந்த் பேச்சுவார்த்தைக்கு அவர்களை அழைத்ததன் மூலமாக இவர்களையும் கூட்டணிக்குள் இணைத்துக்கொள்வது தவிர்க்க முடியாத விஷயமாக நினைக்கிறார். சிறுதாவூர் விவகாரத்தை முன்வைத்து இவர்களுக்குள் மனக்கசப்பு ஏற்படலாம் என்று கருணாநிதியும் எதிர்பார்த்துக் காத்திருக்கிறார். 'சிறுதாவூர் விஷயத்தை நான் சட்டரீதியாகச் சந்திப்பேன். கூட்டணிக்காக அந்த விவகாரத்தை அவர்கள் கிளப்பக் கூடாது என்று கோரிக்கை வைக்க மாட்டேன்' என்று தன்னைச் சந்தித்த தலைவர் ஒருவரிடம் ஜெயலலிதா சொல்லியிருப்பதை வைத்துப் பார்த்தால், மார்க்சிஸ்ட் கட்சியுடன் மோதல் வராது என்றே நினைக்கத் தோன்றுகிறது. 'காங்கிரஸூக்கு எதிரான அணியுடன்தான் நாங்கள் இருப்போம்' என்று மார்க்சிஸ்ட் செயலாளர் ஜி.ராமகிருஷ்ணனும் உறுதிப்படுத்தியிருக்கிறார்.

மு.க. கணக்கு... ஜெ. சூத்திரம்!

இந்த அணியை வைத்துத்தான் ஜெயலலிதா, இடைத் தேர்தலையும் நாடாளுமன்றத் தேர்தலையும் சந்தித்தார். ஆனால், வெற்றி என்பது சாத்தியமாகவில்லை. அப்போது உடன் இருந்த பா.ம.க-வும் இப்போது இல்லை. எனவே, இவர்களை வைத்து ஆட்சியைப் பிடிக்க முடியாது என்பது ஜெயலலிதாவுக்குத் தெரியும். அவருக்கு இன்னமும் காங்கிரஸ் மயக்கம் தீர்ந்தபாடில்லை. காங்கிரஸ் மேலிடத்தில் இருக்கும் தனது ஆதரவாளர்களைவைத்து, சோனியாவின் நல்லெண்ணத்தைப் பெற கடந்த இரண்டு ஆண்டுகளாக அவர் எடுத்த அத்தனை முயற்சிகளும் தோற்றுவிட்டன. 'ராகுல்கூட ஜெயலலிதா ஆதரவு மனநிலைக்கு வந்துவிட்டார். ஆனால், சோனியா மனதை மட்டும் கரைக்க முடியவில்லை' என்று டெல்லி பத்திரிகையாளர்கள் மத்தியில் பேச்சு இருக்கிறது. காங்கிரஸை இணைத்துக்கொண்டால், வைகோ மற்றும் கம்யூனிஸ்ட்டுகள் போய்விடுவார்கள் என்று தெரிந்துமே இதற்காகத் துடித்தார். அது நிராசையான நிலையில், விஜயகாந்த் பக்கமாக அவரது பார்வை சமீபகாலமாகப் பட ஆரம்பித்துஇருக்கிறது.

அரசல்புரசலாகத் தனது எண்ணத்தை தே.மு.தி.க. தரப்புக்கு ஜெயலலிதா சொல்லிவிட்ட நிலையில்தான், 'உடன்பாடான கட்சிகளுடன் கூட்டணி வைக்கத் தயார்' என்று வானகரம் திருமண மண்டபத்தில் தீர்மானம் போட்டார் விஜயகாந்த். அதுவரை மக்களுடனும் ஆண்டவனுடனும்தான் கூட்டணி என்று சொல்லி வந்த அவர், டயலாக்கை மாற்றிப் பேச ஆரம்பித்தது அதற்குப் பின்னால்தான். 'விஜயகாந்த் தரப்பு 85 சீட் வரை கேட்கிறது. ஆனால், அம்மா 60 இடங்கள் வரை தருவதற்கு இறங்கி வரலாம்' என்று தோட்டத்துக்கு நெருக்கமானவர்கள்சொல்ல ஆரம்பித்திருக்கிறார்கள். 'நீங்கள் தனித்து நிற்க நிற்க... அது கருணா நிதிக்குத்தான் லாபமாக இருக்கும். கருணாநிதியை வீழ்த்துவது உங்களது லட்சியமாக இருந்தால், ஜெயலலிதாவுடன் சேருவதைத் தவிர, வேறு வழி இல்லை' என்று விஜயகாந்த்துக்கு அவரது நண்பர் கள் ஆலோசனை சொல்ல ஆரம் பித்து இருக்கிறார்கள். ஒரு தொகுதிக்குக் குறைந்தது 8 ஆயிரமும் அதிகபட்சம் 22 ஆயிரம் வாக்குகளும் தே.மு.தி.க-வுக்கு இருக்கிறது. இது நிரந்தரம் என்றாலும், அதை வைத்து தொகுதிகளைக் கைப்பற்ற முடியாது என்ற யதார்த்தத்தை விஜயகாந்த் புரிந்திருக்கிறார். எனவே, முடிவெடுக்க முடியாத குழப்பத்தில்தான் இன்னமும் அவர் இருக்கிறார்.

மு.க. கணக்கு... ஜெ. சூத்திரம்!

விஜயகாந்த் வந்தால் வைகோ வருத்தம் அடையக்கூடும் என்பதையும் ஜெயலலிதா உணர்ந்துள்ளார். யாருக்கு இரண்டாவது இடம் என்ற குழப்பம் அ.தி.மு.க. கூட்டணிக்குள் அப்போது ஏற்படும். அதை எப்படிச் சரிப்படுத்துவார் என்பது வில்லங்கமான கேள்வி. 'இந்தத் தேர்தல் ஜெயலலிதாவுக்கு வாழ்வா, சாவா என்ற பிரச்னைக்குரிய தேர்தல். இதில் ஜெயிக்க எதை வேண்டுமானாலும் செய்ய அவர் தயாராக இருக்கிறார். பழைய பாணியில் 138 இடங்களில் அவர் போட்டியிட்டு, மற்ற இடங்களைக் கூட்டணிக் கட்சிகளுக்கு ஒதுக்கத் தயாராகி வருகிறார்' என்று தோட்டம் அறிந்தவர்கள் சொல்கிறார்கள். 'கருணாநிதியை வீழ்த்துவது மட்டுமே லட்சியமாக இருந்தால், விஜயகாந்த் - வைகோ இருவரும் இணைவதைத் தவிர, வேறு வழி இல்லை. ஜெயலலிதாவுடன் இவர்களும் இணைந்து நின்றால் மட்டுமே இந்தத் தேர்தலைச் சந்திப்பதில் அர்த்தம் இருக்கிறது. இல்லாவிட்டால், இரண்டு மாதங்கள் வெயிலில் அலைந்தது மட்டுமே மிச்சமாக இருக்கும்' என்பதே அரசியலை உன்னிப்பாகக் கவனிப்பவர்களின் கருத்து.

இரட்டை இலைக்கு இன்னமும் இருக்கும் செல்வாக்கு, எம்.ஜி.ஆர். பக்தர்கள், விஜயகாந்த்தின் வாக்கு வங்கி, வைகோவின் பிரசார பலம், இரண்டு கம்யூனிஸ்ட்டுகளின் தேர்தல் பணிகள், அழகிரி - ஸ்டாலின் ஆட்களின் உள்குத்து, ஆளுங்கட்சி மீதான அதிருப்தி, பணம் வாங்கினாலும் தான் நினைத்த கட்சிக்குத்தான் வாக்கு அளிப்போம் என்ற பென்னாகரம் மக்கள் அளித்துள்ள நம்பிக்கை... ஆகியவற்றைத் தனது வெற்றிக் கான சூத்திரங்களாக ஜெயலலிதா கணித்துவைத்திருக்கிறார்.

இருந்தாலும், 'மக்கள் மனசுல யாரு' என்பது இந்தக் கூட்டல், கழித்தலுக்கு அப்பாற்பட்டது என்பதைத்தான் இதுவரை நடந்த எல்லாத் தேர்தல்களும் நிரூபித்து இருக்கின்றன!

 
மு.க. கணக்கு... ஜெ. சூத்திரம்!
மு.க. கணக்கு... ஜெ. சூத்திரம்!
                            
      
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism