Published:Updated:

மிஸ்டர் கழுகு: ''மாவட்டச் செயலாளர்கள் மீது கோபம் இருக்கிறது!''

மிஸ்டர் கழுகு: ''மாவட்டச் செயலாளர்கள் மீது கோபம் இருக்கிறது!''

பிரீமியம் ஸ்டோரி
மிஸ்டர் கழுகு: ''மாவட்டச் செயலாளர்கள் மீது கோபம் இருக்கிறது!''

அண்ணா அறிவாலயத்தில் இருந்து வந்துகொண்டு இருப்பதாகத் தகவல் சொன்னார் கழுகார். தி.மு.க மாவட்ட நிர்வாகங்களில் நடக்க இருக்கும் மாற்றங்கள் குறித்த தகவலோடு வந்தார்.

''தேர்தல் தோல்விக்குப் பிறகு அதிரடி மாற்றங்களுக்குத் தயாராகிக்கொண்டு இருக்கிறது தி.மு.க. இதுபற்றிய ஆலோசனை​களைச் சொல்வதற்காக ஒரு குழுவை அமைத்தார் கருணாநிதி. இதில் கலசப்பாக்கம் திருவேங்கடம், திருத்துறைப்பூண்டி கல்யாணசுந்தரம், ஒரத்தநாடு ராஜமாணிக்கம், தங்கம் தென்னரசு, வழக்கறிஞர் கே.எஸ்.ராதாகிருஷ்ணன், ஈரோடு சச்சிதானந்தம் ஆகிய ஆறு பேரை கருணாநிதி நியமித்துள்ளார். மாவட்டக் கழக நிர்வாகங்களை எளிமைப்படுத்தி, மேலும் வலுவாக்குவதற்கான சாத்தியக்கூறுகளை ஆய்ந்து முடிவெடுப்​பதற்கான அமைப்பு என்று இதனைச் சொல்லியிருக்​கிறார்கள். இரண்டு மூன்று நாட்களாக இந்தக் கூட்டம் அண்ணா அறிவாலயத்தில் நடந்துகொண்டு இருக்கிறது. முதல் கூட்டத்தில் கருணாநிதி, அன்பழகன், ஸ்டாலின் ஆகிய மூவரும் பங்கேற்றனர்.''

''ஏதாவது வழிகாட்டுதலை கருணாநிதி அவர்களுக்குக் கொடுத்துள்ளாரா?''

மிஸ்டர் கழுகு: ''மாவட்டச் செயலாளர்கள் மீது கோபம் இருக்கிறது!''

''முதல் நாள் கூட்டத்தில் கலந்துகொண்ட கருணாநிதி, கழகத்தை வலிமைப்படுத்துவது பற்றி முதலில் சில வார்த்தைகள் சொல்லியிருக்கிறார். இறுதியாக, 'மாவட்டச் செயலாளர்கள் மீது கட்சிக்காரர்களுக்கும் மற்ற நிர்வாகிகளுக்கும் அதிகமான கோபம் இருக்கிறது. எனவே, பெரிய மாவட்டங்களை சிறிதாகப் பிரித்து அதிகாரப் பகிர்வு செய்தாக வேண்டும். அதற்கான ஆலோ​சனை​களை நீங்கள் சொல்லுங்கள்’ என்று சொல்லியிருக்கிறார். அதாவது, இப்போது தி.மு.க-வில் இருக்கும் மாவட்ட, மாநகர் கழகங்கள் மொத்தம் 35. அதனை உயர்த்தி மாவட்டச் செயலாளர்களின் எண்ணிக்கையைக் கூட்ட வேண்டும் என்று கருணாநிதி நினைக்கிறார். குறிப்பாக வேலூர், விழுப்புரம் போன்ற பெரிய மாவட்டங்களைப் பிரிக்க நினைக்கிறாராம் கருணாநிதி. ஒரு மாவட்டத்துக்கு நான்கு, ஐந்து சட்டமன்றத் தொகுதி இருந்தால் போதும் என்றும் நினைக்கிறாராம்.

இப்போது வேலூர், விழுப்புரம் ஆகிய மாவட்டங்களில் தலா 11 சட்டமன்றத் தொகுதிகள் உள்ளன. கடலூர் மாவட்டத்தில் 10 சட்டமன்றத் தொகுதிகள் வருகின்றன. திருச்சி மாவட்டத்துக்குள் 9 சட்டமன்றத் தொகுதிகள் இருக்கின்றன. இவற்றை எல்லாம் இரண்டாகப் பிரித்து மற்றவர்களுக்கு வாய்ப்புத் தர வேண்டும் என்று நினைக்கிறார். சில மாவட்டங்களை மூன்றாக, நான்காகப் பிரிக்கப்​போகிறார்களாம். உதாரணமாக வேலூர் மாவட்டம் நான்காகப் பிரிக்கப்பட உள்ளது. வேலூர் மாநகர், வேலூர் மாவட்டம், அரக்கோணம், திருப்பத்தூர் என்று பிரிக்கப்பட உள்ளது. விழுப்புரம், திண்டிவனம், கள்ளக்குறிச்சி ஆகிய மூன்று மாவட்டங்களாகப் பிரிக்கப்​பட உள்ளதாம் விழுப்புரம். இதில் உள்ள சிக்கல்களையும் தொண்டர்கள் சிலர் தலைமைக்கு சொல்ல ஆரம்பித்து உள்ளார்கள்!''

''அது என்ன?''

''மாவட்டங்களைப் பிரித்து, அதிகார மையமாக இருந்தவர்களின் அதிகாரத்தைக் குறைப்பது சரிதான். ஆனால், பிரிக்கப்படும் மாவட்டங்களுக்கு அதே மாவட்டச் செயலாளர்களின் கைத்தடிகளையே மாவட்டச் செயலாளர்களாகப் போட்டால், கட்சியை வளர்க்க முடியாது, இது பழைய மாதிரியேதான் இருக்கும் என்கிறார்கள். 'திருவண்ணாமலையில் இருந்து ஆரணியைப் பிரித்து, வேலுவின் ஆதரவாளர் சிவானந்தத்தை மாவட்டச் செயலாளராகப் போடுவார்கள். விழுப்புரத்தில் இருந்து கள்ளக்குறிச்சியைப் பிரித்து பொன்முடியின் ஆதரவாளரான உதயசூரியனை மாவட்டச் செயலாளராகப் போடுவார்கள். திருச்சியைப் பிரித்து நேரு ஆதரவாளரான தொட்டியம் கண்ணையனுக்கு சில பகுதிகளைக் கொடுப்பார்கள். இப்படி மாவட்டச் செயலாளர்களின் ஆதரவாளர்​களுக்கே பதவியைக் கொடுப்பதால் என்ன பயன்?’ என்று கேட்கிறார்கள்.''

''இந்த மாதிரியான சிக்கலுக்கு முடிவே இல்லையே?''

''ஆமாம்! இளமையான, திறமையானவர்​களை மாவட்டச் செயலாளராகப் போடுவோம் என்று ஸ்டாலினே சொல்ல ஆரம்பித்து உள்ளாராம். ஆறு பேர் குழுவில் பேசிய ஸ்டாலின், இதனைச் சொல்லியிருக்கிறார். 'மாவட்டச் செயலாளர்கள் எவர் மீதும் நடவடிக்கையே கூடாது என்று சொல்லிவந்த தளபதி, இப்போது தன்னுடைய கருத்தை மாற்றிக்கொள்ள ஆரம்பித்து இருக்கிறார். சில மாவட்டச் செயலாளர்களை மாற்றி ஆக வேண்டும் என்று அவரும் இப்போது நினைக்கிறார்’ என்கிறார்கள். இது சில மாவட்டச் செயலாளர்கள் கவனத்துக்குப் போனது. 'தாராளமாக எடுத்துக்கொள்ளட்டும். முடிந்தவரை நாங்கள் உழைத்துவிட்டோம். இனி மற்றவர்கள் வந்து வளர்க்கட்டும்’ என்று நக்கலாகச் சொல்கிறார்கள். 'சம்பாதித்து முடித்தவர்கள் செலவழிக்க வேண்டிய நேரத்தில் நைஸாக ஒதுங்குகிறார்கள்’ என்ற பேச்சும் கட்சியில் எழுந்துள்ளது. பார்ப்போம்... இந்தக் குழு என்ன சொல்லப் போகிறது என்பதையும், அதனைத் தொடர்ந்து கருணாநிதி, ஸ்டாலின் ஆகியோர் என்ன முடிவு எடுப்பார்கள் என்பதையும்!'' என்று சொல்லிவிட்டு நிறுத்திய கழுகார்,

''கருணாநிதிக்குத் தேர்தல் தோல்வியைவிட ஸ்பெக்ட்ரம் வழக்கு விசாரணைதான் அதிகமான கவலையை ஏற்படுத்தியுள்ளது. அடிக்கடி இந்த விவகாரம் பற்றித்தான் கருணாநிதி கேட்டுக்கொண்டே இருக்கிறாராம். கலைஞர் டி.வி-க்கு 200 கோடி ரூபாய் வந்தது பற்றிய அமலாக்கத் துறை வழக்கில் கருணாநிதியின் மனைவி தயாளுவின் பெயர் குற்றப்பத்திரிகையில் சேர்க்கப்பட்டு உள்ளது. இதில் தயாளுவைக் கைது செய்துவிடுவார்களோ என்று கருணாநிதி பயந்தார். ஆனால் சி.பி.ஐ சிறப்பு நீதிமன்றம் தயாளு அம்மாளுக்கு ஜாமீன் வழங்கியது. அமலாக்கத் துறையும் தயாளுவுக்கு ஜாமீன் வழங்குவதற்கு எதிர்ப்பு தெரிவிக்கவில்லை. ஆனால் கனிமொழி, ஆ.ராசா உள்ளிட்டவர்களுக்கு ஜாமீன் வழங்க அமலாக்கத் துறை எதிர்ப்பு தெரிவித்தது. தயாளுவுக்கு ஜாமீன் கிடைத்தது கருணாநிதிக்கு பாதி சந்தோஷத்தைக் கொடுத்தது. 'இந்த வழக்கில் இருந்து என்னை விடுவிக்க வேண்டும்’ என்று இன்னொரு மனுவை தயாளு தாக்கல் செய்திருந்தார். ஆனால், இதனை கடுமையாக அமலாக்கத் துறை எதிர்த்தது!''

''என்ன சொன்னார்கள்?''

''தயாளு சார்பில் ஆஜரான வழக்கீல் அம்ரீந்தர் சரண், 'தயாளுவுக்கு 84 வயது ஆகிறது. அவர் பெயரில் பங்குகள் இருந்தாலும் நிறுவனத்தின் முடிவுகளில் தலையிட்டது இல்லை. அவருக்கு இந்த வழக்கு பற்றி எந்த விவரமும் தெரியாது. அவர் அல்சைமர் என்னும் மறதி நோயால் பாதிக்கப்பட்டு உள்ளார். வீட்டில் உள்ளவர்கள் தவிர, மற்ற யாரையும் அவரால் அடையாளம் காண முடியாது. எனவே, அவரை இந்த வழக்கில் இருந்து விடுவிக்க வேண்டும்’ என்று வாதாடினார். மத்திய அமலாக்கத் துறை சார்பில் வழக்கறிஞர் சோனியா மாத்தூர் ஆஜரானார். 'தயாளு அம்மாளுக்கு ஆறு மாதங்களுக்கு முன்பு சென்னையில் மருத்துவப் பரிசோதனை செய்யப்பட்டது. அதன் பிறகு பரிசோதனை செய்யவில்லை.  எனவே டெல்லி, பெங்களூரு மருத்துவர்களை அனுப்பி தயாளுவை சோதனை செய்த பிறகு, நீதிமன்றம் முடிவு செய்யலாம். அதுவரை எந்த முடிவும் எடுக்கக் கூடாது’ என்று வழக்கறிஞர் சோனியா மாத்தூர் சொன்னார். சி.பி.ஐ சிறப்பு நீதிமன்றத்துக்கு இது கோடை விடுமுறை காலம் என்பதால், நீதிபதி ஷைனி தீர்ப்பு அளிக்கவில்லை. ஜூலை 2-ம் தேதிதான் தீர்ப்பு என்று அறிவித்துவிட்டார். ஜூலை மாதம்தான் தீர்ப்பு என்றதும், கருணாநிதி கலங்கிவிட்டார். 'நித்தமும் இதனைப் பற்றியே நினைக்க வைத்துவிட்டார்கள்’ என்று சொல்லி வருகிறாராம் கருணாநிதி. இத்தோடு தயாநிதி சம்பந்தப்பட்ட வழக்கும் வந்துவிட்டதால், சோதனை மேல் சோதனை ஆகிவிட்டது தி.மு.க-வுக்கு!'' என்றபடி அ.தி.மு.க மேட்டருக்கு வந்தார் கழுகார்.

''அம்மா உப்பு பற்றித்தான் பல இடங்களில் பேச்சு. அம்மா உணவகம், அம்மா குடிநீர், பசுமைப் பண்ணை காய்கறித் திட்டம்... என்ற வரிசையில் இப்போது அம்மா உப்பு விற்பனைக்கு வந்துள்ளது. 'தனியார் நிறுவனங்களின் இரட்டை செறியூட்டப்பட்ட உப்பு கிலோ 21 ரூபாய்க்கும், குறைந்த அளவு சோடியம் கொண்ட உப்பு கிலோ 25 ரூபாய்க்கும், சுத்திகரிக்கப்பட்ட அயோடின் கலந்த உப்பு கிலோ 14 முதல் 21 ரூபாய் வரையிலும் வெளிச்சந்தையில் விற்பனை செய்யப்படுகிறது. அம்மா உப்பு வகைகள் முறையே 14, 21, 10 என குறைந்த விலையில் விற்கப்படும்’ என்று அறிவிக்கப்பட்டுள்ளது''

''உண்மையான சந்தை விலை நிலவரம் என்ன?''

மிஸ்டர் கழுகு: ''மாவட்டச் செயலாளர்கள் மீது கோபம் இருக்கிறது!''

''சுத்திகரிக்கப்பட்ட அயோடின் கலந்த உப்புதான் பெரும்பாலானவர்கள் பயன்படுத்துகின்றனர். இந்தியாவின் பிரபலமான ஒரு கம்பெனி தயாரிப்பின் இந்த வகை உப்பு, கிலோ 17 ரூபாய்க்குக் கிடைக்கிறது. ஆனால், இதே சுத்திகரிக்கப்பட்ட அயோடின் கலந்த தரமான உப்பு, கிலோ 6 முதல் 10 ரூபாய் வரை பல்வேறு லோக்கல் பிராண்ட்களில் மளிகைக் கடைகளிலேயே கிடைக்கிறது. ஆனால், இந்த சுத்திகரிக்கப்பட்ட அயோடின் கலந்த அம்மா உப்பு விலை கிலோ 10 ரூபாய். இரட்டை செறிவூட்டப்பட்ட பிரபல தனியார் நிறுவனத்தின் உப்பு, கிலோ 20 ரூபாய். அம்மா உப்பு விலை 14 ரூபாய். இதய நோயாளிகள், ரத்தக்கொதிப்பு நோயாளிகள் உள்ளவர்களுக்கான குறைந்த அளவு சோடியம் கொண்ட பிரபல முன்னணி நிறுவனத்தின் உப்பு கிலோ 27 ரூபாய். அம்மா உப்புக்கு 21 ரூபாய் என்று விலை வைத்துள்ளனர்.

'பிரபல தனியார் நிறுவன விலையோடு ஒப்பிடுகையில் அம்மா உப்பு விலை சற்று குறைவாகத் தெரிந்தாலும், ஏழை எளிய மக்கள் அதிக அளவில் வாங்கி பயன்படுத்தும் சுத்திகரிக்கப்பட்ட அயோடின் கலந்த உப்பு விலை, அம்மா உப்பின் விலையைவிட குறைந்த விலைக்கே இப்போது மார்க்கெட்டில் கிடைக்கிறது. அதோடு அம்மா உப்பு, அமுதம் கூட்டுறவு விற்பனை அங்காடிகளில் மட்டுமே இப்போது கிடைக்கும் என்று அறிவிக்கப்பட்டுள்ளது. நகர்ப்புறங்களில் அங்கொன்றும் இங்கொன்றுமாக உள்ள இந்த கடைகளும் குறிப்பிட்ட நேரங்களில் மட்டுமே திறந்திருக்கும். இந்த அம்மா உப்பு சாதாரண மக்களின் கையில் கிடைப்பது அரிதுதான். முதல்வர் ஜெயலலிதாவிடம் நல்ல பெயர் எடுக்க வேண்டும் என்று அமைச்சர்கள், அவரவர் துறைகளில் அம்மா திட்டங்கள் தொடங்குவதில் தவறு இல்லை. ஆனால், அந்த திட்டங்களின் நோக்கத்துக்கு ஏற்ப, ஏழை எளிய மக்களுக்குப் பயன்படும் வகையில் இருக்க வேண்டும்’ என்று அதிகாரிகள் மட்டத்தில் பேச்சு இருக்கிறது!''

''அ.தி.மு.க செயற்குழு கூடவிருப்பதாக தகவல் அறிவிக்கப்பட்டுள்ளதே?''

''ஜூன் 21-ம் தேதி கட்சி தலைமைக் கழகத்தில் மாலை 4.20 மணிக்கு நடக்க இருக்கிறது அ.தி.மு.க செயற்குழுக் கூட்டம். அதில் கட்சிக்குப் புத்துணர்வு ஊட்டும் நடவடிக்கைகளை ஜெயலலிதா எடுக்க இருக்கிறாராம். கட்சியின் ஒழுங்கு நடவடிக்கைக் குழுவில் ஓ.பன்னீர்செல்வம், நத்தம் விஸ்வநாதன், கே.பி.முனுசாமி, வைத்திலிங்கம் ஆகிய நால்வர் இருந்தார்கள். தருமபுரியை பா.ம.க-விடம் பறிகொடுத்த பாவத்துக்குத் தண்டனையாக, அமைச்சர் பதவியையும் நால்வர் குழு பதவியையும் கே.பி.முனுசாமி இழந்தார். அவருக்குப் பதிலாக எடப்பாடி பழனிச்சாமி நியமிக்கப்பட்டார். இந்த நிலையில் கட்சியின் நிர்வாக விஷயங்களைக் கவனிப்பதற்காக இன்னும் சிலரை முன்னணிக்கு கொண்டுவர நினைக்கிறாராம் முதல்வர். அநேகமாக முன்னாள் அமைச்சர் செங்கோட்டையன், முன்னாள் சபாநாயகர் ஜெயக்குமார், தங்க தமிழ்ச்செல்வன், பொள்ளாச்சி ஜெயராமன் ஆகிய நால்வருக்கும் கட்சிப் பதவியோ அல்லது அமைச்சர் பதவியோ கிடைக்கலாம் என்கிறார்கள். கட்சியை நிர்வாகரீதியாக பலப்படுத்தவும் அமைச்சரவையில் விவரமானவர்களை மட்டும் தக்கவைக்கவும் நினைக்கிறாராம் முதல்வர். எனவே, அமைச்சர்களில் சிலரது பதவியும் காலியாகலாம் என்றும் சொல்லப்படுகிறது!''

''ஓஹோ!''

''இலங்கையில் இருந்து வந்த சிலர் தமிழ் ஆதரவுத் தலைவர்களை வேவு பார்த்து வருகிறார்கள் என்று பல மாதங்களுக்கு முன்பு சொல்லியிருந்தேன். வைகோ, நெடுமாறன், சீமான் போன்றவர்களது பயணங்களை இவர்கள் வேவு பார்த்து வந்தார்கள். ஈழ ஆதரவுக் கூட்டங்களை ரகசியமாக கண்காணிப்பார்கள். டூரிஸ்ட் விசாவில் வருவார்கள். 15 நாட்கள், ஒரு மாதம் எனத் தங்கிவிட்டு மறுபடி கொழும்பு போய்விடுவார்கள். அடுத்த டீம் டூரிஸ்ட் விசாவில் வரும். அவர்கள் வேவு பார்ப்பார்கள். மறுபடி போய்விடுவார்கள். இந்த ஆட்களைக் கண்டுபிடித்துக் களையெடுக்கும் காரியங்களில், நம் மாநில போலீஸ் இறங்கியிருக்கிறது. இந்தக் கெடுபிடிகள் தாங்க முடியாத அந்த உளவுப் பிரமுகர்கள், அண்டை மாநிலப் பகுதிகளான பெங்களூரு, ஹைதராபாத் எனப் போய் பதுங்க ஆரம்பித்துள்ளார்களாம். எனவே, இது மத்திய அரசின் கவனத்துக்குக் கொண்டு​செல்லப்பட்டுள்ளது என்று சொல்கிறார்கள்!''

''மத்தியில் ஆட்சி மாற்றம் நடந்ததன் ரியாக்ஷனாகக்கூட இருக்கலாம் அல்லவா?''

''இருக்கலாம்!'' என்று சொல்லிவிட்டு எழுந்த கழுகார், ''கடந்த ஆட்சியில் கொடிகட்டிப் பறந்த போலீஸ் அதிகாரி அவர். தனது மகளின் திருமணத்தை சமீபத்தில் நடத்தினார். திருமணத்தில் கலந்துகொள்ள முடியாத நிலையில் இருந்த போலீஸ் அதிகாரி ஒருவர், தனது பரிசை அனுப்பி வைத்தாராம். திருமணம் முடிந்த மறுநாள், அந்தப் பரிசு இந்த போலீஸ் அதிகாரி வீட்டுக்குத் திருப்பி அனுப்பி வைக்கப்பட்டுவிட்டதாம். அதில், 'திருமணத்துக்கு வராதவர்களது பரிசை நான் ஏற்பது இல்லை’ என்று எழுதப்பட்டு இருந்ததாம். 'நன்றி மறப்பது நன்றன்று, நன்றல்லது அன்றே மறப்பது நன்று’ என்றும் அதில் எழுதப்பட்டு இருந்ததாம். 'இன்னமும் பழைய கோதாவிலேயே அந்த போலீஸ் அதிகாரி இருக்கிறார். இவ்வளவு இழுத்தடிப்புக்குப் பிறகும் திருந்தியதுபோல் தெரியவில்லை. இதில் கொடுமை என்னவென்றால், திருக்குறளை யாரெல்லாம் மேற்கோள் காட்டுகிறார்கள் என்பதுதான்’ என்று சொல்கிறார்கள்!'' என்று சொல்லிவிட்டுப் பறந்தார் கழுகார்.

படம்: கே.கார்த்திகேயன்

மன்னிப்பு கேட்ட மோடி!

இந்திய நாடாளுமன்றத்தில் முதன்முதலாக பிரதமர் மோடி பேசிய பேச்சு அனைத்து கட்சியினரையும் கவர்ந்ததாம். 'பெரும்பான்மை தொகுதிகளைக் கைப்பற்றி அசுர பலத்தில் உட்கார்ந்துள்ள மோடி, மிகவும் ஆவேசமாகப் பேசுவார் என்று எதிர்பார்த்தோம். ஆனால், அடக்கமாக அவர் பேசினார்’ என்று தங்களுக்குள் பேசும்போது சொல்லிக்கொண்டார்களாம்.

மிஸ்டர் கழுகு: ''மாவட்டச் செயலாளர்கள் மீது கோபம் இருக்கிறது!''

ஜனாதிபதி பிரணாப் முகர்ஜி கடந்த 9-ம் தேதி நாடாளுமன்றக் கூட்டுக் கூட்டத்தில் பேசினார். ஜனாதிபதி உரைக்கு நன்றி தெரிவிக்கும் தீர்மானத்தின் மீது நாடாளுமன்றத்தில் விவாதம் நடந்தது. அதற்குப் பதில் அளித்து பிரதமர் நரேந்திர மோடி, கடந்த 11-ம் தேதி பேசினார். தனது உரையை ஆரம்பித்த உடனேயே மன்னிப்பு கேட்டு அதிர வைத்தார். 'இந்த அவையில் நான் முதன்முறையாகப் பேசுகிறேன். நீங்கள் பல்வேறு கேள்விகளை எழுப்புவீர்கள். விடை தேடுபவர்களாக இருக்கிறீர்கள். நான் கூறுவதில் ஏதேனும் தவறு இருந்தால் உறுப்பினர்கள் என்னை மன்னிக்க வேண்டும்'' என்று சொல்லிவிட்டுத்தான் ஆரம்பித்தார். முடிக்கும்போது, ''வெற்றி எங்களுக்கு அடக்கத்தைக் கற்பித்து இருக்கிறது. அனைத்துக் கட்சிகளின் ஒத்துழைப்பும் எங்களுக்கு வேண்டும். அகங்காரத்தில் இருந்து விடுபடுவோம். வெறும் எண்களை மட்டும் வைத்துக்கொண்டு முன்னேற நாங்கள் விரும்பவில்லை'' என்று சொல்லியிருக்கிறார். இதுதான் அனைத்துக் கட்சி உறுப்பினர்களையும் ஆச்சர்யத்தில் ஆழ்த்தியுள்ளது.

ஜெ. சொன்ன 'சூரியன்’!

மிஸ்டர் கழுகு: ''மாவட்டச் செயலாளர்கள் மீது கோபம் இருக்கிறது!''

நிதி அமைச்சர் ஓ.பன்னீர்செல்வத்தின் மகன் பி.ரவீந்திரநாத் குமாருக்கு கடந்த பிப்ரவரி 24-ம் தேதி ஜெயலலிதாவின் பிறந்தநாள் அன்று சிசேரியன் மூலம் ஆண் குழந்தை பிறந்தது. ஓ.பன்னீர்செல்வம் தனது பேரனுக்குப் பெயர் வைக்குமாறு குடும்பத்துடன் சென்று முதல்வர் ஜெயலலிதாவைச் சந்தித்தார். 'ஆதித்யா’ என்று பெயர் சூட்டினார் ஜெயலலிதா. ''அம்மா இந்தப் பெயரை எப்படி சூட்டினார்கள் என்று தெரியவில்லை. இந்தப் பெயருக்கு 'சூரியன்’ என்று அர்த்தம்'' என்று சொல்கிறார்கள் சிலர்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு