Published:Updated:

அதிகாரம் இழந்த 83 பேர்!

உச்ச நீதிமன்ற அதிரடி

பிரீமியம் ஸ்டோரி
அதிகாரம் இழந்த 83 பேர்!

இந்திய நீதித் துறை வரலாற்றில் ஒரு தீர்ப்பு ஒட்டுமொத்தமாக 83 அரசாங்க அதிகாரிகளின் பதவியைப் பறித்துள்ளது இதுவே முதல் முறை. இப்போது அதிகாரங்களைப் பறிகொடுத்த அவர்கள் அனைவரும் சாதாரண பதவிகளில் இருப்பவர்கள் அல்ல. காவல் துறையில், வணிகவரித் துறையில், வருவாய்த் துறையில் முக்கியப் பதவிகளில் இருப்பவர்கள். இத்தனை பெரிய பதவியில் இருந்து அதிகாரம் செலுத்தியவர்களின் அதிகாரங்களைப் பறித்த வழக்கின் பின்னணி இதுதான்...

24 துணை ஆட்சியர்கள், 20 காவல் துணைக் கண்காணிப்பாளர்கள், 20 வணிகவரித் துறை அலுவலர்கள், 33 கூட்டுறவு சங்கத் துணைப் பதிவாளர்கள், 5 வட¢டார வளர்ச்சி அலுவலர்கள், 2 மாவட்ட வேலைவாய்ப்பு அலுவலர்கள், 1 கோட்ட தீயணைப்பு அலுவலர் பணியிடங்களுக்கு கடந்த 2000-ம் ஆண்டில் குரூப் 1 தேர்வுகளை நடத்தியது டி.என்.பி.எஸ்.சி. இந்தப் பணியிடங்களுக்கு லட்சக்கணக்கானோர் தேர்வு எழுதினர். அவர் பிரிலிமினரி என்ற முதன்மைத் தேர்வு, மெயின் என்று சொல்லப்படும் முக்கியத் தேர்வு, நேர்முகத் தேர்வு என்று ஒவ்வொரு கட்டமாகத் தாண்டி, அதில் 83 பேர் தேர்வானார்கள்.

அதிகாரம் இழந்த 83 பேர்!

'தேர்வான 83 பேரும் தேர்வு எழுதியபோது டி.என்.பி.எஸ்.சி வகுத்துள்ள விதிமுறைகளை அப்பட்டமாக மீறினார்கள். அதன்மூலம் மிகப்பெரிய முறைகேடு நடந்தது. எனவே, இவர்கள் எழுதிய தேர்வு செல்லாது என்று அறிவிக்க வேண்டும்’ என்று கூறி நடராஜன், மாதவன் ஆகியோர் சென்னை உயர் நீதிமன்றத்தை நாடினர். 'விடைத் தாளில் மதச் சின்னங்களை வரைந்தது, பென்சில்களைப் பயன்படுத்தியது, கலர் கலரான பேனாக்களைப் பயன்படுத்தி கோடிட்டுக் காட்டியது, சங்கேத வார்த்தைகளைப் பயன்படுத்தி விடைத் தாள் திருத்துபவருக்கு தங்களை அடையாளப்படுத்தியது போன்றவைதான் அவர்கள் மனுவில் குறிப்பிட்டிருந்த விதிமுறை மீறல்கள்.  

அதிகாரம் இழந்த 83 பேர்!

'இது உண்மையா?’ என்று விசாரிக்க சென்னை உயர் நீதிமன்றம் அட்வகேட் கமிஷனர் ஒருவரை நியமித்து, அனைத்து விடைத் தாள்களையும் சோதித்து அறிக்கைத் தர உத்தரவிட்டது. அதன்படி அட்வகேட் கமிஷனர், 900 பக்க அறிக்கையை சென்னை உயர் நீதிமன்றத்தில் தாக்கல் செய்தார். அதில் விதிமுறை மீறல்கள் நடந்திருப்பது தெளிவானது. இதையடுத்து, இவர்கள் எழுதிய தேர்வு செல்லாது என்று அறிவித்து சென்னை உயர் நீதிமன்றம் உத்தரவிட்டது. பாதிக்கப்பட்டவர்கள் இதை எதிர்த்து உச்ச நீதிமன்றத்தை அணுகினர். சென்னை உயர் நீதிமன்றத்தின் உத்தரவு சரியானதுதான் என்று உச்ச நீதிமன்றமும் தீர்ப்பளித்தது. இதையடுத்து குரூப் 1 தேர்வு மூலம் பதவியை அடைந்த அனைவரும் தங்களின் பதவி, அதிகாரம் என அனைத்தையும் இழக்கும் நிலைக்கு ஆளாகி உள்ளனர்.

இவர்கள் பிறப்பித்த உத்தரவுகள் அனைத்தும் கேள்விக்குறியாகும் நிலை ஏற்பட்டுள்ளதுதான் மக்களை பாதிக்கும் விஷயம்!

- ஜோ.ஸ்டாலின்

படம்: ப.சரவணகுமார்

'விடைத் தாளில் மதச் சின்னங்களை வரைந்தது, பென்சில்களைப் பயன்படுத்தியது, கலர் கலரான பேனாக்களைப் பயன்படுத்தி கோடிட்டுக் காட்டியது போன்றவைதான் அவர்கள் மனுவில் குறிப்பிட்டிருந்த விதிமுறை மீறல்கள்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு