Published:Updated:

மிஸ்டர் கழுகு: சகோதரச் சண்டையில் சரிந்த தலைகள்!

மிஸ்டர் கழுகு: சகோதரச் சண்டையில் சரிந்த தலைகள்!

மிஸ்டர் கழுகு: சகோதரச் சண்டையில் சரிந்த தலைகள்!

மிஸ்டர் கழுகு: சகோதரச் சண்டையில் சரிந்த தலைகள்!

Published:Updated:
மிஸ்டர் கழுகு: சகோதரச் சண்டையில் சரிந்த தலைகள்!

தி.மு.க-வில் இருந்து ஒழுங்கு நடவடிக்கை எடுக்கப்பட்ட 33 பேர் ஜூ.வி-க்கு அளித்த பேட்டிகளை, கழுகார் உள்ளே நுழைந்ததும் வாங்கிப் படித்தார்.

''முன்னாள் மத்திய அமைச்சரும் தஞ்சை மாவட்டச் செயலாளருமான பழனிமாணிக்கம் தவிர, மற்றவர்கள் அனைவரும் தைரியமாகத்​தான் பேசியிருக்கிறார்கள்!'' என்றபடி தி.மு.க தகவல்களைக் கொட்ட ஆரம்பித்தார் கழுகார்.

ஒட்டுமொத்த விகடனுக்கும் ஒரே ஷார்ட்கட்!

''சனிக்கிழமை காலையில் கோபால​புரம் பரபரப்பாக இருந்தது. நடவடிக்கை எடுக்க வேண்டியவர் பட்டியலுடன் கருணாநிதியைப் பார்க்க ஸ்டாலின் நுழைகிறார். 'தேர்தலில் சரியாக வேலை பார்க்காதவர்கள் மீது நடவடிக்கை எடுத்தால்தான் கட்சி நிர்வாகிகளிடம் பயம் இருக்கும்’ என்று ஸ்டாலின் சொல்லியிருக்கிறார். அதனை கருணாநிதி மறுக்கவில்லை. அதைத் தொடர்ந்து ஸ்டாலின் கொடுத்த பட்டியல்தான் கருணாநிதியைப் பதற வைத்துள்ளது!''

''ஏனாம்?''

''அந்தப் பட்டியலில் முதல் பெயராக முன்னாள் அமைச்சர் துரைமுருகன் பெயர்தான் இருந்தது என்கிறார்கள் உள்விவரங்கள் அறிந்தவர்கள். ஆடிப்போய்விட்டாராம் கருணாநிதி. 'துணைப் பொதுச்செயலாளர் பொறுப்பில் இருக்கிற துரைமுருகனை எப்படி எடுக்க முடியும்?’ என்று கேட்டுள்ளார். 'வேலூர் தொகுதியில் கூட்டணிக் கட்சி வேட்பாளர் தோல்விக்கு துரைமுருகன் வேலை பார்க்காததுதான் உண்மையான காரணம்’ என்று ஸ்டாலின் சொன்னதாகச் சொல்கிறார்கள்.

மிஸ்டர் கழுகு: சகோதரச் சண்டையில் சரிந்த தலைகள்!

துரைமுருகன் தனது மகன் கதிர் ஆனந்துக்காக வேலூர் தொகுதியை எதிர்பார்த்தார். 'வாரிசுகளுக்கு ஸீட் இல்லை’ என்று சொல்லி அந்த வாய்ப்​பை ஸ்டாலின் தரவில்லை. இந்திய யூனியன் முஸ்லிம் லீக் கட்சிக்கு அந்தத் தொகுதி தரப்பட்டது. வேட்பாளரான அப்துல் ரகுமான், வாக்குக் கேட்டு முதன்முதலாக அந்தத் தொகுதிக்கு நுழையும்போது துரைமுருகன் ஆதரவாளர்கள் சிலர் சலசலப்பு கூட்டினார்கள். அங்கு கல்வீச்சுகூட நடந்தது. 'தன் மகனுக்கு ஸீட் கொடுக்கவில்லை என்பதற்காகக் கூட்டணிக் கட்சி வேட்பாளரை இப்படி அவமானப்படுத்துவதா?’ என்று ஸ்டாலின் அப்போதே கோபம் ஆனார். இந்தச் சம்பவத்துக்குக் காரணமானவர்கள் பட்டியலை வாங்கி அனைவரையும் கட்சியை விட்டு நீக்கிவிட்டார். பொதுவாக தேர்தல் நடக்கும் நேரத்தில் கட்சியில் எந்த நடவடிக்கையும் எடுப்பது இல்லை. ஆனால், துணிச்சலாக ஸ்டாலின் இதனைச் செய்தார். 'அப்படிச் செய்தால்தான் மற்ற தொகுதிகளில் எல்லோரும் கட்டுப்பாடாக இருப்பார்கள்’ என்று ஸ்டாலின் சொல்லிக்கொண்டார்.

இந்தச் சூழ்நிலையில் துரைமுருகன், வேலூர் தொகுதியில் சரியாக வேலை பார்க்கவில்லை என்று புகார் கிளம்பியது. கருணாநிதி தேர்தல் சுற்றுப் பயணம்

கிளம்பி​யபோது அவருடன் இவரும் கிளம்பினார். அதனால் வேலூரில் இருக்க வேண்டிய அவசியம் இல்லாமல் போய்விட்டது. துரைமுருகன் இல்லாத​தால் அவரது ஆதரவாளர்களும் அங்கு சரியாகத் தேர்தல் பணியாற்ற​வில்லை என்ற வருத்தம் இந்திய யூனியன் முஸ்லிம் லீக் கட்சிக்கு இருந்தது. 'பி.ஜே.பி சார்பில் அந்தத் தொகுதியில் ஏ.சி.சண்முகம் போட்டியிட்டார். அவருக்கு துரைமுருகன் ஆட்கள் மறைமுகமாக வேலை பார்த்தார்கள்’ என்று தகவல் சொல்லப்பட்டது. தேர்தல் தோல்விக்குப் பிறகு பலரும் கருணாநிதிக்குக் கடிதம் அனுப்பினார்கள் அல்லவா?''

''ஆமாம்!''

''வேலூர் மாவட்டச் செயலாளர் காந்தி அனுப்பிய கடிதத்தில், துரைமுருகனின் செயல்பாட்டை முழுமையாக விமர்சித்து அறிக்கை கொடுத்தாராம். 'தேர்தல் பணிகளை ஒழுங்காகச் செய்யவில்லை’ என்று கட்சியை விட்டு நீக்கப்பட்ட துரைமுருகனின் ஆதரவாளர் ஒருவர் கருணாநிதிக்கு அனுப்பிய கடிதத்தில், 'துரைமுருகன் சொல்லித்தான் இப்படி நடந்துகொண்டோம்’ என்று போட்டுக்கொடுத்துவிட்டாராம். ஸ்டாலின் கைக்கு இந்த இரண்டு கடிதங்களும் ஆதாரமாகக் கிடைத்தன. இதனை வைத்து துரைமுருகன் தலைக்கு கத்தி தொங்கவிடப்பட்டது. ஆனால், இதற்கு கருணாநிதி சம்மதிக்கவில்லையாம். 'இந்தத் தேர்தலில் இப்படி நடந்துகொண்டார் என்பதற்காகக் கட்சியை விட்டு நீக்கிவிடக் கூடாது. பழைய விஷயங்களையும் பார்க்க வேண்டும். மிக நீண்ட அனுபவம் வாய்ந்தவர் மீது அப்படி உடனடியாக நடவடிக்கை எடுக்கக் கூடாது’ என்று கருணாநிதி உறுதியாக இருந்துள்ளார். அதனால்தான் ஸ்டாலினால் எதுவும் செய்ய முடியவில்லை.

'இன்று துரைமுருகன் மீது நடவடிக்கை எடுக்கவில்லை என்றாலும், அவரது அரசியல் வளர்ச்சிக்கு முற்றுப்புள்ளி வைக்கப்பட்டது என்றுதான் அர்த்தம். இப்போது துணைப் பொதுச்செயலாளராக இருக்கிறார். அடுத்து வர இருக்கிற மாற்றத்தில் அவருக்கு மீண்டும் தலைமை நிலைய முதன்மைச் செயலாளர் பதவி கிடைக்கும் என்றுதான் எதிர்பார்த்தார். ஆனால், தளபதி அவர் மீது கடுமையைக் காட்ட ஆரம்பித்து இருப்பதால், இனி அவருக்கு தலைமைக் கழகப் பதவிகள் கிடைப்பது சிரமம்’ என்கிறார்கள் உள் விவரங்களை அறிந்தவர்கள். துரைமுருகனை நீக்கு, நீக்கக் கூடாது என்ற விவகாரத்தில் கருணாநிதி - ஸ்டாலின் இருவருக்கும் கடுமையான வருத்தங்கள் ஏற்பட்டன. சனிக்கிழமை மாலை வரையில் கோபம் தணியாமல்தான் இருந்துள்ளார் கருணாநிதி!''

''சொல்லும்!''

''அதேபோல் மாவட்டச் செயலாளர்கள் மீதான நேரடி நடவடிக்கையையும் கருணாநிதி விரும்பவில்லை என்கிறார்கள். 'விளக்கம் கேட்டுவிட்டு அது ஏற்க முடியாத நிலைமையில் இருந்தால் நீக்கலாம்’ என்பதுதான் கருணாநிதியின் நிலைப்பாடு. 'தவறு செய்துவிட்டார்கள் என்று தெரிந்ததும் நீக்குங்கள்’ என்றார் ஸ்டாலின். அதனால்தான் உடனடியாகப் பட்டியல் தயாரித்து 33 பேரை நீக்கிவிட்டார்கள்!''

''இதில் பழனிமாணிக்கம் பெயரைப் பார்த்ததும் பலருக்கும் நம்ப முடியவில்லை!''

''மாணவர் தி.மு.க-தான் கட்சியின் வளர்ச்சிக்கு அடித்தளமாக இருந்த அமைப்பு. இதற்கு 'தி.மா.மு.க’ என்று பெயர். பழைய ஆட்கள் சந்தித்துக்கொள்ளும்போது, 'நாங்கள் அந்தக் காலத்து தி.மா.மு.க ஆட்கள்’ என்று பெருமையாகச் சொல்லிக்கொள்வார்கள். அந்த அமைப்பில் இருந்து வந்தவர் பழனிமாணிக்கம். எட்டு முறை தஞ்சை தொகுதியில் நின்றவர். தி.மு.க சார்பில் கேபினெட் அமைச்சராக மத்தியில் இருந்தவர். முரசொலி மாறனின் சிஷ்யர். அவருக்கு இந்த முறை தஞ்சை தொகுதி தரப்படவில்லை. தஞ்சை கிடைக்காவிட்டால், மயிலாடுதுறையை எதிர்பார்த்தார். அதையும் தந்துவிடக் கூடாது என்பதற்காக அதுவும் கூட்டணிக் கட்சிக்கு தரப்பட்டது. இவர் தேர்தல் பணிகளை ஒழுங்காகச் செய்யவில்லை என்பது குற்றச்சாட்டு!''

''உண்மை என்ன?''

மிஸ்டர் கழுகு: சகோதரச் சண்டையில் சரிந்த தலைகள்!

''தஞ்சை மாவட்டக் கழக வட்டாரத்தில் சொல்லப்படுவதை முதலில் சொல்லிவிடுகிறேன். 'மாவட்டச் செயலாளர் என்கிற முறையில் வேட்பாளருக்கு ஒத்துழைப்பு தரவில்லை. ஒரே ஒருநாள் மட்டும்தான் வேட்பாளருடன் சேர்ந்து ஓட்டுக் கேட்டு பிரசாரம் செய்தார். தன்னுடைய ஆதரவாளர்களையும் நிர்வாகிகளையும் வேலை பார்க்கவிடாமல் தடுத்து நிறுத்தியிருக்கிறார். வேட்பாளர் பெயரை அறிவித்த பிறகு வேட¢பாளரின் உருவ பொம்மையை எரித்தார்கள். ஒன்றிய, நகர கழகச் செயலாளர்கள் அழைத்துக்கொண்டுபோய்,  அவருக்கு ஸீட் கொடுத்தால்தான¢ ஜெயிக்க முடியும். வேறு யாருக்கு ஸீட் கொடுத்தாலும் தோற்றுப்போவார்கள் என¢று சொல்லியிருக்கிறார்கள். இதையெல்லாம் அப்போதே புகாராக தலைமை பதிவுசெய்து வைத்திருந்தது. கோ.சி.மணி, எல்.கணேசன் உள்ளிட்ட மூத்த நிர்வாகிகளும் முன்னாள் எம்.எல்.ஏ-க்கள் மகேஷ் கிருஷ்ணசாமி, துரை.சந்திரசேகர் ஆகியோரிடமும் தோல்வி குறித்து விளக்கம் கேட்கப்பட்டது. அவர்கள் அனைவரும் தோல்விக்குக் காரணம் பழனிமாணிக்கத்தின் உள்ளடி வேலைதான் என¢று பகிரங்கமாகச் சொல்லியிருக்கிறார்கள். கட்சியின் நிழல் மாவட்டச் செயலாளராக வலம்வந்தவர் பழனிமாணிக்கத்தின் தம்பி சகோதரர் ராஜ்குமார். பழனிமாணிக்கம் ஊரில் இல்லாத நேரத்தில் கட்சியையும், கட்சியின் நிர்வாகத்தையும் கவனிப்பவர். சின்னவர் என்று கட்சியினரால் அழைக்கப்படுபவர். யாரையும் உட்கார வைத்து பேசாத மனப்பாங்கு, கட்சிக்காரர்களின் எதிர்ப்புதான் தோல்விக்குக் காரணம்’ என்று சொல்கிறார்கள்.''

''இதுதான் அவரது நீக்கத்துக்குக் காரணமா?''

''கட்சி நிர்வாகி ஒருவரிடம் இதுபற்றி கேட்டபோது, 'இப்படிப்பட்ட ஒத்துழையாமை செய்தவர்களை நீக்குவதாக இருந்தால், இன்னும் நான்கைந்து மாவட்டச் செயலாளர்களை நீக்க வேண்டும். கட்சி தோற்றுவிட்டது என்ற காரணத்துக்கு நீக்க வேண்டுமானால் அனைத்து மாவட்டச் செயலாளர்களையும் நீக்க வேண்டும். தேனி மாவட்டச் செயலாளர் மூக்கையா, அங்கு போட்டியிட்ட வேட்பாளர் பொன்.முத்துராமலிங்கத்துக்கு ஒழுங்காகப் பணியாற்றவில்லை என்று தலைமைக்கு புகார் வந்தது. அவரை ஏன் நீக்கவில்லை? தூத்துக்குடி வேட்பாளர் ஜெகனுக்கு, அனிதா ராதாகிருஷ்ணன் வேலை பார்க்கவில்லை என்று தலைமைக்குப் புகார் வந்துள்ளது அவரை ஏன் நீக்கவில்லை? கிருஷ்ணகிரி பொறுப்பாளராக நியமிக்கப்பட்ட பனமரத்துப்பட்டி ராஜேந்திரன், அந்தத் தொகுதிக்கே செல்லவில்லை என்று புகார் வந்தது. அவரை ஏன் நீக்கவில்லை? திருச்சி, பெரம்பலூர் தொகுதி வேட்பாளர்களுக்கு திருச்சி செல்வராஜ் சரியாக வேலை பார்க்கவில்லை. அவரை ஏன் நீக்கவில்லை? சேலம் உமாராணிக்கு, வீரபாண்டி ராஜா பணியாற்றவில்லை. ஆனால், அவர் ஏன் நீக்கப்படவில்லை? மதுரை மாநகர் மாவட்டச் செயலாளர் தளபதி மீது வேட்பாளர் வேலுசாமி புகார் சொன்னார். அவர் மீது நடவடிக்கை இல்லை. இப்படி புகார்கள் மலை அளவு குவிந்துள்ளன. இதில் சிலரை மட்டும் தேர்ந்தெடுத்து நீக்கியதில்தான் சூட்சுமம் இருக்கிறது’ என்று சொல்கிறார்''

''அது என்ன சூட்சுமம்?''

''தேர்தல் வேலைகள் ஒழுங்காகப் பார்க்கவில்லை என்று சொல்லி நீக்குகிறோம் என்ற அடிப்படையில் அழகிரி, கனிமொழி ஆதரவாளர்களைக் குறிவைத்து தூக்கிவிட்டார் ஸ்டாலின் என்ற புகார் பரவலாகச் சொல்லப்படுகிறது. நகரச் செயலாளர்கள், ஒன்றியச் செயலாளர்களை விலக்கிவிட்டுப் பார்த்தால் முக்கியமானவர்கள் தஞ்சை பழனிமாணிக்கம், நாமக்கல் கே.பி.ராமலிங்கம், தர்மபுரி முல்லைவேந்தன், விருதுநகர் போஸ் ஆகிய நால்வர். இதில் கே.பி.ராமலிங்கமும் போஸும் அழகிரி ஆதரவாளர்கள். பழனிமாணிக்கமும் முல்லைவேந்தனும் கனிமொழி ஆதரவாளர்கள்.

'தனது ஆதரவாளராக இருந்ததால் தான் கோ.சி.மணியிடம் இருந்து மாவட்டச் செயலாளர் பதவியைப் பறித்து பழனிமாணிக்கத்துக்குக் கொடுத்தார் ஸ்டாலின். தஞ்சை தொகுதி பழனிமாணிக்கத்துக்கு இல்லை என்று ஸ்டாலின் முடிவெடுத்ததும், கனிமொழி ஆதரவாளராக மாறினார். தேர்தல் நிதியைக்கூட ஸ்டாலினிடம் தரவில்லை. அனைத்து மாவட்டக் கழகங்களும் தேர்தல் நிதி அளிப்பு பொதுக்கூட்டங்கள் நடத்தி ஸ்டாலினிடம் நிதி அளித்தபோது, அந்தக் கூட்டம் நடத்தாத ஒரே மாவட்டம் தஞ்சைதான். பணத்தை எடுத்துவந்து தலைவரிடத்தில்தான¢ கொடுத்தார். அதுவும் ஸ்டாலினுக்கு கடுப்பானது. அன்றே பழனிமாணிக்கத்தை நீக்க முடிவெடுத்துவிட்டார்.

மிஸ்டர் கழுகு: சகோதரச் சண்டையில் சரிந்த தலைகள்!

மேலும்,  பழனிமாணிக்கத்தின் சகோதரர் சங்கரவடிவேலுவின் மகள் திருமணம் சமீபத்தில் நடைபெற்றது. சிலம்பொலி செல்லப்பன் தலைமையில் நடைபெற்ற இந்தத் திருமணம் 'தமிழரசி’ ம.நடராஜன்தான் தாலியை எடுத்துக் கொடுத்து திருமணத்தை நடத்தி வைத்திருக்கிறார். மன்னார்குடி வகையறாக்கள் அனைவரும் வந்து திருமணத்தில் கலந்துகொண்டு வாழ்த்தியிருக்கிறார்கள். திருமண அழைப்பிதழ் தி.மு.க-வின் சுவடே இல்லாமல் அச்சிட¢டிருந்ததுதான் நீக்கத்தை துரிதப்படுத்தியது என்றும் சொல்கிறார்கள்!''

''ம்!''

''உண்மையில் களையெடுக்க வேண்டுமானால் ஏராளமானவர்கள் இருக்கிறார்கள், அவர்களில் குறிப்பிட்ட சிலரை மட்டும் குறிவைத்து எடுத்ததற்குக் காரணம் சகோதர யுத்தம்தான். சகோதரச் சண்டையால் குறிப்பிட்ட இந்தத் தலைகள் உருண்டுள்ளன. அரூருக்கு கனிமொழி வந்த கூட்டத்தை பிரமாண்டமானதாக ஆக்கி நடத்திக்கொடுத்ததில் இருந்து முல்லைவேந்தன் குறிவைக்கப்பட்டார். கே.பி.ராமலிங்கத்துக்கு சொல்லவே வேண்டியது இல்லை. அழகிரியின் வலது கரம் அவர். விருதுநகர் போஸ், வீட்டுக்கு அழகிரி வந்து போனார். இவைதான் கல்தாவுக்குக் காரணம் என்கிறார்கள். 'கே.பி.ராமலிங்கம் கட்சியின் மாநிலங்களவை உறுப்பினர். அவரை நாமக்கல் வேட்பாளர் காந்திச்செல்வன் சந்தித்து ஆதரவு கேட்கவில்லை. திருச்சி சிவா கட்சியின் மாநிலங்களவை உறுப்பினர். அவரை சந்தித்து திருச்சி வேட்பாளர் அன்பழகனும் பெரம்பலூர் வேட்பாளர் சீமானூர் பிரபுவும் ஆதரவு கேட்கவில்லை. இந்த மாதிரியான புகார்கள் மீது என்ன நடவடிக்கை?’ என்றும் கேட்க ஆரம்பித்துள்ளார்கள் சிலர். மொத்தத்தில் கட்சியில் எடுக்கப்பட்ட நடவடிக்கைகள் சீர்திருத்துவதற்குப் பதிலாக சிக்கலைத்தான் உண்டாக்கி வருகின்றன'' என்று சொல்லிவிட்டு எழுந்த கழுகார்,

''சமீபத்தில் தி.மு.க முக்கியப் பிரமுகர் ஒருவர் மதுரைக்குப் போனார். சில வாரங்களுக்கு முன் மறைந்த கட்சிப் பிரமுகர் வீட்டுக்கு துக்கம் விசாரிக்கச் சென்றார். வீட்டில் இருந்தவர்களை வெளியில் இருக்கச் சொல்லிவிட்டு இறந்து போனவரின் மனைவியிடம், 'உங்கள் கணவரிடம் கொஞ்சம் பணம் கொடுத்து வைத்திருந்தேன். அதனை சீக்கிரமாக செட்டில் பண்ணிவிடுங்கள்’ என்று சொல்லியிருக்கிறார். அந்தப் பெண்ணுக்கு இந்த விஷயங்கள் தெரியவில்லை. தனது மகனிடம் சொல்லி இருக்கிறார். அவருக்கும் தெரியவில்லை. இந்த தகவலை மதுரை அதிரடி பிரமுகர் கவனத்துக்கு அந்தப் பையன் கொண்டுபோனாராம். அப்போது அந்த அதிரடி மனிதர் சிரித்தபடியே, 'உங்க அப்பாவோட செல்போன் நம்பரைக் கொடுத்து கேட்டுக்கச் சொல்லிட வேண்டியதுதானே?’ என்று பதில் அளித்தாராம்'' என்று சொல்லிச் சிரித்தபடி பறந்தார்!

அட்டைப் படங்கள்: க.தனசேகரன், ஆர்.எம்..முத்துராஜ்

பட்டும் பதற்றமும்!

தமிழக அமைச்சர் ஒருவர் கடந்த 21-ம் தேதி சேலத்துக்கு விசிட் அடித்தார். சேலம் கோ-ஆப்டெக்ஸ் தங்கப்பட்டு மாளிகைக்கு வந்தவர், 50 ஆயிரம் மதிப்புள்ள மூன்று பட்டுப் புடவைகளை எடுத்துக்கொண்டு ரசீதும் வாங்காமல் பணமும் கொடுக்காமல் போய்விட்டார். யார் கணக்கில் வரவு வைப்பது, யார் கணக்கில் பற்று வைப்பது என்று பதறிக்கொண்டு இருக்கிறார்கள் ஊழியர்கள்.

அடுத்த லிஸ்ட் ரெடி!

மிஸ்டர் கழுகு: சகோதரச் சண்டையில் சரிந்த தலைகள்!

தி.மு.க நாடாளுமன்றத் தேர்தலில் படுதோல்வி அடைந்ததை அடுத்து, இப்போது தேர்தலின்போது பணியாற்றாத நிர்வாகிகளைக் களையெடுக்கும் பணியைத் தொடங்கிவிட்டது தி.மு.க தலைமை.

இதுவரைக்கும் மூன்று மாவட்டச் செயலாளர்கள், ஐந்து நகரச் செயலாளர்கள், 21 ஒன்றிய செயலாளர்கள் என மொத்தம் 33 பேர் தற்காலிகமாக நீக்கப்பட்டுள்ளனர். இவர்கள் அனைவரும் கட்சியில் அனைத்து பொறுப்புகளில் இருந்தும் விலக்கி வைக்கப்பட, இந்த லிஸ்டில் இல்லாத நபர்கள் 'அப்பாடா... நாம தப்பிச்சோம்’ என்று நினைத்துக்கொண்டிருக்க... மேலும் சில முக்கியப் புள்ளிகள் மீதும் நிர்வாகிகள் நடவடிக்கை தேவை என தலைமைக்குப் புகார் வந்துகொண்டே இருக்கிறதாம். இதனால், அடுத்த லிஸ்ட்டும் தயாராகிக்கொண்டிருக்கிறது. யார் யார் பேரு எல்லாம் வரப்போகுதோ என பல நிர்வாகிகள் ஆடிப்போய் இருக்கிறார்கள்.

டி.ஐ.ஜி பதவிக்கு ஆப்பு?

தமிழக போலீஸ் துறை கட்டமைப்பில் சில மாற்றங்களை கொண்டுவர நினைக்கிறாராம் டி.ஜி.பி ராமானுஜம். அதற்கான ஆலோசனைகள் தீவிரமாக நடக்கின்றன. தமிழகத்தின் முக்கிய ஊர்களில் டி.ஐ.ஜி (சட்டம் - ஒழுங்கு) என்கிற பேனரில் 11 பேர் இப்போது இருக்கிறார்கள். ''ஒருசில மாநிலங்களில் உள்ளது போல இந்த டி.ஐ.ஜி பதவியை நிர்வாகரீதியாக எடுத்துவிடலாமா?'' என்பது குறித்தும் ஆலோசனை நடக்கிறதாம். இதைக் கேள்விப்பட்டு ஐ.பி.எஸ் அதிகாரிகளில் ஒருசாரார், ''காலங்காலமாக இருந்துவரும் பாரம்பரியமான பதவி அது. அதை திடீரென்று தூக்குவது தவறு. இது தொடர்பான ஃபைல் முதல்வரிடம் போகும்போது, நாங்கள் அவருக்கு உரியவகையில் புரிய வைப்போம்'' என்கிறார்கள்.

''துரைமுருகனை நீக்காதவரை தி.மு.கவுடன் கூட்டு இல்லை!''

தமிழ்நாடு மாநிலத் தலைவர் கே.எம்.காதர் மொகிதீன் தலைமையில் இந்திய யூனியன் முஸ்லிம் லீக்கின் தமிழ்நாடு மாநில செயற்குழு கூட்டம், கடந்த 21.6.14 அன்று கும்பகோணத்தில் நடைபெற்றது. மாநில நிர்வாகிகள், மாவட்டத் தலைவர், செயலாளர், பொறுப்பாளர்கள் என 200 பேர் கலந்துகொண்டனர். மாநில, மாவட்ட நிர்வாகிகள் 33 பேர் கூட்டத்தில் பேசினர். பேசிய நிர்வாகிகளில் 32 பேர் 'வேலூர் தொகுதியில் நமது வெற்றிக்குத் துரோகம் இழைத்த துரைமுருகன் உள்ளிட்ட தி.மு.க-வினர் மீது தி.மு.க-வின் தலைமை நடவடிக்கை எடுக்காதவரை அந்தக் கட்சியுடன் கூட்டணியோ, தோழமையோ தேவையில்லை’ என்று கொதிப்போடு பேசினர்.

மிஸ்டர் கழுகு: சகோதரச் சண்டையில் சரிந்த தலைகள்!

பேராசிரியர் கே.எம்.காதர் மொகிதீன் செய்தியாளர்களிடம், ''நடந்து முடிந்த நாடாளுமன்றத் தேர்தல் குறித்து இந்தச் செயற்குழுவில் நீண்ட நெடிய விவாதம் நடைபெற்றது. தி.மு.க பெற்ற வாக்குகளில் 35 லட்சம் வாக்குகள், முஸ்லிம் சமுதாயத்தின் வாக்குகள். வேலூர் தொகுதியில் இரண்டு லட்சம் முஸ்லிம் வாக்காளர்கள் உள்ளனர். பதிவான அவர்களின் வாக்குகளில் ஒரு லட்சத்து 70 ஆயிரம் வாக்குகள் முஸ்லிம் லீக்குக்கு கிடைத்துள்ளது. மீதி 35 ஆயிரம் வாக்குகள் மற்றவர்கள் அளித்தது என்று நாங்கள் எடுத்த புள்ளிவிவரங்களால் அறியப்பட்டது. வேலூர் தொகுதியைப் பொறுத்தவரையில் ஒன்றரை லட்சம் தி.மு.க வாக்குகளை எதிர்பார்த்தோம். அந்த வாக்குகள் எங்களுக்குக் கிடைத்திருந்தால், நாங்கள் வெற்றி பெற்றிருப்போம். ஆனால், வேலூர் தொகுதி தி.மு.க வாக்குகள் பி.ஜே.பி-க்கு சென்றுவிட்டது. வேலூர் தொகுதி முடிவு குறித்து சமுதாயத்தின் உணர்வை தி.மு.க தலைமையிடம் ஒரு குழுவாக சென்று முறையிட உள்ளோம்!'' என்று குறிப்பிட்டார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism