Published:Updated:

ஆளுநர் வித்யாசாகர் ராவ் மகாராஷ்டிராவில் செய்ததை இங்கும் செய்வாரா?

ஆளுநர் வித்யாசாகர் ராவ் மகாராஷ்டிராவில் செய்ததை இங்கும் செய்வாரா?
News
ஆளுநர் வித்யாசாகர் ராவ் மகாராஷ்டிராவில் செய்ததை இங்கும் செய்வாரா?

ஆளுநர் வித்யாசாகர் ராவ் மகாராஷ்டிராவில் செய்ததை இங்கும் செய்வாரா?

மிழக அரசியலின் அடுத்த காட்சி இப்போது ஆளுநர் வித்யாசாகர் ராவைச் சுற்றி நகர்ந்து வருகிறது. ராஜினாமா செய்யப்போவதாகக் கொடுத்த கடிதத்தை ரத்து செய்யும்படி பன்னீர் செல்வம் ஆளுநரிடம் சொல்லி இருக்கிறார். இன்னொருபுறம் "என்னை ஆட்சி அமைக்க அழைக்க வேண்டும்" என்று எடப்பாடி பழனிச்சாமி ஆளுநரிடம் கடிதம் கொடுத்து இருக்கிறார். ஆனால், எல்லாவற்றையும் வாங்கி வைத்துக் கொண்டு எந்த ஒரு முடிவும் எடுக்காமல் ஆளுநர் வித்யாசாகர் ராவ் தொடர்ந்து மெளனம் காத்து வருகிறார். அவரது மெளனத்துக்கு அர்த்தம் தெரியாமல் தமிழகத்தின் அரசியல் ஸ்திரத் தன்மை கேள்விக்குறியாகி இருக்கிறது.

கவர்னர் மனதில் என்ன இருக்கிறது?

வித்யாசாகர் ராவ், மகாராஷ்டிராவின் ஆளுநராகவும் இருக்கிறார். மகாராஷ்டிராவில் கடந்த 2014-ம் ஆண்டு அக்டோபரில் சட்டப்பேரவைத் தேர்தல் நடைபெற்றது. மொத்தம் உள்ள 288 இடங்களில் 145 இடங்களைப் பெறுபவர்தான் ஆட்சி அமைக்க முடியும். ஆனால், தேர்தலில் யாருக்கும் பெரும்பான்மை கிடைக்கவில்லை.  

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

பி.ஜே.பி 122 இடங்களில் மட்டுமே வெற்றி பெற்றிருந்தது.சிவசேனா 45 இடங்களைப் பிடித்தது. சிவசேனா கட்சி பி.ஜே.பி கூட்டணியில் சேர முடியாது என்று முரண்டு பிடித்தது. தேசியவாத காங்கிரஸ் 42 இடங்களைப் பிடித்திருந்தது.

பி.ஜே.பி சட்டமன்றக் குழுத் தலைவராக பட்நாவிஸ் தேர்ந்தெடுக்கப்பட்டார். ஆட்சி அமைக்க அழைப்பு விடுக்குமாறு ஆளுநர் வித்யாசாகர் ராவிடம் கடிதம் கொடுத்தார். அவருக்கு முதலமைச்சராக பதவிப் பிரமாணம் செய்து வைத்தார் வித்யாசாகர் ராவ். பெரும்பான்மையை நிரூபிக்க வேண்டும் என்று உத்தரவிட்டார். அதன்படி 2014-ம் ஆண்டு நவம்பர் 12-ம் தேதி மகாராஷ்டிரா சட்டசபை கூடியது. பட்னாவிஸ் மீது நம்பிக்கை கோரும் தீர்மானத்தை சபாநாயகர் வாசித்தார்.

இந்தத் தீர்மானத்துக்கு பி.ஜே.பி-ஐயை சேர்ந்த எம்.எல்.ஏ-க்கள் குரல் வாக்கெடுப்பு மூலம் ஆதரவு தெரிவித்தனர். சிவசேனா, காங்கிரஸ் கட்சி எம்.எல்.ஏ-க்கள் குரல் ஓட்டுக்கு எதிர்ப்புத் தெரிவித்தனர். டிவிஷன் ஓட்டெடுப்பு கேட்டனர். ஆனால், அதற்கு சபாநாயகர் வாய்ப்பளிக்கவில்லை. தேசியவாத காங்கிரஸ் கட்சி பி.ஜே.பி-க்கு ஆதரவு அளிக்கவும் இல்லை, எதிர்ப்புத் தெரிவிக்கவும் இல்லை. எனவே, பி.ஜே.பி எம்.எல்.ஏ-க்கள் அளித்த ஆதரவின் அடிப்படையில் பட்னாவிஸ் அரசு நம்பிக்கை வாக்கெடுப்பில் வென்றதாக சபாநாயகர் அறிவித்தார். இதனை  ஆளுநர் வித்யாசாகர் ராவ் ஏற்றுக்கொண்டார்.

இத்தனைக்கும் சிவசேனா, காங்கிரஸ் கட்சிகள் சார்பில் ஆளுநர் வித்யாசாகர் ராவிடம் புகார் தெரிவிக்கப்பட்டது. மீண்டும் ஒருமுறை பெரும்பான்மையை நிரூபிக்கும்படி வலியுறுத்த வேண்டும் என்று கேட்டனர். ஆனால், ஆளுநர் வித்யாசாகர் அதையெல்லாம் பொருட்படுத்தவே இல்லை. ஒரு கட்டத்தில் சிவசேனாவே பி.ஜே.பி கூட்டணியில் இணைந்தது என்பது தனிக்கதை. இப்போது தமிழகத்தை கூடுதல் பொறுப்பாகக் கவனித்து வரும் வித்யாசாகர் மனதில் இருப்பதும் அதே போன்ற ஒரு திட்டம்தான் என்கின்றனர்.

முதல்வராக பொறுப்பு ஏற்பவர்கள் தங்களுக்கு உரிய பலத்தை சட்டசபையில் நிரூபிக்கும்போது குரல் ஓட்டெடுப்பு மூலம் பெரும்பான்மையை நிரூபிக்க வாய்ப்பளிக்கப்படும் என்று கூறப்படுகிறது. அப்படி ஒரு வாய்ப்பு அளிக்கப்பட்டால் அதிக எம்.எல்.ஏ-க்களை கையில் வைத்திருக்கும் எடப்பாடிக்கு முதல்வாய்ப்பு அளிக்கப்படும். அதில் சிக்கல் ஏற்பட்டால் அடுத்ததாக அதிக எம்.எல்.ஏ-க்களை கையில் வைத்திருக்கும் தி.மு.க-வுக்கும் வாய்ப்பளிக்கப்படலாம் என்று தெரிகிறது. திராவிடர் கழகத்தலைவர் வீரமணி, தி.மு.க-வை ஆட்சி அமைக்க அழைக்க வேண்டும் என்று அறிக்கை வெளியிட்டதும் இதைக் கருத்தில் கொண்டுதான் என்கின்றனர். என்ன நடக்கப்போகிறது?

-கே.பாலசுப்பிரமணி