Published:Updated:

எடப்பாடி, பன்னீர், சசிகலா தனித்தன்மையை இழந்துவிட்டார்கள்!

ஆனந்தராஜ்
பிரீமியம் ஸ்டோரி
ஆனந்தராஜ்

வறுத்தெடுக்கிறார் நடிகர் ஆனந்தராஜ்

எடப்பாடி, பன்னீர், சசிகலா தனித்தன்மையை இழந்துவிட்டார்கள்!

வறுத்தெடுக்கிறார் நடிகர் ஆனந்தராஜ்

Published:Updated:
ஆனந்தராஜ்
பிரீமியம் ஸ்டோரி
ஆனந்தராஜ்

ஜெயலலிதா மறைவுக்குப் பிறகு அ.தி.மு.க-விலிருந்து விலகிவிட்டாலும், கட்சியில் தலைமைப் பதவிக்காக நடைபெற்றுவரும் குடுமிப்பிடி சண்டை பற்றி அவ்வப்போது கருத்து தெரிவித்து லைம்லைட்டிலேயே இருக்கும்படி பார்த்துக்கொள்கிறார் நடிகர் ஆனந்தராஜ். சமீபகாலமாக கொங்கு நாடு, ஒளிப்பதிவு திருத்தச் சட்ட மசோதா என நடப்பு அரசியல் பிரச்னைகள் பற்றி கருத்து தெரிவித்துவருபவரை நேரில் சந்தித்தோம்...

“அரசியல்வாதி ஆனந்தராஜ் இப்போது எந்தக் கட்சியில், யார் அணியில் இருக்கிறார்?’’

“நான் எங்கேயும் போய் தலைமறைவாகிவிடவில்லை. ஜெயலலிதா மறைவுக்குப் பிறகு கட்சியில் எனக்கு ஏற்பட்ட சில மன வருத்தங்களால் கட்சியிலிருந்து விலகியிருக்கிறேன். மற்றபடி நான் அ.தி.மு.க-வில் இப்போதும் உறுப்பினராக இருக்கிறேனா, இல்லையா என்பதையெல்லாம் அ.தி.மு.க-வினர்தான் சொல்ல வேண்டும்.’’

“அ.தி.மு.க-விலிருந்து விலகும் அளவுக்கு உங்களுக்கு மனவருத்தத்தை ஏற்படுத்தியது யார்?’’

“கட்சியிலிருந்து நான் விலக, பல்வேறு மன வருத்தங்கள் உண்டு. 2016 தேர்தலின்போது, கருணாநிதி எங்கேயெல்லாம் பேசுகிறாரோ, அங்கேயெல்லாம் ஆனந்தராஜ் பேசுவதற்கான வாய்ப்பைக் கொடுத்தார் ஜெயலலிதா. ஆனால், அவரது மரணத்துக்கு முன்பாக மருத்துவச் சிகிச்சையில் இருந்தபோது நடைபெற்ற இடைத்தேர்தலின்போது, தமிழ்நாட்டில் எனக்கு பிரசாரத்துக்குச் செல்லவே வாய்ப்பு மறுக்கப்பட்டது. அரவக்குறிச்சியில் போட்டியிட்ட என் நண்பர் செந்தில் பாலாஜியும், தஞ்சாவூரில் போட்டியிட்ட ரங்கசாமியும், ‘அண்ணே... நீங்க எப்போ பிரசாரத்துக்கு வர்றீங்க?’ என்று என்னிடம் கேட்டுக்கொண்டே இருந்தார்கள். ஆனால், புதுச்சேரி இடைத்தேர்தலில் பிரசாரம் செய்யுமாறு எனக்குக் கட்சி உத்தரவிட்டது. அன்றைக்குப் பொறுப்பிலிருந்த பன்னீரிடம், ‘என்னைத் தமிழ்நாட்டு பிரசாரத்துக்குப் போகவிடாமல், புதுச்சேரிக்கு ஏன் போகச் சொல்கிறீர்கள்?’ என்று நேரடியாகவே கேட்டேன். ஆனால், அன்றைக்கு அவர் எனக்கு அளித்த பதில் திருப்தியாக இல்லை. இப்படிப் பல நிகழ்வுகள் எனக்கெதிராக நடந்துவருவதை அறிந்துதான் நானே கட்சியிலிருந்து ஒதுங்கிவிட்டேன்.’’

எடப்பாடி, பன்னீர், சசிகலா தனித்தன்மையை இழந்துவிட்டார்கள்!

“இன்றைய சூழலில், ‘இரட்டைத் தலைமை - சசிகலா’ ஆகிய இரண்டு தரப்புகளில், அ.தி.மு.க தலைமைப் பொறுப்பை யார் ஏற்றுக்கொள்ள வேண்டும் என்று நினைக்கிறீர்கள்?’’

“வெளிப்படையாகச் சொல்வதென்றால், இன்றைக்கு அ.தி.மு.க-வின் தலைமைப் பொறுப்பை ஏற்கும் தகுதியிலிருந்து இவர்கள் அனைவருமே விலகி வெகுதூரம் போய்விட்டார்கள். எடப்பாடி, பன்னீர், சசிகலா மூவருமே தங்கள் தனித்தன்மையை இழந்துவிட்டார்கள். அதனால்தான், தாங்களும் தனித்தன்மையை இழந்துவிடுவோமோ என்றெண்ணி அ.தி.மு.க-விலிருந்து தங்க தமிழ்ச்செல்வன், செந்தில் பாலாஜி, பழனியப்பன், கலைராஜன் எனப் பல முக்கிய நிர்வாகிகள் வெளியேறிவிட்டனர்.’’

“ `சசிகலா, அ.தி.மு.க தலைமைப் பொறுப்புக்கு வருவார்’ என்கிறார் கார்த்தி சிதம்பரம். ஆனால், ‘சசிகலாவால் அ.தி.மு.க-வைக் கைப்பற்றவே முடியாது’ என்கிறாரே பன்னீர்?’’

“இதெல்லாம் அவர்களுடைய சொந்த விளையாட்டு. அந்த விளையாட்டுக்குள்ளே நான் போக விரும்பவில்லை. 2016-ல் ஜெயலலிதா மறைவுக்குப் பிறகு கட்சி, ஆட்சி என சசிகலா அவசரம் காட்டியபோது, ‘இப்போது அவசரம் வேண்டாம்’ என்று வெளிப்படையாக என் கருத்தைத் தெரிவித்தேன். ஆனால், அன்று அவர் என் பேச்சைக் கேட்கவில்லை. நான்கு வருடங்கள் கழித்து அ.தி.மு.க தலைமைப் பதவிக்காக சசிகலா பொறுமையாக காத்திருக்க வேண்டிய நிலைதான் இப்போது ஏற்பட்டிருக்கிறது. அன்றைக்கு அவர் பொறுமையாக இருந்திருந்தால் கிங் மேக்கராகியிருக்க முடியும்.”

“ `தமிழ்நாட்டைப் பிரிக்க வேண்டும் என்று சொல்கிற நயினார் நாகேந்திரன், வானதி சீனிவாசன் ஆகியோர் இதே கோரிக்கையை முன்வைத்து தங்கள் பதவிகளை ராஜினாமா செய்துவிட்டு தேர்தலைச் சந்திப்பார்களா...’ என்று சவால் விடுத்திருக்கிறீர்களே?’’

“நான் அப்படியெல்லாம் சவால் விடுக்கவில்லை. பத்திரிகைகள்தான் அப்படி எழுதிவிட்டன. ‘கொங்கு நாடு எனத் தமிழ்நாட்டைப் பிரிப்போம் என்பதையும் வாக்குறுதியாகக் கொடுத்துவிட்டு தேர்தலைச் சந்தியுங்கள்’ என்றுதான் நான் சொல்லியிருக்கிறேன். அதுவும்கூட என் சொந்தக் கருத்து மட்டுமே.’’

“ஆனால், தமிழ்நாட்டை மூன்றாகப் பிரிக்க வேண்டும் என்று ஏற்கெனவே குரல் கொடுத்த பா.ம.க-வுக்கு எதிராக ஆனந்தராஜ் எதுவும் கூறவில்லையே?’’

“நிர்வாக வசதிக்காக ‘தமிழ்நாட்டை மூன்றாகப் பிரிக்க வேண்டும், இரண்டாகப் பிரிக்கவேண்டும்’ என்றெல்லாம் நீண்டகாலமாகவே பா.ம.க சொல்லிவருகிறது. அப்போதெல்லாம், ‘இந்த விஷ விளையாட்டே வேண்டாம்’ என முதல் எதிர்ப்பு குரலைப் பதிவு செய்தவன் நான். ‘தமிழ்நாட்டைப் பிரிப்பேன்’ எனப் பேசுவது ஒரு புழுவாக இருந்தாலும், அந்தப் புழுவை நசுக்கித்தள்ள வேண்டிய கடமை தமிழ்நாட்டு மக்களுக்கு இருக்கிறது. அதனால்தான் இந்த விஷயத்தில் இப்போது எதிர்ப்பு தெரிவிக்கும் அ.தி.மு.க எம்.எல்.ஏ கே.பி.முனுசாமியை ‘ஏன் பா.ம.க சொல்லும்போதே எதிர்ப்பு தெரிவிக்கவில்லை?’ என்று நானே கேள்வி கேட்டிருக்கிறேன்.’’

“ஒளிப்பதிவு திருத்த மசோதா எதிர்ப்பு விஷயத்திலும்கூட, ‘தமிழ் நடிகர்களுக்கு எதிரான கட்சி பா.ஜ.க’ என்பது போன்ற தோற்றத்தைச் சிலர் உருவாக்குவதாக தமிழக பா.ஜ.க தலைவர் அண்ணாமலை வருத்தப்படுகிறாரே..?’’

“நான் திரைப்படக் கல்லூரி மாணவன் என்கிற வகையில் சொல்கிறேன்... இந்த ஒளிப்பதிவு சட்டத் திருத்தம் என்பது, திரைப்படங்களுக்கு ஒரு சென்சார் போர்டைத் தாண்டி, அடுத்தகட்ட சென்சாரையும் நியமிக்கிறது. அதாவது, ஒரு திரைப்படத்தை மறுபரிசீலனை செய்யக்கூடிய அதிகாரம் அரசியல்வாதிகளின் கைகளுக்குப் போய்விடுகிறது. இப்படியெல்லாம் சட்டம் கொண்டுவந்தால் ‘பராசக்தி’, ‘தண்ணீர் தண்ணீர்’, ‘சிறை’, ‘முதல்வன்’ மாதிரியான படங்களெல்லாம் இனி வர வாய்ப்பே இல்லை. எனவே, ஒரு கலைஞனாக ‘சட்டத் திருத்தத்தை கொஞ்சம் மாற்றிக்கொள்ளுங்கள்’ என்று எனது கோரிக்கையை வைக்கிறேன்.’’