அந்தர் பல்டிகள் அடிப்பதில் டாக்டர் ராமதாஸ் சளைத்தவர் அல்ல!

இன்றைய நிலவரப்படி, ஜெயலலிதா அணியில் இருந்து தன்னைத்தானே விடுவித்துக்கொண்டுவிட்டார் ராமதாஸ். திண்டிவனத்தில் நடந்த கொலை வழக்கில் தன்னையும் தனது குடும்பத்தினரையும் இணைத்துப் பழிவாங்க அ.தி.மு.க. துடிக்கிறது என்று காரணம் சொல்கிறார். ஆக, ஐயா இப்போது அந்த அணியில் இல்லை. வெளியில் வந்தவர், 'மூன்றாவது அணி' கோஷத்தை உரக்கச் சொல்லத் துவங்கி இருக்கிறார். இதை ஒட்டி கட்சிகளின் கலர்கள் மாறும் என்று கருத வாய்ப்புகள் அதிகம் இருக்கின்றன!

ராமதாஸின் நினைப்பு:

கருணாநிதியும் ஜெயலலிதாவும் இல்லாத அணி என்பதுதான் ராமதாஸின் நினைப்பு. அதற்கு அவர் துணையாக அழைப்பது காங்கிரஸை. டெல்லிக்குச் சென்று சோனியாவைப் பல மாதங்களுக்கு முன் பார்த்த ராமதாஸ், தன் ஆசையை அப்போதே சொன்னார். 'காங்கிரஸ் தலைமையில் பா.ம.க-வும் இணைந்து ஆட்சி அமைத்தால், வெளியில் இருந்து அ.தி.மு.க-வும் ஆதரிக்கும்' என்று ராமதாஸ் சொன்னதாக கருணாநிதிக்கு உளவுத் துறை தகவல் கொடுத்தது. 'என்னுடைய ஆட்சியைக் கவிழ்க்கச் சதி' என்று திரும்பத் திரும்ப கருணாநிதி சொல்லி வந்தது இதைத்தான். எனவே, தி.மு.க-வுடன் காங்கிரஸ் வைத்திருக்கும் ஐக்கியத்தை உடைத்து ஓர் அணியைத் தொடங்கினால் மட்டுமே அது கருணாநிதி - ஜெயலலிதாவுக்கு மாற்றாக இருக்க முடியும் என்று நினைக்கிறார். 'இனியும் இரண்டு அணிகளில் எதற்குப் போனாலும் மரியாதை கிடைக்காது. நம்மை நம்பி இருக்கின்ற அணியை நாமே உருவாக்க வேண்டும் என்று ராமதாஸ் நினைக்கிறார்' என்று சொல்கிறது பாட்டாளி வட்டாரம்.

இதை வெளிப்படையாகச் சொல்லாமல்,

கொஞ்ச நாளைக்கு அடக்கி வாசிக்க முடிவெடுத்து இருக்கிறார் மருத்துவர்.

காங்கிரஸின் கனவு:

'தமிழகத்தில் அடுத்த தேர்தலில் காங்கிரஸ் ஆட்சியை அமைக்க வேண்டும்' என்பது ராகுல் காந்தியின் கனவு. இளைஞர்களை உள்ளே இணைத்து காங்கிரஸைப் பலப்படுத்தவும், முக்கியப் பிரபலங்களைக் கட்சிக்குள் கொண்டுவந்து சேர்க்கவும் களம் இறங்கியுள்ளது ராகுலின் படை. முதல் கட்டமாக ராகுல் நடத்திய ஓட்டு வேட்டை கட்சிக்காரர்களுக்கு உற்சாகம் கொடுத்தது. அதற்கு இணையாக கருணாநிதிக்குக் கடுப்பைக் கிளப்பியது. 'யார் வந்து எதைச் செய்தாலும், தி.மு.க-வை யாராலும் அழிக்க முடியாது' என்று சம்பந்தம் இல்லாமல் ஒரு கல்யாண வீட்டில் அவர் கர்ஜிக்க இதுதான் காரணம்.

ஆட்சியைப் பிடிக்க வேண்டுமானால், தனக்குப் பின்னால் வலுவான கட்சிகளையும் சேர்க்க வேண்டும் என்றும் காங்கிரஸ் தலைமை நினைக்கிறது. காங்கிரஸ் குறிவைப்பது விஜயகாந்த்தை. 'காங்கிரஸ் தலைமையில் ஆட்சி' என்ற வார்த்தைதான் இருவரையும் இணைக்கத் தடையாக இருப்பது. தன் தலைமையை ஏற்க கேப்டன் தயாராக இருந்தால், என்றைக்கோ தி.மு.க-வை காங்கிரஸ் கழற்றிவிட்டிருக்கும். இருந்தாலும், தனது கனவை நிறைவேற்றுவதற்கான காட்சி மாற்றத்தை எதிர்பார்த்துதான் காங்கிரஸ் காத்திருக்கிறது.

கருணாநிதியின் கணக்கு:

மத்தியில் தனக்கான மரியாதை இல்லை என்பதை மத்திய அமைச்சரவை பதவி ஏற்பின்போதே கருணாநிதி உணர்ந்துகொண்டார். 'காங்கிரஸ் எப்போது வேண்டுமானாலும் காலை வாரும்' என்று அப்போதே நினைத்தார். ராகுலின் வருகை அதற்கு அதிகமாகவே கட்டியம் கூறியது. இன்றைய நிலையில், சோனியா தவிர அவரை ஆதரிக்கும் கரம் இன்னொன்று இல்லை என்பதே யதார்த்தம்.
எனவேதான் காங்கிரசுக்கு மாற்று யோசனைகளைச் செய்ய ஆரம்பித்தார். அவரது கண்களுக்கு முதலில்பட்டது பா.ம.க-வும் கம்யூனிஸ்ட் கட்சிகளும்தான். வன்னியர் சங்க அறக்கட்டளைக்குச் சம்பந்தமான சொத்துக்களை அரசாங்கம் திரட்டும் என்ற அறிவிப்புக்குப் பின்னால் ராமதாஸ் கொஞ்சம் அடங்கி வருவார் என்று எதிர்பார்த்தார் கருணாநிதி. நினைத்தது மாதிரியே சமாதானக் கடிதம் அனுப்பினார் ராமதாஸ். உடனேயே, 'ராமதாஸை எதிர்த்து முரசொலியில் எழுத வேண்டாம்' என்று கட்டளை போட்டார் கருணாநிதி. இது ஜெயலலிதாவுக்குத் தெரிய வந்தது. அவர்களுக்குள் இப்படி ஒரு ரகசிய உறவா என்று நினைத்த ஜெயலலிதா கோபம் பாய்ச்சி, கொலை வழக்கை முடுக்கிவிட உத்தரவிட்டார். கருணாநிதியின் முதல் கணக்கு ஓ.கே.

அடுத்ததாக மார்க்சிஸ்ட்டுகள் மனப்பூர்வமாக வருவார்கள் என்பது கருணாநிதியின் கணக்கு. ஏற்கெனவே அ.தி.மு.க-வுக்கும் சி.பி.எம். காம்ரேட்களுக்கும் வெளிப்படையாக அறிக்கை யுத்தம் நடந்தது. 'அ.தி.மு.க. சரியாகச் செயல்படவில்லை' என்றார்கள். கருணாநிதியுடன் திருமண மேடைகளில் என்.வரதராஜன் வந்து போகிறார். எனவே, அவர்களும் சிக்கல் இல்லை. தா.பாண்டியன் மட்டும்தான் பொல்லாத கோபத்தில் இருக்கிறார். அதை டெல்லித் தலைமை மூலமாகச் சரிசெய்துவிடலாம் என்று திட்டமிடுகிறார் கருணாநிதி. எனவே, காங்கிரஸ் கழன்றுகொள்ளும்போது வேறு பலர் வேகமாக வர வழி அமைத்துவிட்டார் அவர்.

விஜயகாந்த்தின் காத்திருப்பு:

'மக்களோடும் கடவுளோடும்தான் கூட்டணி' என்று இதுவரை சொல்லி வந்தவர் விஜயகாந்த். தொடர்ந்து அனைத்துத் தேர்தல்களிலும் தனி அணியாகத்தான் இருந்தார். வாக்கு சதவிகிதம் சொல்லிக்கொள்வது மாதிரி கூடினாலும், இது தொகுதிகளைப் பறித்துக் கொடுக்கவில்லை என்ற வருத்தம் விஜயகாந்த்துக்கு இருக்கிறது. எனவே, ஒரு கூட்டணியை உருவாக்கினால் தான் இதுவரை கிடைத்துள்ள மரியாதையைத் தக்கவைக்க முடியும் என்று நினைக்க ஆரம்பித்திருக்கிறார்.

அவரது மனம் காங்கிரஸை நோக்கித்தான் இருக்கிறது. 'தி.மு.க-வைவிட்டு அவர்கள் விலகி வரட்டும் பார்க்கலாம்' என்று வெளிப்படையாகவே சொன்னார். ஆனால், விஜயகாந்த் தலைமையை காங்கிரஸ் ஏற்றால் மட்டுமே இந்தக் கூட்டணி ஏற்பட வாய்ப்பு இருக்கிறது. இதற்கு டெல்லி மனதுவைக்க வேண்டும். மார்க்சிஸ்ட் தலைமையுடனும் மாநிலப் பொறுப்பாளர்களுடனும் விஜயகாந்த் ஏற்கெனவே சந்திப்புகள் செய்துள்ளார். எனவே, தேர்தல் காலத்தில் இந்தக் கட்சிகளுக்கு அவர்களது கூட்டணியில் வருத்தங்கள் ஏற்பட்டால் வாரி அணைத்துக்கொள்ளலாம் என்ற மனமாற்றத்துக்கு கேப்டன் வந்துள்ளார்.

ஜெயலலிதாவின் எதிர்பார்ப்பு:

நாடாளுமன்றத் தேர்தலில் தான் அமைத்த வலுவான கூட்டணி தோற்றுப்போனதில் ஜெயலலிதாவுக்கு அதிக வருத்தம். இதை அவர் கொஞ்சமும் எதிர்பார்க்கவில்லை. 'தமிழகத்தைப் பொறுத்தவரை கூட்டணிக் கணக்குதான் என்றைக்கும் ஜெயிக்கும்' என்பார்கள். ஆனால், அது செல்லுபடி ஆகவில்லை. எனவே, 'பலமற்ற கட்சிகளை சும்மா பேச்சுக்கு சேர்த்துக்கொண்டு வளர்த்துவிடுவதில் அர்த்தம் இல்லை' என்று நினைக்க ஆரம்பித்திருக்கிறார். ஆடு புலி ஆட்டம் ஆடாமல் உறுதியாக இருக்கும் வைகோ நீங்கலாக, மற்றவர்களைப்பற்றி அதிகம் கவலைப்படவில்லை ஜெயலலிதா.

'கருணாநிதியின் வாக்கு வங்கியை நிறையக் கட்சிகளைச் சேர்ப்பதால் உடைக்க முடியாது' என்று நினைக்கும் ஜெயலலிதா, தி.மு.க. பாணியிலான தேர்தல் வேலைகளை ஒழுங்காகப் பார்த்தாலே போதும் என்று கருதுகிறார். கட்சியைப் பலப்படுத்துவது, பொறுப்பாளர்களை முடுக்கிவிடுவது, பண பலம் உள்ளவர்கள் கையில் அதிகாரத்தைக் கொடுப்பது போன்ற காரியங்களில் இறங்க இருக்கிறார்.

மொத்தத்தில், அத்தனை கட்சிகளின் நிறங்களும் இன்னும் சில மாதங்களில் மாறப் போகின்றன!

பார்க்கலாமே!