Published:Updated:

சசிகலா பற்றிய உண்மைகளைச் சொல்வது பன்னீரின் தனிப்பட்ட உரிமை!

கோவை செல்வராஜ்
பிரீமியம் ஸ்டோரி
கோவை செல்வராஜ்

முட்டுக்கொடுக்கும் கோவை செல்வராஜ்...

சசிகலா பற்றிய உண்மைகளைச் சொல்வது பன்னீரின் தனிப்பட்ட உரிமை!

முட்டுக்கொடுக்கும் கோவை செல்வராஜ்...

Published:Updated:
கோவை செல்வராஜ்
பிரீமியம் ஸ்டோரி
கோவை செல்வராஜ்
சசிகலாவின் அடுத்தகட்ட அரசியல் நகர்வு குறித்து எதிர்பார்ப்புகள் எகிறியிருக்கும் நிலையில் சசிகலா வருகை, எடப்பாடி - பன்னீர் மோதல்கள் குறித்த கேள்விகளுடன் அ.தி.மு.க-வின் செய்தித் தொடர்பாளர் கோவை செல்வராஜிடம் பேசினேன்...

‘‘சசிகலாவை வரவேற்றவர்களைக் கட்சியிலிருந்து நீக்கிய அ.தி.மு.க., சசிகலாவை வாழ்த்தி ட்வீட் பதிவிட்ட ஓ.பி.எஸ் மகன்மீது மட்டும் நடவடிக்கை எடுக்கவில்லையே..?’’

‘‘சசிகலாவை வரவேற்று முதல்வர், துணை முதல்வர், டி.டி.வி.தினகரன், சசிகலா ஆகியோரின் புகைப்படங்களுடன் ‘அ.தி.மு.க-வுக்குத் தலைமையேற்க வா... பொதுச்செயலாளராக வா...’ என்றெல்லாம் சிலர் சுவரொட்டி ஒட்டினார்கள். இது கட்சியிலும் தொண்டர்கள் மத்தியிலும் குழப்பங்களை ஏற்படுத்தியது. எனவேதான், அவர்கள்மீது நடவடிக்கை எடுக்கப்பட்டது. ஆனால், ஓ.பி.எஸ் மகன் மனிதநேய அடிப்படையில், ‘உடல்நலம் பெற்று சீராக வந்து செயல்படுங்கள்’ என்றுதான் பதிவிட்டிருந்தார். அதனால்தான் நடவடிக்கை எடுக்கப்படவில்லை.’’

‘‘எடப்பாடி பழனிசாமி, ‘அ.தி.மு.க-வில் சசிகலா இணைய 100 சதவிகிதம் வாய்ப்பில்லை’ என்று சொல்லியிருந்தாலும், பன்னீர்செல்வம் மட்டும் அமைதி காப்பது சந்தேகத்தை ஏற்படுத்துகிறதே?’’

‘‘ஓ.பி.எஸ்., தெளிந்த நீரோடை போன்ற சிந்தனைவாதி. அவசரப்பட்டுப் பேச மாட்டார். பேசுவதாக இருந்தால், தனது கருத்தை பகிரங்கமாக வெளிப்படுத்துவார். ‘கட்சியில் சசிகலா இணைய 100 சதவிகிதம் வாய்ப்பில்லை’ என்று எடப்பாடி பழனிசாமி கூறியதை, பன்னீர்செல்வமும் ஆமோதிக்கிறார். தவிர, ‘தனிப்பட்ட குடும்பத்துக்குப் பகடைக்காயாக அ.தி.மு.க இருக்காது. கடந்தகால தவறுகள் இனி நடக்காது’ என்று ஏற்கெனவே அவர் கூறியிருக்கிறார்.’’

‘‘ஆழ்ந்து சிந்திப்பதால்தான், தேர்தல் பிரசாரத்துக்குக்கூடச் செல்லாமல் காத்திருக்கிறாரா ஓ.பி.எஸ்?’’

‘‘சென்னையில் நடைபெற்ற தேர்தல் பிரசாரத்துக்கான முதல் பொதுக்கூட்டத்தில் இ.பி.எஸ் - ஓ.பி.எஸ் இருவருமே கலந்துகொண்டனர். ‘முதல்வர் வேட்பாளர்’ என்பதால், இ.பி.எஸ் தற்போது தமிழ்நாடு முழுக்கப் பிரசாரம் செல்கிறார். ஓ.பி.எஸ்., தேர்தல் வியூகங்களை வகுத்துக்கொடுக்கிறார். ‘இ.பி.எஸ் - ஓ.பி.எஸ் இருவரும் பிரிந்துவிட வேண்டும்’ என்று நிறைய பேர் எதிர்பார்க்கிறார்கள். அப்படி எதுவும் நடக்காது. இருவரிடையே எந்தக் கருத்து வேறுபாடும் இல்லை. விரைவில் இருவரும் சேர்ந்தே தேர்தல் பிரசாரம் செய்யவிருக்கிறார்கள்.’’

‘‘நீங்கள் இவ்வளவு சொன்னாலும், தன்னை மட்டுமே முன்னிறுத்தி விளம்பரம் செய்துகொள்வதில் முதல்வர், துணை முதல்வரிடையே நடைபெறும் போட்டி வெளிப்படையாகத் தெரிகிறதே?’’

‘‘கடந்த 10 ஆண்டுகளாக அ.தி.மு.க அரசு செய்துவந்த சாதனைகளைப் பட்டியலிட்டு விளம்பரம் செய்கிறார் முதல்வர். துணை முதல்வரும் ஜெயலலிதா தலைமையின்கீழ், தான் செய்துவந்த பணிகளை விளம்பரங்களாக வெளியிடுகிறார். இதில், தங்களை முன்னிலைப்படுத்தும் எந்தவித உள்நோக்கம் இருவரிடமும் கிடையாது.’’

சசிகலா பற்றிய உண்மைகளைச் சொல்வது பன்னீரின் தனிப்பட்ட உரிமை!

‘‘துணை முதல்வர் தனது சொந்தச் செலவில், தன்னை மட்டுமே முதன்மைப்படுத்தி விளம்பரம் செய்வதில் உள்நோக்கம் இல்லையென்று எப்படிச் சொல்கிறீர்கள்?’’

“அரசின் சாதனைகளைப் பற்றித் தனிப்பட்ட வகையில் அமைச்சர்களும் பத்திரிகைகளில் விளம்பரம் கொடுக்கிறார்கள். அதேபோல் துணை முதல்வரும் அவர் செய்த பணிகளை விளம்பரமாக வெளியிடுகிறார். முதலமைச்சரும்கூட இந்த விளம்பரங்களைப் பார்த்து மகிழத்தான் செய்கிறார்.’’

‘‘ஜெயலலிதா மரணத்தில் எந்தவித மர்மமும் இல்லை என்று பன்னீருக்குத் தெரிந்துவிட்டதா அல்லது மர்மத்தின் பின்னணியிலுள்ள உண்மை குறித்த பயத்தால் ஆணையம் முன் ஆஜராகாமல் தவிர்க்கிறாரா?’’

‘‘ஜெயலலிதா மரணத்தில், ‘குற்றத்தைச் செய்தவர்கள் யார் அல்லது குற்றச்சாட்டுக்கு உள்ளானவர்கள் யார்... தவறு நடந்திருக்கிறதா இல்லையா?’ என்பதையெல்லாம் கண்டுபிடிக்கத்தான் விசாரணை ஆணையமே அமைக்கப்பட்டது. இந்த விசாரணை ஆணையத்தை மீறி துணை முதல்வர் எதுவும் சொல்ல முடியாது. தற்போது இந்த விசாரணைக்கு அப்போலோ மருத்துவமனை தடை வாங்கியிருப்பதால், விசாரணை நடைபெறவில்லை. மீண்டும் விசாரணை ஆரம்பித்ததும் தன் தரப்பு பதிலை ஓ.பி.எஸ் சொல்வார்.’’

‘‘சசிகலா பற்றிய 90 சதவிகித உண்மைகளை உள்ளுக்குள்ளேயே வைத்திருப்பதாகச் சொல்கிற ஓ.பி.எஸ்., இப்போதுவரை அதில் ஒரு சதவிகிதத்தைக்கூட எடுத்துச் சொல்லாமல் இருப்பதன் மர்மம் என்ன?’’

‘‘இது ஓ.பி.எஸ்-ஸின் தனிப்பட்ட உரிமைப் பிரச்னை... சொந்தப் பிரச்னை. அவரது தனிப்பட்ட உரிமைப் பிரச்னையில் தலையிட்டு பதில் சொல்வதற்கு எனக்கு உரிமை கிடையாது.’’

‘‘எடப்பாடி பழனிசாமி முதல்வராகத் தேர்ந்தெடுக்கப்பட்டதில், சசிகலாவுக்குத் துளியளவும் பங்கு இல்லையா?’’

‘‘இந்திய நாடாளுமன்ற ஜனநாயகத்தின் அடிப்படையில் முதல்வரை மக்களால் தேர்ந்தெடுக்கப்பட்ட உறுப்பினர்கள்தான் தேர்ந்தெடுப்பார்கள். அந்தவகையில், அ.தி.மு.க-வின் 124 எம்.எல்.ஏ-க்களால் தேர்ந்தெடுக்கப்பட்ட முதல்வர்தான் எடப்பாடி பழனிசாமி. அன்றைய சூழலில், அ.தி.மு.க-வின் தற்காலிகப் பொதுச்செயலாளராக சசிகலா இருந்தார். எனவே, அவரும் கட்சிப் பணிகளை அன்றைக்கு உடனிருந்து செய்தார். அவ்வளவுதான்!’’

சசிகலா பற்றிய உண்மைகளைச் சொல்வது பன்னீரின் தனிப்பட்ட உரிமை!
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism