Published:Updated:

தலையங்கம்

தலையங்கம்

தலையங்கம்

தலையங்கம்

Published:Updated:
தலையங்கம்
தலையங்கம்

திகாரப் பல்லக்கில் செருக்கோடு அமர்ந்துகொண்டு வெட்கம் எதுவும் இன்றி ஊழல் செய்வோருக்கு உரிய தண்டனை கிடைக்க வேண்டும் என்ற 42 ஆண்டு காலக் கோரிக்கை, அண்மையில் தெருக்களில் தீயாகக் கனன்றது. ஒற்றைக் குரலாக தொடங்கிய அந்த கோஷத்துக்கு ஆதரவாக... நாடு முழுவதும் அலை அலையாக மக்கள் திரண்ட அதிசயமும் நிகழ்ந்தது.

அண்ணா ஹஜாரே மற்றும் அவருடையதோழர்கள் முன்வைத்த 'ஜன் லோக்பால்’ கோரிக்கைக்கு முதலில் செவி சாய்ப்பதுபோல தோற்றம் காட்டிய அரசியல் சக்திகள், அவர்களின் ஒற்றுமை மற்றும் நம்பகத்தன்மையைக் குலைக்கும் விதமாக சூழ்ச்சிகளைக் கட்டவிழ்த்து விடுகின்றன இப்போது!

அவதூறு கிளப்பி, பலவீனப்படுத்தி பின்வாங்கச் செய்துவிட்டால், மக்களையும் மறக்கவைத்து... தங்கள் சாம்ராஜ்யத்தைத் தொடரலாம் என்பதே அந்தச் சக்திகளின் நோக்கம்!

இதில் ஆளும் கட்சி என்றும் எதிர்க் கட்சி என்றும் பேதம் பார்க்க முடியாது. அதிகார நாற்காலியில் யார் வந்து அமர்ந்தாலும், பதவியைக் கேடயமாகத் தூக்கிப் பிடித்து சட்டத்தின் கரங்கள் தங்களைத் தீண்டாமல் 'பாதுகாத்து'க் கொண்டு... தட்டிக் கேட்கவே ஆளில்லாமல் தவறுகளைத் தொடருகிற வெறி அரசியலில் எல்லோருக்கும் பொதுவாகிவிட்டது!  

அண்ணா ஹஜாரே என்பது கண்ணாடியில் தெரியும் ஒரு பிம்பம் மட்டும்தான். ஊழல், அடக்குமுறை, அராஜகம் ஆகியவற்றுக்கு எதிராகக் காலம் காலமாக கொதித்துக் கொண்டு இருக்கும் கோடிக்கணக்கான மக்கள்தான் அந்த பிம்பத்தின் நிஜ உருவம். அதை உணராமல், 'மாற்றம்' வேண்டிக் குரல் கொடுக்கும் அந்தக் கண்ணாடியை உடைத்து விரிசலாக்க நினைப்பவர்களுக்கு 'ஏமாற்றம் வரும்' நாள் நெருங்குகிறது!

புரையோடிப் போன ஒரு புண்ணைத் திறந்து காட்டியதால் ஏற்பட்டு இருக்கும் வலிதான், அண்ணா ஹஜாரேவின் பின்னால் திரண்டவர்கள் எழுப்பும் ஒலி! இனியும்கூட அந்த வலியைத் தீர்க்க வழிவிடாமல், பழையபடியே 'ஆறப் போடும்' தந்திரத்தைக் கையாண்டால், அது ஜனநாயக முலாம் பூசப்பட்ட சர்வாதிகார அணுகுமுறையாகவே பார்க்கப்படும்.

மக்களின் எழுச்சி, அதிகாரத்தை எதிர்க்கும் புரட்சி என்று அறுவை சிகிச்சை அதுவாகவே அரங்கேறிவிடும், ஜாக்கிரதை!