Published:Updated:

இளைஞர் தி.மு.க முதல் செயல் தலைவர் வரை...! மு.க. ஸ்டாலினின் பயணம்

இளைஞர் தி.மு.க முதல் செயல் தலைவர் வரை...! மு.க. ஸ்டாலினின் பயணம்
இளைஞர் தி.மு.க முதல் செயல் தலைவர் வரை...! மு.க. ஸ்டாலினின் பயணம்

இளைஞர் தி.மு.க முதல் செயல் தலைவர் வரை...! மு.க. ஸ்டாலினின் பயணம்

சென்னையில் இன்று நடைபெற்ற தி.மு.க பொதுக்குழுவில் கட்சியின் செயல் தலைவராக சட்டமன்ற எதிர்க்கட்சித் தலைவரும், தி.மு.க பொருளாளருமான மு.க. ஸ்டாலின் அதிகாரப்பூர்வமாக நியமிக்கப்பட்டுள்ளார். செயல் தலைவராக தற்போதுதான் ஸ்டாலின் நியமிக்கப்பட்டுள்ள போதிலும், கடந்த சில ஆண்டுகளாகவே கட்சியின் தலைவர் போலவே அவர் செயல்பட்டுக் கொண்டிருக்கிறார். கருணாநிதியின் மகன் என்பதைத் தாண்டி, கட்சியில் அவர் படிப்படியாக வளர்ந்து வந்துள்ளார். 1966-ல் இளைஞர் தி.மு.க-வை ஆரம்பித்து அரசியலில் குதித்த ஸ்டாலின், 2017-ம் ஆண்டு தி.மு.கவின் செயல் தலைவராகியிருக்கிறார். ஸ்டாலினின் ஆரம்பகால அரசியல் முதல் தற்போது செயல் தலைவராக உயர்ந்திருப்பது வரை ஆண்டுவாரியாக அவரது செயல்பாடுகள்...

*1966-ம் ஆண்டு, தி.மு.க தலைவர் கருணாநிதி வீடு அமைந்துள்ள சென்னை கோபாலபுரம் பகுதியில் சில இளைஞர்கள் ஒன்றுகூடி இளைஞர் தி.மு.க என்ற அமைப்பை ஆரம்பிக்கின்றனர். இளைஞரான மு.க ஸ்டாலின்தான் இந்த அமைப்பை உருவாக்கி, வழிகாட்டியாக இருந்துள்ளார்.. ஆண்டுதோறும் அண்ணாவின் பிறந்த நாளை கொண்டாடுவதுதான் இளைஞர் தி.மு.க-வின் லட்சியமாக இருந்துள்ளது.

*1968-ம் ஆண்டு அண்ணா பிறந்தநாள் விழாவுக்கு அண்ணாவையே அழைக்க முடிவு செய்தார் ஸ்டாலின். அப்போது, தமிழக முதல்வராக இருந்த அண்ணா, உடல்நலம் குன்றியிருந்தார். இருந்தாலும், விழாவுக்கு வர அண்ணா ஒப்புக் கொண்டார். இதுவே ஸ்டாலினின் அரசியல் வாழ்க்கையின் ஆரம்பமாக இருந்தது. ஆனால், சிகிச்சைக்காக அண்ணா அமெரிக்கா சென்று விட்டதால் அந்த விழா அப்போது நடக்கவில்லை. அண்ணாவின் மறைவுக்குப் பிறகும் அவரது பிறந்தநாள் விழாவை இளைஞர் தி.மு.க தொடர்ந்து கொண்டாடியது.

*1969-ம் ஆண்டு அண்ணா மணிவிழாவை ஸ்டாலின்  நடத்தி அரசியலில் அறிமுகமானார். 1971 சட்டமன்ற தேர்தலில் காமராஜரும், ராஜாஜியும் ஒரே அணியாக இருந்து, தி.மு.க-வை எதிர்த்தார்கள். அந்தத் தேர்தலில் சைதை தொகுதியில் போட்டியிட்ட கருணாநிதிக்கு ஆதரவாக, வீதிவீதியாகச் சென்று பிரசாரம் செய்தார் ஸ்டாலின். அப்போதுதான் அவர் மக்கள் மத்தியில் முதல் முதலில் அறிமுகமானார்.

*1975-ம் ஆண்டு டிசம்பரில், தி.மு.க அரசு டிஸ்மிஸ் செய்யப்பட்ட நிலையில், 1976-ம் ஆண்டு தி.மு.கவின் முன்னணி தலைவர்கள் மிசா சட்டத்தில் கைது செய்யப்பட்டனர். அப்போது கைது செய்யப்பட்டவர்களில் 23 வயதான ஸ்டாலினும் ஒருவர். அந்த நேரத்தில், அவருக்குத் திருமணமாகி ஐந்து மாதங்களே ஆகியிருந்தது.

*1983-ம் ஆண்டு தி.மு.க-வின் இளைஞர் அணி செயலாளராக ஸ்டாலின் தேர்ந்து எடுக்கப்பட்டார். வெண் சீருடை, கறுப்பு சிவப்பு கழுத்து பட்டை, சிவப்பு தொப்பி என இளைஞர் அணியின் தோற்றமே புதுமையாக இருந்தது. மாவட்டத்துக்கு ஒரு அமைப்பாளர், இரண்டு துணை அமைப்பாளர், 500 இளைஞர்கள் கொண்ட படை என கட்சிக்குள் புது ரத்தத்தை புகுத்தினார் ஸ்டாலின்.

*1984-ம் ஆண்டு சட்டமன்ற தேர்தலில் ஆயிரம் விளக்கு தொகுதியில் போட்டியிடும் வாய்ப்பு ஸ்டாலினுக்கு கிடைத்தது. ஆனால், அங்கு அவர் தோல்வியைத் தழுவினார். 

*1989-ம் ஆண்டு அதே ஆயிரம் விளக்கு தொகுதியில் மீண்டும் போட்டியிட்டு வெற்றிபெற்றார். இதன்மூலம் முதல் முறையாக சட்டமன்றத்துக்குள் நுழைந்தார். 

*1996-2001 வரை சென்னை மாநகர மேயராக ஸ்டாலின் பணியாற்றினார். மக்களால் தேர்தேடுக்கப்பட்ட முதல் சென்னை மேயர் என்ற பெருமை ஸ்டாலினுக்குக் கிடைத்தது. அதுவரை, மாநகராட்சி உறுப்பினர்கள்தான் மேயரைத் தேர்ந்தேடுக்கும் முறை இருந்தது. 

*2001-ம் ஆண்டு ஸ்டாலின் மீண்டும் மேயராகத் தேர்ந்தெடுக்கப்பட்டார். அதே ஆண்டு நடந்த சட்டமன்ற தேர்தலில் ஆயிரம் விளக்கு தொகுதியில் வெற்றி பெற்றார். 'ஒரே நபர் இரு அரசுப் பதவிகளில் இருக்க முடியாது' என்று அப்போது ஆட்சியில் இருந்த அ.தி.மு.க அரசு சட்டத் திருத்தம் கொண்டுவந்ததால், மேயர் பதவியை ராஜினாமா செய்தார். 

*2003-ல் நடந்த தி.மு.க பொதுக்குழுவில் தி.மு.க. துணைப் பொதுச் செயலாளராக ஸ்டாலின் தேர்ந்தெடுக்கப்பட்டார்.

*2006-ம் ஆண்டு தமிழகத்தில் மீண்டும் தி.மு.க ஆட்சி அமைந்த நிலையில், முதல் முறையாக ஸ்டாலின்  உள்ளாட்சித்துறை அமைச்சரானார்.

*2008-ம் ஆண்டு தி.மு.கவின் பொருளாளராகத் தேர்வு செய்யப்பட்டார். 2009-ம் ஆண்டு தமிழக முதல்வர் கருணாநிதி, ஸ்டாலினுக்கு துணை முதல்வர் பதவி வழங்கினார். 2011-ம் ஆண்டுவரை இப்பதவியை ஸ்டாலின் வகித்தார்.

*2011 சட்டமன்ற தேர்தலில் கொளத்தூர் தொகுதியில் போட்டியிட்டு வெற்றி பெற்றார். 

*2016 சட்டமன்ற தேர்தலில் மீண்டும் கொளத்தூர் தொகுதியில் வெற்றிபெற்று, சட்டமன்ற எதிர்க்கட்சி தலைவரானார்.

*தி.மு.க தலைவர் கருணாநிதியின் உடல்நிலை குன்றியுள்ள நிலையில், கட்சியின் செயல்தலைவராக ஸ்டாலின் நியமிக்கப்பட்டுள்ளார்.தி.மு.கவில் செயல் தலைவர் என்ற பதவி இதுவரை இல்லாதது. இப்போதுதான் முதல்முறையாக  செயல்தலைவர் என்ற ஒரு பதவி உருவாக்கப்பட்டு ஸ்டாலின் அப்பதவியில் நியமிக்கப்பட்டுள்ளார்.
 
- ஆ.நந்தகுமார்

அடுத்த கட்டுரைக்கு